Eksotus 4
4
Nuarin tas alupas 4.
1 Et eteuc nimyeuv niseuc u Moses. 6 Et lep lepros nikman. 10 Et esjum, aien par apan. 14 Et ati Er on a Atua mika yi atau imi yin. 18 Et udei Jedro a Moses um apan. 21 Intas o Atua imi Fero. 24 Et aperitome irai ohwat halav atamaig o un a Sipora. 27 Et abrai Eron a Atua mika yi aubilid Moses. 31 Era imiisjis ninveijec intas urau a nup Isreel.
1IS tas a Moses um ika, Erupu idim eti imiisjis ninveijec intas unyak ara, um eti atahaijeg nohrak: erupu ika ara, Is eti eh-cohos pam ehelum a Ihova.
2Is ika ehelen a Ihova, Inhe naico an nikmam? Is ika aien, Niseuc.
3Is ika aien, Namu ethaigse au nobohtan aiek. Is ethaigse an nobohtan aien, is um imyeuv; is aha vaig a Moses.
4Is ika a Ihova ehele Moses, Namu ada nikmam aiek um asjiraig narapacal o un. Is ada nikman aien um asjiraig, is lep iseuc o un an nikman:
5va erupu imiisjis ninveijec ara mika, is ehcohos pam ehelum a Ihova Atua u ilpu retpora, Atua u Ebraham, im Atua u Aisak, im Atua u Jekob.
6Is lep ika ehelen a Ihova, Namu ati nikmam aiek an ritum. Is ati nikman an ritin aien: is lep atipagki aien, ja is lepros nikman um idivaig sno.
7Is ika aien, Namu lep ati nikmam aiek an ritum, Is lep ati nikman an ritin aien: um lep atipagki au ritin, ja is lep idivaig nohun asega.
8El era eti imiisjis ninveijec intas unyum ara, um eti atahaijeg nohram va nitai asjaaicnaig uhup, erupu imiisjis ninveijec intas unyum ara va nitai asjaaicnaig apitac.
9Ja el era eti imiisjis ninveijec ara va nitai asjaaicnaig raigki, um eti atahaijeg nohram, namu athun wai aiek an nofowai, um atladwi an nobohtan: etpu ja inwai inig napu athoi aiek.
10Is tas ehele Ihova a Moses, um ika, Ak Natimarid unyak, kis eti tas upene ainyak itu acen, um imihum pam an nopan inig na mun tas ehele naheca unyum aiek: ja ek tas taliek ainyak, et lep eti fi auroauro namak.
11Is ika ehelen a Ihova, Is ago nipjineucse atimi a di? et lep ago ilpu atimi pop a di, im ilpu atimi eucjipines intikgara, im ilpu atimi alum itai, im ilpu atimi eti alum itai? kis ago ra ainyak Ihova;
12va nitai inigki namu apan aiek, ekpu lep atau imi nipjineucsem ainyak, um asaig ehelum intas inig namu asaig aiek.
13Is um ika aien, Ak Natimarid unyak, ek ugyi euc ainyak mika an abrai tah aiek, et upene iram nabrai yin vaig.
14Is edemda alupas a Ihova vai Moses, um ika, Et idim etwam a Eron mapoi Livai: ek ato ainyak mika et tas upene aien. Et lep ham aien par aubilid euc: etu wit ecet euc aien, etpu imiacitak inliinmopon aien.
15Namu tas ehelen aiek, um ehtai tas imi yin: ekpu atau imi nipjineucsem ainyak, im lep nipjineucsen, um esege imi caurau nitai iji igki arumu ago aijaurau.
16Etmu asuptecnaig intas unyum aien ehele atimi: etmu idivaig nipjineucsen! aien, namu lep idivaig Atua imi yin aiek.
17Namu apos niseuc inigki an nikmam aiek, um ago niji itai asjaaicnaig iran.
18Is lep adumoij pan ehele Jedro etmai ehgan a Moses, um ika ehelen, Ek ugyi euc ainyak mika, ekmu lep adumoij pan ainyak ehele ilpu etwak era amen Ijipt ara, um almoi, kit era umumoh ara, ka oʼo? Is tas a Jedro ehele Moses, um ika, Et idim upene, namu apan aiek an nigpa.
19Is ika a Ihova ehele Moses an pece Mitian, Namu adumoij pan Ijipt aiek: era emesmas natimi asega eris ika ara eri atgei euc.
20Is leh ehgan a Moses, im ohwat halav atamaig o un, um ikni ehtaij ijinies irai togke, um adumoij pan Ijipt: is apos niseuc u Atua an nikman a Moses.
21Is tas a Ihova ehele Moses, um ika, Nau wit adumoij pan Ijipt aiek, namu ago nitai ehka asega iji igki an nuhup u Fero aiek, ek mun alupai euc nemda ainyak par ago: ja ekpu ago ipjin inliinmopon ainyak, inyi eti atcijaig atimi aien.
22Namu asaig ehele Fero aiek, um ika, Et ika a Ihova, Et halav atamaig unyak a Isreel, et hal unyak inmeto aien:
23ek lep ika ehelum ainyak, Namu atcijaig inhalav atamaig unyak aiek: mika yi aheca unyak aien: el et esjum aiek natcijaig yin vaig, ekpu idim atgei inhal unyum ainyak, inhal unyum inmeto marom.
24Is ehcohos ehelen a Ihova an nefalaig an neom atumop iran, um ika yi atgei yin.
25Ja is leh inhat arig a Sipora, um aperitome irai ohwat halav atamaig o un, um ethaig se u neduon, um ika, Ak natamnyu unyak, ek ohocred ainyak.
26Is atcijaig Moses a Ihova, is lep ika a Sipora, Ak natamnyu unyak, ek idim ohocred ainyak va naperitome ira rau.
27Is um ika a Ihova ehele Eron, Namu apan aiek an namasacen, um aubilid Moses. Is apan aien, um aubilid yin an nedoon u Atua, um aijumnyi yin.
28Is asuptecnaig ehele Eron a Moses intas asega u Ihova is abrai yin aien, im niji itai asjaaicnaig is asaig ehelen aien.
29Erus apan a Moses im Eron, um asjapicnaig ilpu atimi alupas asega u nup Isreel:
30is lep asuptecnaig a Eron intas asega is asaig a Ihova ehele Moses, um ago niji itai asjaaicnaig an nuhup u atimi.
31Eris imiisjis ninveijec natimi: eris wat atahaijeg ara mika is ateghe nup Isreel a Ihova, um almoi nohocred ura, eris atpuse ara um ago nalaigaheni.
Currently Selected:
Eksotus 4: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.
