मरकुस 14

यीशु के घोगेजा गा घाल्जी बिचारबा

(मत्ती 26:1-5; लूका 22:1-2; यूहन्ना 11:45-53)

1बरी दिन बदोन यहूदी कुरकू गा फसह#14:1 मत्ती 26:2 गेन फसह गा तिवार गा बारेन ओल्के होय, गा तिवार बिना खमीर गा तिवार डाऊ मिनी डा। एठा मुख्यायाजक एठा मूसा गा नियम इथूमिठाच इनी बातो के घगाटा लक्के डा, कि यीशु के टोनोगो धोकाटे उठाटे घोजेज्बा। 2पेनो डीच मंडी लक्के डा, “तिवार गा दिन बान उठा एठा बान कुकूठा कही एनोगो बाकी डाऊ कि कुरकून धुम गाळबोळ डायु।”

यीशु गा बेल्लाटे जोम

(मत्ती 26:6-13; यूहन्ना 12:1-8)

3जब यीशु बैतनिय्याह गाँव गेन शमौन कोढया गा उरान आटा जोजोम सुबानके डा मेटे म्या जापाए मेरान संगमरमर गा घोटा आरुके कुप्पीन जटामांसी फुल गा सुकींज सुनूम साटे हेन। एठा कुप्पी टुक्का टे सुकींज सुनूम के यीशु गा कपारेन येंडाके। 4पेनो अदा कुरकू इकुका मनेन खिजोएन एठा म्या बार्खिंजटे गघाल लज्जे, “इनी किमती सुकींज सुनूम गा चोया दिच्नी नाशोके?” 5“चोयाकी इनी किमती सुकींज सुनूम तीन सौ दिनार टे (तीन सौ दिन गा मुंजीरी) अगिरी किमती गेन किजीटे गिरबोकूके कटिंजे डा।” एठा डी जपाएके कल्ला लज्जे। 6यीशु नी मंडीके, “जपाएके कल्लाबाकी, एठा आपे डीचके सतातिन्जेज बाने। दिच्नी एनोगो इंजा गेल्ला अच्छा डाके होय। 7चोयाकी गिरबो आपे गेल्ला हमेशा थंदळवा होय एठा आपे चोला मेंबा मेटे गिरबोकु भलाई डाएवा होय पेनो इंज आपे गेल्ला हमेशा बान थांदळ। 8इनी जपाएनी सुकींज सुनूम इंजा कपारेन येंडाटे। इंजा खबर गेन गळातिंजू गा तैयारी गेन पेलाटेका इंजा कोम्बोरेन ओजोके होय। 9इंज आपेटे सच्चो मंडीवा होय, सेबाई संसार जो तोटेनकभी यीशु गा अच्छा खाबोर प्रचार डाएवा। देडेन इनी जपाए कामय गा चर्चा भी डाऊवा एठा कुरकू डीचके यादोएच्बा।”

यहूदा गा यीशु सथोन विश्वास टुक्काके

(मत्ती 26:14-16; लूका 22:3-6)

10मेटे यहूदा इस्करियोती जो यीशु गा बारह चेलाकू तालाटे म्याखोम डा। मुख्यायाजककु गा मेरान ओले, एठा दिकुटे मंडीके कि इंज यीशु के उठा गा आपेके मदत जेबा। 11डीच इनी आजुमटे खुशोएन एठा डीचके डामा जिऊ गा वादा डावे। एनेगा बादोन यहूदा इस्करियोती यीशु के धोकाटे उठा मौका घगाटा लज्जे।

आखिरी आटाजोम

(मत्ती 26:17-25; लूका 22:7-14; 21-23; यूहन्ना 13:21-30)

12बरी दिन बादोन, बिना बुलूम सोकडा गा तिवार गा पेला दिन, फसह गा आटा घाल्जी सिळी कोंटे गा बलिदान पेळेच्के, यीशु गा चेलाकूनी दियाटे कोम्बाराके, “आम तुगन मेंबाकी आले सेने एठा अमा घाल्जी फसह तिवार गा आटा आले तैयारे?” 13यीशु नी हेजा चेलाकू तलाटे बार्खिंजके इनी मंडीटे कुलकेकु, “यरूशलेम शहरेन सेने, एठा म्या कोरो डा गा गुंडो तुटूल टे आमेन घाटाऊवा, दियागा टाऊटे सेंजू। 14एठा डीच जो उरा सेनेवा डी उरा मालिको टे मांडे गुरु मंडीवा होय, कि इंजगा पाहुनशला तोटेन होय? डेन इंज इंजागा चेलाकू गा सेंग्गोन फसह तिवार गा आटा जोम्बा। 15डबोलटे उरा गा मालिको आमके माठा गा म्या सजा सजाका तैयार कोने घलेबा, डीका जगा आलेगा घाल्जी तैयारी डाए।” 16मेटे डी बरी चेलाकू ओडजे डो यरूशलेम शहरेन हेन। डेनोगोका यीशु नी दिकुटे मंडीके डा डेनोगोका डोके। एठा देटेन फसह तिवार गा आटा तैयारके होय। 17मेटे सिंगुरूपजे मेटेनी यीशु हेजा बराह चेलाकू सेंग्गोन डी उरान हेन। 18एठा जब दिकु सुबांके डो आटाजोम लक्के डा। मेटे यीशु नी मंडीके, “इंज आपेटे सच्चो मंडीवा, कि आपे तलाटे म्याखोम जो इंज सेंग्गोन आटाजोम लक्के होय। दिकु इंज्के उठाघल्जी इंजा दुश्मानकु गा मदत डाएवा।” 19जब चेलाकूनी इनी आजुम्के मेटे इंकू सेबाईकु उदासोन एठा म्या-म्याखोमटे यीशु टे कोकाम्बारा लज्जे, “चोच डीच इंजा होय?” 20यीशु नी दिकुटे मंडीके, “आपे तलाटे म्याखोम होय जो इंजा सेंग्गोन होय थाळान येंडावा होय। 21चोयाकी कोरो गा कोण जो इंज होय डेनोगोका दियागा विषय गेन ओलके होय, डेनोगोका डाऊवा। पेनो डी कोरो लिंजेन भेबाव सजा हेजेवा जो कोरो गा कोण के उठाएच्बा। डी कोरो घाल्जी अच्छा डाऊवा कि डीच जनम बान सा।”

चेलाकू सथोन प्रभु भोज

(मत्ती 26:26-30; लूका 22:14-20; 1कुरि. 11:23-25)

22एठा जब यीशु एठा दियागा जोम्का लक्के डा मेटे दिकु यीशु नी सोकडा सावे एठा डेगा आशीर्वाद आसिटे टुक्काके। एठा हेजा चेलाकूके जीके। एठा मंडीके, “ना इनी इंजा कोम्बोर होय।” 23डाबोलटे अंगूर डा गा कोटोरा साटे धन्यवाद जीके। हेजा गा चेलाकूके जीके एठा दिकु सेबाई जीके एठा दिकु सेबाईकु नुवे। 24यीशु नी चेलाकू टे मंडीके, “इनी पचना वोजीटे परमेश्वर नी कुरकू गेल्ला उनाई करार डाके जो घोनेच कुरकू घाल्जी आडेवा होय। 25इंज आपेटे सच्चो मंडीवाकी, कि अंगूर गा रेस्सो इंज डी दिन टाएन बान नुनू जब टाएन परमेश्वर गा राज्यन उनाई अंगूर गा रेस्सो बान नुनूवा।” 26बदोन यीशु दियागा चेलाकू भाजन गानावे डो बल्लान जैतून गा टुक्की लिजेन ओले।

पतरस गा बान हाडाई गा हेजे मिनी टेमो

(मत्ती 26:31-35; लूका 22:31-34; यूहन्ना 13:36-38)

27जब दिकु टुक्की कोनेन चेल्के डा, मेटे यीशु नी चेलाकू मंडीके, “आपे सेबाईकु इंज्के आराकोम, चोयाकी पवित्र ग्रंथ इंजा बारेन चोच मंडीवा होय देटेन साच्चोजू होना। इन्जा कोरो के घोजेचबा जो इंजा कुरकू गा देखभाल म्या चचारामिंकू रोंगो डाएवा, एठा दिकु मेंडाकू रोंगो इंगन-हुगन सेनेवा। 28पेनो इन्जा जीटाऊ गा बदोन आपेटे पेला गलील शहरेन सेनेवा आपे देटेन मिलातिंजकु।” 29पतरस नी यीशु टे मंडीके, “अगर सेबाई कुरकू आमके आराटे ओले टासो पेनो इंज बान सेने।” 30यीशु नी पतरस जवाब जीके, “इंज अमाटे सच्चो मंडीवाकी टाइंज इनिका रातो कोम्बा बरी डाव राटे पेला, आम आफाई बार इंजागा इन्कार डाएवा।” 31पेनो पतरस नी एठाभी जोर टे मंडीके, “अगर इंज्के अमा गेल्ला गुजू भी टासो एठाभी इंज अमा इन्कार चोलाका बान दडा।” इनी रोंगो बाकी चेलाकूभी मंडीके।

गतसमनी शहरेन यीशु गा प्रार्थना

(मत्ती 26:36-46; लूका 22:39-46)

32जब यीशु एठा दियागा चेलाकू गतसमनी जीमू म्या जगान गेन हेन। एठा यीशु नी हेजा चेलाकू टे मंडीके, “येटेनका सुबानकूका जब टाएन इंज प्रार्थना दडावा।” 33एठा यीशु पतरस एठा याकूब एठा यूहन्ना के हेजा सेंग्गोन थोळासा लेंकिन साय्येकु। दिकु ठायका दुखी एठा नाराजो लक्के डा। 34एठा यीशु नी मंडीके, “इंजा ठायका दुकीके होय डेनोगोका इंजा जान ओठ्बा। आपे एटेन टेंगेनेका एठा जटटो थंदळे।” 35मेटे यीशु थोळासा लेंक्कीन सम्मान ओले, एठा ओटेन बोचोएन डो प्रार्थना दडा लज्जे कि बाटे अगर अमा योजनान डाऊका टासो मेटे इनी कासु टेमो इंजा लिंजेन बाकी हेजे। 36एठा दिच्नी मंडीके, “हे अबा हे बाटे अमाटे सेबाईका डाऊवा होय। इनी खाट कासुके इंजा मेराटे म्या देळेनकी एठाभी पेनो जैसा इंज चाहता डेंगो बाने। पेनो अमा इच्छा पुरायु।” 37डाबोलटे जब यीशु हिराके चेलाकूके गिटीचटे डोके पतरस टे मंडीके, “हे शमौन अमा गिटीच लक्के होय? चोच अमा म्या घंटा भी जटटो थंदळ डुका? 38झाटटो एठा प्रार्थना दडा होना एठा तखलीफबेन बाकी बोचो। कि अमा अंदाजो बाकी बोचो, आत्मा तैयारके होय पेनो कोम्बोर कमजोर होय।” 39यीशु डबोलटे दिकुके आराटे ओले, एठा देडेनका मंडीटे डीका शब्द प्रार्थना वे होय। 40एठा डबोलटे यीशु हेन डो दिकुके गिटीचका डोकेनेच, चोयाकी दियागा दुनूम गा धुंडीनके डा एठा बान हाडाई डा कि डीचके तुनी जवाब जे। 41एठा तिसरा बार हेन यीशु नी चेलाकू टे मंडीके, “नका आपे गिटीजे का एठा आराम्बोए बस टेमो हेन होय। डोगे कोरो गा कोण जो इन्ज होय पापीकु गा टीन उठाउवा होय। 42बिडे बो, डोगे इंजगा उठामिठाच मेरान हेन होय।”

गतसमनी शहरेन यीशु के धोकाटे उठायेनेच

(मत्ती 26:47-56; लूका 22:47-53; यूहन्ना 18:3-12)

43जब यीशु इनी मंडी लक्के डा। कि यहूदा इस्करियोती जो बारह चेलाकू टे म्याखोम डा हेन। एठा हेजा सेंग्गोन म्या खाट गर्दी दिकुगा टीन तलवार एठा लठ्ठा डा साले। दिकुके मुख्यायाजकु एठा मूसा गा नियम इथूमिठाच एठा यहूदी जुना सनाकु नी कुलकेकु डा। 44एठा यहूदा नी उठामिंकूके इनी पता घल्के डा। डीचके इंज गुरु मेंटो हाकोएच्बा एठा चुम्मा जे देटेनका होय डीचके उठाटे सावधान टे साईंय्याकेच। 45यहूदा हेन एठा तुरुटो यीशु गा मेरान ओलेडो मंडीके, “हे गुरु!” एठा डीचके चुम्मा जीके। 46मेटे उठामिंकूनी यीशु लिंजेन टी येंडाटे डीचके उठाएनेच। 47यीशु गा चेलाकू तालाटे जो मेरान टेगेनके डा, म्याखोम नी तलवार कोलाटे खाटयाजक गा भाग्य लिजेन सेन्द्राके। एठा दियागा लुटूरके म्हाके। 48यीशु नी डी गर्दी के मंडीके जो डिच्के उठा हेन डा, “चोच आपे डाकु मेंटो इंज्के उठा गा घल्जी तलवार एठा लठठा साटे ओटके होय? 49इंज नी हरेक दिन यरूशलेम गा मंदिर गा हालेन आपेगा सेंग्गोन थांदळटे इथू डा एठा मेटे आपे इंज्के बान उठाडुका। पेनो इनी इनिघल्जी डाएन कि पवित्र ग्रंथ गा मंडी पुरायु।” 50मेटे सेबाई चेलाकू यीशु के आराटे साळुपजे। #भजन. 88:18 51एठा म्या जवान हेजा नंगा कोम्बोरेन लिजेन चद्दार ओळटे दियागा टाऊटे ओले। एठा कुरकू नी डीचके उठाकेनेच। 52पेनो डीच चद्दार आराटे नंगा साळुपजे।

यीशु महासभा गा सम्मान

(मत्ती 26:57-68; लूका 22:54-55,63-71; यूहन्ना 18:13-14; 19-24)

53डाबोलटे दिकु यीशु के खाटयाजक गा उरान सैय्येनेच। एठा सेबाई मुख्यायाजककु एठा यहूदी जुना सनाकु एठा मूसा गा नियम इथूमिठाच डी उरान जामाएन। 54पतरस लेंक्कीटे टेका दिकु टाऊ-टाऊटे खाटयाजक गा उरा गा दरोम टाएन ओले। एठा सैनिककु गा सेंग्गोन सुबानटे सिंगेलेन सेको लज्जे। 55मुख्यायाजककु एठा सेबाई खाटसभा यीशु के घोगेज गा घाल्जी दियागा खिलाफबेन गवाही घगाटा लक्के डा, पेनो बान घाटाडुका। 56चोयाकी घोनेच कुरकू यीशु गा खिलाफबेन लबाळ गवाही जिऊ लक्के डा। पेनो दिकु सेबाई कुरकू गा गवाही म्याका रोंगो बान डा। 57मेटे चोटोकु नी बिटजे डो दियागा खिलाफ मेटे लाबाळ गवाही जीके, 58आलेनी डीचके इनी मंडीटे आजुम्के होय, “इंज इनी जो कुरकू द्वारा आरुके मिनी मंदिर के फाडेबा, एठा आफाई दिनेन दूसरा आरोएवा।” 59एने लिंजेन भी दिकुगा गवाही म्याका रोंगो बाऊ डा। 60मेटे खाटयाजक नी कुरकू सम्मान टेंगेनटे यीशु के कोम्बाराके, “आम अमागा बबाचातिंजेन चोचकाभी चोया बान मंडी? इनी कुरकू अमा खिलाफबेन चोच गवाही जेबा होय?” 61पेनो यीशु कायोम्के एठा तुनिका जवाब जिडुका। खाटयाजक नी यीशु टे डाबोलटे कोम्बाराके, “चोच अमा डी सेबाई टे महान परमेश्वर गा कोंटे मसीह होय दियागा आले आराधना दडावा होय?” 62यीशु नी मंडीके, “हेन इंज होय एठा आपे कुरकू कोरो गा कोण जो इंज होय कि सर्वाशक्तीमान परमेश्वर गा डाखुरी कोनेन सुबानके एठा आपे इंज्के आकाश गा बदळा गा सेंग्गोन स्वर्ग देटेन परमेश्वर थंदळवा होय देटे टे हेजे टे डोकोम्बा।” 63मेटे खाटयाजक नी हेजा कपळे टयाटे मंडीके, आलेन एठा तुनिका गवाही गा जरुरत बाऊ होय। 64आमनी इनी खिलाफबेन आजुम्के जो इनिजनी चोखरा परमेश्वर गा घाल्जी मंडीके। “आपेगा एनेन चोच साला होय?” दिकु सेबाई कुरकू नी आजुम्जे कि यीशु नी गलती डावे होय इनिघल्जी डीचके गुजू गा दण्डो जे। 65मेटे जेकानी दिया लिजेन बेबेच लज्जे एठा जेका दियागा म्वार टोलटे एठा डीचके बुक्की मुंडाटे मंडी लज्जे अगर अमा परमेश्वर गा कोनेटे मंडीमिठाच होय मेटे आलेके भविष्यवाणी डाटे घाले, कि आमके जे मुंडाकेमी। एठा रखवाली दोडो मिंकूभी डीचके उठाटे थपळा मुंडाके।

पतरस गा बान चिचाना एठा जाम

66जब पतरस इटान दरोम गा मेरानके डा, मेटे खाटयाजक गा दासीकू तलाटे म्याखोम देटेन हेन। 67एठा पतरस के सिंगेलेन सेकोटे डोकेनेच एठा डीचके कळाक्को हाडे टे डोकेनेच मंडी लज्जे, “आमभीनी नासरी यीशु गा सेंग्गोन डा।” 68पतरस बादलाएन एठा मंडीके, “इंज नी बान हाडाई एठा बान समझातिंज डुका कि अमा चोच मेन लक्के।” डाबोलटे डीच बल्लान दराजोन ओले एठा कोम्बानी राके। 69डी दासीनी पतरस के धोटे दियाटे जो मेरान ठेगेन्के डा। डाबोलटे मंडी लज्जे, “कि इनिज दिकु तलाटे म्या चेला होय।” 70पेनो पतरस डाबोलटे बदलाएन एठा मंडीके बाने इंज बाऊ होय। एठा थोळासा टेमो बदोन दिकुनी जो दियागा मेरान टेगेनके डा डाबोलटे पतरस के मंडीके, “जरुर टेका आम दिकु तलाटे म्याखोम होय चोयाकी आम गलील कुरकू टे होय।” 71मेटे पतरस नी मंडीके इंज कसोम जोम सच्चो मंडी लक्के, “इंज डी कोरो बान हाडाई, दियागा बारेन इंज बातो लक्के होय।” 72मेटे तुरुटो का दूसरा बार कोम्बानी राके पतरस के इनी बातो जो यीशु नी दियाटे मंडीके डा यादो हेन, “कोम्बा गा बरी बार राटे पेला अमा आफाई बार इंजगा इन्कार कोम्बा।” मेटे पतरस इनी बातो के सोचातिंजटे खट्टेका जाम लज्जे।

Currently Selected:

मरकुस 14: GOKNT

ማድመቅ

Copy