मरकुस 16

ईशूओ भी ज़िऊंदै हणअ

(मत्ती 28:1-8; लुका 24:1-12; युहन्ना 20:1-10)

1ज़ांऊं बशैघे धैल़ी बिती ता मगदल़ गराऊंए मरिअम और याकूबै आम्मां मरिअम और सलोमी आणी बडी खुशबूदार च़िज़ा ताकि ईशूए ल्हासा दी मल़ी सके।

2हबते पैहली धैल़ी दोती दोथी धुपै लागदी पुजी तिंयां तेसा घोरी सेटा ज़िधी ईशू त डाहअ द। 3तिंयां ती लागी दी आप्पू मांझ़ै गल्ला करदी, “हाम्हां लै घोरीए मोहरै लाई दी बडी टोल्ह कसा दैणीं बदल़ी?” 4ज़ांऊं तिन्नैं भाल़अ कि घोरी का आसा टोल्ह पोर्ही बदल़ी दी, और सह आसा ती खास्सी बडी टोल्ह।

5ज़ांऊं तिंयां घोरी भितरी नाठी ता तिन्नां का शुझुअ एक शेतै झिकल़ै आल़अ ज़ुआन मणछ दैहणीं बाखा बेठअ द और तिंयां हुई बडी रहैन।

6तेऊ ज़ुआन मणछै बोलअ तिन्नां लै, “तम्हैं किल्है हुई रहैन! तम्हैं ईशू नासरी लोल़ी आसा लागी दी ज़ुंण क्रूसा दी छ़ड़ाऊअ त? भाल़ा, सह हुअ ज़िऊंदअ और सह निं इधी आथी। भाल़ा, अह आसा सह ई ज़ैगा, ज़िधी तेऊए ल्हास ती डाही दी।

7“पर तम्हैं डेओआ पतरसा सेटा लै तेऊ का खोज़ै और होरी च़ेल्लै का बी खोज़ै इहअ कि सह डेऊणअ तम्हां का पैहलै गलील लाक्कै लै। ज़िहअ तेऊ तम्हां लै बोलअ त तम्हां भेटणअ सह तिधी।”

8तिंयां बेटल़ी लागी डरै काम्बदी और तिंयां ठुर्ही घोरी सेटा का और तिन्नैं निं डरै कोही का खोज़अ।

मगदल़ गराऊंए मरिअमा का ईशू शुझणअ

(मत्ती 28:9-10; युहन्ना 20:11-18)

9हबते पैहलै धैल़ै दोती दोथी शुझुअ ईशू ज़िऊंदै हणैं का बाद सोभी का पैहलै मगदल़ गराऊंए मरिअमा का, ज़हा का ईशू सात भूत काढै तै।

10सह नाठी ईशूए च़ेल्लै सेटा लै, तिंयां तै शोगा दी पल़ी लेरदै-पकारदै लागै दै। तेसा खोज़ी तिन्नां का सारी गल्ला। 11ज़ांऊं तेसा तिन्नां का खोज़अ कि ईशू हुअ ज़िऊंदअ और मंऐं भाल़अ सह आपणीं आछी, पर तिन्नैं निं तेसे गल्लो विश्वास किअ।

दूई च़ेल्लै का ईशू शुझणअ

(लुका 24:13-35)

12तेखअ शुझुअ सह तिन्नां होरी रुपा दी तिन्नां मांझ़ै दूई ज़ण्हैं का गराऊंआं लै डेऊंदी बारी। 13तिन्नैं बी खोज़अ होरी सोभी का एसा गल्लो समाद पर तिन्नैं होरी च़ेल्लै निं तिन्नें गल्ला दी बी विश्वास किअ।

सोभी गैरा च़ेल्लै का ईशू शुझणअ

(मत्ती 28:16-20; लुका 24:36-39; युहन्ना 20:19-23; शधाणूं 1:6-8)

14तेखअ शुझुअ सह तिन्नां गैरा च़ेल्लै का बी, ज़ांऊं तिंयां रोटी खांदै तै बेठै दै। ईशू नैरै तिंयां किल्हैकि तिन्नैं मन तै एतरै काठै हुऐ दै कि ज़ुंणी ज़िऊंदअ हई करै ईशू भाल़अ त तिन्नैं निं तिन्नें गल्ला दी विश्वास किअ।

15ईशू बोलअ तिन्नां लै, “तम्हैं डेओआ सारै संसारा दी, और सारै संसारे सोभी ज़ातीए लोगा का खोज़ा खुशीओ समाद। 16ज़ुंण विश्वास करे और डुबकी लए, उद्धार भेटणअ तेऊ ई और ज़ुंण बिश्वास निं करे सह हणअ दोशी।

17 “विश्वासा करनै आल़े हणैं ईंयां नछ़ैण, कि तिन्नां काढणैं मेरै नांओंआं करै मणछा का भूत पोर्ही और तिन्नां बोल़णीं नऊंईं-नऊंईं भाषा। 18तिन्नां च़कणीं दानुईं बी हाथै और नज़ाणै दी तिंयां ज़ैहर बी झुटे ता; तैबी निं तिन्नां किछ़ हणअ, और बमार मणछा लै बी ज़ै तिंयां आपणैं हाथा करै छुंए तिंयां हणैं ठीक।”

ईशूओ स्वर्गा लै डेऊणअ

(लुका 24:50-53; शधाणूं 1:9-11)

19तिन्नां च़ेल्लै संघै गल्ला करनै का बाद च़कअ परमेशरै ईशू तिन्नें आछी सम्हनै उझै स्वर्गा लै। संघा बशैल़अ सह आपणीं दैहणीं बाखा सोभी का बडी पदबी दी। (1 पतरस 3:22)

20एता बाद लागै तिंयां येरुशलेम नगरी का हांढदै और तिन्नैं खोज़ी ईंयां गल्ला सारै दी और ज़िधी बी तिंयां नाठै, ईशू रहअ तिन्नां करै नछ़ैण और च़मत्कार करदअ लागी। एता करै रहैऊअ तेऊ लोगा का कि परमेशरो खुशीओ समाद आसा शुचअ। तथास्तू।

Currently Selected:

मरकुस 16: OSJNT

ማድመቅ

Copy