Maki 12

Va'am la bu gureba makerɛ

(Matu 21.33-46; Luki 20.9-19)

1 # Aza 5.1, 2 Ti a pɔhɛ tara mageha tɔgera bɔ'ɔra nɛreba la yeti, “Buraa n burɛ ka tiihi wala va'am, mɛ nangoone kaaɛ va'am la mum, tu' daam ŋmɛkerɛ boko ku puan, gee mɛ limehego zi'an va'am la puan, nyaa dikɛ bo' gureba, gee kiŋɛ timpaberɛ kayima n zaaɛ ha. 2Ti dia la go'ohego saŋa ta paaɛ, ti a tum a yameŋa ti a kiŋɛ gureba la zi'an ta to'e a tɔtɛ na bo' en. 3Ti gureba wa nyɔkɛ yameŋa la ŋmɛ' ka, gee sa'ɛ ka ti ka lebe la nu'bɛɛla. 4Ti a le tum a yameŋa kayima ba zi'an ti ba gi' yameŋa kaŋa me, ŋmɛ' aaɛ ka zuo gee yaalɛ en. 5Ti a le tum yameŋa kayima, ti ba gi' yameŋa kana kɔ'ɔm ku en. Ba iŋɛ yamehi se'ehi woo ti a tum la la bala, ba ŋmɛ' basɛba mɛ, gee ku basɛba. 6Gee va'am daana wa kelum tara la nɛra yima en de a mɛŋa dayɔba'arɛ. Ba'ahegɔ za'a a tum la kaŋa gee yeti, ‘Ena en de mam dayua la, ba wan na'ahɛ en.’ 7Gee gureba wa en ta nyɛ ti va'am daana wa mɛŋa dayua la kini na la, ti ba yele taaba yeti, ‘Ɛhɛɛ asooesɔna n bala kini na wa. Wa'am ya na ti tu ku en gee ti lɔgerɔ la dɛna tumam dinɛ.’ 8Bala ti ba nyɔkɛ en, ku en dikɛ en lobe bahɛ va'am la yiŋa. 9Va'am daana la nyaa wan iŋɛ la ŋwani? A wan kiŋɛ ta ku gureba la gee dikɛ va'am la tee bo' basɛba. 10#Yoo 118.22, 23 Ya ka kãalɛ gɔŋɔ la ze'kana wa en yeti,

‘Kugese'ere ti mɛta zagehɛ la

kugedinɛ en ta dɛna ɛberɛ kugere.

11Daana n tum de bala,

ti la dɛna yelepakerɛ bo' tu.’?”

12Ban ta baŋɛ ti a makɛ makerɛ wa bo' la bamam la, ti ba bɔta ti ba nyɔkɛ en, gee dabeem n tari ba la nɛrekuuŋɔ la ti ba bahɛ en gee kiŋɛ.

Kuba yua sokere

(Matu 22.15-22; Luki 20.20-26)

13Ti ba le tum Farasii la Hɛrɔd kpɛ'ɛnduma Yezu zi'an na, ti ba bɛ̃rɛ a nuurɛ yetɔgum puan. 14Ti ba wa'am na yele Yezu yeti, “Pa'ala, tumam mi' ti fum dela yelemɛŋerɛ daana, gee me ka yɛleha nɛreba, se'ere en sɔi la fum ka to'ohe nɛreba la ninkɔrɛ, gee fum pa'ali Yinɛ sore la me ti la dɔla la yelemɛŋerɛ. La de sore ti tu yɔɔra kuba bɔ'ɔra Siiza bii tu da yɔɔra bɔ'ɔra en? 15Tu yɔɔra bii tu da yɔɔra?” Gee Yezu en baŋɛ ba birikɔgenɛ la, a yele ba yeti, “Ŋwani ti ya makera mam? Bo' ya mam lagekɔberɛ na ti n bihɛ.” 16Ti ba dikɛ lagekɔberɛ bo' en, ti a yele ba yeti, “Ani naanɛ n ŋwana?” La ani gulega n boi bu zuo? Ti ba lerege en yeti, “Siiza.” 17Ti Yezu yele ba yeti, “Dikɛ ya sɛla en de Siiza dinɛ bo' en gee dikɛ sɛla en de Yinɛ dinɛ la me bo' en.” Ti leregere la ba' iŋɛ ba pakerɛ.

Vo'ore sokere

(Matu 22.23-33; Luki 20.27-40)

18 # Tuum 23.8 Sadusii sɛba n ka sakɛ ti nɛra han ki saŋa kini na ti a wan vo'e a kum la puan la, bamam basɛba n wa'am Yezu zi'an na soke en sokere yeti, 19#Tii 25.5 “Pa'ala, Moose gulehɛ nɔze'elego gɔŋɔ la puan bo' tu yeti, ‘Buraa suuɔ han ki gee gee a pɔga, ti ba me ka tara bia, a suuɔ la di pokuurɛ la dɔgɛ kɔma purɛ a suuɔ la yu'urɛ.’ 20La wa iŋɛ mɛ ti buraahi siyopɔi bɔna dɛna suurɔ, ti kiima la di pɔga, ka dɔgɛ gee ki. 21Ti se'em n dole poore la sooe di pokuurɛ la, me ki gee me ka tara bia, ti se'em n tagelɛ butã la me iŋɛ bala mɛa. 22Suurɔ tuyopɔi wa za'a, ba se'em ka makɛ dɔgɛ la pɔka wa. Ti la bɔna bɔna ti pɔka la me wa ki. 23Kum vo'ore wa han ta bɔna, ba ani en wan ta sɔna pɔka la? Se'ere en sɔi la ba za'a di ka soohum mɛ.”

24Ti Yezu yele ba yeti, “Ɛhɛɛ! Ŋwana n pa'alɛ ti ya tuue mɛ gee me pun ka mina Yinɛ tuulum gɔŋɔ la puan bii Yinɛ paŋa la. 25Se'ere en sɔi la, nɛreba han ta vo'e ba kum puan pɔgedire bii sire-ele kan ta bɔna. Nɛreba ta yeti ba ana mɛ wuu Yinɛ suŋereba en boi saazuo ha la. 26#Yɛh 3.6 La han le dɛna la kum vo'ore la yele ya ka kãalɛ sɛla en boi Moose nɔze'elego gɔŋɔ la puan, doohe tuntuo la n yuum taaɛ bugum la. Yinɛ yuum yele Moose yeti, ‘Mam en de Aberaham Yinɛ, Aziki Yinɛ, la Yakɔbe Yinɛ.’ 27Yinɛ wa dela sɛba n vɔi la Yinɛ gee dagi sɛba ki Yinɛ. Bala ya ba' tuue mɛ.”

Yia nɔze'elego

(Matu 22.34-40; Luki 10.25-28)

28Ti gɔnmi'ineba la puan ayima wa'am na pɔra, wum ban ŋmɛ'ɛra nɔkpe'ene la taaba gee me wum ti Yezu lebehe ba suŋa la ti a soke Yezu yeti, Yinɛ nɔze'elego la puan kuni en gani za'a? 29#Tii 6.4, 5 Ti Yezu lerege yeti, “Se'ere en gani za'a dela, ‘Kelehe ya suŋa Izirale buuri wa. Daana la en de tu Yinɛ la dela ayima. 30Nɔŋɛ fum Daana Yinɛ la fum suure za'a, la fum sia za'a, la fum puti'irɛ la fum paŋa za'a.’ 31#Malm 19.18 Se'ere en tagelɛ buyi' la dela, fum nɔŋɛ fum suuɔ wuu fum nɔŋɛ fum mɛŋa se'em la. Nɔze'elego ka le bɔna gana ana ayi' wa.” 32#Tii 4.35 Ti gɔnmina wa yele Yezu yeti, “Pa'ala fum tɔgɛ la asira ti Yinɛ dela deyina. Yinɛ se'ere ka boi han dagena dinɛ ma'a. 33#Hoz 6.6 Gee me nɔŋɛ Yinɛ la fum suure za'a, la fum bɔkerɛ za'a, la fum paŋa za'a, gee nɔŋɛ fum suuɔ wuu fum mɛŋa la. Ŋwana tari tuulum gana daarɛ woo ti fum nyɔ'ɔra dunmuma gee kaabera.” 34Yezu en wum ti buraa wa lebehe la yɛm la, ti a yele en yeti, “Fum ka zaaɛ la Yinɛ sɔ'ɔlum la.” Bilam pooren nɛra ka le sakɛ soke en sokere.

Deviti Dayua sokere

(Matu 22.41-46; Luki 20.41-44)

35Yezu ta bɔna la pu'uhegɔ yire puan pa'ala, a yeti, “Ŋwani ti gɔnmi'ineba la yeti, Kiresta dela Deviti Dayua? 36#Yoo 110.1 Fa'a Sia la yuum bahɛ ti Deviti purɛ yeti,

‘Daana la yele mam Daana yeti,

“Zi'ire mam zuɔ nu'o bɔba wa na,

gura ti n bahɛ ti fum dinduma lebege fum na'tagelega.” ’

37Deviti a mɛŋa yi' en la a Daana, ŋwani ti a nyaa wan dɛna Deviti dayua?” Ti nɛrekuuŋɔ la kɛleha en la pupeelum.

Yezu tɔgɛ gɔnmi'ineba yele

(Matu 23.1-36; Luki 20.45-47)

38Yezu en boi bini pa'ala la, a ta yele ba yeti, “Mini ya gɔnmi'ineba wa, ba dela sɛba en nɔŋɛ ba yɛɛra fuwogero ɛɛra kaara, gee ti nɛreba pu'uhera ba gee na'ahera ba da'ahi puan. 39Gee me nɔŋɛ ba zi'ita nɛŋa kugehi zuto zamehegɔ yiya la puan, la nɛrezura zi'irego zi'ihi de'enkãra puan. 40Ba faarɛ la pokɔpa lɔgerɔ, gee pu'uha pu'uhewogero, ti nɛreba nyɛ ba. Ba wan to'e sageŋɔ seko n ka tari makerɛ.”

Pokuurɛ bo'olum

(Luki 21.1-4)

41Yezu zi' tɔ la bo'olum pi'ɔ la en ze zi'an la, gee biha nɛrekuuŋɔ la en tari ligeri kina ita pi'ɔ la puan la. Ti buntateba zo'e zo'e tara bɔbena kina ita pi'ɔ la puan. 42Ti Yezu nyɛ ti pɔkɔ-naha paaɛ bini dikɛ a ligekɔba ayi' n wan dɛna wuu kɔbega tari na iŋɛ bini. 43Ti Yezu yi' a zahereba la yele ba yeti, n yeti ya la yelemɛŋerɛ wa, pɔkɔ-naha wa n bo' gana sɛba woo n tari ba bo'olum na iŋɛ pi'ɔ la puan la. 44Se'ere en sɔi la, ba za'a yehe la sɛla fifihe ba ligekãra la puan tari na bo' la, gee pɔka wa la a nɔŋɔ la za'a, ka bo' la sɛla ti ka tara en bala, ka bo' la sɛla za'a ti ka tara ti ka di n bala.

Currently Selected:

Maki 12: GBTP

ማድመቅ

Copy