Matiyə̈ 4
4
Jâbolo bölo Jezü
(Mar 1.12-13; Luk 4.1-13)
1La tchêngbâ nə̈ Kpɨ̂ki Yingö tôngo Jezü kə̈ ê la tchë âtə̂lə̂ kpaɛ̈gâ ndə̂kə̂ pa Jâbolo vu tchë. 2Pânə̈ ndə̂ tche zɨ̂âbô kɨ̈zɨ̂ zɨ̂ lakə̂ to pö sə̈ Ndjapä ngbâ lö tə̂ azü bïchuû la tchə̂lə̂ bütchî tə̂ azü bïchuû, gʉ nyû tchë. 3Jâbolo, earə̂ kə̂ bolo azü nə̂ ndola tchë, kə̈ tô rə̂ sə̈ tchë päkëdə̂: «Âdə mo âdə Modô ndə̂ Ndjapä, amö to rə̂ sə̈ täme âtə âdôtə̂ yê tə̂ kɨ̈zɨ̂.» 4Jezü tô rə̂ ndə̂nə̈ sə̈ tchë päkëdə̂: «Mbëtï Ndjapä tö rə̂ päkëdə̂: ‹Akrə sə̂âbo sûwu âtə kütû bëte kɨ̈zɨ̂-a, praâbalë tche sə̈ sûwu bëte pö gbɛ̂ ndə̂ âwûtu lə̂ ma Ndjapä#4.4 Nyë dɨ̈ Det 8.3..›»
5Pânə̈ Jâbolo ê la tchë atə̂ Jerûzalêmo, gö ndə̂ âwâ ngbî bëte Ndjapä. Tche zâ tchë bhâlə̂ küma gbölö nda Ndjapä, 6kə̈ tô rə̂ sə̈ tchë päkëdə̂: «Âdə mo âdə Modô ndə̂ Ndjapä, amö to lə̂ küma nda âtə kə̈ tê atə̂ bêche, bëte Mbëtï Ndjapä tö rə̂ päkëdə̂:
‹Ndjapä âzadje ma sə̈ aânje ndə̂ yê
ndə̂kə̂ sə ndrotə̂ zə̈.
Andjê zadje mö tchânə̂ andjê,
ânyë mo gʉteabô da zə̈ gʉ̂te tə̂ ngâ täme-ê#4.6 Nyë dɨ̈ Aps 91.11-12..›»
7Jezü tô rə̂ sə̈ tchë päkëdə̂: «Mbëtï Ndjapä tö rə̂ päkëdə̂: ‹Âwâbo pä mo bolo Ndjapä Gbölö Gbïɛ̈ ndə̂ zə̈-a#4.7 Nyë dɨ̈ Det 6.16..›»
8Jâbolo kä ê la tchë bhâlə̂ ngâ gbölö küma aga, kə̈ nyîsə̂ agö-gbïɛ̈ ndə̂ tchêbêche gbɛ̂ sə̈ tchë lakə̂ fu ndə̂nə̈, 9kə̈ tô rə̂ sə̈ tchë päkëdə̂: «Âdə mo âgʉte tchâtchâ mê ânyë kə̈ vôga mê, mê kʉadje arə lâme gbɛ̂ sə̈ mö.» 10Jezü tô rə̂ sə̈ tchë päkëdə̂: «Gitə̂ zə̈ chï, Satäa! Mbëtï Ndjapä tö rə̂ päkëdə̂: ‹Äwäpä mo gʉte tchâtchâ Ndjapä Gbölö Gbïɛ̈ ndə̂ zə̈, kə̂ voga kütû tchë balë#4.10 Nyë dɨ̈ Det 6.13..›» 11Jâbolo gbôtə̂ yê, ânyë aânje nə̂ ndrotə̂ yê kə̈ mbô rə̂ la tchë.
Jezü jëtə̂ kə̂ mu pö bhâ Galilë
(Mar 1.14-15; Luk 4.14-15)
12Ndə̂ Jezü djê rə̂ pä a yî Jâan bhâlə̂ nda kânga nə̂, tche zâ köbo kə̈ rô atə̂ Galilë. 13Tche gbô lə̂ gö ndə̂ Näzärête kə̈ sə̂ bhâlə̂ gö ndə̂ Käpërënäyûmo, ndə̂ âwâ ndroma gbölö ngû ndə̂ Galilë bhâlə̂ gö ndə̂ Zabulön la andə̂ Nefetalï. 14Tche mbö tâ käko ndə̂kə̂ pa pö ndə̂ earə̂ ndə̂ma Ndjapä Ezayï tô rə̂ mbo gundə̂sə̂ nə̈. Tche tö rə̂ päkëdə̂:
15«Gö ndə̂ Zabulön la gö ndə̂ Nefetalï,
ndə̂ âwâ lə̂ köbo ndə̂kə̂ e atə̂ ma gbölö kpakpa ngû,
dəkalâ ngû ndə̂ Jurudɛ̈n,
Galilë də̈ gö ndə̂ azü ndə̂ andjë wâbô wâtə̂ ajuîfu!
16Azü ndə̂ andjë sə̂ lə̂ bübü tchô,
andjê wun-adje gbölö ngbänga!
Andə̂ andjanə̈ ndə̂ andjë sə̂ lə̂ bübü tchô lə̂ gö ndə̂ akuzü,
ngbänga âwutuadje tə̂ andjê#4.16 Nyë dɨ̈ Eza 8.23—9.1..»
17Tə̂ lo nə̈ lâme Jezü jêtə̂ kə̂ mu pö. Tche tö rə̂ päkëdə̂: «Äwäpä nyë gbotə̂ bəndɨ kə̂ mbo rə ndə̂ nyê, bëte lo kə̂ mbo kümändëmä ndə̂ Ndjapä pâ nyê ndô nə̂.»
Jezü ë adokʉ̈ adjisîpili ndə̂ yê
(Mar 1.16-20; Luk 5.1-11)
18Ndə̂ Jezü âsə̈ nə tə̂ maga gbölö kpakpa ngû ndə̂ Galilë, tche wûn angâ ayîngâ bïchuû ndə̂ andjë wâtə̂ a-earə̂ kə̂ pu agiangû. Chemön ndə̂ a ê rə̂ tə̂ yê pä Pîêre, la yîngâ yê Anderë. Andjë kä lakə̂ yi gbânda ndə̂ andjê ndə̂kə̂ pu agiangû lə̂ gbölö ngû nə̈. 19Jezü tô rə̂ sə̈ andjê päkëdə̂: «Nyë nə̈ ngbâ mê, mê mboadje rə̂ ânyë nyê watə̂ a-earə̂ kə̂ pu azü.» 20Posə̂nə̈ andjë gbôtə̂ gbânda ndə̂ andjê kə̈ zâ tchêngbâ yê. 21Jezü ê atə̂ tchâtchu nə̈, kə̈ wûn angâ ayîngâ bïchuû: Jâke modô ndə̂ Zebede la yîngâ yê Jâan. Andjë la bha andjê sə̈ lə̂ külû lakə̂ sɨ sə̂ gbânda ndə̂ andjê. Jezü ê andjê. 22Posə̂nə̈ andjë gbôtə̂ külû ndə̂ andjê la bha andjê , kə̈ zâ tchêngbâ Jezü.
Jezü la akpûlû azü
23Jezü nə̈ kulə̂ agö ndə̂ Galilë gbɛ̂. Tche nyïsə̂ rə sə̈ azü lə̂ anda kə̂ voga Ndjapä ndə̂ ajuîfu lə̂ gö nə̈. Tche mü Tchôtchô Pö ndə̂ Gbölö gö-gbïɛ̈ ndə̂ tchêlafô. Tche tchä a-earə̂ tə̂kömbô la azü ndə̂ ngâ tchâme-tə̂ andjê ndɨ̂. 24Rə̈ Jezü zâ tchə̂lə̂ gö ndə̂ Sirï gbɛ̂, ânyë azü ê pu tchë la a-earə̂ tə̂kömbô. Andjanə̈ ndə̂ andjë wâ la tə̂kömbô ngbî ngbî ânyë kə̂ sə ndə̂ andjê wâbô wâtə̂ tchôtchô nə̈, la andjanə̈ ndə̂ andjë wâ la angbongbo atchozö, la andjanə̈ ndə̂ kôkö yi andjê, ndjë la andjanə̈ ndə̂ ngâ tchâme-tə̂ andjê ndɨ̂. Jezü tchâ andjê gbɛ̂ lə̂ tə̂kömbô ndə̂ andjê. 25Kpûlû azü zâ tchêngbâ yê. Azü nə̈ tö bhâ Galilë, angânə̈ tö lə̂ agö lə̂ könô gbɛ̂, angânə̈ tö bhâ Jerûzalêmo, bhâ Judë ndjë lə̂ agö ndə̂ âwâ dəkalâ ngû ndə̂ Jurudɛ̈n ânyë kə̈ nə̂.
Currently Selected:
Matiyə̈ 4: lnl
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Wycliffe Bible Translators, Inc.
