Mâreke 6
6
Azü ndə̂ Näzärête kösə̂ kə̂ za su andjê sə̈ Jezü
(Mat 13.53-58; Luk 4.16-30)
1Jezü gbô tchâme kə̈ ê atə̂lə̂ gö ndə̂ tche kʉ̂che lə̂nə̈#6.1 Gö nə̈ lâme də̈ Näzärête.. Adjisîpili ndə̂ yê zâ tchêngbâ yê. 2Lə̂ lö sabäa, tche sə̂ lakə̂ nyisə̂ rə lə̂ nda kə̂ voga Ndjapä ndə̂ ajuîfu. Angbängbä azü ndə̂ andjë pâlatə̂ andjê ndə̂kə̂ dje pö nə̈, tchə̂lə̂ küma andjê gbɛ̂ djîngɨli. Andjë sə̂ lakə̂ yutə̂ andjê päkëdə̂: «Tche gbö arə âtə gbɛ̂ bhâ tchêbâ? Küma yê ndə̂ âwâ lanə̈ kâkë âtə, tchabâ âzâ rə̂ sə̈ tchë? Atöko kä ndə̂ tche mbo akpɨ̈ngbɨ̈ rə kâkë la könô yê? 3Âdə̂âbo säräpändë âtə, ndə̂ tche də̂ modô ndə̂ Malê, yîngâ Jâke la Jozë la Jûde la Chemön lâme kä? Azə̈ mbôâbo gö la anyînə̂ nə̈ tchâtə?» Rə lâme kä ndə̂ âmbô rə̂ ânyë, andjë kôsə̂ kə̂ za su andjê sə̈ tchë. 4Jezü tô rə̂ sə̈ andjê päkëdə̂: «Lə̂ agö gbɛ̂ a lüsə̂ earə̂ ndə̂ma Ndjapä, praâbalë âdə̂âbo azü lə̂ gö ndə̂ yê, âdəndjë lə̂ bûngrɨ̂ ndə̂ yê, âdəndjë tchâalê ndə̂ yê kä ndə̂ âlusə̂ yê-a.» 5Jezü wâbo ndə̂kə̂ mbo ngâ kpɨ̈ngbɨ̈ rə tchâme-a. Praâbalë tche tö kütû könô yê pâ angâ a-earə̂ tə̂kömbô ânyë andjë tchâ. 6Tchə̂lə̂ küma Jezü djîngɨli, bëte azü gö ndə̂ yê kösə̂ kə̂ za su andjê sə̈ tchë.
Jezü wän adjisîpili lə̂ könô gbɛ̂ tchêpâ nə̈ bïchuû
(Mat 10.5-15; Luk 9.1-6)
Pânə̈ Jezü ê lakə̂ mu pö sə̈ azü kulə̂ ayɛ̈yɛ̈ gö ndə̂ âwâ ndrotə̂ Näzärête. 7Tche ê adjisîpili ndə̂ yê lə̂ könô gbɛ̂ tchêpâ nə̈ bïchuû kə̈ wân andjê bïbïchuû. Tche zâ gbôgbô sə̈ andjê ndə̂kə̂ gro angbongbo atchozö. 8Tche zäma sə̈ andjê ndə̂kə̂ zabô ngâ rə zâ ndə̂kə̂ ro la rə̂-ê, kütû goto. Âwâbo pä andjë kʉ mâpa-a, âdəndjë kədjâ-a, âdəndjë makətche lə̂ kədjâ-a. 9Praâbalë äwäpä andjë yu adakpo#6.9 Jezü nyïndə̂ nə̈ pä andjë yu dakpo ndə̂ âwâ la wü tâ ndə̂ âlûâbô lû-î. tə̂ da andjê, kə̂ kʉabô lə̂ba kʉ̂ bïchuû-î. 10Jezü kä tô rə̂ sə̈ andjê päkëdə̂: «Âdə nyê âli lə̂ ngâ nda, nyë sə̈ kpô tchâalê nə̈ zoo tə̂ lo nə̈ ndə̂ nyë nyîndə̂ kə̂ ro etə̂. 11Âdə angâ azü lə̂ ngâ gö âkosə̂ kə̂ kʉ nyê âdəndjë rə̂ ndə̂ andjë kôsə̂ kə̂ dje pö ndə̂ nyê, kə̂ wutu ndə̂ nyê lə̂ gö nə̈, nyë gʉ̈gʉ cho tchâda nyê#6.11 Rə ndə̂ adjisîpili wâ ndə̂kə̂ mbo rə̂ lâme nyïsə̂ nə̈ pä andjë kâ wâbo la ngbanga la azü gö nə̈-a. Ngâ rə ndə̂ azü gö nə̈ wâbo lə̂ küma andjê balë-a, âdəndjë cho tchâda andjê-a. Nyë dɨ̈ Abdj 13.51; 18.6.. Nyë mbö tâ käko ndə̂kə̂ nyisə̂ nə̈ sə̈ andjê pä andjë mbô ngbongbo rə nə̂.» 12Adjisîpili nə̈ rô lakə̂ mu Tchôtchô Pö päkëdə̂: «Nyë gbötə̂ bəndɨ kə̂ mbo rə ndə̂ nyê!» 13Andjë grö angbongbo atchozö tə̂ gbölösə̂nə̈, kə̈ tchâ atə̂kömbô tə̂ gbölösə̂nə̈ lakə̂ mbo kâdâ tə̂ andjê.
Kuzü Jâan-Batîse
(Mat 14.1-12; Luk 9.7-9)
14Gbïɛ̈ Hërôde djê pö ndə̂ Jezü bëte rə̈ yê zä tchô gbɛ̂. A tö rə̂ päkëdə̂: «Jâan-Batîse jô lə̂ kuzü nə̂, bëte rə̂ kä ndə̂ tche wâ la gbôgbô ndə̂kə̂ mbo akpɨ̈ngbɨ̈ rə.» 15Angânə̈ tö rə̂ päkëdə̂: «Elïe kä.» Angânə̈ tô ndjë rə̂ päkëdə̂: «Ngâ earə̂ ndə̂ma Ndjapä batə̂ angâ a-earə̂ ndə̂ma Ndjapä ndə̂ azə̂ alême kä.» 16Hërôde djê pö ndə̂ yê kə̈ tô rə̂ päkëdə̂: «Jâan-Batîse ndə̂ më kû küma yê alême, tchetchë kä âkə̈ jô lə̂ kuzü lâme.»
17Bëte Hërôde zäma alême ndə̂kə̂ pa a za Jâan-Batîse, kə̂ i tchë la djingîli ânyë kə̂ yi tchë bhâlə̂ nda kânga, bëte Hërödîâde ɛ̈chë ndə̂ yîngâ yê Fïlîpe ndə̂ tche tô tchë ndə̂kə̂ watə̂ ɛ̈chë ndə̂ yê. 18Jâan-Batîse tö rə̂ alême sə̈ Hërôde päkëdə̂: «Ndïɛ̈ zâbo köbo sə̈ mö ndə̂kə̂ to ɛ̈chë ndə̂ yîngâ zə̈-a.» 19Käko su Hërödîâde kôsə̂ Jâan-Batîse ânyë tche nyîndə̂ kə̂ won tchë, praâbalë tche wâbo la gbôgbô ndə̂kə̂ mbo rə̂-a. 20Bëte Hërôde kpë wa Jâan, kə̈ wûnsə̂ nə̈ nə̂ pä Jâan də̈ djîrə̂ akrə, kə̈ wâ ngbî bëte Ndjapä. Hërôde bâta tchë ndə̂kə̂ pa a mboabô ngbongbo rə mbô tə̂ yê-ê. Tche wä alême la gʉ ndə̂kə̂ dje Jâan, praâbalë âdə tche âdje tchë, kə̂ wun-abô sə̂ rə ndə̂ tche wâ ndə̂kə̂ mbo rə̂-a. Lə̂ arə lâme gbɛ̂, tche nyïndə̂ kə̂ dje tchë. 21Dëkë Hërödîâde gbô ngâ tchôtchô köbo nə̂, lə̂ köbosə̂ lö kə̈ zɨ Hërôde. Tə̂ lö nə̈ lâme, Hërôde mbô kpülü bëte agbölö azü kua ndə̂ yê, agbölö amakündji ndə̂ aturûgu ndjë la agbölö azü gö ndə̂ Galilë. 22Ɛ̈wünrə ndə̂ Hërödîâde lî bhâ tchâalê ânyë kə̈ dâ ɛ̈ngbä âfû tə̂ Hërôde la azü ndə̂ tche ê andjê. Käko gbïɛ̈ tô rə̂ sə̈ bechë-ɛ̈chë nə̈ päkëdə̂: «Amö yukû rə ndə̂ su zə̈ nyîndə̂ nə̈, mê zadje rə̂ sə̈ mö.» 23Tche dêba sə̈ tchë päkëdə̂: «Mê zadje rə ndə̂ mo yû mê tâ sə̈ mö, âdəndjë tchâkalâ gö-gbïɛ̈ ndə̂ mê.» 24Bechë-ɛ̈chë nə̈ wûtu kə̈ yû anyï nə̈ päkëdə̂: «Giamâ kä ndə̂ mo nyîndə̂ nə̈ pä më yukû nə̂?» Anyï nə̈ tô rə̂ ndə̂nə̈ sə̈ tchë päkëdə̂: «Amö yukû küma Jâan!» 25Bechë-ɛ̈chë nə̈ dôtə̂ yê wândâ wändä bhândə̂ gbïɛ̈ ânyë kə̈ yûkü nə̈ sə̈ tchë päkëdə̂: «Më nyïndə̂ nə̈ pä mo za küma Jâan-Batîse angaâtə sə̈ mê lə̂ kpângbâlâ chembë!» 26Nyonyo mbô gbïɛ̈ nə̈, praâbalë tə̂ pö ndə̂nə̈ ndə̂ tche dêba tchâtchu azü gbɛ̂ ndə̂ tche ê andjê ndə̂ kpülü nə̈, tche wâbo ndə̂kə̂ kosə̂ nə̈-a. 27Posə̂nə̈, tche wân ngâ turûgu, kə̈ zâma sə̈ tchë ndə̂kə̂ ka la küma Jâan. Turûgu nə̈ ê bhâlə̂ nda kânga nə̈ kə̈ kû gɨ̈ Jâan. 28Tche kâ la küma yê nə̈ lə̂ kpângbâlâ chembë, kə̈ zâ rə̂ sə̈ bechë-ɛ̈chë nə̈ ânyë bechë-ɛ̈chë nə̈ zâ rə̂ sə̈ anyï nə̈. 29Ndə̂ adjisîpili ndə̂ Jâan djê pö ndə̂nə̈, andjë ê kə̈ zâ krʉkrʉ yê, ânyë kə̈ chî rə̂ lə̂ ngâ cho akuzü.
Jezü kʉ̈ kɨ̈zɨ̂ sə̈ azü sâke mïndûu
(Mat 14.13-21; Luk 9.10-17; Jan 6.1-14)
30 Abadjângele pâlatə̂ andjê ndrotə̂ Jezü, kə̈ tô tchêngbâ pö gbɛ̂ ndə̂ arə ndə̂ andjë mbô rə̂ ndjë la arə ndə̂ andjë nyîsə̂ nə̈ sə̈ tchë. 31Tche tô rə̂ sə̈ andjê päkëdə̂: «Azə̈ êë bhâchï bhâlə̂ ngâ tchô ndə̂ âwâtə̂ kpaɛ̈gâ kə̈ yâtə̂ azə̂.» Bëte angbängbä azü nə̈, kə̂ gu, kə̂ nə, kə̂ gu, âmbô rə̂ pä azə̈ gbôâbo köbo ndə̂kə̂ zɨ rə-a. 32Andjë â lə̂ ngâ külû la kütû andjê ndə̂kə̂ e bhâsə̂ ngâ tchô ndə̂ âwâtə̂ kpaɛ̈gâ. 33Praâbalë azü wûn andjê ndə̂ andjë sə̂ lakə̂ ro ânyë angbängbä azü wûnsə̂ andjê. Käko azü lə̂ agö nə̈ gbɛ̂ âlafô la da andjê kə̈ kpê la rö ânyë kə̈ wûtu bhâsə̂ tchô nə̈ dokʉ̈tchê tə̂ andjê.
34Ndə̂ Jezü wûtu lə̂ külû nə̈, tche wûn ngâ gbölö kpûlû azü. Nyonyo andjê mbô tchë bëte andjë wä batə̂ aɛ̈bro-ngbaga ndə̂ andjë wâbô wâ la ngâ akrə ndə̂kə̂ tosə̂ köbo sə̈ andjê-ê. Käko tche sə̂ lakə̂ nyisə̂ rə sə̈ andjê pâ angbängbä arə. 35Ndə̂ tchô sə̂ lakə̂ bu, adjisîpili ndə̂ Jezü nə̂ ndola tchë, kə̈ tô rə̂ sə̈ tchë päkëdə̂: «Lo zɨ̂ nə̂, ânyë tchô âtə azü mbôâbo gö tâ-a. 36Amö gro andjê-ê: Äwäpä andjë ka atə̂lə̂ anda tə̂ a ma akɨ̈ndɨ̈, la ayɛ̈yɛ̈ gö ndrotə̂ azə̂ ndə̂kə̂ yo akɨ̈zɨ̂ ânyë kə̂ zɨ rə̂.» 37Praâbalë Jezü tô rə̂ sə̈ andjê päkëdə̂: «Nyënyê la tə̂ nyê, nyë kʉ̈ kɨ̈zɨ̂ sə̈ andjê.» Andjë tô rə̂ sə̈ tchë päkëdə̂: «Mo nyïndə̂ nə̈ pä ârâ e kə̂ yo mâpa ngbâ mîɛ̈-makətche ngbangbo bïchuû kə̂ kʉ rə̂ sə̈ andjê ânyë andjë zɨ rə̂?» 38Tche tô rə̂ sə̈ andjê päkëdə̂: «Nyë wä la mâpa atöko? Nyë êë kə̈ wûn rə̂!» Ndə̂ andjë ê kə̈ wûn rə̂, andjë tô rə̂ päkëdə̂: «Mâpa mïndûu la agiangû bïchuû.» 39Käko Jezü zâma sə̈ adjisîpili ndə̂ yê ndə̂kə̂ pa andjë pala azü nə̈ gbɛ̂ ngbî ngbî andjë sə bêche pâ bhiɛbhiɛ bë. 40Angânə̈ sə̈ bêche lə̂ kpûlû ngbangbo balë, ânyë angânə̈ sə̂ ndjë lə̂ kpûlû tə̂ azü bïchuû la lə̂ könô gbɛ̂. 41Jezü kʉ̂ mâpa mïndûu la agiangû bïchuû nə̈, kə̈ kênga la yê atə̂ lafô, kə̈ ê tchôtchô pö pânə̈. La tchêngbâ nə̈ tche tchô tchə̂lə̂ mâpa nə̈, kə̈ kʉ̂ rə̂ sə̈ adjisîpili ndə̂ yê ndə̂kə̂ pa andjë krʉ tchə̂lə̂ nə̈ tə̂ azü nə̈. Tche krʉ̂ ndjë tchə̂lə̂ agiangû bïchuû nə̈ tə̂ azü nə̈ gbɛ̂. 42Azü gbɛ̂ zɨ̂ rə tchə̂lə̂ andjê sɨ̂-î. 43Adjisîpili ndə̂ yê rʉ̂â adɨ̂ andöma mâpa nə̈ âsɨ̂ agbasa lə̂ könô gbɛ̂ tchêpâ nə̈ bïchuû ndjë la adɨ̂ agiangû nə̈. 44Azü gbɛ̂ ndə̂ andjë zɨ̂ mâpa nə̈, kə̂ ngba ndə̂ aköchë wä sâke mïndûu.
Jezü nə̈ pâ gbölö kpakpa ngû
(Mat 14.22-33; Jan 6.16-21)
45Kpro la tchêngbâ nə̈, Jezü zâma sə̈ adjisîpili ndə̂ yê ndə̂kə̂ pa andjë a lə̂ külû kə̈ zû dokʉ̈tchê tə̂ yê atə̂ kalâ ngû lə̂ gö ndə̂ Betesayidä. Tche sə̂ andə̂ yê nə̈ dəngbânə̈ ndə̂kə̂ pa tchetchë la tə̂ yê, tche gro akpûlû azü nə̈. 46Pânə̈ ndə̂ tche grô andjê, tche ê atə̂lə̂ küma aga ndə̂kə̂ to pö sə̈ Ndjapä. 47Ndə̂ tchô âsə̈ bu, külû nə̈ wâ lə̂ gûgû ngû, ânyë Jezü sə̂ la kütû yê bêche. 48Tche wûn adjisîpili ndə̂ yê ndə̂ andjë gbrogbrotə̂ andjê lakə̂ to külû nə̈ bëte rə̂ ndə̂ yi sə̂ lakə̂ kâkä la andjê atə̂ ngbânə̈. La ndə̂ma tchôkösô, tche nə̂ pu andjê la da yê pâ ngû nə̈, ânyë kə̈ nyîndə̂ kə̂ ro andjê rö. 49Ndə̂ andjë wûn tchë ndə̂ tche sə̂ lakə̂ nə la ngû nə̈, adjisîpili nə̈ wûntî pä tche də̈ ngâ tchozö, ânyë kə̈ sə̂ lakə̂ ta wârə̂. 50Bëte, ndə̂ andjê âsə̈ wun tchë käko, tchə̂lə̂ küma andjê gbɛ̂ djîngɨli. Praâbalë tche tô rə̂ sə̈ andjê päkëdə̂: «Su nyê zɨ̈-ê, mëmê kä, wa mböäbô nyê mbô-ê.» 51Pânə̈ tche â ndrotə̂ andjê lə̂ külû nə̈, ânyë yi nə̈ krʉ̂-ê. Tchə̂lə̂ küma andjê gbɛ̂ djîngɨli, 52bëte andjë djêâbo tchə̂lə̂ kpɨ̈ngbɨ̈ rə ndə̂ Jezü mbô rə̂ pâ pö ndə̂ mâpa lâme-a. Gbô su andjê kä lakə̂ kpo.
Jezü tchä a-earə̂ tə̂kömbô lə̂ agö ndə̂ Jënëzärête
(Mat 14.34-36)
53Pânə̈ ndə̂ andjë zû dəkalâ gbölö ngû nə̈, andjë wûtu lə̂ agö ndə̂ Jënëzärête. 54Gbô rə̂ ndə̂ andjê âsə̈ wutu lə̂ külû nə̈, a wûnsə̂ Jezü. 55Azü nə̈ ê kulə̂ agö ndə̂ Jënëzärête nə̈ gbɛ̂, kə̈ kʉ̂ a-earə̂ tə̂kömbô pâ kʉ̈ngrʉ, kə̈ nə̂ la andjê sə̂ tchô ndə̂ andjë djê rə̂ pä Jezü kä tâ lâme. 56Tchô gbɛ̂ ndə̂ Jezü ro tâ, lə̂ agö, lə̂ ayɛ̈yɛ̈ gö âdəndjë kulə̂ ayɛ̈yɛ̈ gö tə̂ ma akɨ̈ndɨ̈, azü nə̈ kʉ̈ a-earə̂ tə̂kömbô kə̂ nə la andjê, kə̂ kʉ andjê sə̂ atchô ndə̂ azü sə tchê tâ. Andjë dɨ̈ tchə̂lə̂ ma andjê sə̈ tchë ndə̂kə̂ pa tche gbotə̂ andjê andjë grʉ kütû ma ngrɨ̈ngrɨ̈ lə̂ba ndə̂ yê. Azü gbɛ̂ ndə̂ andjë grʉ̂ rə̂, andjë tchâ-ê.
© Wycliffe Bible Translators, Inc.
