Matəw 10
10
Yeso tom ba utom ighum cho bigə
1Yeso tiya mbə məŋə-anó ma ighum cho bigə asin feyn inaʼa ikay abú úŋwən kwi ú chiyə uzugə iboŋ, izwey ikudi isɨgə ujum ighəy kwi ba boro. 2Amə ikum ba utom wu ighum cho bigə itəŋ. U yi imbəy amə Sayimon ŋunə mbə́ mə́ tiya akə Pita, nə unya anóm ma Andrew: Jems nə unya anóm ma Jon úŋwən mə buŋ Zebedi: 3Filip nə Batoloməw: Tomas nə Matiyo ŋunə yə mə́ num ukab tag: Jems ajoŋ Alfayus nə Tadiyus: 4Sayimon ŋunə yə́ zi fiŋ abey nə Judas Iskariyot ŋunə yə́ fənə Yeso.
Unó mbənə ba utom wu ighum cho bigə ŋu ifaʼ
5Yeso tom ba utom wu ighum cho bigə ighayn abú úŋwən kwi, “Ka mbən ŋu ngwən akaʼa ba mbənə akaʼa ma ba Jû kə iŋu nyi ungɨŋ asin moʼ Samariya. 6Mbən ŋuw amə abú ba Izre nu umə nə injəg tənə inimi. 7Amaʼazənə mbən ŋu awu, mbən yeŋ yə ighayn inayn Nwiye abú úŋwən kwi, ‘Anó ufon azobo si tinə.’ 8Mbən zwey ba isɨgə, izəmə uwu ba, izwey ba mbənə akyuŋ mə inyo ma nibi chi uzugə iboŋ inyo ba. Mə naʼ ikay zəŋ inen ibuw anigə mbən ni aghəy unó mbəŋ ibuw.
9Ka mbən yimə ngwən ukab gol, kə ukab sɨriva kə ukab kapa umbən ubam. 10#1Ko 9.14; 1Ti 5.18Ka mbən num ngwən abam kə ndwi chini kə utabay kə imbaŋ, yə kəʼ kwi ba jəy wa faʼa. 11Mbən bə́ nyi ungɨŋ asin kyayn kə ungɨŋ asin kukuŋe, mbəŋ kaba wa ŋunə u wuʼi inum ngwən anji chuŋ ichomo nə uŋwən pey amaʼazənə mbən mi noʼ asin wu. 12Mbən bə nyi ungɨŋ na moʼ, mbən chaʼara ba mbənə umə awu ungɨŋ na kwi, ‘Nwiye zi aborobod igun inen.’ 13Ba mbənə umə awu ungɨŋ na bə num ngwən anji chuŋ, aborobod yi tənə ungɨŋ na wu. Abə mə kwi cha u di num ma ngwən anji chuŋ, aborobod wu yi gha tənə inen. 14#Ifa 13.51Abə mə kwi cha ba ungɨŋ na moʼ kə ungɨŋ asin moʼ num ma ngwən anji chuŋ kə zəw anó zənə mbən mə ighayn, mbən koro imboyi umbən ughəw idu ungɨŋ na wu kə ungɨŋ asin awu. 15Ayə ghayn asiʼ inen kwi, aney zənə Nwiye mi saʼa isəg, u yi diri ba Sodom nibi diri ba Gomora chigə umugə u mi diri ba mbənə umə ungɨŋ asin wu.”
U mbi nwini inya ughəw ba utom
16 #
Luk 10.3
Yeso ŋu imbəy ighayn kwi, “Mbən zəw! Ayə cha ngwən isəg mbən chomo ni injəg akaʼa ifuŋ. Mbən iwe ngwən ni ijugə, ni nara ni buŋ. 17#Mak 13.9-11; Luk 12.11, 12; 21.12-15Mbən iwe ngwən nə ba, damugə umbi ibiya ngwən ŋu na abú mbə́ saʼa abey, umbi swayn ngwən ungɨŋ na ibumi ba Jû. 18U mbi ghəw ngwən iŋu ifigi gobono foro ifigi ifon da aŋu. Ubə aghəy nigə, amə apan inen ighayn ukən uchuŋ abú úŋwən foro abú ba mbənə akaʼa ma ba Jû. 19Amaʼazənə u bə yimə ngwən, ka mbən tumə ngwən inyo da anó zənə mbən mi ghayn kə da nji zənə mbən mi ghayn. Amaʼ wu bə koʼo, Nwiye yi aghəy kwi mbən kyay anó ni ghayn, 20damugə akə ma u mbən mə inayn. Amə Azugə Mbaʼ ami chigə itən injim inayn.”
21Yeso ŋu imbey ni ghayn abú úŋwən kwi, “Unya umbi fənə unya ma kwi uzwere, mbaʼ mbi fənə buŋ uma kwi uzwere, buŋ mbi beŋe utəw abú mbaʼ uma anigə ghayn kwi u zwere. 22#Mat 24.9; Mak 13.13; Luk 21.17; Mat 24.13; Mak 13.13Ba ujum mbi bana ngwən da aŋu. Asɨmə wa ŋunə umi yimə fiŋ iŋu pey akə inwi, Nwiye yi chiyə uŋwən angəʼ. 23Amaʼazənə umbə nwini itən inya ughəw ungɨŋ asin moʼ, mbən noro iŋu ungɨŋ asin chini. Ayə ghayn asiʼ inen kwi ki mbən sə ŋu yeŋ usin ujum ungɨŋ Izre, Ŋwə̂ Wa yi wene zaʼa.
24 #
Luk 6.40;
Jon 13.16; 15.20 Cha wa ŋunə umə kweme anó mə chigə ma wa ŋunə umə itey anó abú uŋwən, cha wa faʼa mə chigə ma mbaʼ afaʼa. 25#Mat 9.34; 12.24; Mak 3.22; Luk 11.15Anigə wa aməŋə-anó ni wuʼe ma kwi i məŋi nə wa ŋunə umə itey unó abú uŋwən. Ŋwə̂ afaʼa nibi məŋi ni mbaʼ afaʼa. U bə mə tiya atəw akə na kwi Belzebul, nji umbi mə tiya ba ungɨŋ na ma akə ikum nu ibɨy chiyə.”
Wa ŋunə amə aghəy uni goro uŋwən
26 #
Mak 4.22; Luk 8.17 Yeso ŋu imbey ni ghayn kwi, “Mbən mə goro ngwən ba, cha aghəy moʼ awu u kəbərə nu cha umi fiʼi, kə anó moʼ u mə inoy nu cha ba mi kyay. 27Unó mbənə amə ghayn inen ambiri, mbən ghayn Amaʼazənə usin mə zayn. Unó mbənə amə ijumə inen, mbən təm indəm na isaʼ. 28Ka mbən mə goro ngwən ba mbənə amə ghəy u zwere nyə̂ inyo asɨmə cha amə ghəy u zwere azugə. Asɨmə mbən goro amə Nwiye ŋunə amə ghəy u zwere nyə̂ inyo nibi zwere azugə ungɨŋ asin ingəʼ. 29Ká umbə fənə íchiy bigə aba akə ŋwə̂ ukab, asɨmə cha u moʼ mi fwayn ma asey nu cha ungwən mbaʼ di beni. 30Kaba inyoŋ tənə imə umbən utəw, Nwiye si taŋ ujum. 31Anigə, mbən mə goro ngwən. Mbən chigə ngwən akə inen nanaʼ.”
Anó da ibeni kə iton Kristo
32Yeso ŋu imbey ni ghayn kwi, “Wa ŋunə u beni ifigi ba kwi yə kyay aŋu, ayi beni ifigi uŋu Mbaʼ ŋunə umə azobo kwi mə kyay uŋwən. 33#2Ti 2.12Asɨmə wa moʼ ŋunə u ton aŋu ifigi ba, ayi nibi ton ifigi uŋu Mbaʼ ŋunə umə azobo kwi cha adi kyay aŋu uŋwən.”
Yeso zaʼa kwi ba zoŋ ka uchomo uma akə aborobod
34Yeso ŋu imbey ghayn kwi, “Ka mbən kono ngwən kwi mə zaʼa da inaʼ aborobod igun isəg. Cha adi zaʼa ina aŋu aborobod, mə zaʼa amə kwi uni zoŋ. 35Mə zaʼa ighəy kwi,
Ajoŋ ni komo atəw nə mbaʼ ma,
Akwere ni komo atəw nə ingo ma,
Foro kwi ayey ni komo atəw nə ingo mbə unom ma.
36Ungwə wa abana yi mə wa ungɨŋ ungwə unebey.
37Wa moʼ ŋunə u wuʼi mbaʼ ma kə ingo ma chigə aŋu cha u di koʼ iməŋi uŋu aməŋə-anó, wa moʼ ŋunə u wuʼi ajoŋ ma kə ukwere ma chigə aŋu cha u di koʼ iməŋi uŋu aməŋə-anó. 38#Mat 16.24; Mak 8.34; Luk 9.23Wa moʼ ŋunə cha u di beʼe ma azad baʼara niŋi inyi injim, cha u di ikoʼ iməŋi uŋu aməŋə-anó. 39#Mat 16.25; Mak 8.35; Luk 9.24; 17.33; Jon 12.25Wa moʼ ŋunə umə kaba ijəg itəni yi isam itəni wu, asɨmə wa ŋunə u sam itəni ma da aŋu u yi jəg itəni wu.”
Anó da uchoʼo afaʼa
40 #
Luk 10.16; Jon 13.20;
Mak 9.37; Luk 9.48 Yeso ŋu imbey ghayn kwi, “Wa moʼ ŋunə u num ngwən anji chuŋ yə nibi num aŋu anji chuŋ. Wa moʼ ŋunə u num aŋu anji chuŋ yə nibi num wa ŋunə u tom aŋu. 41Wa moʼ ŋunə u num wa ukən Nwiye damugə uŋwən mə wa ukən Nwiye, u yi num u choʼo afaʼa wa ukən Nwiye. Wa moʼ ŋunə u num wa ŋunə umə aghəy unó mbənə u koʼo damugə u yə aghəy unó mbənə ukoʼo, u yi num u choʼo afaʼa wa ŋunə umə aghəy unó mbənə u koʼo. 42Wa moʼ ŋunə u naʼa kaba itoʼ une zuw abú Ŋwə̂ Wa moʼ akaʼa umbəŋ damugə uŋwən amə uŋu aməŋə-anó, u yi mə nə u choʼo afaʼa.”
Currently Selected:
Matəw 10: NGI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 CABTAL
