Maki 13

Pu'uhegɔ la yire lua

(Matu 24.1-2; Luki 21.5-6)

1Yezu en ze'ele pu'uhegɔ yire la puan kɔ'ɔm yehe na la, ti a zahereba la ayima soke en yeti, “Pa'ala, bihɛ kugekãra sɛ'a ti ba dikɛ mɛ dekãtɛ seko taaba wa!” 2Ti Yezu soke ba yeti, “Ya nyɛ dikãra wa? Kugere la deyina me ka yee paga de tadaana zuo, ba za'a wan ta lu.”

3Yezu en ta zi'a Olive Zoore zuo tɔ pu'uhegɔ yire la, ti Pita, Yemesi, Yɔn, la Anduru ta soke en ba ma'a. 4“Yele tu, ŋwani ma'a ti ŋwana wan ta iŋɛ, daalehum boni en wan pa'alɛ ti saŋa la paaɛ ya.” 5Ti Yezu pɔhɛ yɛta ba yeti, “Bihɛ ya mɛhi suŋa ti se'em da pa'ahɛ ya. 6Nɛreba zo'e zo'e wan ta wa'am na dikɛ mam yu'urɛ tɔgera yɛta ti, ‘Mam en de Kiresta la!’ Ba wan pa'ahɛ nɛreba zo'e zo'e ti ba bɔregɛ. 7Ya han ta wuna zaba yɛla la zaba yelebibehi, da bahɛ ya ti ya paleŋa ɛgera, gee yele ana wan ba'ahum wa'am na gee dagi ba'ahegɔ saŋa la en bala. 8Se'ere en sɔi la, timpaberɛ kayima nɛreba wan ihege tɛ' pɛɛma la timpaberɛ kayima nɛreba, ti Na'duma zabera la taaba, tinmiiŋo wan sige tihi zo'e zo'e zuo, ti kom pɛɛlega sige, gee ŋwana wa woo nan dela too la saŋa dɔgum pɔhega en nan bala.

Yezu pun tɔgɛ a namehegɔ yele

(Matu 10.17-22; Luki 21.12-17)

9 # Mat 10.17-20; Luk 12.11, 12 “Gee han dɛna yamam mɛhi, mini ya suŋa suŋa gee ba wan ta nyɔgɛ ya kiŋɛ yele gakereba la zi'an, ba wan ŋmɛ' ya zamehegɔ yiya la puan, ya wan ta ze'ele tihi na'kãreba la na'duma nɛŋan mam zuo, ti la dɛna sɛla en iŋɛ gã'a. 10Gee faarɛ yelehum wa wan diŋɛ nɛŋa muulɛ paaɛ tihi woo. 11Ba han ta nyɔgɛ ya kiŋɛ yele gakereba zi'an da fabele ya, ya wan ta tɔgɛ se'em. Gee yeen yele ya se'ere woo n wa'am ya nuuren na sankaŋa puan la, se'ere en sɔi la, la dagi yamam n tɔgeri, gee la dela Fa'a Sia la. 12Suuɔ wan ta koohe suuɔ tihɛ ti ba ku en, ti sɔ me koohe bia tihɛ, kɔma wan zabɛ la ba dɔgereba ta bahɛ ti ba ku ba. 13Nɛra woo wan ta yaaɛ ya yan dole mam la zuo. Gee fum se'em n ŋmibe ta paaɛ ba'ahegɔ, wan nyɛ faarɛ.

Sageŋɔ lɔkɔ

(Matu 24.15-28; Luki 21.20-24)

14 # Dan 9.27; 11.31; 12.11 “Ya han ta nyɛ ti ba dikɛ galeŋɔ lɔkɔ la en tari sageŋɔ paaɛ la, ze'ele ze'sɛka ti ku ka suna ti ku zɛ'a la, (se'em woo n kãalɛ yele dina wa la bɔkɛ dɛ), bala ma'a la, sɛba woo en boi Yudiya zɔ zom zɔya la zuto. 15Se'em woo en yage gɔhegɔ da sige kɛ̃' bɔ'en ti a dikɛ sɛla. 16Se'em en boi va'am me da lebe kule yire ti a dikɛ fuo. 17Yele boi pɔgepuuheduma la pɔgese'ehi en tari bilɛɛhɛ ti si mɔgera dabeha ana puan! 18Pu'uhi ya mɛ ti yele dina da wa'am ɔɔrɔ saŋa na. 19#Dan 12.1; Lil 7.14 Se'ere en sɔi la, dabeha aŋa ta yeti ka dɛna la kumpiinɔ seto n ka tabelɛ bɔna Yinɛ n pi'ilum timpaberɛ wa maalegɔ na la, gee me pun kan le malum bɔna. 20Daana la han ka ŋmaaɛ ni dabeha aŋa girega, nɛrebeeleho ka boi n wan vo'e. Gee nɛresunduma la zuo, sɛba ti a mɛŋa looe la zuo, ti a ŋmaaɛ dabeha aŋa girega. 21Sankana wa puan, nɛra han yele fum yeti bihɛ Kiresta boi ke bii a boi ke ha, da sakɛ ya. 22Se'ere en sɔi la, Kiresta pumpã'aheduma la nɔtɔgehe pumparenduma wan ta wa'am na tuna pa'ahegɔ kirehi ti ba bahɛ ti nɛreba bɔregɛ. La han wan ta'am ni iŋɛ ni, ba wan pã'ahɛ ni sɛba ti Yinɛ pun looe la. 23Gee bihɛ ya ya mɛhi suŋa gee mam pun yele ya sɛla woo ti didaarɛ nan ka paaɛ.

Asaala Dayua lɛbega na

(Matu 24.29-31; Luki 21.25-28)

24 # Aza 13.10; 13.10; Eze 32.7; Yow 2.10, 31; 3.15; Lil 6.12 “Gee dabeha aŋa puan, namehegɔ saŋa la han ta tole,

wuntɛɛŋa wa wan lebege lika

ti ŋmarega kan niiɛ

25ti ŋmarebibehi wan ze'ele saazuo luta na,

ti pahi se'ehi en boi zuo ha wan gbirege.

26Bala ma'a la, nɛreba nyaa wan nyɛ ti Asaala Dayua la boi la sagbama puan kina na la paŋa en ka tari makerɛ la suŋa. 27A nyaa wan tum a suŋereba ti ba doohe timpaberɛ wa zuo luga anaahi la za'a lagehɛ nɛresɛba woo ti a lugehe ba la, ze'ele timpaberɛ wa tɛka beene ta paaɛ zuo ha.

Kinkaŋa yɛm zamehegɔ

(Matu 24.32-35; Luki 21.29-33)

28“Bala, zamehi ya yɛm kinkaŋa puan. Kinkaŋa han ta tara yilipaala, pɔhɛ puhera vɔpaala, ya mi' ti siiɔ pɔri. 29Bala me, ti ya han ta nyɛta ti yele ana iti, ya mina ti n pɔri na, n kɔ'ɔm bɔna la ya kuleŋa nuuren. 30N yeti ya la yelemɛŋerɛ wa, sankana nɛreba wa kan ki ba'ahɛ gee ti yele ana wa'am na tole. 31Saazuo la timpaberɛ wan tole gee mam yelehum wa la bu fii me kan malum tole.

Se'em ka mi' dabeherɛ la bii saŋa la

(Matu 24.36-44)

32“Gee han dɛna dabeherɛ la bii saŋa la, nɛra nɛra ka mi'. Suŋereba n pun bɔna saazuo ha ka mi' bii Dayua la, gee Sɔ la ma'a n mi'. 33Mini ya, gee maahum ya, se'ere en sɔi la, ya ka mi' saŋa la n ye' se'em ma'a na. 34#Luk 12.26-38 La yeti la ta ana mɛ wuu nɛra n ye' sore gee dikɛ a yire gu'ule a yamehi, bo' nɛra woo la a tuunɛ a tuunɛ gee yele zanɔgura ti a biha yire la suŋa suŋa. 35Dinɛ zuo la, da gihere ya, se'ere en sɔi la, ya ka mi' sansɛka ti yire daana la wan wa'am na, zaanuurɛ, yu'uŋɔ, nɔdɔɔ kaahega bii bulika, 36han dagena bala, ya wan ta giha ti a wa'am na di'e ya. 37Mam yeti ya se'ere wa bala mɛa ti n yɛta bɔ'ɔra nɛra woo, Biheri ya.”

Currently Selected:

Maki 13: GBTP

ማድመቅ

Copy