Ɨfaʼ 2
2
Azhwi zə Fɛmnɨ a Shiʼ Atú Ɨbɛn ba bɨ Nɨ́ŋnɨ́ Mɨntəm ɨma a nye Ŋwi ə
1Njwi nɨdorɨ nɨ bə Yuda za bɨ kɨ́nə́ ntɔ́ŋə́ ngə́ Bɛntɛkɔsɨ ghɨnə nkúʼ, ɨbɛn ba bɨ nɨ́ŋnɨ́ mɨntəm ɨma a nye Ŋwi ghótɨ́ táʼ adiʼ ə. 2Bo vwúkɨ́ ndzúʼ azɔrɨ zə tse za a lónɨ́ a fɔməbvurə ɨ fi a kɨfɛrɨ wu ntɨŋ ə. Azɔrɨ za a lwɨ́gɨ́ ndá za tsum za bo shíʼtɨ́nɨ́ ntsi wə mu lá. 3Bo zɛ́n azúm zə tse za a fínɨ́ ndwa ɨmugɨ ə. A yɛ́btɨ́ ayi ntɛmkɨ atú ŋwɔn tsum ɨ mɔ́ʼɔ́ mɔ́ʼɔ́ ghe. 4Bo tíʼ ndón nɨ Azhwi zə Fɛmnɨ, ntiʼ mbiʼnɨ ngǎm mɨgham mɨ ɨtóm tsɨ daŋ adzaŋ za Azhwi zə Fɛmnɨ za a ghɨ́nɨ́ ngə́ á bo ghamə.
5A nkfu məwa, bə Yuda kə́ nchyɛ̌ a Yerosalɛm mbe ɨbɛn ba bɨ kɨ́nə́ ngúʼsə́ a Ŋwi nkfu tsum, ndo nɨ ɨdiʼ nɨ ɨdiʼ a mu mbyi tsum ə. 6Mbáʼ bɨ zúʼnɨ́ azɔrɨ məzen lá, ɨnɔ ɨbɛn ɨ yén ngótɨ́ adiʼ wa ɨbɛn ba bɨ nɨ́ŋnɨ́ mɨntəm ɨma a nye Ŋwi ghótɨ́nɨ́ ɨwu ə. A kɨ́ʼnɨ́ awa mbɨ́ʼ ngə́ ŋwɔn nɨ bo tsum a zúʼ adzaŋ za ɨbɛn ba bɨ nɨ́ŋnɨ́ mɨntəm ɨma a nye Ŋwi kɨ́nə́ ngǎm ɨni nɨgham ə. 7Mbáʼ a kɨ́ʼnɨ́nɨ́ awa nkɨ mbe anu zə tsanɨnɨ lá, bo bítɨ́ ngə́, “Ɨbɛn ben bɨtsum ba bɨ ghamnə adzaŋ wen lá a se ɨbɛn bɨ Galili be le? 8A tiʼ ntsa lá ɨ nə́ ngə́ bɨgɨ bɨtsum zúʼə bo ghamnɨ mɨgham mɨ alaʼ ɨmɨgɨ le? 9Bɨgɨ lo a Batya, Mɛdia abɔʼnɨ Elam; ndo a Mesobotemia, Yudiya abɔʼnɨ Kabadosha; ndo a Bontusɨ abɔʼnɨ Esha, 10ndo a Frigya bo Bamfilya, ndo a Gyibto abɔʼnɨ mbuʼ Libya a mbyɛn Sirin ə. Bɨgɨ bə mɔʼɔ lo a Roma ghe. 11Bɨgɨ bə mɔʼɔ nɨ bə Yuda abɔʼnɨ ba a se bə Yuda be ba bɨ bəŋnɨ mɨntəm ɨma a ngúʼsɨ́ Ŋwi a nye mbɔm bə Yuda, bɨgɨ bə mɔʼɔ lo a Kritɨ abɔʼnɨ Arebya ghe. Lá bɨgɨ bɨtsum zuʼ bo ghamnɨ mɨgham mɨ alaʼ ɨmɨgɨ mbɨ́ʼ ɨnu tsɨ wi tsa Ŋwi a ghɨnə ghe!” 12A kɨ́ʼnɨ́ awa, ɨtú ɨtsa kɨ mbvurɨ, bo tiʼə mbítə́ awa bo nɨbo ngə́, “Məzen a diʼ lá ngə́ ke le?”
13Lá bə mɔʼɔ wérɨ́ ɨbɛn ba bɨ nɨ́ŋnɨ́ mɨntəm ɨma a nye Ŋwi lá, ɨ sóŋə́ ngə́, “Ɨbɛn biŋ banɨ mɨluʼ ə!”
Nɨgham nɨ Bita a mbó Ɨnɔ Ɨbɛn wa
14A nchwɨ́gɨ́ ɨbɛn ba bɨ wérɨ́nɨ́ awa lá, Bita abɔʼnɨ ntóm Yeso tsə mɔʼɔ tsa nɨghúm ntsɔb mɔ́ʼɔ́ tɛ́m atɨ́, Bita tiʼ mbiʼnɨ ngamə a mbó ɨnɔ ɨbɛn wa nɨ nji zɨ ntən ngə́: “Ɨbɔmbɨma ɨban bə Yuda abɔʼnɨ bən bɨtsum ba bɨ tsínə́ a Yerosalɛm, nɨ zhwiʼtɨ tsɛʼ ɨ shiʼnɨ ɨ shiʼnɨ á ma fɨʼtɨ awən nɨ anu za məzen a diʼnə. 15Ka ɨbɛn biŋ banɨ a wa mɨluʼ adzaŋ za nɨ wíʼtɨ́nə́ lá. A bvurɨ mbe tsɛʼ bɨnyom bi nɨbvuʼə a tənjwi ɛ. 16Anu zen za a funɨ lá, a fu lá tsɛʼ adzaŋ za ntom Ŋwi Yowe ɨ kwɛ́nɨ́ sóŋ ngə́:
17‹Ŋwi a soŋ ngə́: nə nɨ anu za ma mɨ ghɨ a nye njwi tsɨ lwitɨnɨ tsa:
Ma mɨ tsagɨ Azhwi azan a mbó ŋwɔn tsum ə.
Ɨbɔ ɨbən bə mbáŋnɨ́ abɔʼnɨ bə bəngye ghɨ chwítɨ́ nkən ɨghə; ɨbɔ mbáŋnɨ́ ɨbɨŋ mɨ lye ndzɛm nəzhwɨgɨnɨ, á bɨtankaŋ bə mbáŋnɨ́ ɨbɨŋ lye ndzɛm ə.
18Tse a nkə, a nye njwi mətsa, ma mɨ tsagɨ Azhwi azan a mbó ngaŋ
afaʼ ɨtsan tsə mbáŋnɨ́ abɔʼnɨ tsə bəngye, á bo ntíʼə nchwítɨ́ nkən ɨghə.
19Ma ghɨ ghɨ ɨnu tsɨ yerɨnɨ-yerɨnɨ a nɨkaŋ, atɨ́ ɨ kɨ ghɨ ɨnu tsɨ tsanɨnɨ atuəshe ɨghə.
Ma ghɨ maʼ ntso taŋ á ɨmugɨ, alɛm abɔʼnɨ fɨndyiʼ fa fɨ fɨ́ŋnə́ ngə́ tsɨŋ chyɛ;
20nɨnyom a ghɨ bəŋ ɨ tiʼə fɨŋənɨ ɨ fɨŋnɨ,
ɨ bənkɨ a saŋ á ntiʼə mbáŋə́ tso alɛm, mbɔŋə njwi za Maʼmbyí a lo bə yen, ɨ yiŋə. Njwi məzen a nɨ njwi zɨ ngwi za ɨ tsanɨ njwi tsɨ wi ɨtsum ə.
21Ɨ tiʼ zɔŋ, Maʼmbyí ghɨ loŋ a ŋwɔn tsum wa a lɔntɨnɨ akwatɨ a mbó zɨə.›
22Ɨbɔmbɨma ɨban bə Izrai, á nɨ zuʼ aghə! Yeso ŋwɔn Nazarɛ a bé ŋwɔn wa Ŋwi a díʼnɨ́ mɨtən ɨmyi mə fɔməbvurə a mbó bən ntsa a ndzum ɨnu tsɨ yerɨnɨ-yerɨnɨ abɔʼnɨ ɨnu tsɨ tsanɨnɨ tsa zɨə a ghɨ́nɨ́ ntsa a ndzum wɛrə ghe. Bɨŋ mboŋ nɨ zhi a məzen mbɨ́ʼ ngə́ ɨnu tsiŋ ɨtsum fú lá ɨghan a tɨtərɨ bɨŋ ə. 23Ndzɔ̌ŋ akyaŋtɨ za Ŋwi a kwɛ́nɨ́ ndɛ́n a ɨshe, Ŋwi a tsɔ́ʼ a mu ntəm zɨ ngə́ á bɨ ghɨ́ mbəŋ ayi nga a mbó bən; á nɨ zhwitɨ ayi ntsa a ndzum adzaŋ za nɨ nyɛ́ʼtɨ́nɨ́ mbáŋnɨ́ tsə ngɨ mɨbvu kwemtɨ ayi atɨ abaŋnɨ-baŋnɨ ə. 24Lá Ŋwi a zhwémnɨ́ ayi a mbó nɨvwo, nɨvwo keʼ bə mbvurɨ ntsi nɨ mɨtən mə tse atú zɨ, mbɨ́ʼ ngə́ ndóm sé tsi wa nɨvwo chínɨ́ chwa ayi tso ŋwɔn atsáŋ ə. 25Mbɨ́ʼ ngə́ Ɨfɔ Devidɨ a ghám mbɨ́ʼ ayi ngə́:
‹Ma zɛ́n a Maʼmbyí a mbyi me nkfu tsum; wɛrə a tsi a mbyɛn me, anu zə tse a chi keʼ aghan bə nghágə́.
26Ma lan, ɨnye ɨzə sáŋnə́ tsɛʼ saŋnɨnɨ, adzaŋ za ma ghamnə ɨnan lá.
A nkwiʼtə, ma baʼtɨ mbe be ŋwɔn mɨsɔŋ a ntsu wa a ghɨnɨ kfó lá, ma mɨ tiʼə zhwiʼtɨnə a mu ntsiŋə nɨ ntəm tsum
27mbɨ́ʼ ngə́ gho Ŋwi, o mɨ koʼ aghan wáŋ alaʼ bɨkfú;
o mɨ koʼ nyɛʼtɨ á ngaŋ afaʼ ɨzo za ɨ faʼnə nɨ ntəm ɨyi ɨtsum bye a mu nɨshe ghe.
28O diʼnə aghan nɨ ɨbɔʼ ndóm tsa tsɨ tsagɨnɨnə aghan a mu ntsi ntɨŋ ə.
Ma tsi ɨ fátɨ́ agho lá ma tsi nɨ nɨdorɨ nə wi ə.›
29Ɨbɔmbɨma ɨban bə Izrai, ma mɨ zagɨ gham asaŋəsaŋ a mbó bən mbɨ́ʼ a Ɨfɔ Devidɨ wa a bénɨ́ ta ɨwɨgɨnə wu kɔ́ʼɔ́nguʼ wa bɨ zhínɨ́ ayi tsɛʼ a nkan lá. A kfó, bɨ twəŋ ayi ɛ. Nɨshe ɨni tsi a tɨtərɨ bɨgɨnə ɨ kɔʼ kuʼ ɨ sɨŋə ghe. 30Wɛrə a bé ntom Ŋwi, nkɨ nji anu za Ŋwi a káʼnɨ́ ayi nɨ zɛrə ghe: Ŋwi a kán ngə́ zɨə láʼ ghɨ a táʼ ŋwɔn ɨlə̌ ɨyi a nye ɨfɔ, tso mbáʼ zɨ Devidɨ a bénɨ́ lá. 31Devidɨ a zɛ́n anu za Ŋwi a tsínɨ́ ɨ ghɨ ghɨ, ntiʼ ngam mbɨ́ʼ a Wa bɨ Zɔ́ʼnɨ́ wa, wa a ghɨnɨ zhwémnɨ́, mbáʼ a sóŋnɨ́ ngə́:
‹Bɨ sé ayi wáŋ alaʼ bɨ nɨvwo; mbəmnye ɨzhi sé bye a mu nɨshe ghe.›
32Ŋwi a zhwemnɨnə a Yeso məwen a mbó nɨvwo, bɨgɨnə bɨtsum kɨ mbe bətɛmə-ndzě mbɨ́ʼ anu məziŋ ə. 33Ŋwi, Ta ɨyi, a tsɔ́ʼ ayi nkɔʼ ngɛn nɨ zɨ a bagɨ abó zɨ zə maʼə ghe. Yeso a kɨnə nkɨ nkwarɨ Azhwi zə Fɛmnɨ a mbó Tarɨ, adzaŋ za wɛrə a káʼnə́. Za nɨ zɛ́nə́ tɨtsɔŋnɨ nkə́ ndzúʼə lá, a nɨ azúm zə ghanɨ zə Yeso za a ghanɨ a mbó bɨgɨ ə. 34A sé Ɨfɔ Devidɨ bé wa a kɔ́ʼnɨ́ ngɛ́n a fɔməbvurə, Ɨfɔ Devidɨ a báŋnɨ́ sóŋ ngə́:
‹Maʼmbyí a sóŋ a mbó Maʼmbyí ɨghan ngə́: tsi ɨghan a bagɨ abó me zə maʼə
35ɨ kɔʼ kuʼ nkfu za ma ghɨnɨ zumtɨ ngaŋ kɨban ɨtso ɨ ghɨ awa a nye atɛkɨ a mɨku azo ə.›
36Ɨbɛn bə Izrai bɨtsum, tiʼ ntsi nɨ njiɛ a nkənu ngə́ Yeso məwen, wa nɨ kwémtɨ́nɨ́ atɨ abaŋnɨ-baŋnɨ, a nɨ wɛrə wa Ŋwi a ghɨnə a nye Maʼmbyí nkɨ mbe Wa bɨ Zɔ́ʼnɨ́ wa!”
37Mbáʼ ɨbɛn ba zúʼnɨ́ anu za Bita a sóŋnɨ́ lá, tsɨ mɔ́mtɨ́ mɨntəm ɨma, bo bitɨ a mbó zɨ abɔʼnɨ ntóm Yeso tsə mɔʼɔ tsa ngə́, “Ɨbɔmbɨma, bɨgɨnə mɨ ghɨ lá ɨ nə́ le?”
38Bita a chwɨ́gɨ́ a mbó bo ngə́, “Ŋwɔn nɨ bɨŋ tsum a tsi nɨ nyɛʼ mɨbvu ɨmyi, ɨ tiʼ kwarɨ nkyi nɨ ɨkum Yeso Kristo, taŋ á Ŋwi a tiʼ ndɨgɨnɨ mɨbvu ɨmyi; ɨ tiʼ kɨ gha Azhwi zə Fɛmnɨ a mbó bən, zɛrə za a lá azúm zə ghanɨ za wɛrə a káʼnɨ́ lá. 39Ŋwi a kaʼ nga Azhwi zə Fɛmnɨ azhi lá a mbó bən abɔʼnɨ ɨbɔ ɨbən nɨ ŋwɔn tsum wa aghagɨ azhi a sagɨnɨ tsɛʼ nkə, ŋwɔn tsum wa Maʼmbyí Ŋwi ɨwɨgɨnə a tɔ́ŋnə́ ngə́ á yen a mbó zɨə.”
40Bita a ghám mɨgham mə ghaʼnɨ mə mɔʼɔ a mbó bo nkɨ ndɛgɨ awa ɨ sóŋə́ ngə́, “Loŋnə ɨtumbəm ɨtsən a mbó nɨwə̌ nɨ abɨgəntəm niŋ ə!” 41Bo bə ghaʼnɨ nɨ́ŋ mɨntəm ɨma a nye nkən ɨyi, nkɨ ntiʼ nkwarɨ nkyi tsɛʼ bo bɨtsum ə. Ɨbɛn tso 3,000 kwíʼtɨ́ ngǒtə ɨza njwi məwa. 42Bo tíʼ nde nkfu ɨza tsum a ngyɛ́ʼ a mbó ntóm Yeso, mbómnkə́ táʼ adiʼ, ndzɨ́ə mɨdzɨ ɨma táʼ adiʼ nkə́ ntsáʼtə́ a Ŋwi ə.
Ntsi mbyi a Tɨtərɨ Ɨbɛn ba bɨ Nɨ́ŋnɨ́ Mɨntəm ɨma a nye Ŋwi ə
43Ŋwi a ghɨ́ ɨnu tsɨ tsanɨnɨ tsə ghaʼnɨ abɔʼnɨ tsə yerɨnɨ-yerɨnɨ tsə ghaʼnɨ fuənə ntsǎ a ndzum ntóm Yeso, ŋwɔn tsum a tíʼ nkɨ́ ntsí nɨ abɔgɨtɨ ə. 44Ɨbɛn bɨtsum ba bɨ nɨ́ŋnɨ́ mɨntəm ɨma a nye Ŋwi ghɛ́n nɨ mbyi mbómnkə́ táʼ adiʼ nkə́ ngyɛ́btɨ́ ɨdzúm tsa bo tsínɨ́ nɨ tsɛrə ŋwɔn nɨ ŋwɔn ghe. 45Bo kə́ fǐŋ ɨdiʼ ɨshe ɨtsa abɔʼnɨ ɨdzúm ɨtsum tsa bo tsínɨ́ nɨ tsɛrə, ngyɛ́btɨ́ nkáb za bo fénɨ́ ɨwu a tɨtərɨ bo bɨtsum ndzɔ̌ŋ anu za ŋwɔn tsum a kɨ́nə́ ndǒ ngɨə ghe. 46Nɨ njwi nɨ njwi bo kə́ ngótə́ a mu Ndáŋwi zɨ Ngwi ə. Bo kə́ ndzɨ́ə táʼ adiʼ nɨ njwuʼ ɨtsa a mu nɨdorɨ abɔʼnɨ ɨshiʼtə nɨ ɨnye a ɨshe, 47mbóntə́ a Ŋwi, ŋwɔn tsum a tíʼə nkə́ nkɔ́ŋə́ awa ghe. Maʼmbyí a kə́ nkwiʼtɨ ɨbɛn ba bɨ kɨ́nə́ ndóŋə́ awa a nye ngǒtə ɨza nɨ njwi nɨ njwi ɛ.
© 2023, CABTAL
