Alukasɨ 15

Mbyindzɨ za ɨ Byenə

(Mat 18:12-14)

1Njwi tse wa ngaŋ nkwárɨ́ ashɛbɨ tsə ghaʼnɨ abɔʼnɨ ngaŋ ngɨ mɨbvu yénɨ́ a njwíʼtə́ a mbó Yeso, 2bə Farisao bo bɨdiʼ bɨ Nyɔngɔŋ bíʼnɨ́ nzhwúʼnə́ ɨ sóŋə́ ngə́, “Ŋwɔn wen a kwárɨ́ ngaŋ ngɨ mɨbvu nkə́ ndzɨ́ə bo bo ghe!” 3Yeso a tíʼ ná nɨgham nen a mbó bo ngə́:

4“Lɔgɨ ngə́ ŋwɔn nɨ bən a tsi nɨ mbyindzɨ táʼ nkɨ, táʼ a fu ɨwu mbye – a mɨ ghɨ ɨ nə́ le? A nyɛʼtə a tsa mɨghúm mi nɨbvuʼə nɨ ntsɔb nɨbvuʼə atú a ntáʼ ngěn ndǒ a táʼ wa a byenɨ lá ɨ kuʼnɨ nkfu za a zɛnɨ a zɛrə ghe. 5A be ngə́ a zɛn a zɛrə, a tsɔʼ ngwabɨ a zɛrə a mbyɛʼnɨ zɨ, ndórə́ ghe. 6A be ngə́ a kwɛn a njwuʼ, a tɔŋ bɨson ɨbyi abɔʼnɨ ngaŋ nɨbarə ɨchi ɨ soŋ a mbó bo ngə́, ‹Bɨgɨnə dorɨkə, mbɨ́ʼ ngə́ ma ze mbyindzɨ ɨzan za ɨ kɨ byenə!› 7Ndəŋndəŋ, ma sóŋə́ awɨŋ ə, nɨdorɨ nə wi ghɨ tsí a fɔməbvurə mbɨ́ʼ a táʼ ŋwɔn wa a bəŋnɨ ntəm ɨyi a nye mɨbvu ɨmyi ntsi a bagɨ Ŋwi ntsa ɨbɛn mɨghúm mi nɨbvuʼə nɨ ntsɔb nɨbvuʼə ba ka bɨ tsi awa nɨ mbəŋ mɨntəm ɨma a nye mɨbvu ɨma ɨ tsi a bagɨ Ŋwi ə.”

Nɨgham nə Nanɨ mbɨ́ʼ Nkáb Atɨŋə za ɨ Byenə

8“Kə a nɨ wa mangye, wa a tsinɨ nɨ nkáb tsə́ŋtsə́ŋ nɨghúm, mbáʼ be táʼ a byé, a keʼ chwuʼ nkaʼ, ndzɛgɨ ndá ntiʼə ndǒ tsɛʼ abɔbɔ nkuʼnɨ nkfu za a zɛnɨ nkáb za le? 9A be ngə́ a zɛn a zɛrə a tɔŋ bɨson ɨbyi abɔʼnɨ ngaŋ nɨbarə ɨchi ɨ soŋ ngə́, ‹Bɨgɨnə dorɨkə mbɨ́ʼ ngə́ ma ze nkáb ɨzan za ɨ kɨ byenə!› 10Ndəŋndəŋ, ma soŋə awɨŋ ə, bɨtsen bɨ ndá bɨ Ŋwi dórɨ́kə́ mbɨ́ʼ a táʼ ŋwɔn ngɨ mɨbvu wa a bəŋnɨ ntəm ɨyi a nye mɨbvu ɨmyi ntsi a bagɨ Ŋwi ə.”

Nɨgham nə Nanɨ mbɨ́ʼ a Mɔn Mbáŋnɨ́ wa a Byenə

11Yeso a ghɛ́n nɨ mbyi ɨ soŋ ngə́, “Ŋwɔn tse a tsí ɨwu, ntsi nɨ ɨbɔ mbáŋnɨ́ bi bɨbá ghe. 12Azɔŋəndzum za a sóŋ a mbó ta ɨyi ngə́, ‹Tə̧, yɛbtɨ ɨdzúm ɨtso nga azə abagɨ a mbó me ghe.› Tə̧ wa tíʼ ngyɛbtɨ ɨdzúm ɨchi a tɨtərɨ bo bɨbá ghe. 13A ndzum njwi tsɨ tse ndzɔŋ ndzum wa a ghótɨ́ ɨdzúm ɨchi ɨtsum ɨ fentɨ ngantɨ ngɛn ayi alaʼ zə tse zə sa, ɨwu a ghɔ́ʼ azúm atsum tsɛʼ tɨ alə̌tú ə. 14A mɛtɨnə azúm atsum nkwánkɨ́, mɨchwinɨ a kon alaʼ wa; a tiʼə númə́ nchwáŋnə́ ghe. 15A tíʼ ngɛn a faʼə a mbó ŋwɔn tse ghe. Ŋwɔn wa a tságɨ́ ayi afɔn zɨ ngə́ á ghɛn ntsi ndzɨ́gə́ bəkfunyam ɨbyi ɛ. 16A kə́ ndǒ ndzɨ mɨdzɨ mɨ bəkfunyam ba lá bɨ keʼ a mɛrə wəmbo ghaə. 17Atú azhi a bənə ntɔŋ, a wiʼtɨ ngə́, ‹Ngaŋ afaʼ ta ɨghan bɨtsum tsi nɨ mɨdzɨ mə dzɨnɨ, ɨ lɛn a mə mɔʼɔ, lá ma wen ɨghan nkfǒ a mbó nji ɛ! 18Ma mɨ lo atɨ́ ɨ ghɛn a mbó ta ɨghan, ɨ soŋ wəmbo ngə́, ta ɨghan, ma fə anu a ɨshi ɨmɨgɨ Ŋwi nkɨ fə a ɨshi gho; 19ka ma nyaʼ mbə ndanɨ nkuʼnɨ aghan ngə́ be bɨ tɔŋ aghan nɨ mɔn ɨgho wu mbáŋnɨ́; lɔgɨ aghan tso táʼ ŋwɔn afaʼ ɨgho ghe.› 20Ma lan, a ló atɨ́ mbə chwɨ́gɨ́ a təbɨŋə-nɨ-ndzum ngɛn a mbó ta ɨyi ɛ.

A bvúrɨ́ nəghagɨ mbáʼ ta ɨyi a zɛ́nɨ́ ayi nko a mɨlɨŋnɨ, ngɛn nchwa ayi njiʼtɨ a nɨgo zɨ nchwɨgɨ ayi ɛ. 21Mɔn ɨyi wa tíʼ soŋ wəmbo ngə́, ‹Ta ɨghan, ma fə anu a ɨshi ɨmɨgɨ Ŋwi nkɨ fə a ɨshi gho; ka ma nyaʼ mbə ndanɨ nkuʼnɨ aghan ngə́ be bɨ tɔŋ aghan nɨ mɔn ɨgho wu mbáŋnɨ́ ə.› 22Lá ta ɨyi a sóŋ a mbó ngaŋ afaʼ ɨchi ngə́, ‹Nɨ waŋnɨ ngɛn ndɔgɨ a tɔgɨ ɨghan wa a bɔŋnɨ ntsa bɨtsum lá, ngwəgɨ wə ɨnye; ngwəgɨ a karɨ a nye shwi abó ɨyi; nɨ ngobɨ wə mɨku ə; 23ngyen nɨ təkɔʼ mɔn nkɔʼndzum wa nkyem, á bɨgɨnə dzɨ ngɨ nɨdorɨ ə! 24Mbɨ́ʼ ngə́ mɔn ɨghan wu mbáŋnɨ́ wen a kfô, lá tɨtsɔŋnɨ a bə ntsi ntɨŋ ə; a byê, lá tɨtsɔŋnɨ bɨ bənə ndzɛn ayi ɛ.› Nɨdorɨ na tíʼ mbiʼnə.

25Ɨ bə ghɛn ɨwu, mɔn mbáŋnɨ́ wu ndəmə wa a tsí afɔn ə. A bənə tɨ kwě, mbáʼ a yénə fátɨ́ njwuʼ ɨza, ndzuʼ bɨ buʼnɨ ɨkom, ɨbɛn bɨŋənə ghe. 26A tíʼ ntɔ́ŋ a táʼ ŋwɔn afaʼ wa wu tse mbitɨ ayi ngə́, ‹A tsi anu ake ɨghə?› 27Ŋwɔn afaʼ wa a chwɨ́gɨ́ ngə́, ‹Mɨma ɨgho wu mbáŋnɨ́ a bə nkwɛn, ta ɨgho a tiʼ njwitɨ a təkɔʼ bɨ mɔn nkɔʼndzum mbɨ́ʼ ngə́ a bə nkwɛn ɨ shiʼnɨ ə.›

28Ndi ɨyi wa a lánɨ́ ndwi ntɔŋ tsɛʼ nkan, nton ayi a nkúŋə́ a ndá; ta ɨyi a tiʼ ntsa ngyen ndɛtɨ ayi ngə́ á kon a mu ndá ə. 29Lá a chwɨ́gɨ́ a mbó ta ɨyi ngə́, ‹Ze azo, ma faʼnə a mbó gho atú ɨlom tsiŋ ɨtsum, ma láʼnə nkaʼ atú a mbó gho tɨŋə. O gha ake a mbó me le? Kə́ kə́ tsɛʼ mɔn mbyi á ma ghɨ nɨdorɨ ɨwu bɨgɨ bɨ bɨson ɨbə! 30Lá mɔn ɨgho wu mbáŋnɨ́ wen a tsəŋ ɨdzúm ɨtso ɨtsum bo bɨ ɨkwarɨ ə, a bə nkwɛn, o zhwitɨ a təkɔʼ bɨ mɔn nkɔʼndzum wəmbo ə!› 31Ta ɨyi a chwɨ́gɨ́ ngə́, ‹Mɔn ɨghan, o tsi agho ɨghan bɔgə nkfu ɨtsum, azúm atsum za ma tsinɨ nɨ zɛrə a nɨ azo ə. 32Lá bɨgɨnə ló ndzágɨ́ ntsí nɨ ngɨ nɨdorɨ ɨ dorɨkɨ, mbɨ́ʼ ngə́ mɨma ɨgho wu mbáŋnɨ́ a kɨ kfô, lá tɨtsɔŋnɨ a tsi ntɨŋ ə; a kɨ byê, lá tɨtsɔŋnɨ bɨ bə ndzɛn ayi ɛ.›”

Currently Selected:

Alukasɨ 15: MNT

ማድመቅ

Copy