GÉNESIS 10
10
Noé runapaj churicunapaj miraicunatami villajun
(1 Crón. 1:5-23)
1Noé runapaj churicunapaj miraicunaca cashnami mirarca. Noé runapaj churicunaca, Sem, Cam, Jafet shuticunami carca. Cai pachapi tamiashpa yacu jundashca jipami, paicunaca huahuacunata charirca.
2Jafet shuti runapaj churicunaca: Gomer, Magog, Madai, Javán, Tubal, Mesec, Tiras, shuticunami carca. 3Gomer shuti runapaj churicunaca: Askenaz, Rifat, Togarma, shuticunami carca. 4Javán shuti runapaj churicunaca: Elisa, Tarsis, Quitim, Dodanim, shuticunami carca. 5Jafet runapaj miraicunaca, mama cucha manñapi tiyaj alpacunapimi causai callarirca. Ayllucuna mirashpami, shuj rimaitapash callarichirca.
6Cam shuti runapaj churicunaca: Cus, Mizraim, Fut, Canaán shuticunami carca. 7Cus shuti runapaj churicunaca: Seba, Havila, Sabta, Raama, Sabteca shuticunami carca. Raama shuti runapaj churicunaca: Seba shuti, Dedán shutimi carca. 8Cus shuti runaca, Nimrod shuti churitami charirca. Nimrod shuti cai runami, cai pachapica ninan ushaita chari callarirca. 9Nimrod shuti runaca, Mandaj Diospaj ñaupajpica, sacha animalcunata japishpa huañuchinata alipacha yachaj, shinlli runami carca. Chaimandami: “Mandaj Diospaj ñaupajpi, sacha animalcunata huañuchinata alipacha yachaj, shinlli runataca: 'Nimrod runashnami cangui' nishpa” alicachinajun carca. 10Nimrod shuti runaca, Sinar llactapimi, Babel, Erec, Acad, Calne, shuti pueblocunata mandai callarirca. 11Chai llactamandaca, Asiria llactaman rishpami, Nínive, Rehobot, Cala, shuti pueblocunata shayachirca. 12Nínive shuti pueblohuan, Cala shuti pueblohuan chaupipipashmi, Resén shuti jatun pueblota shayachirca.
13Mizraim shuti runaca: Ludim, Anamim, Lehabim, Naftuhim, 14Patrusim, Casluhim, Caftorim, shuti churicunatami charirca. Casluhim shuti runamandami, filisteocunaca mirarca.
15Canaán shuti runaca, Sidón shuti punda churitami charirca. Paica, Het shuti churitapashmi charirca. 16Shinallata: Jebuseo, amorreo, gergeseo, 17heveo, araceo, sineo, 18arvadeo, zemareo, hamateo gentecunapashmi miranajurca. Chai jipami, cananeo gentecunaca, caipi chaipi causai callarinajurca. 19Cananeocunapaj llactaca, Sidón shuti pueblomanda callarishpa, Gerar shuti puebloman rinapi tiyajuj, Gaza shuti pueblocamanmi carca. Shinallata, Sodoma, Gomorra, Adma, Zeboim shuti pueblocunaman catishpaca, Lasa pueblocamanmi carca. 20Paicunami, Cam shuti runapaj miraicuna carca. Paicunaca, ayllupuralla tandanajushpa, paicunapaj rimaita rimashpami, paicunapaj alpacunapi, llactacunapi causanajurca.
21Jafet shuti runapaj punda huauqui Sem shuti runapashmi churicunata charirca. Sem shuti runaca, Heber shuti runamanda mirashca, tucui churicunapaj punda taitami carca. 22Sem shuti runapaj churicunaca: Elam, Asur, Arfaxad, Lud, Aram, shuticunami carca. 23Shinallata, Aram shuti runapaj churicunaca: Uz, Hul, Geter, Mas, shuticunami carca. 24Arfaxad shuti runaca, Sala shuti churitami charirca. Sala shuti runaca, Heber shuti churitami charirca. 25Heber runaca, Peleg shuti, Joctán shuti ishcai churicunatami charirca. Peleg shuti runa causajui punllacunapimi, alpacunata chaupirishpa causai callarirca. Chaimandami paitaca, Peleg shutita shutichirca. 26Joctán shuti runaca: Almodad, Selef, Hazar-mavet, Jera, 27Adoram, Uzal, Dicla, 28Obal, Abimael, Seba, 29Ofir, Havila, Jobab, shuti churicunatami charirca. Paicunaca, tucuillami Joctanbaj churicunalla carca. 30Paicuna causanajushca llactaca, Sefar shuti llactaman rina ñambi tiyaj, Mesa shuti llactamanda callarishpa, indi llujshimuj urcucamanmi carca. 31Paicunami, Sem shuti runapaj miraicuna carca. Paicunaca, paicunapaj ayllucuna imashna cashcashnami, paicunapaj alpacunapi, paicunapaj llactacunapi, paicunapaj rimaipi rimashpa causanajurca.
32Paicunami, Noé runapaj churicunapaj mirai ayllucuna carca. Paicunaca, cai pachapi ninanda tamiashca jipa, paicunapaj llactacunapi causanajushpa mirashpami, caiman chaiman rishpa, shuj llactacunata callarichishpa catirca.
Currently Selected:
GÉNESIS 10: QVI16
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.