GÉNESIS 11
11
Babel shuti torreta ruranajushcamanda
1Cai pachapi causajcunaca, tucuicunami shujlla shimipi rimashpa causanajurca. 2Indi llujshimujman shamushpami, Sinar shuti llactapi tiyaj shuj jatun pambata tarishpa chaipi causai callarinajurca. 3Chaipimi, caishuj chaishuj cashna ninajurca: “Jacuchi, ladrillocunata rurashpa ninapi cusashunchi” ninajurcami. Paicunaca, rumipaj randica ladrillohuan, turupaj randica, asfaltohuanmi rurai callarirca. 4Chai jipaca, cashnami ninajurca: “Jacuchi, shuj pueblotapash, shuj torretapash rurashunchi. Chai torrepaj umapash, jahua pachaman chayajta rurashunchi. Chashna rurashpami, tucui cai pachapica, na caita chaita cachai tucushpa, tucuicuna rijsishca tucushunchij” ninajurcami.
5Shina cajpimi Mandaj Diosca, pueblota, torreta, gentecuna ruranajujta ricuj shamurca. 6Ricushpaca Mandaj Diosca, cashnami nirca: “Cai runacunaca shujllashnallami causanajun, shinallata shujlla shimipimi rimanajun. Paicuna chashna rurangapa callarishcataca, imapash na jarcai ushangachu. 7Shina cashcamanda cunanga, paicunapaj rimaita chaipillata pandachingapa rishunchi. Shina rurajpimi, paicunapura imata rimanajuritapash, na yachanga” nircami.
8Chashnami Mandaj Diosca, chaimandaca, cai pachapi, caiman chaiman cacharca. Chashna cachajpimi, pueblota ruranataca saquirca. 9Shinamandami, chai pambataca, Babel shutita shutichirca. Mandaj Diosca, chaipi causajcunapaj rimaita pandachishcamandami, chashna shutichirca. Chai pambamandami paicunataca, tucui cai pachapi causanajuchun caita chaita cacharca.
Sem shuti runapaj miraicunamanda
(1 Crón. 1:24-27)
10Sem shuti runapaj miraicunaca, caicunami: Sem shuti runaca, patsaj huatata charishpami, cai pachapi ninanda tamiashca ishcai huata jipaca, Arfaxad shuti churita charirca. 11Sem shuti runaca, Arfaxad shuti churita charishca jipapash, picha patsaj huatata causajushpami, shuj churicunata, ushicunata charircara.
12Arfaxad shuti runaca, quimsa chunga picha huatata charishpami, Sala shuti churita charirca. 13Arfaxad shuti runaca, Sala shuti churita charishca jipapash, chuscu patsaj quimsa huatata causajushpami, shuj churicunata, ushicunata charircara.
14Sala shuti runaca, quimsa chunga huatata charishpami, Heber shuti churita charirca. 15Sala shuti runaca, Heber shuti churita charishca jipapash, chuscu patsaj quimsa huatata causajushpami, shuj churicunata, ushicunata charircara.
16Heber runaca, quimsa chunga chuscu huatata charishpami, Peleg shuti churita charirca. 17Heber runaca, Peleg shuti churita charishca jipapash, chuscu patsaj quimsa chunga huatata causajushpami, shuj churicunata, ushicunata charircara.
18Peleg shuti runaca, quimsa chunga huatata charishpami, Reu shuti churita charirca. 19Peleg shuti runaca, Reu shuti churita charishca jipapash, ishcai patsaj iscun huatata causajushpami, shuj churicunata, ushicunata charircara.
20Reu shuti runaca, quimsa chunga ishcai huatata charishpami, Serug shuti churita charirca. 21Reu shuti runaca, Serug shuti churita charishca jipapash, ishcai patsaj canchis huatata causajushpami, shuj churicunata, ushicunata charircara.
22Serug shuti runaca, quimsa chunga huatata charishpami, Nacor shuti churita charirca. 23Serug shuti runaca, Nacorta charishca jipapash, ishcai patsaj huatata causajushpami, shuj churicunata, ushicunata charircara.
24Nacor shuti runaca, ishcai chunga iscun huatata charishpami, Taré shuti churita charirca. 25Nacor runaca, Taré shuti churita charishca jipapash, patsaj chunga iscun huatata causajushpami, shuj churicunata, ushicunata charircara.
26Taré shuti runaca, canchis chunga huatata charishpami, Abram, Nacor, Harán shuti churicunata charirca.
Taré shuti runapaj miraicunamanda
27Taré shuti runapaj miraicunaca, caicunami: Taré shuti runaca: Abram, Nacor, Harán shuti churicunatami charirca. Harán shuti runaca, Lot shuti churitami charirca.
28Harán shuti runaca, Taré shuti paipaj taitapash nara huañujpillatami, pai huacharishca llactapi, caldeocunapaj Ur shuti pueblopi huañurca.
29Abrambash, Nacorpashmi cazararca. Abrambaj huarmica, Sarai shutimi carca. Nacorpaj huarmica, Milca shutimi carca. Milca shuti huarmica, Harán shuti runapaj ushimi carca. Harán shuti runaca, Milca shuti, Isca shuti huarmicunapaj taitami carca. 30Ashtahuangarin Sarai huarmica, huahuata na chari ushajmi carca.
31Taré shuti runaca, paipaj churi Abramdapash, caishuj churi Harán shuti runapaj, churi Lot runatapash, Abrambaj huarmi paipaj jachun Saraitapash pushashpami llujshirca. Shina llujshishpami, caldeocuna causanajuj Ur pueblomandaca, Canaán llactaman rinajurca. Shina rinajushpami, Harán shuti puebloman chayashpaca, chaipi causangapa saquirinajurca. 32Taré shuti runaca, ishcai patsaj picha huatata causashpami, Harán shuti pueblopi huañurca.
Currently Selected:
GÉNESIS 11: QVI16
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.