GENESIS 23
23
Sarah A Thi I Abraham Nih Thlan A Cawk
1Sarah cu kum za kum kul le kum sarih a nung i 2Kanaan ram chung Kiriath-arba khua ah a thi (Kiriath-arba cu Hebron ti zongah ti a si). Abraham nih khan a ruak tuamhlawmnak ding cu a tuah i a ṭah.
3Cun a thimi a nupi cu a kaltak i Hit mi hna sinah khan a va kal i, 4“Kei cu hika ah hin ramdangmi le a lang i a ra um tami ka si. Cucaah nan vawlei tlawmpal cu kan i vuinak ding caah ka zuarh u law ka duh, ka nupi cu cuka ah cun ka vui khawh nakhnga,” a ti.#Heb 11.9,13; Lam 7.16 5Annih nih an leh i, “Bawipa, kan bia kan ngai. 6Nangmah cu kan lakah a ṭhawngmi bawi pakhat na si; kan ngeihmi thlan lak i a ṭha bik ah na mithi cu vui ko. Ahohmanh nih an ngeihmi thlan cu sianh loin an in um lai lo i na mithi vui cu an in dawn lai lo,” an ti. 7Cu tikah Abraham cu a dir i an hmaiah a kun i, 8“Hika ah hin ka nupi cu vui seh ti nan ka duh a si ahcun, Hit mi Efron, Zohar fapa kha ka nawlpiak u law 9amah ta a simi Makpelah lungkua kha ka zuarh seh. Cu lungkua cu a lo kam i a ummi a si. Nan hmaika hrimhrim ah hin a man tling tein a ka zuarh nakhnga ka nawlpiak u law kei nih vuinak hmun kaa ngeih ve lai,” tiah a ti hna.
10Efron zong cu Hit mi hna sinah pumhnak hmun khua hauka ah khan a ṭhu ko i cuka i a ummi vialte theih ah cun, 11“Bawipa, cuticun a si lai lo, lo le a chung i a ummi lungkua cu an dihlak in nangmah kan pek lai. Ka mi hna an hmaika hrimhrim ah hin nangmah cu kan pek lai i na nupi cu na vui lai,” tiah a ti. 12Sihmanhsehlaw Abraham cu mi zapi hmaiah cun a kun i 13mi vialte nih thei kho hna seh tiin Efron cu a thawh i, “Na duh ning cun si sawh seh; cucaah cun ka bia hi ngai tuah: lo cu a ningpi in kan cawk lai. Cun a man kan pekmi cu ka cohlang law ka nupi cu cuka ah cun ka vui lai,” a ti. 14Efron nih cun a hun leh ve i, 15“Bawipa, nang le kei kar ah cu ram ngun tangka phar za li man thamtham cu zeidah a va si. Na nupi cu cu lo chungah cun va vui ko,” tiah a ti. 16Abraham cu a hna a tla ve i Hit mi hna theih hngan i Efron nih cu zat in si seh a timi zat khan Abraham nih cun a thlai — chawdawr pawl nih an thlai ningin ngun tangka phar za li a si.
17Cuticun Mamre nichuahlei i a ummi Makpelah lo Efron ta a rak simi kha, Abraham thil ah a cang; a lo he a chung i a ummi lungkua he, thingkung vialte he, Abraham ta ah an cang dih. 18Pumhnak i aa telmi Hit mi vialte nih khan cu lo cu Abraham ta a si cang ti kha an hngalhpi. 19Cun Abraham nih khan a nupi cu hi lungkua, Kanaan ram chung i a ummi lungkua ah cun a vui. 20Cuticun Hit mi hna ta a rak simi lo le a chung lungkua kha vuinak hmun caah Abraham ta ah an cang.
Currently Selected:
GENESIS 23: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006