Matiyə̈ 3

Kə̂ mu pö ndə̂ Jâan-Batîse

(Mar 1.2-8; Luk 3.1-18; Jan 1.19-28)

1Lo nə̈ lâme, Jâan-Batîse wûtu kə̈ sə̂ lakə̂ mu pö Ndjapä bhâlə̂ kpaɛ̈gâ ndə̂ Judë. 2Tche tö rə̂ päkëdə̂: «Äwäpä nyë gbotə̂ bəndɨ kə̂ mbo rə ndə̂ nyê, bëte lo kə̂ mbo kümändëmä ndə̂ Ndjapä pâ nyê ndô nə̂.» 3Jâan wätə̂ akrə ndə̂ earə̂ ndə̂ma Ndjapä Ezayï tô pö ndə̂ yê alême päkëdə̂:

«Ngâ akrə ön bhâlə̂ kpaɛ̈gâ päkëdə̂:

‹Nyë nyïkrə köbo Gbölö Gbïɛ̈,

Nyë nyïkrə köbo yê ngbêwôn#3.3 Nyë dɨ̈ Eza 40.3,ndə̂ âwâ lə̂ bəndɨ Mbëtï Ndjapä la ma gerêke.!›»

4Jâan-Batîse yü lə̂ba ndə̂ a mbô rə̂ la su kʉ̂tê gia ndə̂ rə̈ yê wû pä chamö. Tche ï wû ndə̂ âwâ la kpoto gia pâ lə̂ba ndə̂ yê. Kɨ̈zɨ̂ ndə̂ yê də̈ kütû agölô la jrôâ awrʉ̂âtro. 5Azü lə̂ agö ndə̂ Judë gbɛ̂ la azü gö ndə̂ Jerûzalêmo gbɛ̂ nə̂ pu Jâan. 6Andjë tösə̂ angbongbo rə ndə̂ andjê ësûwu, ânyë Jâan zâ batɛ̂me sə̈ andjê lə̂ ngû ndə̂ Jurudɛ̈n.

7Ndə̂ Jâan wûn angbängbä afarizïɛ̈n la asadusïɛ̈n ndə̂ andjë nə̂ pû tchë ndə̂kə̂ gbo batɛ̂me, tche tô rə̂ sə̈ andjê päkëdə̂: «Nyënyê ndə̂ nyë wâtə̂ akângê âtə! Tchabâ kä ndə̂ ânyîsə̂ nə̈ sə̈ nyê ndə̂kə̂ pa nyë kpe wa mêrâ ndə̂ Ndjapä ndə̂ ânə lâme? 8Nyë mbö rə ndə̂ ânyîsə̂ pä nyë gbôtə̂ bəndɨ kə̂ mbo rə ndə̂ nyê nə̂. 9Nyë töäbô rə̂ tô päkëdə̂: ‹Abrahâmo də̈ bha ârâ!› Bëte më tö rə̂ sə̈ nyê päkëdə̂, atäme ndə̂ nyê wun rə̂ âtə, Ndjapä kä la gbôgbô ndə̂kə̂ mbo rə̂ pä ädotə̂ yê tə̂ abechë ndə̂ Abrahâmo. 10Dekâ kä tchêtchêtchê ndə̂kə̂ de ada yö la chëchë nə̈ gbɛ̂. Ayö gbɛ̂ ndə̂ âlêâbô atchôtchô lêlê nə̈ lê-ê, a âdeadje rə̂ kə̂ yi rə̂ bhâlə̂ wo. 11Më zä kütû batɛ̂me ndə̂ ngû sə̈ nyê ndə̂kə̂ nyisə̂ nə̈ päkëdə̂ nyë gbôtə̂ abəndɨ kə̂ mbo rə ndə̂ nyê nə̂. Ngâ akrə ndə̂ tche wâ la gbôgbô kə̈ rô mê ânəadje la tchêngbâ mê. Më ndôâbo la sə̂ yê ndə̂kə̂ zu dakpo tə̂ da yê-a. Tchê zadje batɛ̂me ndə̂ Kpɨ̂ki Yingö la andə̂ wo sə̈ nyê. 12Tche kä la tchëkrɨ̈ tchânə̂ yê ndə̂kə̂ pe tchə̂lə̂ rəgʉ ndə̂ yê lakə̂ rʉa krətche nə̈ lə̂ andjî rəgʉ nə̈. Tchê paladje andjî rəgʉ ndə̂ yê gbɛ̂, kə̂ kʉ rə̂ bhâlə̂ gro ndə̂ yê. Praâbalë tchê paladje akrətche nə̈ kə̂ to wo ëtâ, wo nə̈ də̈ wo ndə̂ âwâbô wâ ndə̂kə̂ wrʉ-ê.»

Kə̂ gbo batɛ̂me ndə̂ Jezü

(Mar 1.9-11; Luk 3.21-22)

13Käko Jezü tô bhâlə̂ gö ndə̂ Galilë, kə̈ wûtu ëtə̂ Jâan-Batîse tə̂ maga ngû ndə̂ Jurudɛ̈n, ndə̂kə̂ pa tche za batɛ̂me sə̈ Jezü. 14Jâan-Batîse nyîndə̂ kə̂ kosə̂ nə̈, kə̈ tô rə̂ sə̈ Jezü päkëdə̂: «Momö kä ndə̂ âwâ ndə̂kə̂ za batɛ̂me sə̈ mê. Atöko ânyë mo kä nə̂ ndə̂kə̂ pa më za batɛ̂me sə̈ mö?» 15Praâbalë Jezü tô rə̂ ndə̂nə̈ sə̈ tchë päkëdə̂: «Gamba rə̂ ndə̂kə̂ pa rə nə̈ wa käko angêta. Käko kä ndə̂ azə̈ wâ ndə̂kə̂ mbo rə gbɛ̂ ndə̂ âwâtə̂ tchôtchô nə̈ lə̂ la Ndjapä.» Tchâme, Jâan gâmba rə̂.

16Pânə̈ ndə̂ Jezü gbô batɛ̂me, tche wûtu lə̂ ngû nə̈. Tə̂ lo nə̈ lâme, manda tchêlafô krô-ê. Tche wûn Yingö ndə̂ Ndjapä ndə̂ âjrê batə̂ grôgrô puli ânyë kə̈ sə̂ ëpâ yê. 17A djê tchə̂lə̂ gɨ̈ ngâ akrə bhâ lafô päkëdə̂: «Tchanə̈ âtə də̈ Modô ndə̂ mê ndə̂ më nyîndə̂ yê tə̂ gbölösə̂nə̈, su mê fü la tchë gbɛ̂.»

Currently Selected:

Matiyə̈ 3: lnl

ማድመቅ

Copy

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ

ስለ Mbëtï Ndjapä: TÄFO MADƗ̈ ተጨማሪ ይወቁ

ከ
{{ምዕራፍ}}
ታዋቂ የመጽሐፍ ቅዱስ ጥቅሶች

ቪዲዮ ለ {{ዋቢ_ሰዉ}}

ማቴዎስ 3:1-17

Lumo Project

Matiyə̈ 3

ከ
{{ምዕራፍ}}
ታዋቂ የመጽሐፍ ቅዱስ ጥቅሶች

ቪዲዮ ለ {{ዋቢ_ሰዉ}}

ማቴዎስ 3:1-17

Bible:

Banda, South Central

Version: Mbëtï Ndjapä: TÄFO MADƗ̈ - lnl

Matiyə̈ 3

Matiyə̈ 3

ከ{{ምዕራፍ}} ታዋቂ የመጽሐፍ ቅዱስ ጥቅሶች

ቪዲዮ ለ {{ዋቢ_ሰዉ}}

ማቴዎስ 3:1-17

Bible:

Banda, South Central

Version: Mbëtï Ndjapä: TÄFO MADƗ̈ - lnl

Matiyə̈ 3

ከ
{{ምዕራፍ}}
ታዋቂ የመጽሐፍ ቅዱስ ጥቅሶች