लूका 7
7
रोमी कप्तानका येशूडला बु़डु़म थो़र
(मत्ती ८:५-१३)
1येशूका मु़चु़मिमलाई खोत्ले ल्वा र्वामु दु़म्मिडिमा कफर्नहुम शहरथो़ लम्डी। 2मेसिन्डा रोमी कप्तानकु छो़म द्वादीबुङ कोले डु़ल्चो़ बाइडा। मेराम नो़डामा सिमुङा खाप्डु़म बाइडा। 3मे कप्तानका येशूकु दुथाम थो़स्तु़, मा उ डु़ल्चो़लाई सबेन्साङमिनु़ र्वाक्साका यहूदीमिमकु डोक्पु ङाउमिमलाई येशूकाडा र्वाला सो़सिप्डा थु़र्स्तु़मी। 4मेर्मिम येशूकाडा रोम्डिमा गुमीलाई मेम बेबेसाका आरे र्वाम्डिम-र्वाम्डिम ङा बेम्डी, “मे कप्तान इनीमा न-थो़म ल्वामुका घ्रेट्पा बु, 5हेङालोने इकीमा मु़चु़मिमलाई गुका रिखाम बु़, मा आकीमा घ्रो़म्दीनेम वो गुका ङा बनेबेसाक्तिकिम सो़।”
6ओराम थो़म्डिमा येशू मेर्मिमनुङ लम्डी। कप्तानकु नेम फार्डा येशू रोम्फाम्डिलो गुका उ ङोप्सो़मिमलाई येशूनुङ आरे र्वाबेड्डा थु़र्सोड्डु़, “ङाचो़, आमा नेमडा रोमु लागि दु़खा मेल्वानी, हेङालोने गानीलाई आमा नेमडा येन्मुका घ्रेट्पा गो मेबुङु। 7गो आ त्वाप वो इनीमाडा रोमु घ्रेट्पा मेबुङु र्वाक्पा मिम्सिङडो। लावो गानी र्वाक्नी, मा आमा डु़ल्चो़ स। 8हेङालोने आ त्वाप ङा वो साखामचो़कु ल्वाडा बुङु, मा आमा ल्वाडा सिपाहीमिम बुमी। गो कोलेलाई ‘लक्सा’ र्वाङु, मा मेराम ल मा कोङमीलाई ‘रोका’ र्वाङु, मा मेराम रो। गो आमा डु़ल्चो़लाई ‘आरे बे’ र्वाङुलो मेरामका बु़।”
9ओराम ल्वा थो़म्डिमा येशू ङाङाया दु़म्मिडी। मेकोतिमा उनी चङचङ बिक्तोङा बेपा सेर्पा मु़चु़मिमथो़ ख्लोसिम्डिमा र्वाम्डी, “गो गानीलाई र्वाङु, इस्राएलीमिमगोडा आरेप्माम छो़म थो़रलु़पा सु़ वो गो मेडारुवा।” 10कप्तानका सेला थु़र्स्तु़म ङोप्सो़मिम कप्तानकु नेमडा ख्लोम्सिडिलो मे डु़ल्चो़ समु दु़स्तु़म बाइडा।
येशूका अर्दोमेकु तारापाचो़ सिमुलाम फम्डिम
11उ दिकाम येशू नाइन र्वाक्मा शहरडा लम्डी, मा उनी सीसिपामिम नुङ छो़म सेर्पा मु़चु़मिम गुमीनुङ कोयोङा लम्डिम बाइडा। 12येशू शहरकु लाम्चोकोडा रोम्थिम्डिलो कोले सिपा मु़चु़लाई कुर्साका पाखा ख्लुक्तोङा बेम्डी। मे सिपा मु़चु़ ने अर्दोमेकु कोलेङा तारापाचो़ बाइडा। मेकोतिलो मे अर्दोमेनुङ सेर्पा मु़चु़मिम लम्डिम बाइडा। 13येशूका अर्दोमेलाई ल्वाम्डिमा छो़म उनी थो़म भ्रो़स्ता, मा गुमीका मे मेसेमलाई र्वाम्डी, “मेख्राप्डा।”
14मेकोतिमा येशूका मे सिपा मु़चु़ जु़ल्मा बाकस फार्डा लम्डिमा लु़प्मिडी, मा मे सिपा मु़चु़ कुर्पामिम येम्सिम्डी। गुमीका मेरामलाई र्वाम्डी, “ए छारी, गो गानालाई र्वाङु, बका!” 15मेकोतिलोङा सिपा मु़चु़ बक्तामा गन्डा, मा जेमु चो़म्डु़। येशूका मेराम स्वालालाई उ मामकु ल्वाडा ग्वाम्डी।
16मेकोतिमा मेर्मिम खोत्ले मु़चु़मिम ङिम्डी, मा माम्चु़नीकु नङ कोम्डी। मेम्मा र्वाम्डी, “माम्चु़नीलाम-जेपा कोले छो़म डोक्पु मु़चु़ इकीमाडा योम्डिम बु,” मा “माम्चु़नीका उनी त्वाकु मु़चु़मिमडला न-थो़म रेम्बेम्डिम बु।” 17येशूकु दुथाममिम ओराम ल्वा खोत्ले यहूदिया नुङ मेरामकु होनो-आथो़म खोत्ले देलबाडे फोन्सिड्डा।
कु-रु़दु़म ग्वाक्पा यूहन्ना नुङ येशू
(मत्ती ११:२-१९)
18कु-रु़दु़म ग्वाक्पा यूहन्नाकु सीसिपामिमका वो येशूकु दुथाममिम खोत्ले ल्वा यूहन्नालाई थो़बेट्मिडी। यूहन्नाका उ सीसिपामिमगोडाम नलेलाई येड्डु़ची, 19मा ङाचो़ येशूकाडा ओराम ल्वा हिलाबेप्डा थु़र्स्तु़ची, “गुकु लन्थान्कुमिम मसीह गानी ङा डे, गुकु वाङमिमलाई ङा लन्थान्कुमिम?”
20मेकोतिमा मेर्चिप येशूकाडा रोक्चिमा र्वाक्ची, “कु-रु़दु़म ग्वाक्पा यूहन्नाका गुचुकुलाई ओराम ल्वा गानीनुङ हिलाबेप्डा थु़र्चिकिम बु, ‘गुकु लथान्कुमिम मसीह गानी ङा डे, वाङमिमलाई ङा लन्थामु’?”
21मेकोतिलो येशूका हापा मु़चु़मिमकु सोमोरी नुङ उनी नो़सीलामका सबेट्मिडी, मा मुनाङपेल कोल्साक्तोङा लेट्मिडिम बाइडा, मा हापा मिक्सीका मेल्वापा मु़चु़मिमलाई मिक्सीका ल्वापा दु़म्बेट्मिडी। 22मेकोतिमा येशूका यूहन्नाकु सीसिपाचिपलाई र्वाम्डी, “लक्ची, मा गाची हाम ल्वाच्ची थो़च्ची मेर्मिम खोत्ले ल्वा यूहन्नानुङ र्वाक्ची, मिक्सीका मेल्वापामिमका मिक्सीका ल्वामी, खेल ब्लेट्पा मु़चु़मिम समी, जोनका बेट्पामिम समी नोफ्लाका मेथो़पा मु़चु़मिमका नोफ्लाका थो़मी, सिपा मु़चु़मिम सिमुलामका बम्गेमी, मा उनी हाम वो मेबाट्पामिमका माम्चु़नीकु जो़पा-सेला थो़मी।#यशै ३५:५-६; ६१:१ 23आमा दुथाम सु़का उ नड्डा मेमुर्सी, मेराम मु़चु़ आलाकाम सो़।”
24यूहन्नाका थु़र्स्तु़चिम उ सीसिपाचिप ख्लोसिक्चिम चङडा यूहन्नाकु दुथाम येशूका मे सेर्पा मु़चु़मिमनुङ र्वाम्डी, “हाम गानी हेप्माम मु़चु़लाई रेप्डा र्याङगो-र्याङगोडा लक्नी? हाम मेराम मु़चु़ जुक्का थो़पा नारकु जु़जु़ होप्माम बाइडा? 25मेएँ माला गानी हाम रेप्डा लक्नी? हापा थिकाम ये-सेम फसिक्पा मु़चु़मिमलाई रेप्डा लक्निम? हापा थिकाम ये-सेम फसिक्पा मु़चु़मिम ने उनी नसीहोम बेत्तो हप बाखोप ओगानेमडा बुमी। 26हाम गानी माम्चु़नीलाम-जेपा मु़चु़लाई रेप्डा लक्नी? गो गानीनुङ र्वाङु, माम्चु़नीलाम-जेपा मु़चु़डाम वो घ्ल्वापा मु़चु़लाई गानी ल्वान्नी। 27मेराम यूहन्ना ङा सो़, मेरामकु दुथाम माम्चु़नीकु र्याक्मा सिजेमडा आरेसाका र्याक्मा बु,
‘रेप्डा, गो आमा सेलाचो़लाई इमा ङादो-ङादो थु़रु,
मा मेरामका इमा लाम्दी ङादो-ङादो बनेबु़जो़लु़।’#मला ३:१
28“गो गानीनुङ र्वाङु, ओम्लोसम्म ओराम सुबुडा गक्पा मु़चु़मिमगोडा कु-रु़दु़म ग्वाक्पा यूहन्नाडाम घ्ल्वापा मु़चु़ सु़ वो मेबुमी। लावो माम्चु़नीकु किब्दीगोडा उहेम खोत्लेडाम याक्के बु, मेराम मु़चु़ यूहन्नाडाम वो घ्ल्वापा दु़म।”
29खोत्ले मु़चु़मिम नुङ कर फक्पामिम वो येशूकु ओराम ल्वा थो़म्डिमा माम्चु़नीकु लाम्दी जो़पा र्वाक्साका रम्डी। हेङालोने मेर्मिमका यूहन्नालामका कु-रु़दु़म रम्डिम बाइडा।#मत्ती २१:३२; लूक ३:१२ 30लावो फरिसी नुङ मोशाकु डु़म्ला छो़म थेट्पा मु़चु़मिमका ने माम्चु़नीका मेर्मिमडला बेम्डिम न मेद्वाक्मिवा। हेङालोने यूहन्नालामका कु-रु़दु़म रम्डिम मेबायावा।
31येशूका र्वाम्डी, “आथामबिलिम आरेप्माम मु़चु़लाई गो हामनुङ थो़पु? मेर्मिम हेप्माम बुमी? 32मेर्मिम ने बजारडा खोम्सिक्साका चाम्सिक्पा चो़च्चो़ होप्माम बुमी, मे चो़च्चो़मिमका उनी त्वाप-त्वापडा आरे र्वाबोमी,
‘गुकु लिउसाम डु़प्तोको लावो गानी मेछो़म्निवा।
गुकु येत्तो ख्राप्तो बेत्तोको लावो गानी इनी प्ल मेआल्निवा।’
33“कु-रु़दु़म ग्वाक्पा यूहन्ना रोक्ता, मा उपास बाइडा मा अङ्गूरकु बिलाम मेडुङु़वा। गानी मेरामलाई ‘मुनाङका हुप्डु़म मु़चु़’ र्वाक्नी। 34मिनीचो़ रोक्ता, मा पु़रु़ डुङ्डु़, गानी मेरामलाई पोम्सा, डु़सेवा, मा कर फक्पा नुङ छु़लचो़मिमकु ङोप्सो़ र्वानी। 35लावो माम्चु़नीलाम नेप्ची ल्वापा मु़चु़मिमका ङा माम्चु़नीकु नेप्ची जो़पा र्वाक्पा रेम्बोमी।”
येशूका कोले मेसेमकु छु़ल हेम्साम्डिम
36फरिसीमिमगोडाम सिमोन र्वाक्मा कोले फरिसीका येशूलाई ग्रुला पेप्डा येड्डु़, मा गुमी मेराम फरिसीकु नेमडा लम्डिमा ग्रुला पेप्डा गन्मिडी। 37मेराम शहरडा कोले छु़लचो़ मेसेम बाइडा। फरिसीकु नेमडा येशू ग्रुला पेप्डा रोम्डिम बु र्वाक्पा ल्वा मेराम मेसेमका थो़स्तु़। मेकोतिमा मेराम मेसेमका कोले सिङ्गमरमरकु सोजामडा भ्रपा मुर्नेम्पा तेल रेड्डु़मा मेसिन्डा रोक्ता,#मत्ती २६:७; मर्क १४:३; यूह १२:३ 38मा गु येशूकु चङलामका रोक्तामा उनी खेल फार्डा येम्स्तामा, उ प्ल येशूकु खेलडला डस्तु़, मा उ बुइडलाम सेमका बक्साक्तो उनी खेलडा चुप बु़डु़, मा भ्रपा मुर्नेम्पा तेलका क्लमु चो़म्डु़।
39येशूलाई येट्पा फरिसीका ओराम ल्वास्तु़मा उ नड्डा आरे र्वाक्ता, “ओराम माम्चु़नीलाम-जेपा मु़चु़ माला ने हेप्माम मेसेमका गुलाई लु़प्तोङा लेडु़ र्वाक्साका चवा, हेङालोने मेराम ने छु़लचो़ मेसेम डे।”
40येशूका मे फरिसीनुङ र्वाम्डी, “ए सिमोन, गानानुङ हाम-हुम र्वामु आमा न बु।”
गुका र्वाक्ता, “र्वाक्नीका ङाचो़।”
41“कोले खाप्चीचो़काम नले मु़चु़का जेर मोक्चिम बाइडा। कोलेका ङो सङ (५००) सिक्का,#७:४१ ग्रीकडा ङोसङ (५००) दिनार बु। मेराम र्वाक्मा २ थकु ज्याला, मा ङोधु़म (५०) दिनार र्वाक्मा २ मुनामकु ज्याला सो़। मा कोङमीका ङो धु़म (५०) जेर मोक्चिम बाइडा। 42लावो मेर्चिपका जेर सोमु मेचाप्चिवा, मा जेर ग्वाक्पा मु़चु़का निफिलाई ङा जेर सोमु मेबासी बु़डु़ची। मेर्चिपगोडा सु़का गुलाई हापा रिखाम बु़?”
43सिमोनका र्वाक्ता, “हापा जेर उहेमका मोक्तु़म बाइडा, मा सोमु मेबासावा मेरामका हापा रिखाम बु़।”
येशूका गुलाई र्वाम्डी, “गाना र्वाक्नाम जो़पा ङा।”
44मेकोतिमा मेराम मेसेमथो़ हिसिम्डिमा येशूका सिमोनलाई र्वाम्डी, “ओराम मेसेमलाई रेप्डा! गो इमा नेमडा रोङडो, गाना खेल सो़ल्पा कु वो मेग्वाक्ङिवा, लावो ओराम मेसेमका ने उ प्लका आमा खेल सो़ल्साङ्डी, मा उ सेमका बङ्साङडी।#७:४४ यहूदीमिमका उनी बोच्चो़मिमलाई छो़म डोक्पु मिम्साका हुनाखाना बेम्डिम रेम्बु़। 45गाना गोलाई चुप मेबेङिवा, लावो गो आसिन्डा रोङडोलो आथाम ओराम मेसेमका ने आमा खेलडा चुप बु़होम ङा बु।#७:४५ यहूदी यहूदीमिमका सेव सान्बोमिलो फोसु़डा लोवो कुप्पीडा लोवो चुप बेबोमी। गुमीडाम छो़म आला-तोमाकाम दु़स्ताम मा रिखाम बु़डु़म आसिन्डा मेसेमका येशूकु खेलडा चुप बु़डु़मका रेम्बु़डु़म बु। 46गाना आमा बुइडला तेलका मेक्लङसाक्ङिवा,#७:४६ यहूदीमिमका उनी बोच्चो़लाई छो़म हुनाखाना बोमिलो बोच्चो़कु बुइडला तेल क्लम्साम्डी। लावो ओराम मेसेमका ने आमा खेलडा भ्रपा मुर्नेम्पा तेल क्लङसाङ्डिम बु। 47मेम्मिमका गो गानालाई र्वाङु, ओराम मेसेमकाम हापा छु़लमिम हेम्सिड्डाम बु, मा ओराम मेसेमका गोलाई हापा रिखाम बोङी। लावो उहेमकु छु़ल कि-कि कोङङा हेम्सी, मेरामका कि-कि कोङङा रिखाम बु़।”
48मेकोतिमा येशूका मेराम मेसेमलाई र्वाम्डी, “इमा छु़लमिम हेम्सिम्डिम बु।”
49मेसिन्डा ग्रुला पेप्डा गन्पा वाङमिमका उनी त्वाप-त्वापडा आरे र्वा बोमु चो़म्मिडी, “मु़चु़कु छु़लमिम वो हेप्साक्पा ओराम मु़चु़ सु़ डे मा?”
50येशूका मेराम मेसेमलाई र्वाम्डी, “गाना गोडला थो़र लु़न्नामका गाना सेल्सिट्नाम बु। इ न भ्रसिक्तो लक्सा।”
© Wycliffe Bible Translators, Inc. All rights reserved.
