GENESIS 24
24
Isak Nupi Halnak le Ṭhitnak
1Abraham cu a tar ngaingai cang i a thil tuahmi kip ah khan Bawipa nih thluachuahnak a pek. 2A sal upa bik, a ngeihmi thil vialte a zohkhenhtu kha a thawh i, “Ka phei tangah na kut chia law bia i kam. 3Van le vawlei uktu Pathian Bawipa min in chiatser in, ka sinah bia i kam ti kan duh. Cu bia kamter kan duhmi cu hihi a si: atu i ka umnak Kanaan ram mi hi ka fapa Isak nupi caah na ṭhi hrimhrim hna lai lo. 4Ka chuahkehnak ram ah khan na va kal lai i ka rualchan hna chung khan ka fapa Isak caah cun nupi na va ṭhit lai,” tiah a ti. 5A salpa nih cun a thawh i, “Hika ram lei rat awkah ngaknu nih cun an inn cu kaltak duh hlah seh law tah zeitindah ka tuah hnga? Na fapa cu maw na chuahkehnak ram ah cun ka kirter ṭhan hnga?” tiah a hal. 6Abraham nih cun, “Ka fapa cu cuka ah cun na kirter hrimhrim hnga lo. 7Vancung Pathian Bawipa nih, ka pa inn le ka sahlawh le ka rualchan vialte hna sinin a ka chuahpi i, hi ram hi na tefa ka pek hna lai, tiah chiatser tein bia a ka kam. A vancungmi kha na hmaiah a thlah lai i cuka ah cun ka fapa caah nupi ding na va hmuh ko lai. 8Sihmanhsehlaw nu nih khan an zulh duh lo ahcun, ka sin i bia naa kammi na luat lai. A zei si hmanh ah, ka fapa cu a kir bel cu ram ah cun na kirpi bal hnga lo,” tiah a leh. 9Cucaah a salpa nih cun a bawipa Abraham phei tangah cun a kut kha a chiah i a fialmi kha tuah dingin bia aa kam.
10A salpa nih cun a bawipa kalauk chungin pahra kha a lak hna i laksawng man sungsung kha aa phorh hna i Mesopotamia ram Nahor khua i kal awkah cun aa thawh. 11A va phak tikah, khua pawng i a ummi tikhor pawngah khan a kalauk cu a bawhter hna. Cu caan cu zanlei sang, nu nih ti than awk i an rat caan khi a si. 12Cun thla a cam i, “Bawipa, ka bawipa Abraham i a Pathian, nihin ah hin hlawhtlinnak ka pe law ka bawipa sin i bia na kammi kha hmunhter ko. 13Atu ah hin khua chung ngaknu nih ti an rung thannak ding tikhor ah hin ka um i hi tikah 14ngaknu kha ka thawh i, ‘Zaangfahnak in na ti-um kha vun ṭhum law ti din awk ka pe tuah,’ ka ti i, ‘Ding hen, na kalauk hna zong kha ti ka pek hna lai,’ a timi cu, na sal Isak ca i na thimmi si seh. Cu bantuk thil a si ahcun, ka bawipa sin i na biakamnak kha a hmun tiah ka hngalh lai,” a ti.
15A thlacam a dih hlanah khin Rebekah kha a ti-um cu a liang ah a run i khinh i a ra. Rebekah cu Bethuel fanu kha a si, Bethuel cu Milkah fapa kha a si i Milkah cu Abraham nau Nahor nupi kha a si. 16Rebekah cu ngaknu a si i aa dawh ngaingai. Tikhor ah cun a vung kal i a um khat cun ti cu a vung than i a hung chuak ṭhan. 17Abraham salpa nih khan a hei tlikhnawh i, “Zaangfahnak tein na um chung ti kha din awkah ka pe tuah,” tiah a ti. 18Rebekah nih cun, “Ding hen, bawipa,” a ti i a ti-um cu a liang cung cun a vun ṭhumh i a tlaih bu khan a dinter. 19A din dih in Rebekah nih khan, “Na kalauk hna ca zongah hin ka vung than lai i cim tein ding hna seh,” a ti. 20Saṭil ti dinnak kuang ah khan a ti cu a bungh i tikhor chungah cun a vung tli ṭhan i a kalauk kha an tihal a riamh cikcek hlantiang ti cu a thanpiak hna. 21Bawipa nih ka khualtlawnnak ah hin hlawhtlinnak a ka pe maw pe lo tiin mipa nih khan Rebekah cu dai tein a zoh ko.
22Kalauk kha ti a dinh dih hna hnuah Abraham salpa nih khan a man a fak ngaimi sui hnartonh pakhat kha aa chuah i a hnar ah cun a tonh, cun sui kuthrolh ngan pipi pahnih zong aa chuah i a kut ah khan a hrolh hna. 23Cun ngaknu cu a thawh i, “Ahodah na pa a si, ka chim tuah. Na pa inn ah cun keimah le ka mi hna caah riahnak hmun a um hnga maw?” tiah a hal. 24Ngaknu nih cun, “Nahor le Milkah fapa Bethuel fanu ka si,” tiah a leh. 25“Kan inn ah cun ramro le saṭil rawl zong tampi a um i nanmah riahnak ca hmun zong a um ko,” a ti fawn. 26Cun Abraham salpa nih cun a khuk aa bil i Bawipa kha a biak. 27Cun aa thawh i, “Ka bawipa Abraham i a Pathian, ka bawipa sin i a biakam let lo tein a ummi cu thangṭhat si ko seh. Bawipa nih ka bawipa i a unau inn ah ding tein a ka hruai ko,” tiah a ti.
28Ngaknu cu a nu inn ah khan a va tli i cu kong cu a dihlak in a chimh dih. 29Rebekah ṭa Laban kha, mipa umnak tikhor lei i va kal awkah cun lengah khan a tli. 30A hnartonh le a far kut i a kuthrolh kha a hmuh hna i a far nih mipa nih a ka chimh a timi a chimmi zong kha a theih tikah Abraham salpa, a kalauk hna pawng i a dirnak tikhor ah khan a va kal. 31Amah cu, “Bawipa, ra lut tuah. Nangmah cu Bawipa nih thluachuah an pekmipa na si. Zeicahdah lengah cun na um ko. Kan inn chungah nangmah caah hmun pakhat kan sersiampiak cang i na kalauk hna ca zongah hmun a um ko,” a ti. 32Cucaah mipa cu inn chungah khan a lut i Laban nih khan kalauk cu an thil a ṭhumh hna i ramro le rawl kha a pek hna. Cun Abraham salpa le a mi hna ke ṭawlnak caah ti a rak put. 33Rawl kha an hun hunh hna, sihmanhsehlaw mipa nih khan aa thawh i, “Ka rathnawh chanmi thil ka chim hlanah cun ka ei lai lo,” a ti. Laban nih, “Chim ko,” tiah a ti.
34Abraham salpa nih cun aa thawh i, “Kei cu Abraham sal ka si. 35Bawipa nih ka bawipa cu thluachuahnak tampi a pek i mi lianngan pakhat ah a ser. Tuurun le mehehrun le caw le sui le ngun le salnu le salpa le kalauk le laa kha a pek hna. 36Cun ka bawipa nupi Sarah nih khan ka bawipa cu a tar toiah fapa pakhat a hrinpiak i ka bawipa nih a fapa cu a ngeihmi thil vialte kha a pek dih. 37A nawlbia kha ngaih awkah chiatserh tein bia a ka kamter i cu biakam ah cun hitihin a ti: ‘Ka umnak Kanaan ram ngaknu hna chungin ka fapa caah nupi na hal hrimhrim lai lo. 38Ka pa miphun, ka sahlawh ka rualchan hna sinah na kal lo i cu hna sinin ka fapa caah nupi na ṭhit lo a si ahcun, na cungah chiatnak tlung seh,’ a ka ti. 39Cun ka bawipa cu ka thawh i, ‘Nu nih cun a ka zulh duh lo ah tah, zeitindah a si hnga, ka ti. 40A ka leh i, ‘Amah nawl ka ngaih zungzalmi Bawipa nih a vancungmi kha na sinah a kalter lai i na hlawh a tling ko lai. Ka mi hna sinin, ka pa chungkhar hna sinin ka fapa cu nupi na va hmuhpiak ko lai. 41Hihi na tuah ahcun, chiat kan sertermi hin na luat lai, cun ka rualchan hna sinah na va kal i an in pek duh lo ahcun, chiat kan sertermi khan na luat ṭhiamṭhiam lai,’ a ka ti.
42“Cun nihin i tikhor ka ra phak ah khan thla ka cam i, Bawipa, ka bawipa Abraham i Pathian, ka khualtlawnnak ah hin nangmah nih thluachuahnak ka pe ko. 43Atu hi tikhor ah hin ka um. Ngaknu pakhatkhat tithan i an rat tikah ka rak thawh lai i, ‘Na ti-um chung khan din awk ti ka pe tuah,’ tiah ka rak ti lai i 44cu i anih nih, ‘Ding hen, cun na kalauk hna zong kha ti ka dinh hna lai,’ a ti ahcun, cu ngaknu cu Bawipa nih ka bawipa fapa nupi ca i a thimmi si seh, ka ti. 45Ka lung chungin thla ka cammi a dih hlanah cun, Rebekah kha a ti-um a liang ah run i khinh in a ra i tithan ah cun tikhor chungah khan a vung ṭum. Amah cu ka rak chawnh i, ‘Zaangfahnak in ti din awk ka pe tuah,’ ka ti. 46Khulrang in a ti-um cu a liang cung khan a ṭhumh i, ‘Ding hen, na kalauk hna zong kha ka dinh hna lai,’ a ti. Cuticun ka din i ka kalauk hna zong cu ti cu a dinh hna. 47Ngaknu cu ka thawh i, ‘Ahodah na pa a si?’ ka ti. A ka leh i, ‘Nahor le Milkah fapa Bethuel i fanu ka si,’ a ti. Cun a hnar ah khan hnartonh ka tonh i a kut ah khan kuthruk kha ka hruk hna. 48Ka khuk kaa bil i Bawipa kha ka biak, cun lam ṭha tein a ka hruaitu Pathian, ka bawipa Abraham i a Bawipa kha ka thangṭhat. Amah nih cun ka bawipa i a unau inn ah hin a ka hruai i a fanu kha ka Bawipa fapa caah cun ka hmuh cang. 49Cucaah cun ka bawipa cungah hin a phung ning bantukin rian cu kan ṭuan lai nan ti ahcun ka chim u; cun kan ṭuan hnga lo nan ti ahcun ka chim fawn ko u, cuticun lung i thleh awk kaa hngal lai,” a ti.
50Laban le Bethuel nih cun, “Hi thil hi Bawipa sinin a rami a si caah kannih nih biakhiahnak hi kan tuah awk a si hnga lo. 51Hika ah pei Rebekah cu a um ve ko hi; i lak law i kalpi ko. Bawipa hrimhrim nih a chim bang cun, na bawipa fapa nupi cu va si ko seh,” tiin an leh. 52An bia cu Abraham salpa nih khan a theih tikah vawlei lei hoih in a kun i Bawipa kha a biak. 53Cun sui hlawn le ngun hlawn le hnipuan kha a chuah hna i Rebekah kha a pek hna. A ṭa le a nu zong kha a man a fakmi laksawng a pek hna.
54Cun Abraham salpa le a mi hna nih cun rawl cu an ei i an din i cu zan cu cuka ah cun an riak. A thaizing an thawh tikah salpa nih khan, “Ka bawipa sinah ka tlunter cang u,” a ti. 55Asinain a nu le a ṭa nih khan, “Ngaknu cu kan sinah zarh khat maw ni hra in dik um rih ko seh. Cun a kal te lai,” an ti. 56Sihmanhsehlaw anih nih a thawh hna i, “Ka camter hlah u. Bawipa nih ka khualtlawnnak ah hin ka hlawh a tlinter cang; cucaah cun ka bawipa sinah ka kirter ko u,” a ti. 57Annih nih, “Ngaknu kha au u si law zeitindah a ti ve hnga, hal hmasa hnik tuah u sih,” an ti. 58Cucaah Rebekah cu an auh i, “Hi pa sin kal cu na duh maw?” tiah an hal. Anih nih, “Ka duh ko, ka kal lai,” tiah a leh hna. 59Cucaah an far Rebekah kha amah a cawngtu nu he Abraham salpa le a mi hna sinah cun an kalter. 60Cun Rebekah cu thluachuah an pek i,
“Kan farnu, nang cu mi thong tampi nu ah va cang law,
Na tefa hna nih khan an ral hna khuapi kha tei hna seh,” an ti.
61Cun Rebekah le a sinum ngaknu pawl cu kalauk an i cit hna i mipa sinah cun an kal; Abraham salpa nih khan Rebekah cu aa lak i an kal.
62Isak cu Beer-lahai-roi#24.62 BEER-LAHAI-ROI cu “A ka hmutu Pathian Nung tikhor” ti a si. ah khan a rak i thawn i Negeb rawn ah khan a um. 63Ni khat cu zanlei sang ah khin tuan nawn ah ram lakah khan a vaa chawk i kalauk an rat kha a hmuh. 64Cun Rebekah nih Isak kha a hei hmuh. A kalauk cung khan a ṭum i, 65Abraham salpa kha, “Khika hmun i mipa, kanmah lei i a rami khi ahodah a si?” tiah a hal. “Ka bawipa a si,” tiah a leh. Cucaah a hmaikhuhnak puan kha aa lak i a hmai cu aa khuh. 66Salpa nih khan a tuahmi vialte cu Isak kha a chimh dih. 67Cun Isak nih cun Rebekah cu a thlam ah aa luhpi i a nupi ah a cang. Isak nih cun Rebekah cu a dawt ngaingai i cucaah a nu thih hnuah Rebekah nih khan Isak cu a hna a ngamter ṭhan.
Currently Selected:
GENESIS 24: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006