मरकुस 9

यीशु गा बदलाव

(मत्ती 17:1-13; लूका 9:28-36)

1डाबोलटे यीशु नी गर्दी गा कुरकू एठा हेजा चेलाकू टे मंडीके, “इंज आपेटे सच्चो-सच्चो मंडीवा होय आपे तलाटे अदा कुरकू जो येटेन टेंगेनकेनेच होय। दिकु दोडो बाकी दिकुगा गुजूटे पेला परमेश्वर गा राज्य म्या उनई एठा सर्वाशक्तीमान तारिकाटे हेन होय।” 2म्या हाप्ता गा बादोन यीशु नी पतरस, याकूब एठा यूहन्ना के सेंग्गोन साटे म्या ऊँचा टुक्कीन ओले? दिकुगा देटेन थंदळ दियागा पूरा रुपो बदलाएन। 3एटे टाएन कि दियागा आंगी गा म्या अलग्गो रुपो डा। डीच आंगी चमकातिंज्के एठा भेबाव पुलूम्जे दिजागा पुलूमा गा इनी दुनियान जेका बराबोर बाऊ डा। 4मेटे इनी आफाई चेलाकूनी मूसा एठा एलिय्याह जो परमेश्वर कोंटे मंडीमिठाच होय, दिकुके यीशु गा सेंग्गोन मंडीटे डोकेकिंज। 5एने लिंजेन पतरस नी यीशु के मंडीके, “हे गुरु, आलेगा येदेन थंदळ अच्छा होय, इनीघांजी कि आले आफाई डेरा हारोए, म्या आमके घल्जी, म्या मूसा के घाल्जी, एठा म्या एलिय्याह के घाल्जी।”

6पेनो पतरस एठा अलग्गो बरी चेलाकिंज भेबाव हिगराएन डा एठा पतरस जेन बान मालूम डा कि देटेन चोजा बारेन मंडी लक्के होय। 7डाबोलटे एठा म्या बदळा हेन एठा दिकुके उगुरकेकू दिकुनी बदळा परमेश्वर गा आवाज के आजुम्के कि “इनिज इंजागा प्रिय गा कोण होय, डीच जो मंडीवा होय दिया लिंजेन ध्यान जे।” #2 पत. 1:17; भजन. 2:7 8मूसा एठा एलिय्याह ओले डा मेटे दिकुनी बस यीशु के दिकु सेंग्गोन डोकेनेच। 9जब यीशु एठा दियागा आफाई चेलाकू टुक्कीटे आगुरू लक्के डा, यीशु नी दिकुके मंडीके कि डीच जेकाकेभी मेटे टाएन इनी बाकी गघाल कि दिकुनी चोच डोके। जब टाएन इंज जो कोरो गा कोण होय गुजूटे बान जीटाऊ बाने। 10इनिघल्जी दिकुनी इनी बातो के डोके। लेकिन दिकुनी इनी बारेन मंडी चालुके कि गुजूटे डाबोलटे जीटाऊटे चोच मतलब होय। 11डाबोलटे चेलाकूनी दियाटे कोम्बराके, “मूसा गा नियम इथूमिठाच, इनी मंडीन सही होय चोच, कि येटेन जरुरीकी मसीह गा हेजे टे पेला एलिय्याह जो परमेश्वर कोंटे मंडीमिठाच हेजे होना? एठा अगर हेन, मेटे देटेन आए चोया बान हेजडुका?” 12-13यीशु नी दिकुके जवाब जीके, “इनी सच्चो होय कि परमेश्वर नी एलिय्याह जो परमेश्वर कोंटे मंडीमिठाच कुकूल गा वादा डाके डा। कि दिकु सेबाईका बारबोर गा घाल्जी पेलाका हेजेवा। लेकिन एलिय्याह पेलाका हेके होय, पेनो आबुगा सम्मा कोरोनी दियागा घोनेच बुरा डाके। देगो डीच दडा चाहता डा, डेनेगोका परमेश्वर कोनेटे मंडीमिठाच घोनेच पेलाका मंडीके कि डाएवा। लेकिन कोरो गा कोण इन्जगा बारेन चोखरा ग्रंथन सब कुछ ओल्के। कि इन्जा घोनेच तखलीफ़ साहनेवा एठा कुरकू बान स्वीकारेज।”

भूतो टे आराकोम्बा

(मत्ती 17:14-21; लूका 9:37-43)

14जब यीशु एठा दियागा आफाई चेलाकू दूसरा चेलाकू मेरान डाबोलटे हेन, दिकुनी खाट गर्दी चेलाकू गा उफुन भी कोनेन डोके। मूसा गा नियम इथूमिठाच दिकुगा सेंग्गोन अमा-इंजा लज्जे। 15डेनोगो सेबाई कुरकू यीशु के डोकेनेच मेटे सेबाई भेबाव बिचारजे होय एठा डीच कोनेन साळुपटे डीच कोनेन हेन एठा डीचके नमस्कार केनेच। 16यीशु नी चेलाकू टे कोम्बाराके, “आपे कुरकू दिकुगा सेंग्गोन चोच अमा इंजाबा होय?” 17गर्दी टे नी म्याखोम नी डीचके जवाब जीके, हे गुरु, इंज-इंजगा कोण के, डीजेननी म्या भूतोकु होय जो डीचके मंडीटे रुकातिंजेज्बा डीचके अमा मेरान सालेनेच डा। 18जब भी इनी भूतो दिया लिंजेन हामला डाएवा मेटे इनिज डीचके इटान बोबोचो मतलब आरुवा। दियागा चाभु टे उलीच ओटबा होय, “एठा डीच हेजा तिळींज रिरीगिठ्बा होय एठा जिद्दोउबा होय एठा ओखेंज बाने होय। इंज्नी अमागा चेलाकूके भूतोके बल्लान ओड गा घाल्जी मंडीके। लेकिन डीच बान दडुका।” 19इनी आजुमटे यीशु नी चेलाकूके जवाब जीके, “हे अविश्वास पीढी गा कुरकू, इंजेन आपेगा सेंग्गोन चोटो टाएन थंदळ होना जब टाएन आपे विश्वास डोए? इंजेन आपेगा विश्वास दोडो घाल्जी चोटो टाएन रहा दोडो होना? डी पोट्टाके इंजा मेरान सेगेच।” 20इनिघल्जी दिकु पोट्टाके यीशु मेरान सालेनेच। एठा जब भूतोनी यीशु के डोकेनेच मेटे डी भूतोनी तुरुटो डीचके कोळेचके ओटे बोचोकेनेच एठा दियागा चाभु टे उलीच आडीटे ओठलज्जे। 21यीशु नी पोट्टा गा बाटे टे कोम्बराके, “इनी सेबाई चोलाटे चालुके होय?” एठा पोट्टा गा बाटे मंडीके, “जब टे इनिज डायेन। 22डीचके घोगेजा घाल्जी भूतोनी डीचके सिंगेल बांटो डा गेन बोचोगेचबा होय। पेनो अगर अमा आलेगा डाए टासो मेटे आले लिंजेन आसा धोटे आलेगा कोण के सजाकेच।” 23यीशु नी दियाटे जवाब जीके, “आमेन शक बान होनाकी इंज एनोगो डाएवा होय! अगर तुनिका कोरो इंजा विश्वास दोडो टासो चोचकाभी डाऊवा होय।” 24पोट्टा गा बाटे नी तुरुटो हाकोटे मंडीके, “हे प्रभु, इंज विश्वास डोएवाकी, इंज्के शक बान दडा गा मदत डाए।” 25जब यीशु नी डोके कि एठाभी जदा गर्दी डीचके दोडो घाल्जी जमाएन। मेटे यीशु नी भूतोके इनी मंडीटे कल्लाकेनेच, “हे भूतो जो इनी पोट्टाके भेरा आरोएच लक्के एठा मंडी डाए बान लक्के इंज आमके मंडी बाकी डीचके आराकेच। एठा दियेन चोलाकाभी मु बाकी।” 26जब डी भूतो खाट्टेका चिल्लातिंजटे एठा डीचके कोळेचटे ओठ्जे, एठा पोट्टा बान ओखेंजडुका डी पोट्टा घोचका डोके। 27पेनो यीशु नी दियागा टी उठाटे डिच्के ठुलकेनेच, एठा डीच तेगेन्जे। 28बादोन जब यीशु हेजा गा चेलाकू सेंग्गोन उरान एकलान डा। मेटे चेलाकूनी यीशु टे कोम्बराके, “आले डी भूतोके चोया बान ओटडुका?” 29डाबोलटे यीशु नी चेलाकूके जवाब जीके, “इनी रोंगो भूतो प्रार्थना गा बिना कुरकू टे बल्लान बान सेने होय।”

यीशु गा हेजा गुजू गा बारेन नी डबोलटे घागल

(मत्ती 17:22-23; लूका 9:43-45)

30बादोन यीशु एठा दियागा चेलाकू डी जगा के आराके एठा गलील जिल्हा टे चेल्के। यीशु बान मेंबा डा जेकान भी मलुम्जूकी डीच तोटेनके होय। 31चोयाकी यीशु हेजा चेलाकू सेंग्गोन येठाभी टेमो बिबीतातिंज एठा दिकुके इथू चाहता डा। जल्लोका कि जेका कोरो गा कोण के जो इंज होय। इंजा दुश्मनकु गा हाकगेल्ला इंज्के धोका जेबा। डी कुरकू इंज्के घोचकोम्बा। “लेकिन आफाई दिन जब इंज्के घोचकोम्बा मेटे इंज डाबोलटे जीटाऊवा।” 32पेनो इनी बातो चेलाकू गा समझोन बान हेजडुका, एठा दिकु यीशु टे कोकोम्बारा टे हिगरा डा।

चेलाकून सबसे खाटजे होय

(मत्ती 18:1-5; लूका 9:46-48)

33यीशु एठा दियागा चेलाकू कफरनहूम पूरा गा हेजा उरान हेन। जब दिकु उरा तालनके डा। यीशु नी दिकुटे कोम्बराके, “आपे कोरान चोच चर्चा दडा लक्के डा?” 34चेलाकू कायोमका थांदळे, चोयाकी कोरान नी दिकुनी इनकुका येटेन हिंजमान लज्जे आलेटे खाटजे होय? 35यीशु सुबानजे एठा डी बारह चेलाकूके जो दियागा उफुन भी कोनेन डा, दिकुके हाकोकेकु एठा दिकुटे मंडीके, “अगर जेकाभी सेबाईकु टे खाट हारू गा चाहतावा मेटे खुदके सानी आरोए एठा सेबाई कुरकू गा सेवा जारूरी दडा होना।” 36एठा यीशु नी म्या सनी के साटे हेजा तलान तेंगेन्केनेच, गा घाल्जी मंडीके, दिच्नी सनी के काटूएच्बा एठा हेजा गा चेलाकू टे मंडीके, 37जब आपे इंजा कराण म्या सनी के मनातिंजेवा, मेटे आपे इंज्के मनातिंजेवा। “एठा जब आपे इंज्के मानेनकोम्बा मेटे आपे डीचनी इंज्के कुल्केमी होय डीचके मानेनेज्बा।”

38मेटे यूहन्ना नी यीशु टे मंडीके, “हे गुरु, आलेनी म्या कोरो के अमा जीमू गा शक्तीटे भूतोकुके कोखला टे डोकेनेच। एठा आले डीचके बाकी मेन लक्के, इनिघल्जी कि डीच आले रोंगो चेलाकू टे बाऊ डा।” 39-40यीशु नी यूहन्ना टे मंडीके, “जो आलेगा खिलाफबेन बाऊ डीच आलेगा घाल्जी होय। इनिघल्जी जेकाभी इंजा जीमू टे अचम्बो कामय दडावा होय। डीच डीका टेमोन इंजा बारेन चोचकाभी बुरा बान मेन्बा। इनिघल्जी डीचके बाकी रोराकातिंज।” 41“जेकाभी जो आपेके डा गा म्या कटोरी, इनिघल्जी आपेके जेबा होय कि आपे मसीह गा चेलाकू मेना, परमेश्वर डी कोरो सेंग्गोन पक्का रुपोटे भला डाएवा।”

यीशु गा अंदाजो गा बारेन घालेवा

(मत्ती 18:6-9; लूका 17:1-2)

42डाबोलटे यीशु नी चेलाकू टे मंडीके, “अगर जेकाभी डी कोरो के जो इंजा लिंजेन विश्वास दोडोवा होय। दियागा विश्वासेन खेडा जोम गा करण आरुवा होय। भला कि इनी सनी रोंगो जेका टासो, इनी दियागा घल्जी अच्छा होय कि दियागा गर्दनेन म्या खाट घोटा टोल्के टासो एठा डीचके नामुजू घाल्जी समुद्रान टेप्पाकेचबा। 43अगर आपे पापो दडा गा घल्जी अमा टीके कमाय गेन येंडा गा सोचोन होय, मेटे इनिके म्हाकी। म्या टी बिना परमेश्वर गा राज्यन मु मुश्किलुबा, पेनो बरी भी टीके दोडो एठा नरक मु ठायका बुरा होय। 44नरक गेन सेबाईकु कोम्बोरके जोममिंकू किळाकु चोलाकाभी बान गुजू एठा सिंगेल चोलाकाभी जुलू बंदोऊ बाने। 45अगर आपे पापो दडा गा घल्जी आपना नंगाके कमाय गेन येंडा गा सोचोन होय, मेटे इनिके म्हाकी। म्या नंगा बिना परमेश्वर गा राज्यन मु मुश्किलुबा, पेनो बरी भी नंगाके दोडो एठा नरक मु ठायका बुरा होय। 46नरक गेन सेबाईकु कोम्बोरके जोममिंकू किळाकु चोलाकाभी बान गुजू एठा सिंगेल चोलाकाभी जुलू बंदोऊ बाने। 47अगर आपे पापो दडा गा घल्जी आपना मेटके कमाय गेन येंडा गा सोचोन होय, मेटे इनिके म्हाकी। म्या मेट गा बिना परमेश्वर गा राज्यन मु मुश्किलुबा, पेनो बरी भी मेटके दोडो एठा नरक मु ठायका बुरा होय। 48नरक गेन सेबाईकु कोम्बोरके जोममिंकू किळाकु चोलाकाभी बान गुजू एठा सिंगेल चोलाकाभी जुलू बंदोऊ बाने। 49यीशु नी दिकुके उदाहरण जीटे मंडीके, हरेक जेकाभी परीशान गा आंदोजो डोगेवा डेनोगोका कुरकू इकुका बलिदानेन बुलूम येंडावा होय एठा डाबोलटे दिकुके जुल्कुवा होय। 50बुलूम अच्छा होय, अगर बुलूम हेजा गा सिंबिल स्यागेबा होय मेटे आपे डेगा सिंबिल चोथान डाबोलटे हिरागेवा? आपेन नी आपेका बुलूम गा गुण होना डा एठा म्या बार्खिंज गेल्ला शांती टे थंदळ होना।”

Currently Selected:

मरकुस 9: GOKNT

ማድመቅ

Copy