Mâreke 5
5
Jezü grö ngbongbo tchozö lə̂ ngâ köchë
(Mat 8.28-34; Luk 8.26-39)
1Pânə̈ andjë wûtu dəkalâ gbölö kpakpa ngû ndə̂ Galilë pâ cho ndə̂ Jerazɛ̈n. 2Ndə̂ Jezü âsə̈ wutu lə̂ külû nə̈, ngâ köchë ndə̂ ngbongbo tchozö wâ lə̂ yê sə̂ lakə̂ nə wândâ wändä pu tchë. Köchë nə̈ lâme tö bhâ sə̂nə̈ ndə̂ a chi akuzü tâ ânyë kə̈ wûtu. 3Tche lö lə̂ gbâtə̂ acho akuzü. Ngâ akrə balë wâbo ndə̂kə̂ i tchë, âdəndjë ndə̂kə̂ i tchë la djingîli-a. 4Bëte andjë ï tchê da yê la wɛ̂n, kə̂ i könô yê la djingîli, praâbalë tche köäkoa tchə̂lə̂ wɛ̂n nə̈ la djingîli nə̈ gbɛ̂. Ngâ akrə balë ndə̂ tche wâ ndə̂kə̂ i tchë ânyë tche sə gii sə̂âbo-a. 5Dalobiî tche nə̈ lə̂ gûtə̂ acho akuzü, âdəndjë kulə̂ aküma aga lakə̂ ta wârə̂, kə̂ kʉ atäme lakə̂ sro tə̂ yê la rə̂ la ku. 6Ndə̂ tche âsə̈ wun Jezü ngrɨ̈, tche kpê la rö, kə̈ gʉ̂te tchâtchâ yê, 7kə̈ tâ wârə̂ päkëdə̂: «Jezü, Modô ndə̂ Ndjapä ndə̂ mo sə̂ pâ arə gbɛ̂, giamâ kä ndə̂ mo wûn rə̂ tə̂ mê? Më yükû nə̈ sə̈ mö la rə̈ Ndjapä, amö djingɨliabô tchə̂lə̂ küma mê djîngɨli-î!» 8Tche tö pö lâme käko bëte Jezü zäma sə̈ tchë päkëdə̂: «Ngbongbo tchozö wutu lə̂ köchë âtə-ê!» 9Tche yû tchë päkëdə̂: «Rə̈ zə̈ wü atöko?» Tche tô rə̂ ndə̂nə̈ sə̈ tchë päkëdə̂: «Rə̈ mê wü pä Lejïön, bëte ‹Ârâ ngbângbä.›» 10Pânə̈ tche dɨ̂ tchə̂lə̂ ma yê sə̈ Jezü ndə̂kə̂ pa tche groabô angbongbo atchozö nə̈ grô tʉ̂rʉ lə̂ gö nə̈-ê.
11Dëkë lə̂ tchô nə̈ lâme, kpûlû akoso kä lakə̂ zɨ rə ndrotə̂ aga nə̈. 12Angbongbo atchozö nə̈ dɨ̂ tchə̂lə̂ ma andjê sə̈ Jezü päkëdə̂: «Amö wan ârâ bhâlə̂ kpûlû akoso ndə̂kə̂ pa ârâ li lə̂ andjê.» 13Jezü zâ köbo sə̈ andjê, käko angbongbo atchozö nə̈ wûtu lə̂ köchë lâme, ânyë kə̈ lî lə̂ akoso nə̈. Akoso nə̈ gbɛ̂ wä ndola sâke bïchuû. Andjë trô tə̂ gbo aga nə̈ la rö, kə̈ tû lə̂ gbölö kpakpa ngû, ânyë andjê gbɛ̂ drô lə̂ ngû nə̈. 14A-earə̂ kə̂ nyiale akoso nə̈ kpê kə̈ ê kə̈ tô pö ndə̂nə̈ lə̂ gö nə̈, ndjë lə̂ ayɛ̈yɛ̈ gö gbɛ̂ tə̂ ma kɨ̈ndɨ̈, ânyë azü nə̂ kə̈ wûn rə ndə̂ âmbô lâme. 15Andjë nə̂ ndola Jezü, kə̈ wûn köchë ndə̂ tche wâ alême la angbängbä angbongbo atchozö lə̂ yê lâme, tche yû lə̂ba tə̂ yê kə̈ sə̂ bêche. Tə̂ yê dâka nə̂, ânyë wawa mbô andjê gbɛ̂. 16Azü ndə̂ andjë wûn rə lâme, andjë tô tchêngbâ pö ndə̂ arə ndə̂ âmbô tə̂ köchë ndə̂ tche wâ la angbongbo atchozö lâme ndjë la rə ndə̂ âgbô akoso lâme gbɛ̂ sə̈ azü ndə̂ andjë nə̂ lâme. 17Käko andjë dɨ̂ tchə̂lə̂ ma andjê sə̈ Jezü ndə̂kə̂ pa tche gbo lə̂ gö ndə̂ andjê-ê. 18Ndə̂ Jezü â lə̂ külû ndə̂kə̂ gu, köchë ndə̂ tche wâ alême la angbongbo atchozö lə̂ yê lâme dɨ̂ tchə̂lə̂ ma yê sə̈ tchë ndə̂kə̂ pa tche gbotə̂ anyê, anyë sə̂ ndrotə̂ yê. 19Praâbalë Jezü kôsə̂ nə̈ ânyë kə̈ tô rə̂ sə̈ tchë päkëdə̂: «Gu atə̂ndə̂ zə̈, kə̂ pu azü lə̂ bûngrɨ̂ ndə̂ zə̈, kə̂ to tchêngbâ pö ndə̂ arə gbɛ̂ ndə̂ Gbölö Gbïɛ̈ mbô rə̂ tə̂ zə̈ lə̂ köbosə̂ nə̈ ndə̂ tche wûn nyonyo zə̈ lâme.» 20Köchë lâme âsə̈ gu, kə̈ jêtə̂ kə̂ mu pö ndə̂ arə gbɛ̂ ndə̂ Jezü mbô rə̂ tə̂ yê lə̂ agö lə̂ könô gbɛ̂. Azü gbɛ̂ ndə̂ andjë djê pö nə̈, tchə̂lə̂ küma andjê gbɛ̂ djîngɨli-î.
Ɛ̈wünrə ndə̂ Jäyïrûse la ɛ̈chë ndə̂ tche grʉ̂ ma lə̂ba ndə̂ Jezü
(Mat 9.18-26; Luk 8.40-56)
21Ndə̂ Jezü zû dəkalâ gbölö kpakpa ngû nə̈, kpûlû azü pâlatə̂ andjê ndrotə̂ yê. Tche sə̂ ë maga gbölö kpakpa ngû nə̈. 22Ngâ makündji ndə̂ nda kə̂ voga Ndjapä ndə̂ ajuîfu ndə̂ rə̈ yê wû pä Jäyïrûse nə̂. Tche âsə̈ wun Jezü kə̈ tê bêche tchâtchâ yê, 23kə̈ dɨ̂ tchə̂lə̂ ma yê sə̈ tchë tə̂ gbölösə̂nə̈, kə̈ tô rə̂ päkëdə̂: «Ɛ̈wünrə ndə̂ mê ndô tə̂kə̂ tchu nə̂, amö nə kə̈ tô könô zə̈ pâ yê, tche tcha ânyë kə̂ sə la tʉ̈rʉ̂ la yê.» 24Jezü la Jäyïrûse, andjë gû gutə̂. Ngâ gbölö kpûlû azü zâ tchêngbâ Jezü ânyë kə̈ sə̂ lakə̂ frofro tchë katchôgbɛ̂.
25Dëkë lə̂ kpûlû azü nə̈, ngâ ɛ̈chë kä tâ ndə̂ jï sə̂ lakə̂ tu tə̂ yê ngû lə̂ könô gbɛ̂ tchêpâ nə̈ bïchuû. 26Tche wün yûkû tə̂ gbölösə̂nə̈ tchânə̂ angbängbä adokotöro. Tche ndɨ̂ makətche tchânə̂ yê gbɛ̂, praâbalë tə̂ yê krâbo-a, ânyë tə̂kömbô nə̈ kä rôpâ anə̈ dokʉ̈tchê. 27Käko, ndə̂ tche djê pö ndə̂ Jezü, tche nə̂ lə̂ kpûlû azü nə̈ dəngbâ yê kə̈ grʉ̂ ma lə̂ba ndə̂ yê. 28Bëte tche tö rə̂ päkëdə̂: «Âdə mê âgrʉ kütû ma lə̂ba ndə̂ yê, kə̂ tchadje.» 29Posə̂nə̈, jï nə̈ krʉ̂-ê, ânyë tche wûntə̂ yê pä ânyë tchâ lə̂ tə̂kömbô ndə̂ anyê nə̂. 30Posə̂nə̈, Jezü wûnsə̂ nə̈ pä ngâ gbôgbô wûtu lə̂ anyê nə̂. Tche djêtə̂ yê lə̂ kpûlû azü nə̈ ânyë kə̈ yû andjê päkëdə̂: «Tchabâ kä ndə̂ âgrʉ̂ lə̂ba ndə̂ mê?» 31Adjisîpili ndə̂ yê tô rə̂ sə̈ tchë päkëdə̂: «Mo wûn rə̂ nə̂ pä kpûlû azü kä lakə̂ frofro mö katchôgbɛ̂, ânyë mo kâ yûkû nə̈ päkëdə̂: ‹Tchabâ kä ndə̂ âgrʉ̂ mê?›» 32Praâbalë tche wûn tchô ndrotə̂ yê ndə̂kə̂ wun akrə ndə̂ tche mbô rə lâme. 33Wawa mbô ɛ̈chë nə̈, tche sə̂ lakə̂ gugu bëte tche wûnsə̂ rə ndə̂ âmbô tə̂ yê la tə̂ yê nə̂. Tche nə̂ kə̈ tê tchâtchâ Jezü, ânyë kə̈ tô lëge pö gbɛ̂ sə̈ tchë. 34Jezü tô rə̂ sə̈ tchë päkëdə̂: «Ɛ̈wünrə ndə̂ mê, kə̂ za su zə̈ sə̈ mê tchâ mö nə̂. Amö gu la zɨtɨ su, kə̂ tcha lə̂ tə̂kömbô ndə̂ zə̈.»
35Ndə̂ gbô Jezü ndə̂po lakə̂ to pö nə̈ käko, angâ azü tô bhândə̂ makündji ndə̂ nda kə̂ voga Ndjapä ndə̂ ajuîfu nə̈ kə̈ nə̂, kə̈ tô rə̂ sə̈ tchë päkëdə̂: «Ɛ̈wünrə ndə̂ zə̈ nə̈ tchû nə̂, bëte giamâ kä ndə̂ gbô mö sə̂ lakə̂ ka küma Earə̂ kə̂ nyisə̂ rə ndə̂nə̈?» 36Praâbalë Jezü zâbo su yê tə̂ pö ndə̂ andjê lâme balë-a. Tche tô rə̂ sə̈ Jäyïrûse päkëdə̂: «Amö mboabô wa mbô-ê, za kütû su zə̈ sə̈ Ndjapä.» 37Tche kôsə̂ nə̈ pä azü gbɛ̂ za tchêngbâ yê, kütû Pîêre la Jâke la yîngâ yê Jâan. 38Andjë wûtu bhâ tchâalê ndə̂ makündji ndə̂ nda kə̂ voga Ndjapä ndə̂ ajuîfu nə̈, tchâme Jezü wûn rə̂ pä azü kä lakə̂ nyoanyoa tə̂ andjê la kɨ̈ lakə̂ ta wârə̂. 39Tche lî bhâ tchâalê nə̈, kə̈ tô rə̂ sə̈ andjê päkëdə̂: «Bëte giamâ kä ndə̂ nyë sə̂ lakə̂ mbo tə̂ arə kâkë la kɨ̈? Bechë nə̈ tchûâbo tchü-a, tche lôlö.» 40Andjë sə̂ lakə̂ mo tchë. Praâbalë tche tô rə̂ sə̈ andjê gbɛ̂ ndə̂kə̂ wutu atə̂ sûwu. Tche zâ kütû bha nə̈, la anyï nə̈ la adjisîpili ndə̂ yê vötaâ lâme, ânyë kə̈ lî la andjê bhâ sə̂nə̈ ndə̂ bechë-ɛ̈chë nə̈ sə̂ tâ. 41Tche zâ könô bechë nə̈ ânyë kə̈ tô rə̂ sə̈ tchë päkëdə̂: «Tälïtä kûm!» Änyïndə̂ kə̂ to rə̂ päkëdə̂: «Bechë-ɛ̈chë, më tö rə̂ sə̈ mo, amö jo-ê!» 42Posə̂nə̈, bechë-ɛ̈chë nə̈ âlafô kə̈ sə̂ lakə̂ nə, bëte tche wä alême la ngû lə̂ könô gbɛ̂ tchêpâ nə̈ bïchuû. Gbô rə̂ ndə̂ andjê âsə̈ wun rə lâme käko, tchə̂lə̂ küma andjê gbɛ̂ djîngɨli. 43Jezü zâma sə̈ andjê la gbôgbô ndə̂kə̂ pa ngâ akrə balë wun-abô sə̂nə̈ wûn-î. Tche tô rə̂ sə̈ andjê päkëdə̂: «Nyë zä kɨ̈zɨ̂ sə̈ ɛ̈wünrə nə̈.»
© Wycliffe Bible Translators, Inc.
