Ɨfaʼ 1
1
1O Tiofilo:#1:1 Alukasɨ 1:1-4
A mu aŋwaʼnɨ azan zə ntsambyi za ma ŋwáʼnɨ́nɨ́ a mbó gho lá, ma ŋwáʼnɨ́ lá mbɨ́ʼ ɨnu ɨtsum tsa Yeso a ghɨ́nɨ́ nkɨ ndíʼ ndɔgɨnɨ nkfu wa a bíʼnɨ́nɨ́ afaʼ azhi 2ɨ kɔʼ kuʼ njwi za Ŋwi a lɔ́gɨ́nɨ́ ayi nkɔ́ʼ ngɛ́n nɨ zɨ a fɔməbvurə ghe. Bɔŋ á wɛrə a ndɔ́gə́ ayi a fɔməbvurə, Yeso a ghá atɨgɨtɨ ntsa a ndzum adaʼ Azhwi zə Fɛmnɨ a mbó ɨbɛn ba a kwɛ́nə ntsɔʼ tso ntóm ɨchi ɛ. 3Mbáʼ Yeso a zɛ́nɨ́ ngɨ́ʼ, nkfo, mbə nzhwemnɨ a mbó nɨvwo lá, atú njwi 40 wɛrə a kə́ fúə a ɨshe a tɨtərɨ ntóm Yeso nkfu tsə ghaʼnɨ a nye mɨndóm ma mɨ díʼnɨ́ ngə́ tsɛʼ a nkənu wɛrə a tsí atú ntɨŋə. Bo zɛ́n ayi, a kɨ ngamnɨ bo bo mbɨ́ʼ anu a nɨfɔ nɨ Ŋwi ə. 4A njwi tse za a tsínɨ́ bo bo ndzɨ́ə, a ghá ntɨgə zen a mbó bo ngə́: ‘‘A nɨ keʼ a Yerosalɛm fu, lá á nɨ ntsíŋə́ azúm zə ghanɨ za Ta ɨghan a káʼnɨ́ awən nɨ zɛrə, za ma ghámnɨ́ mbɨ́ʼ a zɛrə a mbó bən lá.#1:4 Alukasɨ 24:49 5Yoane a kə́ ngǎ nkyi lá nɨ nkyi ngəŋ ə, lá a ndzum njwi tsɨ tsɛrə a nɨsháŋnɨ́, Ŋwi a mɨ tsagɨ Azhwi zə Fɛmnɨ á ntíʼə nchyɛ̌ a mu ɨnye bɨŋ ə.’’
Ŋwi a Lɔgɨ a Yeso Nkɔʼ Ngɛn nɨ zɨ a Fɔməbvurə ghe
(Mar 16:19-20; Alu 24:50-53)
6A nkfu za Yeso bo bɨ ntóm Yeso tsínɨ́ adiʼ ziə mɔ́ʼɔ́, bo bítɨ́ ayi ngə́, “Maʼmbyí, tɨtsɔŋnɨ, o mɨ bvugɨ bə Roma, ɨ ghɨ á bə Izrai sáʼə ɨtumbəm ɨtsa bo mboŋ le?”
7Yeso a sóŋ a mbó bo ngə́, “A tsi Ta ɨghan ntsi nɨ mɨtən a ntsɔ́ʼə a mu ntəm zɨ nkfu za ɨnu tsiŋ mɨ be, a keʼ adiʼ azən be a njí nyom wa tsɨ ghɨnɨ bé ə. 8Lá a nkfu za Azhwi zə Fɛmnɨ a ghɨnɨ shíʼ atú bən, a ghɨ gha adaʼ a mbó bən, á nɨ be ɨbɛn ba bɨ númnə́ sóŋə́ anu azan a Yerosalɛm, a mu Yudiya tsum nɨ Samaria, ɨ ghɛn kuʼ a ndwitɨ atuəshe ə.” 9A mɛtɨnə a sóŋ məzen, Ŋwi a lɔgɨ ayi a fɔməbvurə, ntóm Yeso tsa tɛm ndyiŋə ayi, mbaʼ ɨ nkubɨnɨ ayi, bo chi keʼ ayi bə nkwiʼ ndze.
10Mbáʼ bo bvúrɨ́ ntɛ́m ɨwu, njigɨ ɨmɨgɨ ɨma a nɨkaŋ adzaŋ za Yeso a kɨ́nə́ kɔ́ʼə ngěn, ɨbɛn bə tse bi bɨbá ngwəgɨ awa a mu ɨtsɛʼ tsɨ fú shwə́gɨ́nɨ́ ntɛm a mbyɛn bo 11ɨ soŋ ngə́, “Ɨbɛn bɨ Galili, nɨ tɛm adiʼ wa ndyǐŋ atɨ́ lá mbɨ́ʼ ake le? Yeso wen wa Ŋwi a lɔgɨnɨ a mbó bən nkɔʼ ngɛn zɨ wɛrə a fɔməbvurə lá, a ghɨ bə yen a mbó bən tsɛʼ a nye ndóm wa nɨ zɛnɨ a kɔ́ʼə ngěn lá.”
Matyasɨ a Lɔgɨ Adiʼ a Yudasɨ ə
(Mat 27:3-10)
12Ntóm Yeso tíʼ ndo atú Ntáʼ Olif wa mbə mbən a Yerosalɛm ə. A ndǒ ɨwu ɨ ghɛn a Yerosalɛm a bé tso akum a marɨ ə. 13Bo yenə nkon a Yerosalɛm, nkɔʼ ngɛn a mu ndá nɨkaŋ a mu kwasɨ ndá wa bo kɨ́nə́ nchyɛ̌ ɨwu lá. Bo bé lá: Bita, Yoane, Jemsɨ, Andɨrɨya, Firɨbɔ, Tɔməshi, Batəloma, Matyo, Jemsɨ mɔn Afasɨ, Samɔn Nkɔŋəlaʼ abɔʼnɨ Yudasɨ mɔn Jemsɨ ə. 14Bo bɨtsum, nɨ táʼ ntəm, kə́ ngótə́ nɨ nkfu nɨ nkfu a ntsaʼtɨ Ŋwi bo bɨ bəngye ba abɔʼnɨ Mɛrɨ nɨmo bɨ Yeso abɔʼnɨ ɨbɔmbɨma bɨ Yeso bə mbáŋnɨ́ ə.
15A ndzum njwi tsɨ tse a nɨsháŋnɨ́, ɨbɛn ba bɨ nɨ́ŋnɨ́ mɨntəm ɨma a nye Yeso wɛ́m ngǒtə ghe. Ɨbɛn bɨtsum ba bɨ tsínɨ́ ɨwu bɨ bé tso 120 ghe. Bita a ló atɨ́ a ngamə ɨ soŋ ngə́, 16“Ɨbɔmbɨma ɨban, nɨgham nɨ Ŋwi tsí nɨ nkɔʼ bom bo anu za Azhwi zə Fɛmnɨ ntsa a ndzum Ɨfɔ Devidɨ a sóŋnɨ́ a za a ghɨnɨ fú mbɨ́ʼ a Yudasɨ, zɨ wa a tságɨ́nɨ́nɨ́ ɨbɛn ba bɨ kónɨ́ a Yeso lá. 17Yudasɨ a bé táʼ ŋwɔn abɔʼnɨ bɨgɨ mbɨ́ʼ ngə́ Yeso a tsɔ́ʼ ayi ngə́ á faʼə bɨgɨ bo ghe.”
18(Yudasɨ a lɔ́gɨ́ nkáb za a kwárɨ́nɨ́ a nye afaʼ a ntɔm azhi za ndzon abɨŋ a ɨshe ɨwu ə. Ɨwu, a vwó nɨ atú azhi nkfoə. Mɨto ɨmyi bébɨ́nɨ́, ngǒ mɨto ɨyi ɨtsum fu nɔŋ a ntáʼ ə. 19Ŋwɔn tsum wa a kɨ́nə́ nchyɛ̌ a Yerosalɛm a zúʼ anu məziŋ ə, ma lan, a mu nɨgham nɨ alaʼ ɨna, bo tɔŋ abɨŋ a ɨshe za nɨ Akɛldama, ndiʼ lá ngə́ “Abɨŋ a ɨshe Alɛm ə.”)
20Bita a ghɛ́n nɨ mbyi ɨ soŋ ngə́, “Bɨ ŋwaʼnɨ a mu aŋwaʼnɨ a bɨsalmsɨ ngə́:#1:20 Salmsɨ 69:25; 109:8
‹A ndá ɨzhi tɛm zɨ ndzobɨnɨ, á ŋwɔn tse a keʼ wə mu chyɛ.›
Bɨ kɨ ŋwaʼnɨ ngə́:
‹A ŋwɔn adaŋ a lɔgɨ adiʼ afaʼ azhi ɛ.›
21Ma lan, a bɔŋ á bɨgɨnə tsɔʼ a táʼ ŋwɔn wa a tsínɨ́ a tɨtərɨ bɨgɨnə nkfu tsum za bɨgɨ bɨ Maʼmbyí Yeso kɨ́nə́ númə́ nkárə́, 22ndɔgɨnɨ nkfu za Yoane a kɨ́nə́ sǒŋ anu a nkwarɨ nkyi, ɨ kɔʼ kuʼ nkfu za Ŋwi a lɔ́gɨ́nɨ́ a Yeso a fɔməbvurə lá. Táʼ ŋwɔn abɔʼnɨ məben a tsi nɨ ɨ zagɨ kon a tɨtərɨ bɨgɨnə ɨ tiʼ be ŋwɔn wa a númnə́ soŋə anu mbɨ́ʼ adzaŋ za Yeso a zhwémnɨ́nɨ́ a mbó nɨvwo ə.”
23Ma lan, bɨ ghá mɨkum mɨ ɨbɛn bi bɨbá ghe. Bo bé Yosɛb wa bɨ kɨ́nə́ ntɔ́ŋə́ ngə́ Basabasɨ (bɨ kɨ́ njí ayi ngə́ Jusɨtusɨ) abɔʼnɨ Matyasɨ ə. 24Bo tíʼ ntsaʼtɨ a Ŋwi ɨ soŋ ngə́, “Maʼmbyí, o zhi ntəm ŋwɔn tsum ə; tíʼ lá ndiʼ a mbó bɨgɨ a tɨtərɨ ɨbɛn benə bi bɨbá a wa o tsɔʼnɨ 25ngə́ á faʼ tso ntom Yeso adiʼ Yudasɨ, wa a nyɛ́ʼtɨ́nɨ́ awɨgɨ ngɛn adiʼ za a kuʼnɨnɨ wəmbo lá.” 26Bo tíʼ maʼ ndzɔʼ a ntsɔ́ʼ táʼ ŋwɔn a tɨtərɨ ɨbɛn ba bi bɨbá ghe. Ndzɔʼ ɨ díʼ ɨkum Matyasɨ ə. Bɨ kwíʼtɨ́ ayi abɔʼnɨ ntóm Yeso tsa nɨghúm ntsɔb mɔ́ʼɔ́ ghe.
© 2023, CABTAL
