मरकुस 16

खाली मार्गोटो

(मत्ती 28:1-8; लूका 24:1-12; यूहन्ना 20:1-10)

1दूसरा दिन गा सिंगुरूप मेटे परमेश्वर गा चोखरा दिन डा बितातिन्जे, मेटे मरियम जो मगदेला गाँव टे डा एठा सलोमी एठा मरियम जो सानी याकूब एठा योसेस गा आंटे डा। दिकुनी अच्छा सुकींज चीजो मोलाटे सावेकी हेजे डो यीशु गा कोम्बोरेन येंडाए। 2मेटे इतावार गा फेजेर, जब सूर्या वोटके डा। डी जपाएकु यीशु गा गगाळातिंज गा गुफा। 3एठा इकुका मंडी लक्के डा, “आले घाल्जी गगाळातिंज गा गुफा गा दरोजोटे घोटा जे म्याधेळेनेवा?” 4एठा जब जपाएकु गगाळातिंज गा गुफा हेन मेटे गगाळातिंज गा गुफा गा दरोजो खुल्लाका डोके। 5मेटे गुफा गा मर्गोटो तलान ओलेडो दिकुनी म्या जवानके पुलूम कपडे उरीटे डाखुरी गगाळातिंज गा गुफा कोनेन सुबंटे डोके एठा ठायका बिचारजे। 6डी जवान कोरो जपाए कुटे मंडीके, “अचाम्बोऊ, आपे यीशु नासरी के, जो क्रूस लिजेन पेळेच्केनेच डा घागटावा। डीच जीटाएन होय येटेन बाने होय। डोगे, इनी डीका जगा होय। देटेन यीशु के डोकेनेच डा। 7पेनो आपे सेने, एठा दियागा चेलाकूके एठा पतरस टे मांडे। कि यीशु आपेटे पेला गलील लेन सेनेवा। डेंगोका डीचनी आपेटे मंडीके डा। आपे देडेनका डीचके डोगेचबा।” 8इनी गा बादोन, जपाएकु गगाळातिंज गा गुफा टे साळुपटे बल्लान हेन, चोयाकी दिकु घबरातिंजे कपातिंजू लज्जे। कोरान, दिकुनी जेकाकेका चोचकाभी घालडुका चोयाकी दिकु हिगराएन डा।

जीटायु प्रभु गा डूगु एठा स्वर्ग गेन सेने

(16:9-20)

मरियम मगदलीनी यीशु के डोकेनेच होय

(मत्ती 28:9-10; यूहन्ना 20:11-18)

9इतावार गा फेजेर यीशु गा मुर्दा टे जीटाऊ गा बादोन। सेबाई टे यीशु जो कोरोन डोके डीच मरियम जो मगदेला गाँव टे डा। देटे यीशु नी पेला आईय्या भूतोकुके ओटकेकु डा। 10मरियम नी यीशु गा चेलाकू मेरान ओलेडो यीशु गा जीटाऊ गा खाबोर घल्के। जब मरियम दिकुके डोकेकु कि, दिकु यीशु गा गुजू बारेन दुखिनके डा एठा जाम लक्के डा। 11लेकिन जब चेलाकूनी दियाटे आजुम्के कि यीशु डाबोलटे जीटाएन होय एठा मरियम नी डीचके डोकेनेच होय, मेटे दिकुनी दिया लिंजेन विश्वास दोडो टे बान मेंके।

बरी चेलाकिंज गा डूगुवा

(लूका 24:13-35)

12एने बदोन यीशु दूसरा रुपोन हेजा चेलाकू तलाटे बर्खिंज के जब दिकिंज शहर टे गाँव कोनेन सेने लक्के डा दिकुन डोके। लेकिन दिकुनी डीचके जलदिका बान चिनाडुका चोयाकी देटेन बिलकुल अलग्गो डूगु डा, 1325 जब दिकुन एसास डाएन कि डीच यीशु होय। दूसरा चेलाकूके अच्छा खाबोर घागल घाल्जी डाबोलटे हिराएन। लेकिन जेकाभी दिकिंज लिंजेन विश्वास बान दोडुका।

महान हुकूम

(मत्ती 28:16-20; लूका 24:36-49; यूहन्ना 20:19-23; प्रेरित 1:6-8)

14एनेगा बादोन यीशु डी ग्यारह चेलाकूभी जब दिकु आटा जोजोम सुबानके डा डोके। एठा यीशु नी दिकुके कल्लाकेकु डा चोयाकी डीच जिद्दी डा। दिकुनी डी कुरकू गा गवाही लिंजेन विश्वास बान दोडुका। दिकुनी यीशु के जीटाऊ गा बादोन डोकेनेच डा। 15मेटे यीशु नी चेलाकू टे मंडीके, “आपे सेबाई दुनियान सेने डो कुरकू के इंजा अच्छा खाबोर घालेवा।” 16जेकाभी इंजा लिंजेन विश्वास दोडोवा एठा येटेन गघाल घाल्जी बपतिस्मा सावा होय, कि डीच इंजा लिंजेन नका विश्वास दोडोवा होय, परमेश्वर दिकुके पापो गा सजाटे बचातिंजकोम्बा, लेकिन डी सेबाई कुरकू जो इंजा लिंजेन विश्वास बान दोडो होय, परमेश्वर दिकुके दिकुगा पापो गा घाल्जी दण्डो जेबा। 17विश्वास दडामिंकू नी इनी निशान डायेन दिकु इंजा जीमू टे अचम्बो कामय दडावा एठा भूतोके कोलाकुवा, एठा रेंग्गो-रेंग्गो भाषा मंडीवा। 18जहरमिठाच बिंजकुके ठुलकुवा, एठा अगर दिकु जहरमिनी चीजो भी नोएवा तोभी दियागा चोचकाभी तखलिफ बान डाऊ। डीच बिमारीकु लिजेन टी डोएबा, एठा दिकु साजाऊवा होय।

यीशु गा स्वर्ग ओले

(लूका 24:50-53; प्रेरित 1:9-11)

19मेटे प्रभु यीशु इनी सेबाई बातो के मंडी गा बदोन स्वर्ग लिंजेन टूलजेनेच। एठा परमेश्वर गा जेवना कोनेन सुबानजे।#1 पत. 3:22 20एठा यीशु गा चेलाकूनी ओटजे डो हरेक जगान अच्छा खाबोर गा खाबोर घाल्के। एठा प्रभु यीशु दिकुके अचम्बो कामय दडा गा शक्ती जीके। एठा साबितके कि दिकुगा खाबोर सच्चो होय। आमीन।

Currently Selected:

मरकुस 16: GOKNT

ማድመቅ

Copy