Alukasɨ 14

Adzaŋ za Yeso a Tsuʼnɨ a Ŋwɔn Nɨghɔ

1A bé a Njwi Alaʼ Ŋwi zɨ tse Yeso a ghɛn a ndzɨ́ə a ndá ŋwɔn bə Farisao wa a bénɨ́ atú ə. Ɨbɛn tɛ́gɨ́ ɨmɨgɨ a nye zɨə. 2Ŋwɔn tse wa a tsínɨ́ nɨ ɨdɨnkɨ mɨku bo ɨdɨnkɨ mbó a yén a mbó Yeso, 3Yeso a tíʼ mbítɨ́ bɨdiʼ bɨ Nyɔngɔŋ bo bɨ bə Farisao ngə́, “Nyɔngɔŋ ɨwɨgɨnə a diʼ ngə́ á bɨ tsuʼ a ŋwɔn a Njwi Alaʼ Ŋwi kə ngáŋ le?”

4Bɨ náʼ ayi nkeʼ anu zə tse soŋə. Yeso a lɔ́gɨ́ a ŋwɔn wa, ntsuʼ ayi ngɨ a kwɛn ayi ɛ. 5Ntiʼ mbə soŋ a mbó bo ngə́, “A nɨ ɨwa ŋwɔn nɨ bən wa be mɔn ɨyi wu mbáŋnɨ́ kə mbɔŋ ɨzhi vwo a mu abɨ́ a nkyi, a Njwi Alaʼ Ŋwi, a keʼ tǒkɨ ɨ fɨgɨ tsɛʼ a Njwi Alaʼ Ŋwi məza le?”#14:5 Matyo 12:11

6Lá bɨ ghúʼ nchwɨgɨ anu məzen wəmbo kɨ́káŋ ə.

Ɨshiʼtə nɨ Ɨnye a Ɨshe abɔʼnɨ Nkwarɨ Bɨghən ə

7Yeso a zɛ́n adzaŋ za mbáʼ ɨbɛn kɨ́nə́ ntɨŋə a nchyɛ́ atú ɨlaŋ ɨbɛn bə wi, ntiʼ ná nɨgham nen a mbó bo bɨtsum ngə́: 8“Be ŋwɔn a ghon agho adiʼ a nɨzɔ́ʼ, o yen, koʼ ghɛn ntsi atú alaŋ a ɨbɛn bə wi ə. A chi be ngə́ bɨ kɨ ntɔŋ a ŋwɔn wu ngwi wu tse wa a tsanɨ agho,#14:8 Mɨgham mə nanɨ 25:6-7 9be a yen, mboŋ nɨzɔ́ʼ wa a tɔŋnɨ awən bɨbá, a mɨ yen a mbó gho, ɨ soŋ ngə́, ‹Lo atɨ́ nga alaŋ zen a mbó ŋwɔn wiŋ ə.› A nyom məwa, o mɨ ghɛn tsi atú alaŋ a ɨbɛn bə kɨʼnɨ nɨ adɨrətú ə. 10Lá be bɨ ghon agho adiʼ, ghɛn ntsi agho atú alaŋ a ɨbɛn bə kɨʼnɨ, taŋ nyom wa mboŋ anu a yenɨ, a chi soŋ a mbó gho ngə́, ‹Ɨson ɨghan, tsa ngɛn ntsi atú alaŋ a ɨbɛn bə wi ə›; a nyom məwa bɨ mɨ tiʼ kɔʼsɨ agho atɨ́ a ɨshi ŋwɔn tsum wa a tsinɨ adiʼ anu wa. 11Mbɨ́ʼ ngə́ ŋwɔn tsum wa a kɔ́ʼsɨ́nə́ atuəmbəm azhi, bɨ ghɨ shíʼsɨ́ ayi, á ŋwɔn tsum wa a shíʼsɨ́nə́ atuəmbəm azhi, bɨ ghɨ kɔ́ʼsɨ́ ayi ɛ.”#14:11 Matyo 23:12; Alukasɨ 18:14

12Yeso a tíʼ sóŋ a mbó mboŋndá wa a ghónɨ́ ayi lá ngə́, “Be o ngǎ mɨdzɨ a mbó ɨbɛn a zhwɨ́gɨ́nɨ́ kə a nkwɛfɔ, koʼ ghuŋ bɨson ɨbo kə ɨbɔmbɨma ɨbo kə ngwəgɨ ɨzo kə ngaŋ mbyɛn ndá ɨtso tsa nɨ ngaŋ nkáb ə — mbɨ́ʼ ngə́ bo ghɨ kɨ́ ghon agho ɨ byigɨ ɨshiʼ ə. 13Be o ndǒ ndzɨgɨ ɨbɛn, ghuŋ ɨfúm, bɨmbyinkɨnɨ, bɨtə́ngórə́kuʼ abɔʼnɨ bɨfɨgɨ ə; 14Ŋwi a mɨ fɔgɨ agho, mbɨ́ʼ ngə́ məba bo chi keʼ ɨshiʼ ɨgho byigə. Ŋwi a ghɨ tsɔ́ʼ afaʼ azo a njwi wa wɛrə a zhwemnɨnɨ ɨbɛn bə shiʼnɨ ə.”

Nɨgham nə Nanɨ mbɨ́ʼ Nɨdorɨ nə Wi ə

(Mat 22:1-10)

15Mbáʼ táʼ ŋwɔn wa a tsínɨ́ atú atɛkɨ a zúʼnɨ́ a məzen lá, ɨ soŋ a mbó Yeso ngə́, “Nɨdorɨ nə wi ghɨ tsí a mbó ɨbɛn ba bɨ ghɨnɨ shíʼtɨ́ tsi atú atɛkɨ a mu nɨdorɨ nɨ Nɨfɔ nɨ Ŋwi ə!”

16Yeso a sóŋ wəmbo ngə́, “Ŋwɔn tse a ghɨ́ ntsí ɨwu ntsi nɨ nga nɨdorɨ, ntɔŋ ɨbɛn ɨwu tsɛʼ a ɨnɔ ghe. 17Nkfu nɨdorɨ za ɨ ghɨnə nkúʼ a tsagɨ a ŋwɔn afaʼ ɨyi ngə́ á ghɛn ɨ soŋ a mbó ɨbɛn ba a ghónɨ́ lá ngə́, ‹Yenə, azúm atsum a tsinə a ɨshe!› 18Lá bo bíʼnɨ́, ɨ mɔ́ʼɔ́ mɔ́ʼɔ́, ɨ fɨ́ʼtɨ́ ɨnu tsa tsɨ chwanɨ awa ghe. Wu ntsambyi a sóŋ a mbó ŋwɔn afaʼ wa ngə́, ‹Ma zuŋ adiʼ a ɨshe zə tse, ma zagɨ ntsi nɨ ɨ ghɛn ləŋtə; ma ko a mɨlɨŋnɨ ngə́ ma mɨ kaʼ yiŋə.› 19Wu mɔʼɔ a sóŋ ngə́, ‹Ma zuŋ mbɔŋ ndyiʼ mɨshwom tsi nɨghúm ə, ma tsi lə a ndómnji ɨ ghɛn zhwəŋtɨ a tsɛrə ghe; ma buʼ mbó ma chi kaʼ yiŋə.› 20Wu mɔʼɔ a kwíʼtɨ́ ɨ soŋ ngə́, ‹Ma bvurɨ ndzɔʼ a ngwe ɨghə, ma lan, ma chi kaʼ yiŋə.›

21Ŋwɔn afaʼ wa a tíʼ mbə mbə́n ɨ fɨʼtɨ ɨnu tsiŋ ɨtsum a mbó tafaʼ ɨyi ɛ. Ntɔŋ tafaʼ ɨyi wa ɨ lwí tsɛʼ nkan, a tiʼ soŋ a mbó ŋwɔn afaʼ ɨyi wa ngə́, ‹Yaŋ ɨnye ɨzo ngɛn nɨ mɨndómɨnji mə wi abɔʼnɨ ɨbɔʼ ndóm a mu ntáʼmbagə wen, ntɔŋ ɨfúm, bɨmbyinkɨnɨ, bɨfɨgɨ, abɔʼnɨ bɨtə́ngórə́kuʼ ə.› 22Mɨmboŋnɨ ŋwɔn afaʼ wa a sóŋ ngə́, ‹Tə̧, ma ghɨnə tsɛʼ adzaŋ za o soŋnɨ lá, lá abárɨ́ a bvurɨ ntsi a nkwiʼtɨ ɨbɛn ə.› 23Tafaʼ wa a tíʼ sóŋ a mbó ŋwɔn afaʼ ɨyi wa ngə́, ‹Ghɛn nɨ mɨndómɨnji ma mɨ ghɛnə nɨ ɨfɔn abɔʼnɨ ɨbɔʼ ndóm, ntɔŋ ɨbɛn ngə́ á bɨ yen, taŋ á ndá ɨzan ɨ luŋə. 24Ma soŋ a mbó bən ngə́ kə́ tsɛʼ táʼ ŋwɔn wa bɨ tɔ́ŋnɨ́ lá a ghɨ zhwíʼtɨ́ azúm a nɨdorɨ azan za zə tse ghe!›”

Adzaŋ za a Tənɨ a Mbé Ngyɛʼ ə

(Mat 10:37-38)

25A ghɨnə mbé a nkfu tse mbáʼ ɨnɔ ɨbɛn ɨ kɨ́nə́ ngyenə bo bɨ Yeso, a bə́ŋ ayi ɨ soŋ a mbó bo ngə́, 26“Ŋwɔn wa a yenə a mbó me, a chi keʼ be ngyɛʼ ɨghan tɨgha a kɔŋ aghan ntsa adzaŋ za a kɔŋnɨ a ta ɨyi, kə a nɨmi ɨyi, kə ngwe ɨyi bo bɨ ɨbɔ ɨbyi, kə ɨbɔmbɨma ɨbyi bə mbáŋnɨ́ bo bə bəngye nkwiʼtɨ atuəmbəm azhi ɛ.#14:26 Matyo 10:37 27Ŋwɔn tsum wa mbáʼ a chi keʼ byɛʼ abaŋnɨ-baŋnɨ azhi ndzɔŋ a ndzum me, a chi keʼ be ngyɛʼ ɨghə.

28A nɨ ɨwa ŋwɔn nɨ bən wa a kwaʼtɨnɨ nkorɨ kɔ́ʼtɨ́ wa a se fómə́ nchyɛ̌ a tɨshe nkwaʼtɨ ndvuŋ ɨyi a njíɛ ngə́ nkáb ɨzhi ɨ kuʼnɨ a mɛtɨ wɛrə le? 29Be a tú lá be, a tum atsé nchi keʼ mɛtɨ ngvwu kɔ́ʼtɨ́ wa; ŋwɔn tsum wa a zɛnɨ anu za a funɨ lá, a mɨ we ayi ɛ. 30Bɨ mɨ tiʼə soŋənə ngə́, ‹Ŋwɔn wen a bíʼnɨ́ ngvwǔ ndá nchi keʼ ɨfaʼ ɨyi mɛtə!›

31Be ɨfɔ a tsi nɨ ngěn a ntso nɨ bɨgwe nchwuʼ tsi nɨghúm ɨ tokɨ a ɨfɔ wa a tsinɨ nɨ bɨgwe nchwuʼ mɨghúm mɨmbá, a tsi nɨ nchyɛ a ɨshe ɨ kwaʼtɨ ngə́ zɨə tsi nɨ adaʼ za a kuʼnɨnɨ a ntókɨ́ ɨfɔ wu mɔʼɔ wa. 32Be a be ngə́ a se nɨ zɛrə tsi, a mɨ tyigɨ bɨlo bɨ ntom a nye ɨfɔ wu mɔʼɔ wa, ɨ buʼtɨ mbó ngə́ á bɨ kyaŋtɨ mbɔnɨ mbáʼ a bvurɨnɨ ntsi a nye abaŋ zə sa ghe.” 33Ndəŋndəŋ Yeso a lwɨ́gɨ́nɨ́ ngə́, “Kə́ tsɛʼ táʼ ŋwɔn nɨ bən a chi keʼ be ngyɛʼ ɨghan tɨkə a nyɛʼtɨ azúm atsum za a tsinɨ nɨ zɛrə ghe.”

Fɨngwáŋ fɨ tə́ Ndə́mə́ ghe

(Mat 5:13; Mar 9:50)

34“Fɨngwáŋ bɔŋə, lá be fɨ shwetɨ ntú bɨŋə ləmnə ka ndómnji tse be ayi ɨwu mbáʼ be bɨ ghɨ fɨ bə ndəm wədiʼ ə. 35Ka fɨ byi mbɔŋ ayi a mbó ɨshe kə nɨkfúrɨ́ nɨ anyagɨ ə; bɨ tiʼ nyɛʼə. Zuʼnə lá, mbáʼ be nɨ tsi nɨ ɨtoŋnɨ ə!”

Currently Selected:

Alukasɨ 14: MNT

ማድመቅ

Copy