Jenesis 27
27
Nuarin tas alupas 27.
1 Et abraig Isa a Aisak mika yi leh nitai caig adale. 6 Et esege imi Jekob a Ribeka mika yi leh intas acis yi alwai yin. 15 Et ika a Jekob et Isa aien um leh intas iyehki. 30 Et lep leh nitai caig adale a Isa. 33 Et eucjeucjeucaij a Aisak. 34 Et asan tas ehti a Isa, um imiisjis, um leh tah intas acis yi alwai yin. 41 Et ika aien yi atgei Jekob aien. 42 Et imiaras Jekob a Ribeka.
1IS wat efatimi a Aisak, um apat nesganimtan, um eti alum itai, is ahlaig vai Isa aien inhal o un inmeto, um ika ehelen, Ak inhal unyak: is ika aien, Ainyak ap aigki.
2Is ika aien. Ek mun efatimi ainyak, um eti ato nadiat inig ekpu mas iran ainyak:
3va nitai inigki, namu leh nij va itai eklim edo irai pece unyum aiek, nikavaig, nefana unyum im nauitoga unyum, um apan an lelitai, um ahilek itai eklim edo irai pece incak:
4um ago nitai caig adale incak, et idivaig ek ahvig ainyak, um imiapam ehelek, mika ki caig ainyak, um acis yi alwai euc, ja pah mas.
5Is wat tas a Aisak ehele Isa inhal o un is ahgei intas o un a Ribeka. Is apan a Isa an lelitai, mika yi ahilek itai eklim edo irai pece, um imiapan ehelen.
6Is tas a Ribeka ehele Jekob inhal o un, um ika, Ek mun atahaijeg intas o etmam ainyak ehele Isa etwam, is ika aien,
7Ahilek nitai eklim edo irai pece aiek, um ago nitai caig upene incak, mika ki caig ainyak, um acis yi alwai euc an nuhup u Ihova, ja pah mas.
8Va nitai inigki, ak inhal unyak, namu imiaiji intas unyak aiek, um ago nedo inig ekpu asaig ehelum ainyak.
9Namu apan aiek u anin, um leh pame ehelek nakli nanin upene inyi ero; ekpu ago nitai caig upene iran ainyak incai etmam, et idivaig et ahvig aien:
10namu imiapan ehele etmam aiek, mika yi caig aien, um acis yi alwai euc, ja pah mas.
11Is ika a Jekob ehele Ribeka risin, Et eteuc nalau an nohui Isa etwak, ja et adila nohuk ainyak:
12el et atcei pam nyak a etmak, ekpu idivaig natimi efaifa ainyak an nuhup o un; ekpu ahlaijai nyak aien, um eti acis yi alwai nyak.
13Is ika ehelen a risin, Ak inhal unyak, etmu yetpam irak intas ahlaijai euc: namu atahaijeg intas unyak ache aiek, um apan um leh pam ehelek.
14Is apan aien, um leh, um imiapan ehele risin: is ago nitai caig adale a risin, is idivaig is ahvig a etman.
15Is leh napelumai esjilid u Isa inhal o un inmeto a Ribeka, is amen ehelen anliin neom, um aso Jekob iran inhal o un inharei:
16is aso nikman aien, im nuarin adila an nauinwan an narasi nakli nanin:
17is ati an nikmai Jekob inhal o un aien nitai caig adale iyehki im nareto is ago aien.
18Is apan aien ehele etman, um ika, Ak etmak: is ika aien, Ainyak ap aigki; aiek di aigki, ak inhal unyak?
19Is ika a Jekob ehele etman, Ainyak Isa aigki inhal unyum inmeto; ek mun ago ainyak et idivaig as asaig ehelek aiek: namu atidaijai aiek, um caig nitai caig unyak, um acis yi alwai nyak.
20Is tas a Aisak ehele inhal o un, um ika, Ak inhal unyak, et echamecha na mun auroauro aiek um leh? Is ika aien, Is alupai nyak a Ihova Atua unyum.
21Is ika a Aisak ehele Jekob, Ak inhal unyak, apam ubutpotet aiek, mika ki atcei pan euc ainyak um ato, kit na idim hal unyak Isa aiek, ka oʼo.
22Is apan a Jekob ubutpotet pan ehele Aisak etman; is atcei pan yau aien, um ika, Et ohrai Jekob nohram, ja et ikmai Isa nikmam.
23Ja is eti ato yin aien, is amen nalau an nikman et idivaig nikmai Isa etwan: is acis yi alwai yin aien.
24Is ahodaig aien, um ika, Nai idim hal unyak Isa aiek, ka oʼo? Is um ika aien, Maiya.
25Is ika aien, Imiapam ehelek, ekpu caig nitai caig u inhal unyak ainyak, mika ki acis yi alwai euc ainyak. Is imiapan ehelen aien, is um caig aien: is lep imiapan nide vaine ehelen aien, is umnyi aien.
26Is ika ehelen a Aisak etman, Ak inhal unyak, apam ehelek aiek, um aijumnyi nyak.
27Is apan ubutpotet aien, um aijumnyi yin: is ahgei nipin napelumai iran aien, um acis yi alwai yin, um ika, Almoi, et upene nipi inhal unyak um idivaig nipin nuarin nobohtan inig is asan tas acis yi alwai vaig a Ihova:
28etmu alupai euc nopoigmul an nohatag a Atua, im niji itai upene an nobohtan, im korn inyi ahinag im nide vaine:
29erumu aheca unyum natimi, erumu lep atpuse an nuhup unyum a nup urai iji pece: namu atimarid irai ilpu etwam aiek, erumu atpuse an nuhup unyum a ilpu hal u risum: uhmu ahlaijai ra asega erupu ahlaijai euc ara, ja uhmu acis yi alwai ra erupu acis yi alwai euc ara.
30Is wat acis yi alwai ehni Jekob a Aisak, is lep udei Aisak etman a Jekob, ja is auroauro a Isa etwan, um ahes u nahilek vaig itai eklim edo irai pece, um lep han.
31Is lep ago nitai caig adale aien, um imiapan ehele etman, um ika ehele etman, Namu atidaijai aiek, ak etmak, um caig nitai caig u inhal unyum, um acis yi alwai nyak.
32Is ahodai yin a Aisak etman, um ika, Aiek di aigki? Is ika aien, Ek Isa ainyak inhal unyum inmeto.
33Is eucjeucjeucaij alupas acen a Aisak, um ika, Di? natimi eda iyehki is leh nitai caig aien, um imiapam ehelek, ek mun upyi caig ainyak, um acis yi alwai yin, ja na par ham aiek? maiya, etpu idim ahesmoij aien.
34Is wat atahaijeg intas o etman a Isa, is taig alupas acen aien, um ika ehele etman, Ak etmak, namu lep acis yi alwai nyak aiek, nyak marom.
35Is ika aien, Et mun ham a etwam um ago nedo efaifa, um ahneg intas acis yi alwai euc.
36Is ika aien, Eris anvi nidan inveijec par ika Jekob, is ecero ago nedo efaifa aien vai nyak: is ahneg natimi alupas vai inmeto unyak aien; et mun lep ahneg intas acis yi alwai nyak aien an nopan inig. Is ika aien, Et lep amen ehelum tah intas acis yi alwai nyak, ka oʼo?
37Is tas a Aisak ehele Isa, um ika, Ek mun ati yin ainyak mika yi atimarid unyum aien, ek mun lep ikni ilpu etwam asega ainyak mika eri ilpu aheca o un ara; ek mun alupai yin korn incan ainyak im nide vaine luman: ekpu lep ago inhe vai euc ainyak, ak inhal unyak?
38Is ika ehele etman a Isa, Ak etmak, et eteuc ehelum intas acis yi alwai et ethi ache, ka oʼo? namu lep acis yi alwai nyak aiek, ak etmak, nyak marom. Is taig ijinies a Isa.
39Is tas ehelen a Aisak etman, um ika, Namu amen aiek an nuarin esjilid an nobohtan, etmu lep ahes nimaig an nohatag vai euc;
40namu umoh aiek va nauitoga unyum, um aheca u etwam; ja nau wit emda aiek, namu atcijai yin aiek.
41Is edemda vai Jekob a Isa van tas acis yi alwai yin is asaig a etman: is ika inliinmopoi Isa, Et mun ubutpotet u nopan imitaig etmak; ekpu atgei Jekob etwak ainyak an nopan iyehki.
42Eris asuptecnaig ehele Ribeka intas inigki u Isa inhal o un inmeto: is ahilek Jekob inhal o un inharei aien um ahlaig vai yin, um ika ehelen, Namu ato aiek mika, et eropse inliinmopoi Isa etwam, et ika aien yi aru nedo unyum aien, um atgei euc.
43Va nitai inigki, ak inhal unyak, namu atahaijeg intas unyak aiek; um atidai, um ahapan Heran ehele Leban natamaig irak;
44um amen ehelen irai hal adiat, um uhum pan an nopan iyehki etpu ti nedemda u etwam vai euc;
45etu wit eti lep edemda a etwam vai euc, um eti imiheva nedo unyum vai yin: ekpu abraig pan tah ehelum ainyak mika an apam aiek igcaki: el erau emesmas aijaurau an nadiat inyi ethi, uhpu uauo nyak?
46Is ika, a Ribeka ehele Aisak, Ek esjum ainyak numoh vaig vai ohwat takata u nup u Hed: el et leh tah natahig irai nup u Hed a Jekob ehgan, et idivaig ilpu atahig an pece, et eti upene vai nyak numoh vaig.
Currently Selected:
Jenesis 27: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.