मत्ती 28

यीशु गा जीटाऊ

(मरकुस 16:1-10; लूका 24:1-12; यूहन्ना 20:1-10)

1परमेश्वर चोखरा दिन गा बादोन हाप्ताह गा पेला दिन जब फेजेरु लक्के डा बिजली साडेन का डोन मरियम जो मगदेला गाँव टे डा एठा दूसरा मरियम कब्रा के दोडो हेन। 2मेटे अचानक म्या खाट भूकंपा डायेन एठा प्रभु गा म्या स्वर्गदूत स्वर्ग टे आगुरुके, एठा मेरान हेंडो डीचनी घोटाके धिकलीके डा, एठा डे लिंजेन सुबानजे। 3दियागा रुपो बिजली रोंगो एठा दियागा जवानके पुलूम कपडे गा रोंगो डा। 4दियागा हिगराएन सैनिककु कापतींजे बिडजे, एठा गोएन रोंगोयेन मेना। 5स्वर्गदूत नी जपाए कुटे मंडीके, “बाकी हिगरा इंजेन मालूम कि आपे यीशु नासरी के, जो क्रूस लिजेन पेळेच्केनेच डा घागटावा 6देटेन येटेन बाने होय, पेनो आपना वचन गा रोंगो जीटाएन होय, हेजे येटेन जगा डोगे, येटेन प्रभु के डोकेनेच डा। 7एठा जाल्दी दियागा चेलाकू टे मांडे, कि देटेन घोएनाटे जीटाएन होय, आपेटे पेला गलील लेन सेनेवा होय, देटेन दियागा दर्शन डूगुवा, डोगे, इन्जनी आपेटे मंडीके डा।” 8एठा दिकुन हिगरा एठा भेबाव खुशी गा सेंग्गोन कब्रा टे जाल्दी हिरायेन दियागा चेलाकूके समाचार जिऊ गा घांजी साळूप के मेना।

जापाएकुन यीशु गा दर्शन

9मेटे अचानक यीशु दिकुन घाटाएन एठा मंडीके, “आपेन शांती आरुका थंदळजू” एठा चेलाकू मेरान हेंडो एठा दियागा नंगा उठाटे नंगा साब लज्जे। 10मेटे यीशु नी दिकुटे मंडीके, “बाकी हिगरा, इंजा चेलाकू टे सेने डो मांडे, कि गलील जिल्हान सेने देटेन इंज्के डोकोम्बा।”

जागलीमिंकू घागल

11मेटे कि जापाएकु चेलाकूके येदेन खाबोर जिऊ घागल गा घल्जी चेल्के डा, डो दोडोमिंकू जो कब्र जागली पूरा, सैनिक तलाटे चोटोकु नगरेन हेंडो पूरा हाल डी जगान डाएन डा मुख्यायाजककु के घाल्के। 12मेटे मुख्यायाजककु, यहूदी जुना सनाकु टे मिलातिंजके एठा आपना योजना हारुके। दिकुनी सैनिककुके डामा जीटे म्या खाट घोनेचका चाँदी जिऊ फैसला डाके, येदेन घागल गा घल्जी कि कब्र खालिका चोया डा। 13“येटेन सेबाई कुरकू टे मंडीकी कि रातो आले जब गिटीच लक्के डा, मेटे यीशु चेलाकू हेंडो दियागा म्हाळा चुरीटे साईय्ये। 14अगर येटेन बातो राज्यपाल गा लुटूर टाएन आदिरेवा, डो आले डीके समझातिंजेवा, आपेन तुनिका मंडी गा चिंता दडा गा जरुरात बाऊ होय।” 15इनिघल्जी दिकुनी डामा साटे जैसा इथूकेकु डा, डेनोगोका डाके, एठा येटेन बातो टैंज टाएन यहूदी कुरकू गेन मालूम्जे होय।

चेलाकूके दर्शन एठा आखिरी हुकूम

(मरकुस 16:14-18; लूका 24:36-49; यूहन्ना 20:19-23; प्रेरित 1:6-8)

16एठा ग्यारह चेलाकू गलील जिल्हा डी टुक्की लिंजेन ओले, येटेन यीशु नी दिकुटे मिलातिंजू घल्जी मंडीके डा। 17एठा चेलाकूनी यीशु के धोटे दर्शन घाटाएन डीचके नंगा साब्बे पेनो जेका-जेका के शक जे कि देटेन जीटाएन होय। 18यीशु नी दिकु मेरान हेंडो मंडीके, कि स्वर्ग एठा पृथ्वी गा सेबाई हाक इंज्के जिले होय। 19इनिघल्जी आपे सेने डो सेबाई जाटो गा कुरकू के चेलाकू आरुकु एठा दिकुके बाटे एठा कोण गा पवित्र आत्मा गा जीमू टे बपतिस्मा जे, 20एठा दिकुके सेबाई बातो जो इंज्नी आपेके हुकूम जीके होय, मामानातींज इथूकु एठा डोगे, इंज दुनिय गा आखरी टाएन हमेशा आपे गेल्ला थंदळवा।

Currently Selected:

मत्ती 28: GOKNT

ማድመቅ

Copy