Jenesis 26
26
Nuarin tas alupas 26.
1 Et apan Cirar a Aisak va numlaig has. 2 Et esege imi yin a Atua, um asan tas acis yi alwai yin. 7 Et acaiji yin a Abimelek, va nedo o un par ateri vai ehgan. 12 Et ikni itai aien. 18 Et ucji Isek aien, im Sitna, im Rihobod. 26 Et asan tas etipup ehelen a Abimelek Biersiiba. 34 Ohwat ehnaa u Isa.
1IS eteuc numlaig has an pece, ja is eche numlaig has uhup an nopan umoh u Ebraham. Is apan Cirar a Aisak ehele Abimelek natimarid u nup u Filistia.
2Vaig inig nikavaig, is upyi ehcohos pan ehelen a Ihova, um ika, Namu jim asuol pan Ijipt aiek; amen an pece inig ekpu asaig ehelum ainyak:
3amen an pece inigki aiek, ekpu lep amen ehelum ainyak, um acis yi alwai euc; ekpu alupai euc ira ilpu mapom inpece iji igki asega ainyak; ekpu lep ehneijid intas aktit unyak ainyak ehele Ebraham etmam;
4ekpu ika ainyak eri ahinag a ilpu mapom, um idivaig niji moijeuv an nohatag, ekpu lep alupai ilpu mapom inpece iji igki asega ainyak; erupu ahesmoij a nup urai iji pece asega vai mapom;
5va nedo o Ebraham, nikavaig, is atahaijeg nohrak aien, um apos intas unyak, im intas aktit unyak, im intas itap unyak, im intas alep unyak.
6Is amen Cirar a Aisak:
7eris ahodai yin a nup an nuarin iyehki vai ehgan; is ika aien, Et atahig irak aien: is imtitaig aien nasaig vaig mika, Et ehgak aien; va eri jim atgei yin a nup an nuarin pece iyehki vai Ribeka; is eklim upene aien.
8Is wat amen eahki aien is itu iran, is eas pok ijo an mun neom o un a Abimelek natimarid u nup u Filistia, um ecet Aisak im Ribeka ehgan, erus laav jipe arau.
9Is ahlaig vai Aisak a Abimelek, um ika, Et idim ehgam aien: as a uri aiek par ika, Et atahig irak aien? Is ika ehelen a Aisak, Kis asaig ainyak, va eri jim atgei nyak vai yin.
10Is ika a Abimelek, As a uri aiek par ago nedo inigki vai cama? el is apan tah natimi um amen ehele ehgam, el et yetpam irama nimtan nedo has va nedo unyum.
11Is tas a Abimelek ehele ilpu dualep asega o un, um ika, El et ago tah nitai tah vai natimi inigki im ehgan, uhmu idim atgei yin.
12Is ahwaig upsiitai an pece iyehki a Aisak, ja par lep asjapicnaig nohwai itai is wun huntret an mesese iyehki: is acis yi alwa yin a Ihova.
13Is atimi alupas aien, um aridjai, is lep esjilid acen natimi alupas o un:
14is ahinag siip o un, im kurimatau o un, eris lep ahinag a ilpu aheca o un: eris auatitai vai yin a nup u Filistia.
15An nopan iyehki is umoh a Ebraham etman, eris ucji ehpanwai a ilpu aheca u etman, ja eris atapnes nehpaiwai iji ehki asega a nup u Filistia, um athei.
16Is ika a Abimelek ehele Aisak, Atga unyum aiek, um udei cama; na esjilid irama aiek.
17Is ahes eahki a Aisak, um atga o un, um athai neom o un an niskanse Cirar, um amen eahki.
18Is lep ucji nehpaiwai iji ehki a Aisak, eris ucji an nopan umoh u Ebraham etman; ja is wat mas a Ebraham eris athei a nup u Filistia: is anvi nidan aien is idivaig is anvi nidan a etman.
19Eris ucji nehpanwai an niskanse a ilpu aheca u Aisak, um ecetai nimtanwai eahki.
20Eris imiisjisitai ehele ilpu aheca u Aisak a nup u Cirar, um ika, Inwai unyima nigki: is anvi nidan nehpanwai iyehki aien, par ika Isek, (Nehtauo); va nedo ura, nikavaig, eris imiisjisitai ehelen ara.
21Eris lep ucji nehpanwai is eche ara, ja eris lep imiisjisitai vaig ara: is anvi nidan aien par ika Sitna, (Nedemda).
22Is lep ahes eahki aien, um atga o un, um ucji nehpanwai is eche; ja eris eti lep imiisjisitai ara: is anvi nidan aien par ika Rihobod, (Nuarin lah); is ika aien, Et mun ati nuarin lah imi caija a Ihova; intupu ahinag akaija an pece.
23Is ahes eahki aien, um apan Biersiba.
24Is ehcohos pan ehelen a Ihova an nepig iyehki, um ika, Ek Atua u Ebraham etmam ainyak: namu jim imtitaig aiek, ek amen ehelum ainyak, ekpu lep acis yi alwai euc ainyak, um ika eri ahinag a ilpu mapom vai Ebraham naheca unyak.
25Is actaig natau eahki aien, um arohwai nidai Ihova, um athai neom o un eahki: eris lep ucji nehpanwai is ethi eahki a ilpu aheca u Aisak.
26An nopan iyehki is ahes Cirar a Abimelek, im lep Ahussad etwan is ethi, im Faikol natimi alupas u ilpu eucsupo o un, um apan ehelen.
27Is ika ehele ehtaij a Aisak, Ehtaij a uri aijautaij par apam ehelek, akis edemda vai nyak aijaua, um abraig pagki nyak.
28Ehtijis tas ehelen ahtaij, um ika, Ecris idim almoi aijama mika et amen ehelum a Ihova: ecris ika aijama, Intupu asan tas aktit jipe uja akaija im intas etipup uja;
29mika an eti ago tah nedo has vai cama aiek, et idivaig ecris eti ago tah nedo has vai euc aijama, ecris ago nedo upene ache vai euc aijama, um adcijai euc an nigpa, um aiheuc vai euc: na mun ahesmoij aiek vai Ihova an nopon inig.
30Is auanetha alupas incai ehtaij aien, eris hag ara um umwig.
31Is wat lep lahlah an tak apnyin, eris auroauro ara um aiji, um asan tas aktit jipe ehele ra: is adcijai ehtaij a Aisak; ehtijis aiheuc vai yin ahtaij, um atga u ehtaij.
32An nadiat iyehki eris apan a ilpu aheca u Aisak, um asuptecnaig ehelen va nehpanwai iyehki eris ucji ara, um ika ehelen, Ecra mun ecetai inwai aijama.
33Is anvi nidan aien par ika Siba, (Intas aktit): eris lep anvi nidan nuarin pece iyehki par ika Biersiba, (Nehpanwai an tas aktit), um imihum pam an nopan inig.
34Is eteuc inmesese is forte irai Isa, ja is leh Jutid aien ehgan, inhalav atahig u Biirai, nup u Hed, im Basemad inhalav atahig u Ilon, nup u Hed:
35is ohocred inliinmopoi Aisak im Ribeka vai intakata erahki.
Currently Selected:
Jenesis 26: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.