Matəw 9
9
Yeso zwey anóm nu aba inyo ma feyn ku
1Yeso nyi abaŋ ugwi kwene ŋu ungɨŋ asin zənə yə́ mə́ chomo awu.#9.1 Yə mə chomo Kapenahom. 2Amaʼazənə yə pey awu, ba moʼ beʼe anom igun abaʼa iŋu abú uŋwən. Amaʼazənə Yeso zən umugə ba wu zi fiŋ inyo ma, Yə ghayn abú anom ŋunə aba inyo ma feyn ku kwi, “Yimə fiŋ inyi ajoŋ, mə si waʼ umbə unó iboŋ.”
3Amaʼazənə yə ghayn nigə, mbə́ taʼa ba akə unoʼo moʼ ghayn akaʼa uma kwi, “Anom ŋunə yə jimə Nwiye!”
4Yeso kyay ikono uma anigə yə́ ighayn kwi, “Mbən mə kono unó iboŋ itən fiŋ da ngiya? 5Amə anó zayn amə zaba? Amə ighayn kwi, ‘Mə si waʼ Umbə unó iboŋ’ kə ighayn kwi, ‘Noʼo atey iyeŋ?’ 6Anigə ayi aghəy mbən kyay kwi Ŋwə̂ Wa yə nə ikay akə igun isəg iwaʼ unó iboŋ ba.” Amaʼazənə yə ghayn nigə, yə́ ghayn abú wa ŋunə aba inyo ma feyn ku kwi, “Noʼo atey beʼe injə abaʼa ŋu unuʼ.” 7Anom wu noʼ atey ŋuw ma unuʼ. 8Amaʼazənə akama ba wu zən anó zəŋ, mbə́ bó anigə iyere Nwiye umugə u naʼa ukudu ikay yugə abú wa.
Yeso tiya Matiyo
9Yeso noʼ asin wu, umugə yə́ mə́ yeŋ ŋuw, yə zən anom moʼ nu mbə́ mə́ tiya akə Matiyo. Yə chomo ungɨŋ na zənə umə fere ukab tag awu ungɨŋ. Yeso ghayn abú uŋwən kwi, “Niŋe inyi jim” Matiyo noʼ iniŋe anjim ma.
10 #
Luk 15.1, 2 Amaʼazənə Yeso nə mbə məŋə-anó ma chomo ni jəgə ungɨŋ na Matiyo, mbə fere utag chini nanaʼ foro ba mbənə umə aghəy unó iboŋ foro ni ijəg aboʼo úŋwən. 11Amaʼazənə ba Farasay zən anó zəŋ, mbə́ biri abú mbə məŋə-anó ma kwi, “Ungwən ataʼa ba mə jəgə ni mbə fere ukab tag foro nə ba mbənə umə aghəy unó iboŋ da ngiya?”
12Amaʼazənə Yeso zəw anó zəŋ, yə ghayn kwi, “Cha ba mbənə umə ikay mə kaba uma wa ifuʼ. Amə ba mbənə umə sɨgə, umə kaba wa ifuʼ 13#Mat 12.7Mbən ŋuw ikab aton akə inayn zənə ighayn kwi, ‘Ayə kaba amə kwi diri ba umbi. Akaʼa ma kwi ba naʼa u aghəy ifá iniŋ.’ Cha adi zaʼa aŋu i tiya ba mbənə umə aghəy unó mbənə ukoʼoro, mə zaʼa itiya amə ba unoʼ iboŋ.”
Ibiri da anó ni ijiyə injəy
14Mbə́ məŋə-anó Jon ŋunə yə́ mə́ naʼa une ŋu abú Yeso pey yi biri abú uŋwən kwi, “Aton zənə umba nə ba Farasay mba mə ijiyə injəy cha umbə məŋə-anó mə ijiyə uma amə da ngiya?”
15Yeso ywiri abú úŋwən kwi, “Ba mbənə u ŋuw ijəg ugən mi chomo akə akənə ngiya nu unom ugən mə aboʼo úŋwən? Aney yi zaʼa nu umi num unom ugən wu akaʼa uma. Aney wu bə koʼo, umbi ijiyə injəy.
16Cha wa moʼ mə num ma aba ndwi fey ikən ubəg akə anun ndwi awu. U bə ghəy nigə, aba ndwi fey wu ayi gha pəŋi ubəg kyayn akə anun ndwi wu. 17Kə cha wa moʼ mə num ma unoʼ zuw zi ungɨŋ toʼ zənə i siy ibey. Ubə ghəy nigə, amaʼazənə unoʼ wu mi ti mə tənə, toʼ wu yi toʼo anigə unoʼ tuwə. Umbə zi unoʼ zuw ungɨŋ toʼ fey da ka u nim ma toʼ inim unoʼ.”
Yeso zəmə akwere moʼ nibi zwey ayey nu yə́ mə́ sɨgə
18Amaʼazənə Yeso mə bugə inayn, wa kyayn moʼ abú ba Jû ŋu abú uŋwən. Pey yi zum utəw nwi ifigi ma ghayn kwi, “Inyi akwere chere iku. Zaʼa iniŋi umbə ubugə igun ma anigə uyi gha zəmə.” 19Yeso nə mbə məŋə-anó ma noʼ ni ŋuw aboʼo uŋwən.
20Ayey moʼ nu yə si sɨgə imbayn beni akə ituʼ ighum cho bigə ŋu anjim Yeso pey yi bira iyad ndwi ma. 21Yə́ ghayn ungɨŋ fiŋ ma kwi, “Abə́ bira aba ndwi ma a yi boro.”
22Amaʼazənə yə bira nigə, Yeso gha ma zən uŋwən ghayn abú uŋwən kwi, “Uŋu kwere yimə fiŋ, injə ibeni fiŋ aghəy ayə ngwə boro.” Aba ghari wu, ayey wu boro.
23Amaʼazənə Yeso ŋu aku wa kyayn wu abú ba Jû, yə zən ba umə toŋo adura inbi zən umoʼ nu umə idey ijoʼo. 24Amaʼazənə yə zən nigə, yə ghayn abú úŋwən kwi, “Mbən duw isəg, cha akwere zəŋ di si kuw ma uyə bune amə buni.” Amaʼazənə yə ghayn nigə, ba wu chiʼ uŋwən. 25Amaʼazənə mbə́ si cha ba wu isəg, Yeso nyi ungɨŋ na wu yimə abugə akwere wu. Akwere wu noʼ təm atəy.
26Ukən da anó zəŋ saŋa ungɨŋ aba abey wu ujum.
Yeso zwey ifəg ibigə
27Amaʼazənə Yeso noʼo asin wu, umugə yə mə yeŋ ŋuw, anom ubigə nu amə́ ifəg niŋe anjim ma. Mbə́ mə́ yeŋ yə kyayn akə ikay ghayn kwi, “ŋwə̂ Dafid kənə akə ngwa.”
28Amaʼazənə Yeso nyi ana, ifəg wu ŋu abú uŋwən. Anigə yə́ biri abú úŋwən kwi, “Mbən beni kwi ayə nə ikay ighəy mbən zən usin?” Mbə́ ywiri kwi, “Masa mba beni.”
29Yeso bira aghɨ uma ighayn kwi, “Anó zənə mbən beni aghəy inen nigə.” 30Anigə mbə́ gha ti ni zən usin. Yeso chere úŋwən akə ikay ighayn kwi, “Ka mbən aghəy ngwən kwi wa moʼ noʼo kyay anó zəŋ.” 31Asɨmə mbə́ noʼ ni yeŋ yə saŋa ukən da Yeso ungɨŋ aba abey wu ujum.
Yeso zwey anóm moʼ nu cha yə́ mə́ inayn
32Amaʼazənə ifəg wu mə ŋuw, ba moʼ num anóm moʼ nu uzugə iboŋ aghəy u beŋe akə ukəw ŋuw abú Yeso. 33Amaʼazənə Yeso chi uzugə iboŋ wu, anom wu ti ni inayn. Ba ujum yere, anigə ighayn kwi, “Cha mba di si noʼ zən ngwa ukudu unó uŋu ungɨŋ Izre.”
34 #
Mat 10.25; 12.24; Mak 3.22; Luk 11.15 Asɨmə ba Farasay ghayn kwi, “Amə ufon abú uzugə iboŋ u naʼa ikay abú uŋwən kwi u chiyə uzugə iboŋ.”
Yeso kənə akə ba
35 #
Mat 4.23; Mak 1.39; Luk 4.44 Yeso mə gha yeŋ usin kyayn ujum foro ungɨŋ usin kukuŋe ujum. Yə́ mə́ yeŋ yə itey unó ungɨŋ na ibumi ba Jû tənə tə́ mə́ ungɨŋ usin wu. Yə́ mə́ nibə yeŋ yə ghayn ukən uchuŋ da anó ufon azobo, nibə yə zwey ikudi isɨgə ujum. 36#Mak 6.34Amaʼazənə yə́ zən akama ba wu, akənə sugi ungɨŋ fiŋ ma abú úŋwən. Damugə mbə́ mə́ zəw ingəʼ foro da mugə amə cha wa yə mə ywere úŋwən. Anigə, mbə́ chomo ni injəg tənə cha anəmə injəg. 37#Luk 10.2Yə ghayn abú mbə́ məŋə-anó ma kwi, “Ughəy jaŋa mbə nanaʼ, asɨmə ba faʼa kweʼ. 38Anigə, mbən chaʼara Asɨyisəg ŋunə amə imbayn ima kwi u cha ba faʼa u ŋuw jaŋa u ghəy ma.”
Currently Selected:
Matəw 9: NGI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 CABTAL
