मरकुस 10

ब्याह एठा फारगति गा बारेन नी इथू

(मत्ती 19:1-12; लूका 16:18)

1यीशु नी हेजा गा चेलाकू सेंग्गोन कफरनहूम पुराके आराके। एठा दिकु यहूदिया जिल्हा टे चेल्के एठा यरदन गडा गा दूसरा कोनेन ओले। डबोलटे गर्दी यीशु मेरान जमाएन एठा देटेन हमेशा गा रोंगो दिकुके इथू लज्जे। 2मेटे फरीसि कुरकू नी यीशु गा मेरान हेके डो दियागा आन्दाजो सा घाल्जी दियाटे कोम्बाराके, “चोच मूसा गा नियम गेन म्या कोरो के हेजा जपाए टेका फरगति जिऊ गा हुकूम होय?” 3यीशु नी फरीसि कुरकू के म्या सवाल गा सेंग्गोन जवाब जीके, “मूसा गा नियम आपेके एनेगा बारेन चोच इथूवा होय?” 4फरीसि कुरकू मंडीके, “मूसा गा नियम गेन म्या कोरो के हेजा जपाए टेके फारगति गा काकडो ओल एठा डीचके आरा गा हुकूम जीके।” #व्यवस्था. 24:1-3 5यीशु नी फरीसि कुरकू टे मंडीके, “चोयाकी अमा जिद्दो गा इनी मूसानी अमा घाल्जी इनी हुकूम ओल्के।” 6लेकिन सुटूका जब परमेश्वर नी सेबाईका आरुके। दिच्नी दिकुके “पोट्टा एठा तराई मेंटो आरुकेकु।” #उत्प. 1:27; 5:2 7इनी घाल्के होय कि परमेश्वर नी चोया मंडीके, कि मेटे म्या कोरो एठा जपाए ब्याह दडा टासो, मेटे कोरो आपना आंटे-बाटे के आराटे, आपना जपाए गेल्ला मिलातिंज थंदळवा दडावा होय ताकी दिकिंज बार्खिंज भी म्या सेंग्गोन बेल्लाटे म्या कोम्बोर आरुवा डेनोगोका दिकिंज बर्खिंज म्या कोरो होय। 8एठा डिकीन्ज बारखीन्ज म्या तन मनुवा। इनीघाल्जी दिकिंज नका बरी कुरकू किंज रोंगो बाने पेनो इंज्कीन म्या कोरो रोंगो होय।#उत्प. 2:24 9“इनिघल्जी डीके परमेश्वर नी म्या सेंग्गोन जोळातिंजके होय डीके जेकाभी अलग्गो बाकी होना।” 10बादोन यीशु चेलाकू सेंग्गोन डी उरान एकलाका डा। मेटे चेलाकूनी यीशु टे इनी विषय गा बारेन कोम्बराके। 11यीशु चेलाकू टे मंडीके, “जेकाभी आपना जपाएके आराटे दूसरा टे ब्याह डाए मेटे डी पेला जपाए गा खिलाफबेन आनोवा दडावा होय। 12एठा अगर जपाए आपना साना के आराटे दूसरा टे ब्याह डाए टासो। मेटे डीच हेजा सानाटे खिलाफबेन आनोवा दडावा होय।”

सानी एठा स्वर्ग राज्य

(मत्ती 19:13-15; लूका 18:15-17)

13डाबोलटे कुरकू चफनीकुके यीशु गा मेरान साकु लज्जे। कि डीच दिकु लिजेन टी धोटे दिकुके आशीर्वाद जे। पेनो चेलाकूनी कुरकू के कल्लाकेकु। 14यीशु नी इनी धोटे चेलाकू टे खिजोएन एठा दिकुटे मंडीके, चफनीकुके इंजा मेरान हेजे डाए। डीका कुरकू जो चफनीकू रोंगो भरोसा गा लायको एठा नम्र होय परमेश्वर गा राज्यन थंदळवा। 15इंज आपेटे सच्चो मंडीवा होय कि जेकाभी परमेश्वर गा राज्यके चफनीकू रोंगो मानेन नेवा, “डी सेबाई रोंगो टे परमेश्वर गा राज्यन शामीलुवा।” 16एठा यीशु नी चफनीकुके काटूकेकु एठा दिकु लिंजेन टी धोटे दिकुके आशीर्वाद जीके।

डामा कोरो एठा परमेश्वर गा राज्य

(मत्ती 19:16-30; लूका 18:18-30)

17डेनोगोका यीशु हेजा गा चेलाकू सेंग्गोन डाबोलटे यात्रा दडा चालुके डा। मेटे म्या कोरो दियागा मेरान साळूप लठ्ठाका हेन। एठा दियागा सम्मान मान टे ठोपरे जेगाटे दियाटे कोम्बराके, “हे कास गुरु इंज चोच कामय डाए कि परमेश्वर इंज्के हमेशा गा जीवन जेबा?” 18यीशु नी डीचके जवाब जीके, “अमागा मंडी गा कारण चोच होय कि इंज कास होय? बस परमेश्वर का आए टेमोन कास होय।” 19अमा परमेश्वर गा हुकूमकेनी हडाई होय, घोगेच बाकी दडा, आनोवा बाकी दडा, चुचीरी बाकी, ळाबाळ गवाही बाकी जिऊ, जेकाकेका धोका बाकी जिऊ, एठा आपना गा बाटे एठा आंटे गा मान डोए। #निर्ग. 20:12-16; रोम. 13:9 20डी कोरोनी यीशु टे मंडीके, “हे गुरु इनी सेबाई हुकूम के इंज सानीका लागी मनातिंजटे हेन होय।” 21यीशु नी डीचके प्यार टे डोकेनेच एठा डीचके मंडीके, “आमेन म्या एठा बातो होय आमेन दडा गा जरुरत होय जो चोचकाभी अमा होय डीके किजीटे गिरबो कुरकू लिजेन नजर आन्डटे दियाटे प्यार डाके, एठा दियाटे मंडीके, आमेननी म्या बातो गा कमी होय, सेने, जो चोचकाभी अमागा होय डीके किजिकी गिरबोकूके डामा जे, मेटे अमा मेरान स्वर्ग गेन डामा टासो। आपे एनोगो दडा गा बादोन हेजे डो इंजा चेला आरु घल्जी इंजा टाऊटे हेजे।” 22जब डी कोरोनी यीशु के इनी मंडीके आजुम्के। मेटे दियागा चेरा नराजोएन। एठा डीच नराजोटे देटे टे ओले। चोयाकी डीच भेबाव डामा कोरो डा।

23यीशु नी उफुन भी कोने धोटे हेजा चेलाकू टे मंडीके, “डामा कुरकू घाल्जी परमेश्वर गा राज्यन मु ठायका मुश्किल होय।” 24येटेन आजुमटे चेलाकू अचम्बोएन इनिघल्जी यीशु नी दिकुटे डाबोलटे मंडीके इंजा प्रियो परमेश्वर गा राज्यन मुगा घल्जी म्या लकपाती कोरो गा घल्जी मु भेबाव मुश्किल होय! 25यीशु नी म्या उदाहरण जीटे मंडीके जोभी म्या ऊँटो घल्जी सुई गा पोपा टे सेने असान होय। “डेनोगोका म्या लकपाती कोरो गा घल्जी परमेश्वर गा राज्यन सेने ठायका मुश्किल होय।” 26जब चेलाकूनी इनी आजुम्के, मेटे दिकु एठाभी बिचारजे एठा म्या बार्खिंजटे मंडीके, “एनेगा मतलब होय कि जेकाभी पापो गा सजाटे बचातिंजू बाने होय।” इनी कोरो गा घाल्जी मुश्किल होय लेकिन परमेश्वर गा घाल्जी बाने। परमेश्वर गा घाल्जी सेबाईका डाऊवा होय। #अय्यू. 42:2; लूका 1:37 27यीशु नी दिकु कोने धोटे मंडीके, “येदेन कोरो गा घल्जी बान डाऊ होय, पेनो परमेश्वर घल्जी बाऊ चोयाकी परमेश्वर सेबाईका डाऊवा।” #अय्यू. 42:2; लूका 1:37 28पतरस नी यीशु टे मंडी लज्जे, डोगे, “आलेगा चोच डाऊवा? आलेनी अमागा चेला आरु घाल्जी सेबाईका आराके।” 29यीशु नी चेलाकू टे मंडीके, “इंज आपेके सच्चाई घालेवा होय इंजा चेला आरु घाल्जी एठा परमेश्वर गा अच्छा खाबोर गघाल घाल्जी। जोभी कोरो उराके आराके होय। देटेन डाईके, आंटे-बाटे के, जापाए, चफनीकुके, खिटीके डीच पूराटेका इनी युग गेन सताव गा सेंग्गो-सेंग्गोन घोनेच घाटाऊवा। एठा मिनी टेमोन आमके हमेशा गा जीवन घटाऊबा। 30एठा जोभी कोरो उराके आराके होय। देटेन डाईके, आंटे-बाटे के, चफनीकुके, खिटीके डीच पूराटेका इनी युग गेन सताव गा सेंग्गो-सेंग्गोन घोनेच घाटाऊवा। एठा मिनी टेमोन आमके हमेशा गा जीवन घटाऊबा। 31लेकिन घोनेच कुरकू आए महान होय दिकुके मेटे नम्र कुवा, एठा घोनेच कुरकू जो नका नम्र होय, दिकु डी टेमो महान आरुवा।”

यीशु गा हेजा गुजू गा बारेन नी आफई बार घागल

(मत्ती 20:17-19; लूका 18:31-34)

32जब बारह चेलाकूके यरूशलेम शहर सेने लठ्ठाका कोरानके डा मेटे यीशु दिकुगा सम्मा-सम्मा चेलके डा। चेलाकू ठायका हैरानजे कि डीच डिंगन चेल्के येटेन घोनेच कुरकू नी दियागा खिलाफबेन डा। एठा दूसरा कुरकू जो दिकुगा सेंग्गोन के डा दिकुन इनी बातो हिगरा डा कि यरूशलेम शहरेन दियागा चोच डाऊवा। म्या बार डाबोलटे बारह चेलाकूके म्या कोनेन सैय्येकु। एठा डी चीजो गा बातो मंडीके जो दियागा सेंग्गोन डाऊ लक्के डा। 33“डोगे, आले यरूशलेम शहर सेनेवा होय। एठा कोरो गा कोण जो इंज होय, मुख्यायाजककु एठा मूसा गा नियम इथूमिठाच गा टीन उठाउवा, एठा दिकु इंज्के घोगेज गा लायको हारोएच्बा, एठा इंज्के अलग्गो जाटोकु गा टीन जेच्बा। 34एठा दिकु दियागा मजाक ऊळातीन्जेबा, दिया लिजेन उलीच बेजेवा, डीचके बाल्खा टे मुंडाएबा, एठा डीचके घोजेज्बा, एठा आफाई दिन इंज जीटाऊवा।”

सेवा गा महान

(मत्ती 20:20-28)

35मेटे जब्दी गा कोणटे याकूब एठा यूहन्ना नी दियागा मेरान हेके डो मंडीके, “हे गुरु, आले चाहतावा कि जो चोचकाभी आले अमाटे आसी टासो, डीका अमा आले घाल्जी डाये।” 36यीशु नी दिकिंज बर्खिंजाटे प्रश्न कोम्बराके, “आपे चोच चाहतावा कि इंज आपे घाल्जी डाए?” 37दिकिंज बर्खिंज यीशु के जवाब जीके, “जब अमा अमागा महिमा टे भेट्टिटे राज्य गेन राजोबा, मेटे प्यार आमगा सेंग्गोन राजो दडा गा अनुमति सेगे। म्याखोम आमगा जेवना कोनेन एठा दूसरा आमगा डाखोरया कोनेन सुबान डाए।” 38यीशु नी दिकिंज बर्खिंजाटे मंडीके, “आपे बान हाडाई कि चोच आसिवा होय?” चोच आपे साततिंजू घाल्जी तैयारके होय, चोयाकी इंज्के जलदिका सतातिंजकोम्बा? चोच आपे गुजू घाल्जी तैयारके होय चोयाकी इंज जलदिका घोजकोम्बा होय। 39दिकिंज बर्खिंजनी यीशु टे मंडीके, “आलेटे डाऊ टासो।” यीशु नी दिकिंजके मंडीके, “आपेके भी सतातिंजकोम्बा डेनोगोका इंज्के भी सततातिंज कोम्बा आपे भी घोचकोम्बा डेनोगोका इंजभी के भी घोचकोम्बा।” 40हालाकी इंज्के इनी दडा गा हाक बाऊ होय कि जे इंजा बाजुन देटेन मन गा जगा डोएबा। परमेश्वर नी देटेन नी मन जगा तैयारके होय। दिकुके दिच्नी कलमकेकु डेगा घाल्जी। 41मेटे चेलाकूनी इनी आजोमके, दिकु याकूब एठा यूहन्ना लिजेन खिजोऊ लज्जे। 42मेटे यीशु नी चेलाकूके मेरान हाकोटे दिकुटे मंडीके, “आपे हाडाई होय कि जो कुरकू इनी दुनियान हाक मेंबा होय। दिकु इकुगा हाक गा इस्तामाल आपना इटान थंदळ कुरकू लिंजेन हाक दोडो घाल्जी दडावा होय। दिकुगा अगुवा कुरकू दिकुगा बातो ममानातिंज घाल्जी दिकुगा हाक इस्तामाल दडावा होय। 43-44पेनो तलाटे एंगो बाकी दडा होना बनकी आपे तलाटे जो अगुवा आरु टासो दिजेन दूसराकु गा सेवा दडा होना। जो दूसराकु अगुवाई दडा टासो डीचके भाग्यकु रोंगो सेबाईकु सेवा दडा होना। 45इंज एनोगो इनिघल्जी मंडीवा होय चोयाकी इंज जो कोरो गा कोण होय दुसराकूगा सेवा दडा घाल्जी इनी दुनियान हेन डा। इंज इनिघल्जी बान हेजडुका कि दूसरा इंजा सेवा डाये। इंज चोटोका कुरकू के दिकुगा पापो टे आरागेच्बा गुजू हेन डा।”

अंधळा बरतिमाई गा सासजा

(मत्ती 20:29-34; लूका 18:35-43)

46यरूशलेम शहर टे सेने टेमो यीशु एठा दियागा चेलाकू यरीहो शहरेन हेन। डेनोगोका यीशु एठा दियागा चेलाकू एठा कुरकू गा म्या गर्दी शहर के आरागे लक्के डा। म्या बरतिमाई जीमू गा अंधळा भिखरी कोरा धुरान सुबंके डा डीच तिमाई गा कोणटे। 47जब डी बिखरीनी कुरकू टे आजुम्के यीशु जो नासरत शहराटे होय डीच डी कोरा टे चेल्के होय। दिच्नी जोर टे चिल्लातिंजटे मंडीके, “हे यीशु राजा दाऊद गा पीढी इंजा लिंजेन दया डाए।” 48घोनेच कुरकू नी डीचके कल्लाकेनेच एठा डीचके कायोम थांदळ घाल्जी मंडीके, पेनो डीच एठाभी जोर टे हाको लज्जे, “हे दाऊद गा कोंटे इंजा लिंजेन दया डाए।” 49जब यीशु नी डिच्के आजुम्के मेटे दिच्नी सेंद्रा बंदोके एठा आसो पासो गा कुरकू टे डिच्के सा गा घाल्जी मंडीके। एठा कुरकू नी डी अंधाके हाकोटे डिच्के मंडीके, “हिंमत डोए! भी डे! डीच आमके हाको लक्के होय।” 50डाबोलटे अंधळा कोरोनी हेजा बल्ला गा आंगीके टेप्पाटे जल्लोका बिटजे डो यीशु गा मेरान ओले। 51एने लिजेन यीशु नी डीचके मंडीके, “अमा चोच चाहतावा होय कि इंज आमगा घाल्जी डाए?” अंधळा नी दियाटे मंडीके, “हे गुरु, येदेन कि इंज डो-डो लज्जू।” 52यीशु नी दियाटे मंडीके, “इंज आमके साजाएन लक्के चोयाकी अमा इंजा लिंजेन विश्वास दोडोवा। मेटे नका अमा उरान सेनेवा होय। एठा देटेन डी कुरकू गा गर्दी गेन बेल्लाएन जो यीशु गा टाऊटे चेल्के डा।”

Currently Selected:

मरकुस 10: GOKNT

ማድመቅ

Copy