ଲୁକ 22
22
ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍
(ମାଥି. ୨୬:୧-୫; ମାର୍କ. ୧୪:୧-୨; ଯୋହନ. ୧୧:୪୫-୫୩)
1ନିସ୍ତାର୍ ପାର୍ବୁ ଆରେ ସଡ଼ା ମେହଆୱିତି ରୁଟି ପାର୍ବୁ ଲାଗେ ଆଜି ୱାଜି ମାଚାତ୍। 2ହେପାଦ୍ନା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପଣ୍ଡିତାର୍ ମାନାୟାର୍ ପୁନ୍ୱିଲେକେ କିଜି ଯୀଶୁଙ୍ଗ୍ ଆସ୍ତି ମାର୍ନେ ଅସ୍ତେଙ୍ଗ୍ ଉପାୟ୍ ଡେକ୍ଚି ମାଚାର୍। ମାତର୍ ହେୱାର୍ ଇଞ୍ଜିମାଚାର୍, “ଆସେଙ୍ଗ୍ ପାର୍ବୁ ତିନିହିଙ୍ଗ୍ ଇୱାନିଙ୍ଗ୍ ଆହୁସ୍, ଇନେସ୍କି ହେବେ ମାନାୟାର୍ ମାଙ୍ଗେଙ୍ଗ୍ ଗଣ୍ଡ୍ଗଲ୍ କିଦ୍ନାର୍।”
ଇଷ୍କାରିତିୟ ଯିହୁଦା ଯୀଶୁଙ୍ଗ୍ ଶାତ୍ରୁର୍ କେଇଦ ଆହିକିଦେଙ୍ଗ୍ ଉପାୟ୍ କିତାନ୍
(ମାଥି. ୨୬:୧୪-୧୬; ମାର୍କ. ୧୪:୧୦-୧୧)
3ହେପାଦ୍ନା ଯୀଶୁ ବାଚିକିତି ବାରଜାଣ୍ ଚେଲାହିର୍ ବିତ୍ରେତାଙ୍ଗ୍ ଇଷ୍କାରିତିୟ ଯିହୁଦା ତର୍ଦାକାନ୍ ତାକେ ଶୟତାନ ହଟାତ୍। 4ଆରେ ଇଷ୍କାରିତିୟ ଯିହୁଦା ହାଲ୍ଜି, ଇନା ଉପାୟ୍ ତାକେ ଯୀଶୁଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ କେଇଦ ଆହିକିଦେଙ୍ଗ୍ ଆଡ୍ନାନ୍, ହେଦାଙ୍ଗ୍ ହେୱାର୍ ହୁଦାଙ୍ଗ୍ ବେଣ୍ବାଟ୍ କିତାନ୍।
5ହେବେତାଙ୍ଗ୍ ହେୱାର୍ ୱାରିୟା ଆତାର୍ ଆରେ ଇଷ୍କାରିତିୟ ଯିହୁଦାଙ୍ଗ୍ ଡାବୁଙ୍ଗ୍ ହିଦେଙ୍ଗ୍ ବେଣ୍କିବାଆତାର୍। 6ଆରେ ଇଷ୍କାରିତିୟ ଯିହୁଦା ରାଜି ଆଜି ମାନାୟ୍ ହୁଡ଼୍ୱାଦାଙ୍ଗ୍ ଯୀଶୁଙ୍ଗ୍ ହେୱାନ୍ ଶାତ୍ରୁ କେଇଦ ଆହିକିଦେଙ୍ଗ୍ ହେୱାନ୍ ଉପାୟ୍ ଦାସ୍ତେଙ୍ଗ୍ ଲାଗାତାନ୍।
ଯୀଶୁ ଚେଲାହିର୍ ହୁଦାଙ୍ଗ୍ ନିସ୍ତାର୍ ପାର୍ବୁଚିଞ୍ଜେଙ୍ଗ୍ ହାରିହାରା ବଜି କିତାର୍
(ମାଥି. ୨୬:୧୭-୨୫; ମାର୍କ. ୧୪:୧୨-୨୧; ଯୋହନ. ୧୩:୨୧-୩୦)
7ରିଦିନ୍ ପାଚେ ସଡ଼ା ମେହାଆୱିତି ରୁଟି ପାର୍ବୁତ ପାର୍ତୁମ୍ ନାଞ୍ଜିଙ୍ଗ୍, ଇନାୱେଡ଼ାଙ୍ଗ୍ ମେଣ୍ଢା ପୁଜାକିଜି ନିସ୍ତାର୍ ପାର୍ବୁ ତିନାର୍, ହେନାଞ୍ଜ୍ ଏକିୱାତାତ୍। 8ଆରେ ଯୀଶୁ ପିତର ଆରେ ଯୋହନତିଙ୍ଗ୍ ଇଦାଙ୍ଗ୍ ୱେଚ୍ଚି ପକ୍ତାନ୍, “ଆସେଙ୍ଗ୍ ଇନେସ୍ କିଜି ଚିଞ୍ଜେଙ୍ଗ୍ ଆଡ୍ନାସ୍, ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ହାଲ୍ଜି ମା କାଜିଙ୍ଗ୍ ନିସ୍ତାର୍ ପାର୍ବୁ ମାନି କିଦେଙ୍ଗ୍ ଭଜିରହାଟ୍।” 9ହେବେତାଙ୍ଗ୍ ହେୱାର୍ ଯୀଶୁଙ୍ଗ୍ ୱେନ୍ବାତାର୍, “ନିସ୍ତାର୍ ପାର୍ବୁ ମାନି କିଦେଙ୍ଗ୍ ଆସେଙ୍ଗ୍ ଇମେତାକେ ବଜି ତିନାସ୍ ଇଞ୍ଜି ମାନ୍ କିନାୟା?”
10ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ହୁଡ଼ାଟ୍, ଏପେଙ୍ଗ୍ ଯିରୁଶାଲାମ ସହର୍ତାକେ ହାଲାଟ୍। ଏପେଙ୍ଗ୍ ରକାନ୍ ଟାଙ୍ଗାତ ଏଜୁଙ୍ଗ୍ ନିପିତ ପିଣ୍ଜି ହାନାକାନିଙ୍ଗ୍ ଏପେଙ୍ଗ୍ ହୁଡ଼୍ନାଦେର୍। ହେ ଏଜୁଙ୍ଗ୍ ଆସ୍ତି ମାନାୟ୍ ଇମ୍ଣି ଇଞ୍ଜ ହଣାନ୍, ଏପେଙ୍ଗ୍ ତାପାଚେ-ପାଚେ ହାଲ୍ଜି ହେ ଇଞ୍ଜ ହାଲାଟ୍। ଆରେ ହେଇଞ୍ଜି ମାଲିକ୍ତିଙ୍ଗ୍ ୱେନ୍ବାଟ୍, 11‘ଗୁରୁ ନିଙ୍ଗେଙ୍ଗ୍ ୱେନ୍ବାଆଦ୍ନାନା, ଆନେଙ୍ଗ୍ ନା ଚେଲାର୍ ହୁଦାଙ୍ଗ୍ ଇମ୍ଣି ବାକ୍ରାତ ନିସ୍ତାର୍ ପାର୍ବୁନି ବଜି ତିନାପ୍।’
12ହେ ଇଲ୍ ମାଲିକ୍ ସପାସୁତ୍ରା ଜପ୍ଣି ପାଉଜ୍ତ ହାର୍ଦି ବାକ୍ରା ଚଚ୍ଚାନାନ୍। ହେ ବାହାତାକେ ଏପେଙ୍ଗ୍ ମା କାଜିଙ୍ଗ୍ ନିସ୍ତାର୍ ପାର୍ବୁନି ଭଜିରହାଟ୍।” 13ଆରେ ହେୱାର୍ ହାଲ୍ଜି, ଯୀଶୁ ହେୱାରିଙ୍ଗ୍ ଇନେସ୍ ଲେକେ ୱେଚିମାଚାନ୍, ହେଲେକେ ଆତାର୍ ଆରେ ହେୱାର୍ ନିସ୍ତାର୍ ପାର୍ବୁନି ବଜି ରସ୍ତାର୍।
ପ୍ରବୁବଜ୍ ବିଦି ରସ୍ତାନ୍
(ମାଥି. ୨୬:୨୬-୩୦; ମାର୍କ. ୧୪:୨୨-୨୬; ୧ କରି. ୧୧:୨୩-୨୫)
14ଆରେ ଅଲପ୍ ହାଚି ପାଚେ, ଯୀଶୁ ଆରେ ତା ବାଚିକିତି ଚେଲାହିର୍ ହୁଦାଙ୍ଗ୍ ଚିଞ୍ଜେଙ୍ଗ୍ କୁଚ୍ଚାର୍। 15ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ହାଃୱିଆଗେ ମିହୁଦାଙ୍ଗ୍ ରବେ ଇ ନିସ୍ତାର୍ ପାର୍ବୁନି ବଜି ଚିଞ୍ଜେଙ୍ଗ୍ ରକାଙ୍ଗ୍ ଇଚାକିଜି ମାଚାଙ୍ଗ୍। 16ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ୱାନିଯୁଗ୍ତ ଈଶ୍ୱର ସାସନ୍ କିନି ରାଜି ୱାୱି ପାତେକ୍ ଆନେଙ୍ଗ୍ ଇନାୱେଡ଼ାଙ୍ଗ୍ ପା ନିସ୍ତାର୍ ପାର୍ବୁନି ବଜି ତିନୁଙ୍ଗ୍।”
17ତାପାଚେ ଯୀଶୁ ର ଗିନାତାକେ ଅଙ୍ଗୁର୍ ରାସ୍ ଅତାନ୍। ଇଦାଙ୍ଗ୍ କାଜିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍। ଆରେ ୱେଚ୍ଚାନ୍, “ଇ ଗିନା ଅୱାଟ୍, ଇବେ ମାନି ଅଙ୍ଗୁର୍ ରାସ୍ ୱିଜାକାରିଙ୍ଗ୍ ହିୟାଟ୍।” 18ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଆନେଙ୍ଗ୍ ଈଶ୍ୱର ସାସନ୍ କିନି ରାଜି ୱାୱି ପାତେକ୍ ଆନେଙ୍ଗ୍ ଇନାୱେଡ଼ାଙ୍ଗ୍ ପା ଇ ଅଙ୍ଗୁର୍ ରାସ୍ ଉଣୁଙ୍ଗ୍।”
19ହେୱାର୍ ତିନିହିଙ୍ଗ୍ ଯୀଶୁ ରୁଟିଙ୍ଗ୍ ଆସ୍ତି ଈଶ୍ୱରତିଙ୍ଗ୍ ଦନ୍ଯବାଦ୍ କିତାନ୍ ଆରେ ରୁଟି ଡ୍ରିକ୍ଚି ଚେଲାହିରିଙ୍ଗ୍ ହିଜି ୱେଚ୍ଚାନ୍, “ଅୱାଟ୍, ଆରେ ତିନାଟ୍ ଇଦାଙ୍ଗ୍ ନା ଗାଗାଡ଼୍।” 20ତିନ୍ଞ୍ଜି ୱିସ୍ତି ପାଚେ ହେଲେକେ ଯୀଶୁ ଅଙ୍ଗୁର୍ ରାସ୍ ମାନିଗିଲାସ୍ ଆସ୍ତି ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ଚେଲାରିଙ୍ଗ୍ ହିଜି ୱେଚ୍ଚାନ୍, “ମି କାଜିଙ୍ଗ୍ ଅଙ୍ଗୁର୍ ରାସ୍ ନା ନେତେର୍ତାଙ୍ଗ୍ ରସ୍ତି ପୁନି ନିୟମ୍ ଆନାତ୍।”
21ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ମି ବିତ୍ରେତାଙ୍ଗ୍ ରକାନ୍ ନାଙ୍ଗେଙ୍ଗ୍ ଶାତ୍ରୁ କେଇଦ ଆହିକିଦ୍ନାନ୍। ଆରେ ହେୱାନ୍ ପା ମା ବିତ୍ରେ ମାନାନ୍। 22ଈଶ୍ୱର ଇନେସ୍କିଜି ହିତାନ୍ନା, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ପା ହେଲେକେ ହାଃନାନ୍। ମାତର୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତିଙ୍ଗ୍ ଇମ୍ଣାକାନ୍ ଶାତ୍ରୁ କେଇଦ ଆହିକିଦ୍ନାନ୍, ତା କାଜିଙ୍ଗ୍ ଇଦାଙ୍ଗ୍ ବେସି କରାପ୍ ଆନାତ୍।” 23ତାପାଚେ ପକିୟାଆତି ଚେଲାହିର୍ ୱେନ୍ବା-ୱେନ୍ବି ଆତାର୍, “ମା ବିତ୍ରେତାଙ୍ଗ୍ ଇନେର୍ ଯୀଶୁଙ୍ଗ୍ ଇଲେକେ ଶାତ୍ରୁ କେଇଦ ଆହିକିନାନ୍?”
ର ହେବାକିନାକାନ୍ ଆଡ
24ଚେଲାହିର୍ ବିତ୍ରେତାଙ୍ଗ୍ ଇନେର୍ ଗାଜାକାନ୍ ଇଞ୍ଜି ଜାର୍-ଜାର୍ବିତ୍ରେ ୱେଚ୍ପା ଆଦେଙ୍ଗ୍ ଲାଗାତାର୍। 25ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇ ଜଗତ୍ତାକେ ରାଜାର୍ ତା ମାନାୟାର୍ ଜପି ସାସନ୍ କିନାର୍। ଇମ୍ଣି ମାନାୟାର୍ ଜେକନି ମାନାୟ୍ କାଜିଙ୍ଗ୍ ସାସନ୍ କିନି ଆଦିକାର୍ ମାନ୍ଗାନାତ୍, ଜେକନିକାର୍ କାଜିଙ୍ଗ୍ ଉପ୍କାର୍ କିଦ୍ନାଙ୍ଗ୍ ଇଞ୍ଜି ଚଚିୟା ଆନାର୍।”
26ମାତର୍ ଏପେଙ୍ଗ୍ ହେୱାର୍ ଲେକେ ଆମାଟ୍, “ମି ବିତ୍ରେ ଇନେର୍ ଯଦି ଗାଜାକାନ୍ ହେୱାନ୍ ୱିଜୁତାଙ୍ଗ୍ ହିରୁକାନ୍ ଆନି ଦର୍କାର୍। ଆରେ ଇନେର୍ ସାସନ୍ କିଦେଙ୍ଗ୍ ଇଚାକିନାନ୍ ହେୱାନ୍ ହେବାକିନାକାନ୍ ଆୟେନ୍।” 27ଇମ୍ଣାକାନ୍ ଟେବୁଲ୍ତ ଚିଞ୍ଜେଙ୍ଗ୍ କୁଚ୍ଚାକାନ୍ ଗାଜାକାନ୍ କି। ଇନେର୍ ହେୱାନିଙ୍ଗ୍ ବାଟାକିଜି ହିନି ମାନାୟ୍? ଏପେଙ୍ଗ୍ ବାବି କିନାଦେର୍ ଯେ ଚିଞ୍ଜେଙ୍ଗ୍ କୁଚ୍ଚି ମାନାୟ୍ ଆଦିକ୍ ଗାଜାକାନ୍। ମାତର୍ ମି ବିତ୍ରେ ଆନେଙ୍ଗ୍ ରକାଙ୍ଗ୍ ହେବାକିନାକାନ୍ ଲେକେ ମାନାଙ୍ଗା।
28“ମାତର୍ ଏପେଙ୍ଗ୍ ନା ଦୁଃକ୍ କଷ୍ଟ ୱେଡ଼ାଙ୍ଗ୍ ପା ନା ହୁଦାଙ୍ଗ୍ ମାନାଦେରା। 29ନା ଆବା ଈଶ୍ୱର ନାଙ୍ଗେଙ୍ଗ୍ ର ରାଜି ହିତ୍ତାନ୍ନା। ନା ହୁଦାଙ୍ଗ୍ ଏପେଙ୍ଗ୍ ପା ତା ଜପି ଶାସ୍ କିଦେଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଆଦିକାର୍ ହିଦ୍ନାଙ୍ଗା। 30ଇନେସ୍ ଲେକେ ଏପେଙ୍ଗ୍ ନା ରାଜିତାକେ ନା ହୁଦାଙ୍ଗ୍ ଟେବୁଲ୍ ଜପି ତିନାଦେରା, ଆରେ ଏପେଙ୍ଗ୍ ସିଂହାସନ୍ ଜପି କୁକ୍ଚି ଇସ୍ରାଏଲନି ବାରଗଟା କୁଟମ୍ନି ମାନାୟାରିଙ୍ଗ୍ ସାସନ୍ କିନାଦେର୍।
ମି ପାର୍ତି ଆରାଇ କିମାଟ୍
(ମାଥି. ୨୬:୩୧-୩୫; ମାର୍କ. ୧୪:୨୭-୩୧; ଯୋହନ. ୧୧:୩୬-୩୮)
31ଶିମୋନ, ଶିମୋନ, ‘ହୁଡ଼ା ନିଙ୍ଗେଙ୍ଗ୍ ଶୟତାନ୍ ୱିଜାକାରିଙ୍ଗ୍ ପରିକ୍ଷା କିଦ୍ଦେଙ୍ଗ୍ ମାପୃ ତାକେଣ୍ଡାଙ୍ଗ୍ ଆଦେସ୍ ଏନ୍ତାତ୍ନା, ହାର୍ଦି ମାନାୟ୍ତାଙ୍ଗ୍ ବାନ୍ୟା ମାନାୟ୍ତିଙ୍ଗ୍ ଜେକ କିଦେଙ୍ଗ୍, ଇନେସ୍କି ଚାଷି ଗହମ୍ତାଙ୍ଗ୍ ପଲଙ୍ଗ୍ ଅଲ୍ଗା କିତିଲେକେ।’ 32ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଜି ମାଞ୍ଜାଟ୍, ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମି କାଜିଙ୍ଗ୍ ପାର୍ତାନା କିନାଙ୍ଗା, ଏପେଙ୍ଗ୍ ୱିଜୁ ପାପ୍ କାମାୟ୍ ପିସ୍ତି ମାପୃତାକେ ୱାତି ପାଚେ ମି ଟଣ୍ଡାରିଙ୍ଗ୍ ନା ଜପି ପାର୍ତି କିଦେଙ୍ଗ୍ ୱେଚାଟ୍।”
33ପିତର ଯୀଶୁଙ୍ଗ୍ ୱେଚ୍ଚାନ୍, “ହେ ମାପୃ, ଆନେଙ୍ଗ୍ ନି ହୁଦାଙ୍ଗ୍ ଜଇଲ୍ତାକେ ହାଞ୍ଜେଙ୍ଗ୍ ରେଡି ମାନାଙ୍ଗ୍। ଇଲେକେ ଆନେଙ୍ଗ୍ ନି କାଜିଙ୍ଗ୍ ହାଃଦେଙ୍ଗ୍ ପା ରେଡି ମାନାଙ୍ଗ୍।” 34ଯୀଶୁ ୱେଚ୍ଚାନ୍, “ହେ ପିତର, ୱିଗାଲିଙ୍ଗ୍ ନାଣାଙ୍ଗେ କୁଜୁ କେୱି ଆଗେ ଏନେଙ୍ଗ୍ ୱେଚ୍ନାଇ ଯେ, ଏନେଙ୍ଗ୍ ନାଙ୍ଗେଙ୍ଗ୍ ପୁନୁଙ୍ଗ୍ ଇଞ୍ଜି ତିନ୍ହଟ୍ ୱେଚ୍ନାୟ୍।”
ଅସୁବିଦା କାଜିଙ୍ଗ୍ ପାର୍ତାନା କିଜି ଜାଗ୍ରତ୍ ମାନାଟ୍
35ତାପାଚେ ଯୀଶୁ ପକ୍ଚିମାଚି ଚେଲାହିରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମାନାୟାର୍ ଲାଗାୟ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ମିଙ୍ଗେଙ୍ଗ୍ ପକ୍ଚି ମାନ୍ଞ୍ଚାଙ୍ଗ୍। ଆନେଙ୍ଗ୍ ମିଙ୍ଗେଙ୍ଗ୍ ଡାବୁଙ୍ଗ୍, ମଣା, ଆରେ ପାଣ୍ଡାୟ୍ ପିସ୍ତି ଇନାକାପା ଅୱେଦେଙ୍ଗ୍ ପକ୍ଚି ମାନ୍ଞ୍ଚାଙ୍ଗ୍। ମିଙ୍ଗେଙ୍ଗ୍ ଇନା ଅସୁବିଦା ଆତାତ୍ କି?” ପକିଆତି ଚେଲାହିର୍ ୱେଚ୍ଚାର୍, “ଆକାୟ୍।” 36ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନଙ୍ଗୟ୍ ଯଦି ଡାବୁଙ୍ଗ୍ କି ମଣା ମାନ୍ଗାନାତ୍, ଲାଗିଙ୍ଗ୍ ହେଦାଙ୍ଗ୍ ହେୱାନ୍ ଅୱେନ୍। ଯଦି ମିଙ୍ଗେଙ୍ଗ୍ କାଣ୍ଡା ପା ରଞ୍ଜାଙ୍ଗ୍ ହିଲ୍ୱିତିସ୍ ଲାଗିଙ୍ଗ୍ ଏପେଙ୍ଗ୍ ଜାର୍ ଜପି ଉସ୍ପିନି କଟ୍ ପା ପସି କାଣ୍ଡା କଡ଼ାଟ୍।
37ସାସ୍ତର୍ତାକେ ଭବିଷ୍ଯତବକ୍ତାର୍ ୱେଚ୍ଚାର୍, ‘ମାନାୟାର୍ ହେୱାନିଙ୍ଗ୍ ରକାନ୍ ଦସି ମାନାୟ୍ ଇଞ୍ଜି ୱେଚ୍ନାର୍। ଇ ସାସ୍ତର୍ନି ବେଣ୍ ହାତ୍ପା ଗଟାଆନାତ୍, ଇଦାଙ୍ଗ୍ ନା ବିଷୟରେ ଲେକାମାଚାତ୍, ଆରେ ଇଦାଙ୍ଗ୍ ନଙ୍ଗୟ୍ ପୁରା ଆନାତା।’ ” 38ହେବେତାଙ୍ଗ୍ ଚେଲାହିର୍ ୱେଚ୍ଚାର୍, ହୁଡ଼ା ମାପୃ ଇବେ ରିଣ୍ଡାଙ୍ଗ୍ କାଣ୍ଡା ମାନିକ୍, ଯୀଶୁ ୱେଚ୍ଚାନ୍, “ରିଣ୍ଡାଙ୍ଗ୍ କାଣ୍ଡାଙ୍ଗ୍ ସାରି।”
ଜିତ୍ମାର୍ ମାନି ମାଡ଼ିତାକେ ଯୀଶୁ ପାର୍ତାନା କିତାନ୍
(ମାଥି. ୨୬:୩୬-୪୬; ମାର୍କ. ୧୪:୩୨-୪୨)
39ଯୀଶୁ ଯିରୁଶାଲାମ ସହର୍ ପିସ୍ତି ୱିଜୁଦିନ୍ ହାଚି ଲେକେ ଜିତ୍ମାର୍ ମାନି ମାଡ଼ିତାକେ ପାର୍ତାନା କିଦେଙ୍ଗ୍ ହାଚାନ୍। ଆରେ ତା ଚେଲାହିର୍ ପା ତାପାଚେ ପାଚେ ହାଚାର୍। 40ହେ ବାହାତାକେ ଏକିସ୍ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଦୁଃକ୍ ଇନେସ୍ ପରିକ୍ଷାତାକେ ପଡ଼ାଆଉଦେର୍, ଇଦାଙ୍ଗ୍ କାଜିଙ୍ଗ୍ ଈଶ୍ୱରତାକେ ପାର୍ତାନା କିୟାଟ୍।”
41ତାପାଚେ ଯୀଶୁ ଚେଲାହିରିତାଙ୍ଗ୍ ଶହେ ହାତ୍ ଦେହା ହାଚାନ୍, ଆରେ ହେୱାନ୍ ମେଣ୍ଡାକୁନ୍ଦିକିଜି ପାର୍ତାନା କିତାନ୍, 42“ଏ ଆବା ନାଙ୍ଗେଙ୍ଗ୍ ଇ ଦୁଃକ୍କଷ୍ଟତାଙ୍ଗ୍ ଦେହାକିଦା, ନି କେଇଦ ୱିଜୁଆନାତ୍ ନା ଇଚା ଆକାୟ୍ ମାତର୍ ନି ଇଚାଆଏତ୍।”
43ତାପାଚେ ସରଗ୍ତାଙ୍ଗ୍ ର ଦୁତ୍ ୱାଜି ଚଞ୍ଜିଆତାନ୍। ହେ ଦୁତ୍ତିଙ୍ଗ୍ ଯୀଶୁଙ୍ଗ୍ ସାଇଜ କିଦେଙ୍ଗ୍ ପକ୍ଚି ମାଚାର୍। 44ଯୀଶୁ ବେସି ଦୁଃକ୍ତାକେ ମାନ୍ଞ୍ଜି ପା ଆରେ ବେଗି-ବେଗି ପାର୍ତାନା କିଦେଙ୍ଗ୍ ଲାଗାତାନ୍। ତା ମୁମ୍ଦାଙ୍ଗ୍ ରୁମି, ନେତେର୍ ଟୁପା ଲେକେ ହସି ନେଲା ଆର୍ତାତ୍।
45ଯୀଶୁ ପାର୍ତାନା କିଜି ୱିସ୍ତି ପାଚେ ଚେଲାହିର୍ତାକେ ହାଚାନ୍। ଆରେ ତା ଚେଲାହିର୍ ୱିଜାର୍ ହୁନ୍ଞ୍ଜି ମାଚାର୍, ହେୱାର୍ ଦୁଃକ୍ତାଙ୍ଗ୍ ହୁନ୍ଞ୍ଜି ମାଚାକା ହୁଡ଼୍ତାନ୍। 46ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଇନା କିଦେଙ୍ଗ୍ ହୁଞ୍ଜ୍ନାଦେରା? ପରିକ୍ଷା ଇନେସ୍ ପାୟା ଆଉଦେର୍, ଇଦାଙ୍ଗ୍ କାଜିଙ୍ଗ୍ ନିଙ୍ଗ୍ଞ୍ଜି ଈଶ୍ୱରତାକେ ପାର୍ତାନା କିୟାଟ୍।”
ଯୀଶୁ ଶାତ୍ରୁ କେଇଦ ଆହିଆତାନ୍
(ମାଥି. ୨୬:୪୭-୫୬; ମାର୍କ. ୧୪:୪୩-୫୦; ଯୋହନ. ୧୮:୩-୧୨)
47ଏଚେପାଦ୍ନା ଯୀଶୁ ଇ ୱିଜୁବେଣ୍ ୱେଚ୍ନିହିଙ୍ଗ୍, ର ଦଳ୍ ମାନାୟ୍ ହେବେ ୱାତାର୍। ବାରଜାଣ୍ ଚେଲାହିର୍ ବିତ୍ରେତାଙ୍ଗ୍ ରକାନ୍ ଇଷ୍କାରିତିୟ ଯିହୁଦା ତର୍ଦାକାନ୍ ହେ ଦଳ୍ତିଙ୍ଗ୍ ଆସ୍ତି ୱାଜିମାଚାନ୍। ଯୀଶୁଙ୍ଗ୍ ଚୁମା ହିଦେଙ୍ଗ୍ ଯୀଶୁ ଲାଗାୟ୍ ୱାତାନ୍। 48ମାତର୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏ ଇଷ୍କାରିତିୟ ଯିହୁଦା, ନାଙ୍ଗେଙ୍ଗ୍ ଚୁମା ହିଜି ଇନାକା ସରଗ୍ତାଙ୍ଗ୍ ୱାଜିମାଚି ମାନାୟ୍ତିଙ୍ଗ୍ ଶାତ୍ରୁ କେଇଦ ଆହିକିଦ୍ନାୟା?”
49ଯୀଶୁ ଚେଲାହିର୍ ପା ହେବେ ନିଲ୍ଚି ମାଚାର୍। ଇନାକା ଗଟାଆଜି ମାଚାତ୍ ହେ ୱିଜୁ ହୁଡ଼୍ଜି ମାଚାର୍, ହେ ଦଶ୍ଜାଣ୍ ଚେଲାହିର୍ ୱେଚ୍ଚାର୍, “ମାପୃ, ଆପେଙ୍ଗ୍ ଇନାକା ମା କାଣ୍ଡା ହପ୍ନାପ୍?” 50ଆରେ ହେୱାର୍ ବିତ୍ରେତାଙ୍ଗ୍ ରକାନ୍ ଚେଲାହି କାଣ୍ଡା ହପ୍ଚି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ତା ହଲିଆହିଙ୍ଗ୍ ତିନାବାଗାୟ୍ନି କିତୁଲ୍ ହଣ୍ତାନ୍। 51ମାତର୍ ଯୀଶୁ ୱେଚ୍ଚାନ୍, “ବନ୍ଦ୍ କିୟା!” ତାପାଚେ ଯୀଶୁ ହେ ହଲିଆହିନି କିତୁଲ୍ତ ଆସ୍ପିସ୍ ହାର୍କିତାନ୍।
52ତାପାଚେ ଯୀଶୁଙ୍ଗ୍ ଆସ୍ତେଙ୍ଗ୍ ୱାଜିମାଚି ହେଦଳ୍ତ ଈଶ୍ୱର ହେବାକିନି ମୁଡ଼୍ଦି ପୁଜାରିର୍, ମନ୍ଦିର୍ନି, ଯିହୁଦିର୍ ନେତାର୍ ଆରେ ଯିହୁଦିର୍ ସେନାର୍ ମାଚାର୍। ଯୀଶୁ ପ୍ରାଚିନାରିଙ୍ଗ୍ ୱେଚ୍ଚାନ୍, “ଡାକୁର୍ ବିରଦ୍ତାକେ ହାନିଲେକେ ଆଜି କାଣ୍ଡାଙ୍ଗ୍ ଆରେ କଣାଙ୍ଗ୍ ଆସ୍ତି ଏପେଙ୍ଗ୍ ଇନା କିଦେଙ୍ଗ୍ ନାଙ୍ଗେଙ୍ଗ୍ ଆସ୍ତି ଗାଚ୍ଚେଦେଙ୍ଗ୍ ୱାତାଦେର୍? 53ଆନେଙ୍ଗ୍ ୱିଜୁଦିନ୍ ମିହୁଦାଙ୍ଗ୍ ମାନ୍ଞ୍ଜି ଈଶ୍ୱର ମାନି ମନ୍ଦିର୍ ପିଣ୍ଡାତ ହିକ୍ଷାହିଜି ମାନ୍ଚାଙ୍ଗ୍, ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ଆସ୍ତି ଗାଚ୍ଚେଦେଙ୍ଗ୍ ୱାତାଦେର୍, ମାତର୍ ଇଦାଙ୍ଗ୍ ମି ସମୟ୍ ଆରେ ମି ଜିବୁନ୍ ମାଜ୍ଗା ଆତ୍ତାତ୍।”
ପିତର ଯୀଶୁଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ଚାନ୍
(ମାଥି. ୨୬:୫୭-୫୮-୬୯-୭୫; ମାର୍କ. ୧୪:୫୩-୫୪-୬୬-୭୨; ଯୋହନ. ୧୮:୧୨-୧୮-୨୫-୨୭)
54ତାପାଚେ ହେୱାର୍ ଯୀଶୁଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଇଞ୍ଜ ଅତାର୍, ମାତର୍ ପିତର ଅଲପ୍ ଦେହା ମାନ୍ଞ୍ଜି ତାପାଚେ ପାଚେ ହାଚାନ୍। 55ସେନାର୍ ମାଦି ହାକ୍ଡ଼ିତ ନାଣି କାଚାୟ୍ କିଜି ରବେ କୁକ୍ଚି ମାଚାର୍, ପିତର ପା ହେୱାର୍ ହୁଦାଙ୍ଗ୍ କୁଚ୍ଚାନ୍।
56ରଞ୍ଜେଲ୍ ଚାକ୍ରାଣି ପିତରତିଙ୍ଗ୍ ହେବେ କୁଚ୍ଚାକା ହୁଡ଼୍ତାତ୍। ହେ ଚାକ୍ରାଣି ପିତରତିଙ୍ଗ୍ କାଚାଆନି ନାଣିନି ଅଜଡ଼୍ତାକେ ହୁଡ଼୍ଦେଙ୍ଗ୍ ଆଡ଼୍ତାତ୍। ହେ ଚାକ୍ରାଣି ମାନ୍ଦିୟାନ୍ କିଜି ପିତର ମୁମ୍ଦିଙ୍ଗ୍ ହୁଡ଼୍ଜି ୱେଚ୍ଚାତ୍, “ଇୱାନ୍ପା ଯୀଶୁ ଲାହାଙ୍ଗ୍ ମାଚାନ୍।” 57ମାତର୍ ପିତର ଇ ବେଣ୍ତିଙ୍ଗ୍ ମାନିକିୱାଦାଙ୍ଗ୍ ୱେଚ୍ଚାନ୍, “ଆକାୟ୍ ତଣ୍ଦେଲ୍, ଆନେଙ୍ଗ୍ ହେୱାନିଙ୍ଗ୍ ମୁଳ୍କେ ପୁନୁଙ୍ଗ୍।” 58ଅଲପ୍ ହାଚି ପାଚେ ଆରେ ରକାନ୍ ପିତରତିଙ୍ଗ୍ ହୁଡ଼୍ଜି ୱେଚ୍ଚାନ୍, “ଏନେଙ୍ଗ୍ ପା ଯୀଶୁ ହୁଦାଙ୍ଗ୍ ବୁଲାଆଜି ମାଚାଇ।” ମାତର୍ ପିତର ୱେଚ୍ଚାନ୍, “ଆକାୟ୍, ଆନେଙ୍ଗ୍ ଆକାୟ୍।”
59ର ଘଣ୍ଟା ପାଚେ ଆରେ ରକାନ୍ ୱେଚ୍ଚାନ୍, “ଇଦାଙ୍ଗ୍ ସତ୍। ଇୱାନ୍ ହାତ୍ପା ଯୀଶୁ ହୁଦାଙ୍ଗ୍ ମାଚାନ୍। ଇନେସ୍କି ଇଦାଙ୍ଗ୍ ସତ୍ ଯେ ହେୱାନ୍ ତ ଗାଲିଲୀ ଜିଲ୍ଲାନି ମାନାୟ୍।” 60ମାତର୍ ପିତର ୱେଚ୍ଚାନ୍, “ଆକାୟ୍ ଟଣ୍ଡେନ୍! ଏପେଙ୍ଗ୍ ଇନାକା ୱେଚ୍ନାଦେରା, ଆନେଙ୍ଗ୍ ହେଦାଙ୍ଗ୍ ପୁନ୍ୱାତାଙ୍ଗ୍ନା।” ପିତର ଇବେଣ୍ ୱେଚ୍ନିହିଙ୍ଗ୍ ହେଦାପ୍ରେ କୁଜୁ କେତାତ୍।
61ଆରେ, ଯୀଶୁ ବୁଲାଆଜି ପିତରତିଙ୍ଗ୍ ର ହାଣ୍କୁ କିଜି ହୁଡ଼୍ତାନ୍, “ପିତର ଯୀଶୁ ୱେଚ୍ଚି ବେଣ୍ତିଙ୍ଗ୍ ଏତ୍କିତାନ୍, ନେଞ୍ଜେଙ୍ଗ୍ କୁଜୁ ରିହା କେୱି ଆଗେ ନାଙ୍ଗେଙ୍ଗ୍ ତିନ୍ହଟ୍ ପୁଞ୍ଜୁୟ୍ ଇଞ୍ଜି ୱେଚ୍ନାଇ।” 62ଲାଗିଙ୍ଗ୍ ପିତର ବେସିଦୁକ୍ ଆଜି ଆଡ଼୍ବାତାନ୍।
ମାନାୟାର୍ ଯୀଶୁଙ୍ଗ୍ ଗାଇତାର୍ ଆରେ ଇଡ଼୍ତାର୍
(ମାଥି. ୨୬:୬୭,୬୮; ମାର୍କ. ୧୪:୬୫)
63ଆରେ ସେନାର୍ ଯୀଶୁଙ୍ଗ୍ ଆସ୍ତି ଇଡ଼୍ଜି ମାଚାର୍, ହେୱାର୍ ଯୀଶୁଙ୍ଗ୍ ଇଡ଼୍ଜି-ଇଡ଼୍ଜି ଇନସ୍ତା କିତାର୍। 64ତା କାଣ୍କୁକାଙ୍ଗ୍ ଗାର୍ଣ୍ଡା ଗାଚ୍ଚି ହେୱାନିଙ୍ଗ୍ ବିଧା ଇଡ଼୍ଜି ହିନସ୍ତାକିଜି ୱେନ୍ବାତାର୍, “ଏନେଙ୍ଗ୍ ଯଦି ର ଭବିଷ୍ଯତବକ୍ତାତି, ଏଲେଙ୍ଗ୍ଇଚି ନାଙ୍ଗେଙ୍ଗ୍ ୱେଚ୍ଚା ନିଙ୍ଗେଙ୍ଗ୍ ନଙ୍ଗୟ୍ ଇନେର୍ ଇଡ଼୍ଦାତାର୍!” 65ଆରେ ମାନାୟାର୍ ଯୀଶୁଙ୍ଗ୍ ଇଲେକେ କେତେକ୍ ତା ବିରଦ୍ତାଙ୍ଗ୍ ଇଞ୍ଜି ନିନ୍ଦା କିଦେଙ୍ଗ୍ ଲାଗାତାର୍।
ଯୀଶୁଙ୍ଗ୍ ବିଚାର୍ କିଦେଙ୍ଗ୍ ଗାଜାସବାତାକେ ଅତାର୍
(ମାଥି. ୨୬:୫୯-୬୬; ମାର୍କ. ୧୪:୫୫-୬୪; ଯୋହନ. ୧୮:୧୯-୨୪)
66ଅଜଡ଼୍ ଆତି ଦାପ୍ରେ ଯିହୁଦିର୍ ଦଳ୍ନି ନେତାର୍, ପଣ୍ଡିତାର୍ ଆରେ ପ୍ରାଚିନ୍ନାର୍ ହୁକେ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଇ ୱିଜାକାର୍ ରବେଆଜି ବିଚାର୍ ସବାତାକେ ଯୀଶୁଙ୍ଗ୍ ଅତାର୍। ଆରେ ହେୱାର୍ ୱେଚ୍ଚାର୍, “ଏନେଙ୍ଗ୍ ଯଦି ଖ୍ରୀଷ୍ଟ, ଲାଗିଙ୍ଗ୍ ମାଙ୍ଗେଙ୍ଗ୍ ୱେଚ୍ଚା।”
67ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଯଦି ମିଙ୍ଗେଙ୍ଗ୍ ୱେଚ୍ଚାନାଙ୍ଗ୍, ଏପେଙ୍ଗ୍ ପା ପାର୍ତି କିଉଦେର୍। 68ଆନେଙ୍ଗ୍ ଯଦି ମିଙ୍ଗେଙ୍ଗ୍ ର ପ୍ରଶ୍ନ ୱେନ୍ବାଆଦ୍ନାଙ୍ଗ୍, ଲାଗିଙ୍ଗ୍ ଏପେଙ୍ଗ୍ ତା ଉତର୍ ହିଦୁଦେର୍। 69ମାତର୍ ନଙ୍ଗୟତାଙ୍ଗ୍ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଈଶ୍ୱର ସିଂହାସନ୍ନି ତିନାବାଗାୟ୍ ଆଦିକାର୍ତାଙ୍ଗ୍ କୁଚ୍ନାଙ୍ଗ୍।” 70ହେବେତାଙ୍ଗ୍ ୱିଜାକାର୍ ୱେନ୍ବାତାର୍, “ଲାଗିଙ୍ଗ୍ ଏନେଙ୍ଗ୍ ଇନାକା ଈଶ୍ୱର ମେହି?”
ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆଁ ଏପେଙ୍ଗ୍ ଇନାକା ୱେଚ୍ଚାନାଦେରା, ହେଦାଙ୍ଗ୍ ଟିକ୍।” 71ଲାଗିଙ୍ଗ୍ ହେୱାର୍ ୱେଚ୍ଚାର୍, “ଲାଗିଙ୍ଗ୍ ନଙ୍ଗୟ୍ ଆରେ ସାକି ଇନା କିଦେଙ୍ଗ୍ ମାଙ୍ଗେଙ୍ଗ୍ ଦର୍କାର୍? ଆସେଙ୍ଗ୍ ତ ନିଜେ ତା ୱେଇଦାଙ୍ଗ୍ ଇଦାଙ୍ଗ୍ ୱେଚାସ୍।”
Currently Selected:
ଲୁକ 22: PEGNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
