ଲୁକ 20
20
ଯିହୁଦି ନେତାର୍ ଯୀଶୁଙ୍ଗ୍ ର ପ୍ରଶ୍ନ ୱେନ୍ବାତାର୍
(ମାଥି. ୨୧:୨୩-୨୭; ମାର୍କ. ୧୧:୨୭-୩୩)
1ଦିନେକ୍ ଯୀଶୁ ମନ୍ଦିର୍ ପିଣ୍ଡାତାକେ ମାନାୟାରିଙ୍ଗ୍ ହିକ୍ଷା ଆରେ ଈଶ୍ୱର ମାନି ରାଜିନି ହାର୍ଦିକାବୁର୍ ଶୁଣାୟ୍ କିଜି ମାଚାନ୍। ହେପାଦ୍ନା ଈଶ୍ୱର ହେବାକିନି ମୁଡ଼୍ଦି ପୁଜାରିର୍, ପଣ୍ଡିତାର୍ ଆରେ ପ୍ରାଚିନାର୍ ହୁଦାଙ୍ଗ୍ ୱାଜି ଯୀଶୁଙ୍ଗ୍ ପ୍ରଶ୍ନ ୱେନ୍ବେଦେଙ୍ଗ୍ ଲାଗାତାର୍। 2ହେୱାର୍ ୱେଚ୍ଚାର୍, “ଏନେଙ୍ଗ୍ ଇନା ଆଦିକାର୍ତାଙ୍ଗ୍ ଇୱିଜୁ କିନାୟା? ଆରେ ଇୱିଜୁ କିଦେଙ୍ଗ୍ ନିଙ୍ଗେଙ୍ଗ୍ ଇନେର୍ ଇ ଆଦିକାର୍ ହିତାର୍?”
3ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ପା ମିଙ୍ଗେଙ୍ଗ୍ ର ବେଣ୍ ୱେନ୍ବାଆଦ୍ନାଙ୍ଗ୍, ନାଙ୍ଗେଙ୍ଗ୍ ଉତର୍ ହିଦାଟ୍, 4ମାନାୟ୍ତିଙ୍ଗ୍ ଡୁବନ୍ ହିଦେଙ୍ଗ୍ ଯୋହନତିଙ୍ଗ୍ ଇନେର୍ ପକ୍ତାତାର୍? ଈଶ୍ୱର ପକ୍ତାତାନ୍ କି ମାନାୟାର୍ ପକ୍ତାତାର୍?”
5ହେବେତାଙ୍ଗ୍ ହେୱାର୍ ଜାର୍-ଜାର୍ବିତ୍ରେ ବେଣ୍କିଜି ୱେଚ୍ଚେଙ୍ଗ୍ ଲାଗାତାର୍, “ଯଦି ସରଗ୍ତାଙ୍ଗ୍ ଇଞ୍ଜି ୱେଚ୍ନାସ୍, ଲାଗିଙ୍ଗ୍ ହେୱାନ୍ ମାଙ୍ଗେଙ୍ଗ୍ ଏପେଙ୍ଗ୍ ଇନା କିଦେଙ୍ଗ୍ ଯୋହନତିଙ୍ଗ୍ ପାର୍ତି କିୱାତାଦେର୍ ଇଞ୍ଜି ଇଞ୍ଜ୍ନାନ୍? 6ମାତର୍ ଆସେଙ୍ଗ୍ ଯଦି ମାନାୟ୍ ତାକେଣ୍ଡାଙ୍ଗ୍ ଇଞ୍ଜି ୱେଚ୍ନାସ୍, ଲାଗିଙ୍ଗ୍ ୱିଜାକାର୍ ମାଙ୍ଗେଙ୍ଗ୍ କାଲ୍କୁ ଲାହାଙ୍ଗ୍ ଇଡ଼୍ଦାନାର୍। ଇନେସ୍କି ଯୋହନତିଙ୍ଗ୍ ହାତ୍ପା ରକାନ୍ ଭବିଷ୍ଯତବକ୍ତା ଇଞ୍ଜି ମାନିକିଜି ମାଚାର୍।”
7ଲାଗିଙ୍ଗ୍ ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ହେୱାନ୍ ଇମେତାଙ୍ଗ୍ ଆଦିକାର୍ ପାୟାଆତାନ୍, ହେଦାଙ୍ଗ୍ ଆପେଙ୍ଗ୍ ପୁନୁପ୍।” 8ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଲାଗିଙ୍ଗ୍ ଆନେଙ୍ଗ୍ ଇମ୍ଣି ଆଦିକାର୍ତାଙ୍ଗ୍ ଇ ୱିଜୁକିନାଙ୍ଗା, ହେଦାଙ୍ଗ୍ ଆନେଙ୍ଗ୍ ପା ମିଙ୍ଗେଙ୍ଗ୍ ୱେଚ୍ଚୁଙ୍ଗ୍।”
ଅଙ୍ଗୁର୍ ବାଡ଼୍ ଆଦି ଆସ୍ତି ବାନ୍ୟା ମାନାୟ୍ନି କାତା
(ମାଥି. ୨୧:୩୩-୪୬; ମାର୍କ. ୧୨:୧-୧୨)
9ତାପାଚେ ଯୀଶୁ ଯିହୁଦି ନେତାରିଙ୍ଗ୍ ଇ କାତା ୱେଚ୍ନିଲେକେ କିଜି ୱେଚ୍ଚାନ୍, “ର ମାନାୟ୍ ତା ବାଡ୍ଦ ଅଙ୍ଗୁର୍ ରୁସ୍ତାନ୍, ଆରେ ତା ଚାରିବେଣ୍ତାଙ୍ଗ୍ ବାଡ଼୍ ମୁକ୍ତାନ୍। ତାପାଚେ ହେ ଅଙ୍ଗୁର୍ ବାଡ଼୍ଦିଙ୍ଗ୍ ଆଦି ହିଜି ବେସିଦିନ୍ କାଜିଙ୍ଗ୍ ବିଦେସ୍ ହାଚାନ୍। 10ଅଙ୍ଗୁର୍ ବାଡ଼୍ ଆଦି ଆସ୍ତାକାର୍ ଅଙ୍ଗୁର୍ ଏଚ୍ନିହିଙ୍ଗ୍, ମାଲିକ୍ ତା ବାଗ୍ ତାତେଙ୍ଗ୍ ତା ହଲିଆହିଙ୍ଗ୍ ହେୱାର୍ତାକେ ପକ୍ତାନ୍। ମାତର୍ ହେ ବାଡ଼୍ ଆଦି କିତାକାର୍ ହେ ହଲିଆଙ୍ଗ୍ ଆସ୍ତି ମାଡ୍ ହିତାର୍, ଆରେ ୱାରି କେଇଦାଙ୍ଗ୍ ଲେଉଟାଇ କିତାର୍।
11ମାଲିକ୍ ଆରେ ରକାନ୍ ହଲିଆହିଙ୍ଗ୍ ପକ୍ତାନ୍। ହେୱାର୍ ହେୱାନିଙ୍ଗ୍ ପା ଟ୍ରାକ୍ଚି ଇନସ୍ତାକିଜି ୱାରି କେଇଦାଙ୍ଗ୍ ପକ୍ତାର୍। 12ପାଚେ ହେ ମାଲିକ୍ ଆରେ ପା ରକାନିଙ୍ଗ୍ ପକ୍ତାନ୍। ମାତର୍ ହେୱାର୍ ହେୱାରିଙ୍ଗ୍ ପା ଚିତ୍ରା କାବ୍ରା କିଜି ଟ୍ରାକ୍ଚି ବାର୍ତ ତୁହିହିତାର୍।
13ହେବେତାଙ୍ଗ୍ ଅଙ୍ଗୁର୍ ବାଡ଼୍ଦି ମାଲିକ୍ ୱେଚ୍ଚାନ୍, ‘ଆନେଙ୍ଗ୍ ଅଙ୍ଗୟ ଇନାକା କିନାଙ୍ଗ୍? ନା ଲାଡ୍ ମାଜିଙ୍ଗ୍ ପକ୍ନାଙ୍ଗ୍, କେଜାଣେ ନା ହିମ୍ଣାତିଙ୍ଗ୍ ହେୱାର୍ ମାନିକିନାର୍।’ 14ମାତର୍ ହେ ଆଦି ଆସ୍ତାକାର୍ ହେୱାନିଙ୍ଗ୍ ହୁଡ଼୍ଜି ଜାର୍ ଜାର୍ବିତ୍ରେ ବେଣ୍କିବାଆଜି ୱେଚ୍ଚାର୍, ‘ଇୱାନ୍ତ ମାଲିକ୍ ମେହି, ଇୱାନିଙ୍ଗ୍ ମାର୍ନେ ଅସ୍ତିସ୍, ଇ ଅଙ୍ଗୁର୍ ବାଡ଼୍ ୱିଜୁ ମା ଆଦିକାର୍ ଆନାତ୍।’
15ଆରେ ହେୱାର୍ ହେୱାନିଙ୍ଗ୍ ଅଙ୍ଗୁର୍ ବାଡ଼୍ଦାଙ୍ଗ୍ ହପ୍ଚି ମାର୍ନେ ଅସ୍ତାର୍। ‘ନଙ୍ଗୟ୍ ହେ ଅଙ୍ଗୁର୍ ବାଡ଼୍ଦି ମାଲିକ୍ ହେୱାରିଙ୍ଗ୍ ଇନାକା କିନାନ୍? 16ମାଲିକ୍ ୱାଜି ଆଦି ଆସ୍ତାକାରିଙ୍ଗ୍ ଅହ୍ନାନ୍। ଆରେ ଅଲଗାଲଗାଙ୍ଗ୍ ଅଙ୍ଗୁର୍ ବାଡ଼୍ ହିନାନ୍।’ ମାନାୟାର୍ ଇ ବେଣ୍ତିଙ୍ଗ୍ ୱେନ୍ଞ୍ଜି ୱେଚ୍ଚାର୍, ‘ଈଶ୍ୱରଲେକେ କିମେନ୍।’ ”
17ଯୀଶୁ ହେୱାରିଙ୍ଗ୍ ହୁଡ଼୍ଜି ୱେଚ୍ଚାନ୍, “ଲାଗିଙ୍ଗ୍ ଦରମ୍ ସାସ୍ତର୍ତାକେ ଲେକାଆତି ଇ ବେଣ୍ନି ଅର୍ତ ଇନାକା ଆନାତ୍? ଇଲ୍ ରହ୍ନାକାର୍ ଇମ୍ଣି କାଲ୍ତିଙ୍ଗ୍ ଗାଚ୍ଚେଙ୍ଗ୍ ମାନ୍କିୱାତାର୍, ଈଶ୍ୱର ହେ କାଲ୍ତିଙ୍ଗ୍ କୁନାଦିନି ମୁଡ଼୍ଦି କାଲ୍ ଆତାନ୍। 18ଇମ୍ଣାକାନ୍ ହେ କାଲ୍ଜପି ଆର୍ନାନ୍, ହେୱାନିଙ୍ଗ୍ କେଇ କାଲ୍କୁ ଡିଙ୍ଗ୍ନିକ୍। ମାତର୍ ହେ କାଲ୍ ଇନେର୍ ଜପି ଆର୍ତିସ୍ ହେୱାନ୍ କୁଟ୍ କୁଟା ଆନାନ୍।”
ପଣ୍ଡିତାର୍ ଆରେ ମୁଡ଼୍ଦି ପୁଜାରିର୍ ସିସ୍ତୁ ହିନି ବିଷୟରେ ଯୀଶୁଙ୍ଗ୍ ପ୍ରଶ୍ନ ୱେନ୍ବାତାର୍
(ମାଥି. ୨୨:୧୫-୨୨; ମାର୍କ. ୧୨:୧୩-୧୭)
19ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପଣ୍ଡିତାରିଙ୍ଗ୍ ଯୀଶୁ ର କାତା ୱେଚ୍ନିଲେକେ କିଜି ୱେଚ୍ନାକା ପୁଚାର୍। ହେଦାଙ୍ଗ୍ କାଜିଙ୍ଗ୍ ଯୀଶୁଙ୍ଗ୍ ହେବେ ଆସ୍ତେଙ୍ଗ୍ ଉପାୟ୍ କିତାର୍। ମାତର୍ ହେୱାର୍ ମାନାୟାରିଙ୍ଗ୍ ପାଣ୍ଡ୍ରାଆଜି ଆହ୍ୱାତାର୍। 20ତାପାଚେ ହେୱାର୍ ଯୀଶୁଙ୍ଗ୍ ବୁଲ୍ ଆସ୍ତି ଦସି କିଦେଙ୍ଗ୍ ଉପାୟ୍ ଡେକ୍ଚି ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାର୍ କେତ୍ଜାଣ୍ ବାଟ୍ପାଣିଆର୍ ଲେଗ୍ଦି ମାନାୟାରିଙ୍ଗ୍ ଯୀଶୁ ଲାଗାୟ ପକ୍ତାର୍। ହେୱାର୍ ବାବିକିଜି ମାଚାର୍ ଯେ, ଯୀଶୁ ୱେଚ୍ଚି କାତାତିଙ୍ଗ୍ ବୁଲ୍ ଆସ୍ତେଙ୍ଗ୍ ଆଡ୍ନାର୍। ଆରେ ହେ ବୁଲ୍ ଆସ୍ତି ରମିୟ ସରକାର୍ ଗବର୍ନର୍ କେଇଦ ଯୀଶୁଙ୍ଗ୍ ଆହିକିଦେଙ୍ଗ୍ ଆଡ୍ନାର୍।
21ହେ ବାଟ୍ପାଣିଆର୍ ବୁଲ୍ ଆସ୍ତେଙ୍ଗ୍ ୱାଜି ଯୀଶୁଙ୍ଗ୍ ୱେନ୍ବାତାର୍, “ଏ ଗୁରୁ, ଆପେଙ୍ଗ୍ ପୁନାପ୍ ଯେ, ଏନେଙ୍ଗ୍ ଇମ୍ଣାକା ହିକ୍ଷା ହିନାୟ୍ ଆରେ ଇମ୍ଣାକା ୱେଚ୍ନାଇ ହେଦାଙ୍ଗ୍ୱିଜୁ ଟିକ୍। ଆରେ ଏନେଙ୍ଗ୍ ଇନେରିଙ୍ଗ୍ ମୁମ୍ ହୁଡ଼୍ଜି କାତା ୱେଚୁଇ। ମାତର୍ ଈଶ୍ୱର ମାଙ୍ଗେଙ୍ଗ୍ ଇନାକା ଇଚା କିଦ୍ନାନା ହେ ବିଷୟରେ ଟିକ୍କିଜି ହିକ୍ଷା ହିନାଇ। 22ନଙ୍ଗୟ୍ ମାଙ୍ଗେଙ୍ଗ୍ ୱେଚ୍ଚା, ‘ରମିୟ ସର୍କାର୍ କାଇସର୍ ମହା ରାଜାଙ୍ଗ୍ ସିସ୍ତୁ ହିନାକା ବିଦି ମାନାତ୍ କି ଆକାୟ୍?’ ”
23ମାତର୍ ଯୀଶୁ ହେୱାର୍ ଚାତୁର୍ ବୁଜାଆଜି ୱେଚ୍ଚାନ୍, “ର ରୁପାଡାବୁ ନାଙ୍ଗେଙ୍ଗ୍ ଚଚ୍ଚାଟ୍। 24ଇ ଡାବୁତ ଇନେର୍ ମୁର୍ତ୍ତି ଆରେ ଇନେର୍ ତର୍ ମାନାତ୍?” ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ରମିୟ ସର୍କାର୍ କାଇସର୍ ମହା ରାଜାତି।”
25ହେବେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣାକା ରମିୟ ସର୍କାର୍ କାଇସର୍ ମାହା ରାଜାତି ହେଦାଙ୍ଗ୍ ମହା ରାଜାଙ୍ଗ୍ ହିଆଟ୍, ଆରେ ଇମ୍ଣାକା ଈଶ୍ୱରତି, ହେଦାଙ୍ଗ୍ ଈଶ୍ୱରତିଙ୍ଗ୍ ହିଆଟ୍।” 26ହେବେତାଙ୍ଗ୍ ହେ ବାଟ୍ପାଣିଆର୍ ମାନାୟ୍ ମୁମ୍ଦ ଯୀଶୁ ବେଣ୍ତିଙ୍ଗ୍ ବୁଲ୍ ଆସ୍ତେଙ୍ଗ୍ ଆଡ୍ୱାତାର୍, ଆରେ ହେୱାର୍ ତା ଉତରତାଙ୍ଗ୍ କାବାଆଜି ଚିମ୍ରା ଆଜି ମାଚାର୍।
ସାଦୁକିଦଳ୍ନି ମାନାୟାର୍ ଆରେରଗ ଜିବୁନ୍ଆନି ବିଷୟରେ ଯୀଶୁଙ୍ଗ୍ ପ୍ରଶ୍ନ ୱେନ୍ବାତାର୍
(ମାଥି. ୨୨:୨୩-୩୩; ମାର୍କ. ୧୨:୧୮-୨୭)
27ତାପାଚେ କେତ୍ଜାଣ୍ ଯିହୁଦି ଦର୍ମନି ସାଦୁକିଦଳ୍ନି ମାନାୟାର୍ ଯୀଶୁ ଲାଗାୟ୍ ୱାତାର୍। ହେ ସାଦୁକିର୍ ପାର୍ତି କିଜି ମାଚାର୍ ଯେ, ମାନାୟାର୍ ହାଃତିତାଙ୍ଗ୍ ଆରେରଗ ଜିବୁନ୍ଆଜି ଜିଦେଙ୍ଗ୍ ଆଡୁନ୍। ହେୱାର୍ ଯୀଶୁଙ୍ଗ୍ ୱେନ୍ବାତାର୍, 28“ଏ ଗୁରୁ! ମୋଶା ମା କାଜିଙ୍ଗ୍ ସାସ୍ତର୍ତାକେ ଲେକିକିତାନ୍ନା, ଯଦି ରକାନ୍ ବିବାଆଜି ହିମ୍ଣାୱାକ୍ଡ଼ା ଆୱାଦାଙ୍ଗ୍ ହାଃନାନ୍। ଆରେ ତା ଟଣ୍ଡେନ୍ ତା ଟଣ୍ଡେନ୍ ଡକ୍ରୁହିଙ୍ଗ୍ ବିବା ଆନାନ୍। ଇନେସ୍କି ହେ ବିବା ଆତାକାନ୍ ତା ଟଣ୍ଡେନ୍ କାଜିଙ୍ଗ୍ ହେ କଗ୍ଲେତାଙ୍ଗ୍ ହିମ୍ଣାୱାକ୍ଡ଼ା ଉବ୍ଜାଇ କିଦେଙ୍ଗ୍ ଆଡ୍ନାନ୍।
29ମାନ୍ତ ବାବିକିୟା ରଞ୍ଜ ସାତ୍ବାଇ ମାଚାର୍। ଗାଜାକାନ୍ ର କଗ୍ଲେଙ୍ଗ୍ ବିବାଆଜି ହିମ୍ଣାୱାକ୍ଡ଼ା ଆୱାଦାଙ୍ଗ୍ ହାଃତାନ୍। 30ପାଚେ ଗାଜା ମାଜିଆ ଆରେ ହିରୁ ମାଜିଆ ପା ହେଦେଲିଙ୍ଗ୍ ବିବା ଆତାର୍। ଆରେ ହେୱାର୍ ପା ହିମ୍ଣାୱାକ୍ଡ଼ା ଆୱାଦାଙ୍ଗ୍ ହାଃତାର୍। 31ହେଲେକେ ସାତ୍ବାଇ ପା ହିମ୍ଣାୱାକ୍ଡ଼ା ଆୱାଦାଙ୍ଗ୍ ହାଃତାର୍। 32ୱିଜାର୍ ୱିସ୍ତି ପାଚେ ହେ କଗ୍ଲେ ପା ହାଃତାତ୍। 33ଲାଗିଙ୍ଗ୍ ହେ କଗ୍ଲେ ତ ସାତ୍ବାଇତିଙ୍ଗ୍ ପା ବିବାଆଜି ମାଚାତ୍। ହାଃତାକାର୍ ଆରେରଗ ଜିବୁନ୍ ଆତିସ୍ ହେଦେଲ୍ ଇନେର୍ ଡକ୍ରୁହି ଆନାତ୍?”
34ଯୀଶୁ ସାଦୁକିରିଙ୍ଗ୍ ୱେଚ୍ଚାନ୍, “ଇ ପୁର୍ତିନି ବିଦିତାଙ୍ଗ୍ ମାନାୟାର୍ ବିବା ଆନାର୍। 35ମାତର୍ ଈଶ୍ୱର ଇମ୍ଣାକାରିଙ୍ଗ୍ ଦରମ୍ ମାନାୟ୍ ଇଞ୍ଜି ଗାଣା କିନାନ୍, ହେ ମାନାୟାର୍ ହାଃତିତାଙ୍ଗ୍ ଆରେରଗ ଜିବୁନ୍ଆଜି ନିଙ୍ଗ୍ନାର୍। ଆରେ ହେୱାର୍ ଈଶ୍ୱର ହୁଦାଙ୍ଗ୍ ସରଗ୍ତାକେ ମାନ୍ଗାନାର୍। ଆରେ ହେ ମାନାୟାର୍ ବିବା ଆଉର୍। 36ହେ ଜିବୁନ୍ତ ମାନାୟାର୍ ସରଗ୍ଦୁତ୍ ଲେକେ ଆଜି ମାନାର୍। ଆରେ ହେୱାର୍ ଇନାୱେଡ଼ାଙ୍ଗ୍ ପା ହାଃଉର୍। ଇନେସ୍କି ହେୱାର୍ ହାଃତିତାଙ୍ଗ୍ ଆରେରଗ ଜିବୁନ୍ ଆତାର୍ନା। ହେଦାଙ୍ଗ୍ କାଜିଙ୍ଗ୍ ହେୱାର୍ ଈଶ୍ୱର ମେହିର୍ ଆନାର୍।
37ମୋଶା ତା ଲେକିକିତି ସାସ୍ତର୍ତାକେ ୱେଚ୍ଚାତାନ୍ନା ଯେ ହାଃତାକାର୍ ଆରେରଗ ଜିବୁନ୍ ଆନାର୍। ମଶା କାଚାଆନି ବୁଟାନି ବିଷୟରେ ୱେଚ୍ଚାତାନ୍ନା, ଈଶ୍ୱର ମା ଆକଦାଦି ଅବ୍ରାହାମ୍, ଇସାକ ଆରେ ଯାକୁବ। 38ଈଶ୍ୱର ହାଃତାକାରିଙ୍ଗ୍ ଈଶ୍ୱର ଆକାୟ୍, ମାତର୍ ଜିତାକାରିଙ୍ଗ୍ ଈଶ୍ୱର। ଇନେସ୍କି ଈଶ୍ୱର ୱିଜାକାରିଙ୍ଗ୍ ଜିବୁନ୍ ମାନି ମାନାୟାର୍ ଇଞ୍ଜି ଗାଣା କିତାନ୍ନା।”
39ହେବେତାଙ୍ଗ୍ ପଣ୍ଡିତାର୍ ୱେଚ୍ଚାର୍, “ଗୁରୁ, ନି ୱେଚ୍ଚି ବେଣ୍ ବଡିଆ ମାଚାତ୍।” 40ଯୀଶୁଙ୍ଗ୍ ଇନେର୍ ପା ଆଦିକ୍ ପ୍ରଶ୍ନ ୱେନ୍ବେଦେଙ୍ଗ୍ ଶାସ୍ କିୱାତାର୍।
ଖ୍ରୀଷ୍ଟ ଦାଉଦ ମେହି
(ମାଥି. ୨୨:୪୧-୪୬; ମାର୍କ. ୧୨:୩୫-୩୭)
41ତାପାଚେ ଯୀଶୁ ମାନାୟାରିଙ୍ଗ୍ ୱେନ୍ବାତାନ୍, “ମାନାୟାର୍ ଇନେକିଦେଙ୍ଗ୍ ଖ୍ରୀଷ୍ଟ ଦାଉଦ ରାଜା ମେହି ଇଞ୍ଜି ୱେଚ୍ନାରା? 42ଦାଉଦ ରାଜା ନିଜେ କେର୍କଣ୍ ବହିତାକେ ଲେକିକିତାନ୍ନା,
‘ମାପୃ ଈଶ୍ୱର ନା ମାପୃ ଖ୍ରୀଷ୍ଟଙ୍ଗ୍ ୱେଚ୍ଚାନ୍,
43ଏଚେପାଦ୍ନା ପାତେକ୍ ଆନେଙ୍ଗ୍ ମି ଶାତ୍ରୁରିଙ୍ଗ୍ ମି ସାକ୍ତିତାଙ୍ଗ୍ ମି ତାରେନ୍ ଇଟ୍ନାଙ୍ଗ୍। ହେପାଦ୍ନା ପାତେକ୍ ଏନେଙ୍ଗ୍ ନା ତିନାବାଗାୟ୍ ନା ଲାଗାୟ୍ କୁଚ୍ଚି ମାନା।’
44ଦାଉଦ ରାଜା ପା ଖ୍ରୀଷ୍ଟଙ୍ଗ୍ ନା ମାପୃ ଇଞ୍ଜି ଇନାନା। ଲାଗିଙ୍ଗ୍ ଇନେସ୍ କିଜି ଖ୍ରୀଷ୍ଟ ଦାଉଦ ମେହି ଆନାନ୍?”
ପଣ୍ଡିତାର୍ତାଙ୍ଗ୍ ଜାଗ୍ରତ୍ ଆଜି ମାନାଟ୍
(ମାଥି. ୨୩:୧-୩୬; ମାର୍କ. ୧୨:୩୮-୪୦)
45ମାନାୟାର୍ ତା ବେଣ୍ ୱେନିହିଙ୍ଗ୍ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, 46“ପଣ୍ଡିତାର୍ତାଙ୍ଗ୍ ଜାଗ୍ରତ୍ ଆଜିମାନାଟ୍! ହେୱାର୍ ଡେଙ୍ଗା ଆରେ ଦାମ୍କିୟା ହେନ୍ଦ୍ରା ଉସ୍ପେଦେଙ୍ଗ୍ ଆରେ ଆଟ୍ ବାଜାର୍ତାକେ ସନ୍ମାନ୍ ପାୟା ଆଦେଙ୍ଗ୍ ଇଚାକିନାର୍। ଆରେ ଯିହୁଦିର୍ ପାର୍ତାନା ଇଞ୍ଜ ସନ୍ମାନ୍ ପାୟ୍ଆନି ବାହାତାକେ କୁଚ୍ଚେଙ୍ଗ୍ ଇଚାକିନାର୍। 47ହେୱାର୍ ଚାଲାକି କିଜି ରାଣ୍ଡି ଇଞ୍ଜାକା ୱିଜୁ ବୁଡାଇ କିନାର୍। ମାନାୟାରିଙ୍ଗ୍ ବଲ୍ବଲାୟ୍ ଆଦେଙ୍ଗ୍ ଡେଙ୍ଗା ପାର୍ତାନା କିନାର୍। ମାତର୍ ମାପୃ ହେୱାରିଙ୍ଗ୍ ବେସି ଗାଜା ଦଣ୍ଡ୍ ହିନାନ୍।”
Currently Selected:
ଲୁକ 20: PEGNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
