Eksotus 5
5
Nuarin tas alupas 5.
1 Et atuh Moses im Eron a Fero vai intas urau imi yin. 5 Et ika aien yi alupas nauritai u nup Isreel. 15 Et acaiji niji tas ehti ura aien. 20 Era ahlaig vai Moses im Eron ara. 22 Et asan tas ehti ehele Atua a Moses.
1ERUS epitpitac a Moses im Eron, um apan, um tas ehele Fero, um ika, Et ika a Ihova Atua u nup Isreel, Namu atcijaig ilpu atimi unyak aiek, mika eri apan ara an namasacen, um ahlap irai iji itai ahlap vai nyak.
2Is tas a Fero, um ika, Ethi di nigki a Ihova, mika ki imiaiji intas o un ainyak, um atcijaig nup Isreel? Ek eti ato Ihova ainyak, inki eti atcijaig nup Isreel ainyak.
3Erus ika arau, Is ehcohos ehelumrau a Atua u nup u Hibru: ecra ugyi euc aijumrau, mika ecri apan aijama um atga an namasacen ira adiat inyi eseij, um ahlap irai iji itai ahlap vai Ihova Atua unyima; vai yi jim auahas cama aien an nemehe, ka nedoa.
4Is tas ehele rau a natimarid Ijipt, um ika. Erau a uri aijaurau, ak Moses im Eron, par auahas nauritai u atimi? akumu apan ai-jaua um ago nauritai unyimia.
5Is lep ika a Fero, Era ahinag natimi an pece an nopan inig, ja erau ika aijaurau eri udei nauritai ura ara.
6Is tas alep a Fero an nadiat iyehki ehele ilpu atimi aminjinaig nauritai ura, im ilpu atimi alupas ura, um ika,
7Akumu jim lep alupai atimi incei korn aijaua, par ago brik iran, et idivaig itu: erumu apan ara, um ahilek incei korn imi ra.
8Akumu lep an vai ehele ra brik inyi ahinag aijaua, yi tup apapa pan iran ji ehki eris upyi ago ara; etmu jim eti elpat: era tup amen ara; va nitai inigki era taigtaig ara, um ika, Ecrumu apan aijama um ahlap irai iji itai ahlap vai Atua unyima.
9Uhmu anvai nauritai alupas ehele atimi, mika eri auritai ara: erumu jim lep atahaijeg intas ahnag ara.
10Eris alau ijo a ilpu atimi aminjinaig nauritai, im ilpu atimi alupas ura, um tas ehele atimi, um ika, Et ika a Fero, Inki eti alupai caua incei korn ainyak.
11Akumu apan aijaua, um ahilek incei korn imi caua: etmu jim lep tintin nauritai unyimia.
12Va nitai inigki eris terimterim natimi an pece Ijipt asega, par ahilek nefelelicai nasjapigmoig incei korn.
13Eris tidehio ra a ilpu atimi aminjinaig nauritai ura, um ika, Akumu ago ehni nauritai unyimia aijaua, nauritai irai iji adiat, et idivaig an nopan iyehki is eteuc incei korn.
14Eris aredei ilpu atimi alupas iji ehki u nup Isreel, eris ikni ra a ilpu atimi aminjinaig nauritai u Fero, um ika, Eka a uri aijaua par eti ago ehni nauritai unyimia, um ago brik ianiv im lep inpig, et idivaig itu?
15Eris apan a ilpu atimi alupas u nup Isreel um taig an nuhup u Fero, um ika, Na a uri aiek par ago nedo inigki vai ilpu aheca unyum?
16Er eti alupai ilpu aheca unyum incei korn, ja era ika ehelema ara, Akumu ago brik aijaua: er lep aredei ilpu aheca unyum; ja et has nedo u ilpu atimi unyum ache.
17Ja is ika aien, Eka tup amen aijaua, eka tup amen aijaua: va nitai inigki eka ika aijaua, Ecrumu apan aijama um ahlap irai iji itai ahlap vai Ihova.
18Akumu apan aijaua um auritai; eri eti alupai caua incei korn, ja akumu ago brik aijaua et idivaig er anvai ehelemia.
19Eris ato a ilpu atimi alupas u nup Isreel mika is has namen ura, eris wat ika ara, Etmu jim eti elpat brik unyimia irai iji adiat.
20Eris ahes ehele Fero ara um atga ura, ja eris ehtet irai Moses im Eron ara an nefalaig:
21eris tas ehele rau ara, um ika, Etmu alum caurau a Atua, um aktaktai nedo unyimirau; er amcel vai cama an nuhup u Fero, im lep an nuhup u ilpu aheca o un vai caurau, arau mun lep ati nauitoga irai ikmara aijaurau par atgei cama.
22Is adumoij pan ehele Ihova a Moses, um ika, Ak Ihova, na a uri aiek par auoh ohocred ilpu aheca unyum? as a uri aiek par abrai nyak?
23Kis wat tas ehele Fero ainyak an nidam, is ago nedo has esjilid aien vai atimi iji igki um imihum pam an nopan inig; ja as idim eti imiaras ilpu atimi unyum aiek.
Currently Selected:
Eksotus 5: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.
