मरकुस 8

यीशु व्दारा उफुन हजार कुरकू के चाचरा

(मत्ती 15:32-39)

1अदा दिन गा बादोन जब यीशु दिकापुलिस गेन डा, डाबोलटे गर्दी परमेश्वर गा राज्य गा बारेन आजोम घाल्जी जमाएन एठा मेटे दिकु मेरान चोचकाभी जोजोमागा बान डा, मेटे यीशु नी हेजा चेलाकूके मेरान हाकोटे दिकुके मंडीके, 2“इनी कुरकू इंजा सेंग्गोन आफाई दिन टाएन थंदळके होय। दिकु मेरान नका चोचकाभी जोजोमागा बाऊ होय। इनिघल्जी इंजेन दिकु घाल्जी भेबाव बेकार लगातिंजू लक्के होय। 3चोयाकी येनेटे अदा कुरकू लेंक्कीटे हेन होय। अगर इंज इंकुके बिना चोचकाभी जोजोमागा रांगेच्का उरान कुलकू टासो मेटे दिकु कोरान बेसाउवा।” 4दियगा चेलाकूनी डीचके जवाब जीके, “पेनो टोनोंगो जेकाभी इनी सुनसान जगान नी सेबाई कुरकू के चचारा घाल्जी आटा घगाटावा?” 5यीशु नी चेलाकू टे कोम्बराके, “आपेगा मेरान चोटो सोकळा होय?” दिकुनी मांदिके “एइय्या सोकळा।” 6इनिघल्जी यीशु नी कुरकू के ओटे लिंजेन सुबान घाल्के एठा दिकु सुबंजे। डेगा बादोन यीशु नी डी एइय्या सोकडा सावे एठा परमेश्वर गा धन्यवाद डाटे सोकळाके तुकडा टे अलग्गोके डाबोलटे चेलाकूके तुकडा जिऊ चालुके म्हणजेकी दिकु तुकडाके कुरकू के कटिंजकी, एठा दिकुनी कुरकू के कटींजके। 7एठा दिकु मेराननी थोळासा चफनीकू भी डा। एठा डीचनी परमेश्वर गा धन्यवाद डाटे चेलाकूके जीके म्हणजे दिकु कुरकू सम्मान डोकी होना। 8कुरकू नी काकू एठा सोकडा जोम्टे लाज भेट्टेन। एठा बादोन चेलाकूनी एइय्या टोपला भेटटी टे टुक्काके तुकडा जमाके। 9एठा गर्दी गा कुरकू उफुन हजार गा अंदाजोटे डा। जब यीशु नी कुरकू के कुलकेकु, 10मेटे डीच हेजा चेलाकू गा सथोन डोंगा लिंजेन पेळेन डो दलमनूता ईरिया न ओले।

फरीसि कुरकू व्दारा निशान आसी

(मत्ती 16:1-4)

11डाबोलटे फरीसि कुरकू यीशु गा मेरान हेन दियाटे इनिज डीज्य बारेन नी मंडी लज्जे। दिकु यीशु के पपासातिंज डा, इनिघल्जी दिकुनी दियाटे स्वर्ग टे म्या अचम्बो कामय दडा घाल्जी मंडीके कि परमेश्वर नी डीचके शक्ती जीके इनी गघाल गा घाल्जी। 12डीचनी दिकुगा अविश्वास गा वोजीटे दिकुटे यीशु नी आत्मान भेटटी टे मंडीके, “इनी कुरकू चोया निशान एठा अचम्बो कामय आसिवा होय? इंज आपेटे सच्चो मंडीवा होय कि इनी कुरकू के तुनिका निशान एठा अचम्बो कामय बान जिऊ।” 13डाबोलटे दिच्नी फरीसि कुरकू के आराकेकु। हेजा चेलाकू सेंग्गोन डाबोलटे डोंगा लिंजेन पेळेन एठा दिकु गलील समुद्र आसो-पासोन एठा सम्मान ओले।

फरीसिकू गा सोडा

(मत्ती 16:5-12)

14यीशु गा चेलाकू इकुका सेंग्गोन आटा सा भुल्लाएन। इनिघल्जी सिर्फ म्या सोकडा आलवा डोंगान एठा ठायका बाऊ डा। 15यीशु नी दिकुके ध्यान थंदळे, “फरीसि कुरकू एठा हेरोदेस राजा गा सोडा बचातिंजू घाल्जी ठायका ध्यान टे थंदळे।” 16चेलाकू इकुका बिचार टे मंडी लज्जे, “डीच आलेके इनिघल्जी मंडी लक्के होय चोयाकी आले सोकळा साडुका डा।” 17इनी चिनाटे यीशु दिकुटे कोम्बराके, “आपे चोया आपेका बिचार लक्के होय कि आबु मेरान सोकळा बाऊ?” चोच आपेगा मानके येटो जिददो डोके कि आपे आए भी समजातिंजडुका? 18आपेगा मेरान मेट एठा लुटूर टाका पेनो दोडो डो आजोम बाने एठा आमेन यादो भी बाऊ। 19यीशु नी चेलाकूके कोम्बराके, “जब इंज्नी डी मोनाई हजार कुरकू के बस मोनाई चफनी सोकळा एठा बरी काकू टे चाराके। मेटे आमनी बचातिंजके तुकडा टे चोटो टोपला आपेनी टूलके डा?” चेलाकूनी यीशु टे मंडीके, “बराह टोपला।” 20“एठा जब उफुन हजार कुरकू गा घाल्जी आईय्या सोकळा डा मेटे आपेनी तुकडा गा चोटो टोपला भेटटी टे टूलके डा?” चेलाकूनी यीशु टे मंडीके, “आईय्या टोपला।” 21यीशु नी दिकुटे मंडीके, “आपे आयभी बान समजातिंजडुका कि इंज जे होय!”

अंधाके सासजा

22मेटे यीशु एठा दियागा चेलाकू बैतसैदान हेके, एठा कुरकू म्या अंधाके दियागा मेरान सालेनेच एठा दियाटे बिनती डावे डीचके उठाटे सजाकेनेच। 23यीशु नी डी अंधाके टी उठाटे डीचके डी गाँव टे बल्लान सैजेनेच, एठा जो यीशु नी डीचके ससाजा घाल्जी दियागा मेडेन उलीच बेचटे हेजा टी येंडाके। एठा दियाटे कोम्बराके “चोच अमा दोडोवा होय?” 24डी अंधळा नी माठा धोटे मंडीके, “इंज कुरकू के दोडोवा होय, लेकिन इंज दिकुके ठायका अच्छा टे बान दोडो। डीच हिंदळी झाळी गा रोंगो डूगु डा।” 25मेटे यीशु नी डाबोलटे हेजा गा टी दियागा मेडेन डोके। एठा मेटे डी अंधळा कोरो हेजा मेढ उघाळटे डोके कि डीच सजाएन डा। एठा सेबाईका सापा-सापा दोडो लज्जे डा। 26यीशु नी डीचके मंडीके, “अमा उरा गेन हिरागे, येटेन चोच डाएन डा गाँवमिंकू के गघाल घाल्जी गाँवेन सेने बाकी।”

पतरस व्दारा यीशु मसीह मानतिन्जेनेच

(मत्ती 16:13-20; लूका 9:18-21)

27यीशु एठा दियागा चेलाकू बैतसैदा शहर आराटे कैसरिया फिलिप्पी शहर गा मेरा गा गाँवेन ओले। कोरान नी यीशु नी हेजा चेलाकू टे कोम्बाराके, “कुरकू इनके चोच मंडीवा होय?” 28चेलाकूनी जवाब जीके, “अदा कुरकू मंडीवा होय कि अमा यूहन्ना बपतिस्मा जिऊमिठाच, दूसराकु मंडीवा होय कि परमेश्वर गा कोनेटे मंडीमिठाच एलिय्याह होय एठा दूसराकु मंडीवा आम अलग्गो परमेश्वर गा कोनेटे मंडीमिठाच टे तुनिका म्याखोम।” 29डाबोलटे यीशु नी दिकुटे कोम्बाराके, “पेनो आपे चोच सोचातिंज्बा कि इंज जे होय?” पतरस नी डीचके जवाब जीके, “अमा परमेश्वर गा वोजीटे कुलकेमी मसीह होय।” 30मेटे यीशु नी चेलाकूके चातराएटे घाल्के “कि डीच दियागा बारेन जेकाकेका बाकी गघाल कि यीशु का मसीह होय।”

यीशु गा हेजा गुजू गा बारेन घागल

(मत्ती 16:21-23; लूका 9:22)

31मेटे यीशु नी हेजा चेलाकूके इथूटे मंडीके कि जरुरी होय कि इंज जो कोरो गा कोण होय घोनेच कासु टूलबे एठा बान मेना, एठा यहूदी जुना सनाकु एठा मुख्यायाजक एठा मूसा गा नियम इथूमिठाच वोजीटे इंज्के मनेन बान मनातिंजटे घोच्केमी एठा आफाई दिन गा बादोन जीटाएन। 32यीशु नी इनी बातो सापा-सापा मंडीके। एने लिजेन पतरस नी डीचके तखलिफ एठा गुजू गा विषय गेन बातो गा वोजीटे डीचके कल्लाकेनेच। 33पेनो यीशु टाउन इखाटजे एठा चेलाकूके डोकेकु एठा डाबोलटे पतरस के कल्लाटे मंडीके, “शैतान गा रोंगो कमाय दडा बंदोए! चोयाकी अमा डेनोंगो बान सोसाचातिंज डेनोगोका परमेश्वर गा रोंगो सोसाचातिंज होय। लेकिन कुरकू रोंगो सोसाचातिंज्बा होय।”

चेला हारू गा अर्थ

(मत्ती 16:24-28; लूका 9:23-27)

34यीशु नी गर्दी के हेजा चेलाकू गेल्ला हेजा मेरान होकोटे दिकुटे मंडीके, “अगर आपे इंजा चेलाकू आरु टासो, तो आपेके आपेगा इच्छाके आरा होना।” आपेन आपेगा क्रूस तुटूल घाल्जी तैयारका थंदळ होना एठा इंजा टाऊटे सेंद्रा होना। 35इनी डाए चोयाकी जो इनी पृथ्वी लिंजेन आपना जान के बबाचातिंज गा कोशिश दडा टासो डीच सच्चो जीवन आडेवा। लेकिन आपे जो इंजा वोजीटे एठा परमेश्वर अच्छा खाबोर गा वोजीटे आपना जीवन जेबा होय डीच सच्चो जीवन घाटाऊवा। 36म्या कोरो के चोच फायदा अगर डीच दुनिया गा सेबाईकु टे खाट डामा कोरो आरोएन टासो। सच्चो जान आडेवा लेकिन परमेश्वर गा सेंग्गो गा हमेशा गा जीवन आडे टासो? 37चोच इनी डाऊवा होय कि जेका हमेशा गा जीवन घाटाऊ घाल्जी परमेश्वर गा घाल्जी जेबा होय? चोचकाभी बाने! 38इनी जमाना कुरकू धोकेबाज एठा पापी होय। अगर आपे तालाटे जेकाभी इंज्के प्रभु मनातिंजटे एठा इंजा शिक्षा मनातिंजटे इंकार डाएवा, बस इनिका कारण टे आमेन कुरकू हिगरा होय कि दिकु आमके नुकसान जेबा, मेटे इंज जो कोरो गा कोण मेना, जब इंज पृथ्वी लिंजेन चोखरा स्वर्गदूतकु गेल्ला डाबोलटे हेजेवा मेटे इंजभी आपेके इंजा चेलाकू मनातिंजटे इंकार डाएवा। डी टेमो हारेक कोरो इंजागा चमकातिंजू महिमा के डोगेवा डेनोगोका इंजा बाटे गा महिमा होय।

Currently Selected:

मरकुस 8: GOKNT

ማድመቅ

Copy