መጽሐፈ ኢዮብ 19

ኢዮብ

1ኢዮብም እንዲህ ሲል መለሰ፦

2“እስከ መቼ ድረስ ታሠቃዩኛላችሁ?

እስከ መቼስ በነገር ቅስሜን ትሰብሩታላችሁ?

3እነሆ ዐሥር ጊዜ ትሰድቡኛላችሁ፤

ስታዋርዱኝም አታፍሩም።

4በእርግጥ ተሳስቼ ከሆነ፥

ስሕተቱ የሚጐዳው ራሴን ብቻ ነው።

5በእውነት እናንተ ራሳችሁን ከፍ ከፍ አድርጋችሁ፥

የእኔን መዋረድ የመከራከሪያ ነጥብ ታደርጉታላችሁ

6ነገር ግን ይህን ሁሉ መከራ ያደረሰብኝና

መረብ ውስጥም የጣለኝ እግዚአብሔር መሆኑን እንድታውቁ እወዳለሁ።

7ተበደልኩ ብዬ ብጮኽ የሚሰማኝ አላገኘሁም፤

ድምፄን ከፍ አድርጌ አቤቱታ ባሰማም ፍትሕ አላገኘሁም።

8እግዚአብሔር መንገዴን ሁሉ ስለ ዘጋው

መተላለፊያ የለኝም፤

መሄጃዬንም በጨለማ ጋርዶታል።

9ክብሬን ከራሴ ላይ ገፎ አዋረደኝ።

10ሰውነቴን በየአቅጣጫው በመቀጥቀጥ

ጨርሶ አፈራረሰው፤

የነበረኝንም ተስፋ ሥሩ ተነቃቅሎ እንደሚወድቅ ዛፍ አደረገው።

11እግዚአብሔር ተቈጥቶ መዓቱን አፈሰሰብኝ፤

እንደ ጠላትም ቈጠረኝ።

12እኔን ለማጥፋት ሠራዊቱን ላከ፤

በድንኳኔም ዙሪያ ምሽግ ሠርተው ከበቡኝ።

13“እግዚአብሔር ወንድሞቼ ከእኔ እንዲርቁ አደረገ፤

የሚያውቁኝም ሰዎች ሁሉ ባይተዋር አደረጉኝ።

14ዘመዶቼ ራቁኝ፤

ወዳጆቼም ረሱኝ።

15በእንግድነት በቤቴ ተቀብዬ

ያስተናገድኳቸው ሁሉ ረሱኝ፤

ገረዶቼ ሁሉ እንደ መጻተኛ ቈጠሩኝ፤

እንደ ባዕድም ተመለከቱኝ።

16አገልጋዬን ስጠራው መልስ አይሰጠኝም

እባክህ እርዳኝ ብዬ ስለምነውም እንኳ እሺ አይለኝም።

17ሚስቴ ጠረኔን ጠላችው፤

የገዛ ወንድሞቼም ተጸየፉኝ።

18ሕፃናት እንኳ ይንቁኛል፤

እኔንም በሚያዩበት ጊዜ ያፌዙብኛል።

19የቅርብ ወዳጆቼ ተጸየፉኝ፤

በጣም የምወዳቸው ሰዎች በጠላትነት ተነሡብኝ።

20ሥጋዬ አልቆ ቆዳዬ በአጥንቴ ላይ ተጣበቀ፤

ድድ ብቻ ቀርቶልኝ ተረፍኩ።

21“ወዳጆቼ ሆይ! የእግዚአብሔር እጅ ስለ መታኝ

እባካችሁ እናንተ እዘኑልኝ! ራሩልኝም!

22እግዚአብሔር እንዳሳደደኝ

እናንተ ደግሞ ለምን ታሳድዱኛላችሁ?

እስካሁንስ ያሠቃያችሁኝ አይበቃችሁምን?

23“እስከ አሁን የተናገርኩትን ቃል የሚያስታውስና

በመጽሐፍ የሚመዘግበው ሰው ቢገኝ

እንዴት ደስ ባለኝ ነበር!

24ምነው በብረት መሣሪያና በእርሳስ ተጽፈው

ወይም በድንጋይ ላይ ተቀርጸው

ለዘለዓለም እንዲኖሩ ቢደረግ እንዴት ደስ ባለኝ ነበር!

25ነገር ግን አዳኜ ሕያው እንደ ሆነና፥

በመጨረሻ ጊዜም እኔን ለመታደግ

በምድር ላይ እንደሚቆም ዐውቃለሁ።

26ቆዳዬ ተበልቶ ቢያልቅም፥

ከሥጋዬ ተለይቼ እግዚአብሔርን እንደማየው ዐውቃለሁ።

27እርሱም እኔው ራሴ የማየው ነው፤

ዐይኖቼ ያዩታል፤ ሌላም አይደለም፤

ልቤም ያችን ዕለት በጣም ይናፍቃል።

28“ወዳጆቼ ሆይ! እኔን ወቅሳችሁ ለማሠቃየት፥

የችግሩን ምክንያት እርሱ ራሱ ነው በማለት ትናገራላችሁ።

29የእግዚአብሔር ቊጣ የሰይፍን ቅጣት ስለሚያስከትል

ሰይፍ እንዳይበላችሁ ተጠንቀቁ።

የእግዚአብሔር ፍርድ መኖሩንም ዕወቁ።”

Currently Selected:

መጽሐፈ ኢዮብ 19: አማ05

ማድመቅ

Copy

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ

መጽሐፈ ኢዮብ 19

ከ
{{ምዕራፍ}}
ታዋቂ የመጽሐፍ ቅዱስ ጥቅሶች

Bible:

አማርኛ

Version: አማርኛ አዲሱ መደበኛ ትርጉም - አማ05