लुका 1
1
भेत-बछ़ैण
1हे श्रीमान थियुफिलुस, ज़ुंण गल्ला हाम्हां मांझ़ै आसा हुई बिती दी, तिन्नां गल्ला कठा करना और लिखणा लै आसा हाम्हां मांझ़ै कई लोगै मैन्थ की दी। 2ईंयां गल्ला पजैल़ी तिन्नैं हाम्हां सेटा ज़ुंण पैहलै ई का तिन्नां गल्ला आपणीं आछी भाल़णैं आल़ै और ईशूए खुशीए समाद प्रच़ार करनै आल़ै तै। 3तै समझ़अ मंऐं इहअ ठीक कि हुंह लिखूं ताल्है हेरी-भाल़ी करै शुरू ओर्ही बाढै इना गल्लो पूरअ हाल। 4ताकि ताखा एसा गल्लो थोघ लागे कि ज़ुंण गल्ला ताखा आसा खोज़ी दी तिंयां आसा शुची और अटल़।
युहन्ने पैईदा हणें बारै
5ज़धू यहूदा लाक्कै हेरोदेस राज़ैओ राज़ त, तधू आसा त अबियाहे दला#1:5 अबियाहे दला दाबेद राज़े ज़मानैं ओर्ही तै परोहिते 24 दल। तिंयां करा तै मांदरे हर काम ज़िहअ कि भैंट, बल़ीदान, प्राथणां, आराधना और मांदरे हेर सभाल़। हर दले एछा ती छ़हा भिन्नैं बाद बारी और साला दी दूई बारी। दी एक जकरयाह नांओं परोहित और तेऊए लाल़ी इलीशिबा#1:5 इलीशिबा सह बी आसा ती इस्राएले परोहित हारूणें खांनदानी का ती हारूणें खांनदानी का। 6तिंयां दुहै ज़ण्हैं तै परमेशरा सम्हनै धर्मीं और प्रभूए सारै हुकम और बधाने बिधी मनणा लै निं तिन्नां लै कोई दोश आथी त। 7पर तिन्नें निं कोई आद लुआद आथी ती। किल्हैकि इलीशिबा ती बांढी और तिंयां दुहै ज़ण्हैं गऐ तै खास्सै प्रोढै बी हई।
8एकी धैल़ै ज़ांऊं जकरयाह आपणीं मंडल़ीए बारी दी परमेशरे सम्हनै परोहितो काम करा त, 9ता तेऊए नांओंए निखल़ी परोहिते रबाज़े साबै परच़ी कि प्रभूए मांदरै डेऊई करै ज़ाल़ै धूप। (लुआह 30:7) 10ज़ांऊं सह भितरी धूपा ज़ाल़दअ त लागअ द, तेभै तै बागै मांदरे खोल़ै बडै भारी लोग प्राथणां करदै लागै दै।
11तेऊ का शुझुअ नभैऊशै कि एक परमेशरो स्वर्ग दूत हुअ धूप बेदीए दैहणीं बाखा प्रगट। 12जकरयाह झशकुअ तेऊ भाल़ी करै और तेऊ फिरअ बडअ भारी हैल़अ। 13पर स्वर्ग दूतै बोलअ तेऊ लै, “हे जकरयाह डरै निं आथी, प्रभू हेरी तेरी प्राथणां शूणीं और तेरी बेटल़ी इलीशिबा का हणअ तेरअ एक शोहरू और तूह डाहै तेऊओ नांअ युहन्ना।” 14ताह हणीं तेऊ करै नंद और खुशी; संघा होरी बी भेटणीं बडै भारी लोगा तेऊए ज़ल्मां करै खुशी। 15किल्हैकि सह हणअ प्रभूए सम्हनै महान। तेऊ निं कधि अंगूरो रस और शराब झुटणअ और सह हणअ आपणीं आम्में गर्भा ई का पबित्र आत्मां करै भर्हुअ द। (इफिसी 5:18; न्यायियों 13:4-5) 16तेऊ फरेऊंणै इस्राएला का बडै भारी लोग प्रभू परमेशरा बाखा लै। 17सह डेऊणअ प्रभू आजू-आजू शगती और पबित्र आत्मां दी एलियाह गूरा ज़िहअ ताकि सह मुखियेओ मन तिन्नें लान्हैं बाखा लै फरेओए और परमेशरे हुकम नांईं मनणै आल़ै धर्में समझ़ एछे और प्रभू लै एक धर्मीं परज़ा बणांईं सके। (मलाकी 4:5-6)
18जकरयाह पुछ़अ स्वर्ग दूता का, “हुंह किहअ करै करूं एसा गल्लो भरोस्सअ? आप्पू ता हुंह प्रोढअ आसा और मेरी लाल़ी बी गई प्रोढी हई?”
19स्वर्ग दूतै बोलअ तेऊ लै इहअ, “हुंह आसा जिबराईल स्वर्ग दूत; और हुंह रहा सदा परमेशरे सम्हनै खल़्हुई। हुंह आसा परमेशरै ताह सेटा लै गल्ला करदअ और एसा खुशीए समादा खोज़दअ छ़ाडअ द। (दानिएल 8:16; 9:21) 20पर ऐबै शुण, ज़ेभै तैणीं ईंयां गल्ला पूरी निं हई मुक्के, तेभै तैणीं रहणअ तूह च़ुप्पी (टाट्टै ज़िहअ) और तूह निं किछ़ै बोली सकदअ। इहअ हणअ तै किल्हैकि तंऐं निं मेरी इना गल्लो विश्वास किअ ज़ुंण ठीक बगती पूरी हणीं।” 21ता लोग तै बागै जकरयाह न्हैल़ै-भाल़ै लागै दै और तिंयां हुऐ रहैन कि जकरयाह मांदरा भितरी एतरी देर किल्है पाई? 22ज़ांऊं जकरयाह बागै निखल़अ; ता सह निं किछ़ै बोली सकअ, जकरयाह लागअ तिन्नां लै शारै करदअ और सह रहअ टाट्टअ ई। तै गऐ तिंयां समझ़ी कि एऊ हुऐ मांदरै किज़ै दर्शण।
23ज़ांऊं तेऊए सेऊआ-च़ाकरीए धैल़ै पूरै हुऐ, ता सह नाठअ आपणैं घरा लै। 24इना धैल़ै बाद हुई तेऊए लाल़ी इलीशिबा पैरभारी। पर सह निं पांज़ा भिन्नैं तैणीं आपणैं घरा का ओर्ही-पोर्ही दूर नाठी। 25सह लागी आपणैं मनैं बोलदी कि इना धैल़ै की अह क्रिप्पा प्रभू मुंह संघै मणछा मांझ़ै इज़त डाहणें तैणीं। (मूल़ 30:23)
ईशूए ज़ल्म हणें बारै
26इलीशिबा पैरभारी हणें छ़हा भिन्नैं बाद छ़ाडअ परमेशरै जिबराईल नांओं स्वर्ग दूत गलील लाक्कै नासरत नांओंऐं नगरी एकी कुंआरी सेटा। 27तेसा कुंआरी नांअ त मरिअम और तेसरी बरनीं ती दाबेदे राज़े खांनदानीए एकी युसुफा नांओंऐं मर्धा संघै हुई दी। 28स्वर्ग दूत आअ तेसा सेटा भितरी संघा बोलअ तेसा लै, “तेरी हणीं बधाई, परमेशरै दैनअ ताल्है जश और प्रभू आसा ताह संघै।”
29एऊ बैणा शूणीं करै पल़अ मरिअमे मनैं झाख और सह लागी इहअ सोठदी कि इना गल्लो किज़ै मतलब आसा। 30तेखअ बोलअ स्वर्ग दूतै तेसा लै, “हे मरिअम, तूह निं फिकर करी ताल्है की परमेशरै झींण। 31भाल़, तूह हणीं पैरभारी और तेरअ हणअ एक शोहरू और तूह डाहै तेऊ नांअ ‘ईशू।’ (याशायाह 7:14) 32सह हणअ महान; और सह हणअ परम प्रधान परमेशरो शोहरू। प्रभू परमेशरा बणांणअ सह तेरै पित्तर दाबेद राज़ै ज़िहअ राज़अ। (भज़न 132:11; याशायाह 9:6-7) 33तेऊ करनअ याकूबे घरानै दी सदा राज़, और सह हणअ सदा लै राज़अ।” (2 शमूएल 7:12,16; इब्रानी 1:8; दानिएल 2:44)
34मरिअमै बोलअ स्वर्ग दूता लै, “इहअ किहै करै सका हई? हुंह ता कुंआरी आसा?”
35स्वर्ग दूतै बोलअ तेसा लै, “ताल्है एछणअ पबित्र आत्मां और परम प्रधान परमेशरे शगती रहणीं ताह संघै। ज़ुंण सह पबित्र शोहरू पैईदा हणैं आल़अ आसा, तेऊ लै बोल़णअ परमेशरो शोहरू।” 36शुण, तेरी मसेरी बैहण इलीशिबे बारै आसा सोभी का थोघ कि सह आसा बांढी; एभै आसा तेसो छ़ऊअ भिन्नअ लागअ द। 37परमेशरे भलै सका सोभै गल्ला हई। (मत्ती 19:26; यिर्मयाह 32:27)
38मरिअमै बोलअ तेऊ स्वर्ग दूता लै, “भाल़, हुंह आसा प्रभूए सेऊआ च़ाकरी करनै आल़ी, ज़िहअ तूह बोला तिहअ ई लोल़ी मुल्है हुअ।” सह स्वर्ग दूत नाठअ तेखअ तिधा का।
मरिअमो इलीशिबा सेटा मिलदै डेऊणअ
39संघा नाठी तिन्नां ई धैल़ै बाद मरिअम उझै सराज़ा दी यहूदा लाक्कै एकी नगरी लै ज़िधी जकरयाह परोहित रहा त। 40ज़ांऊं सह जकरयाहे घरै पुजी ता तेसा पुछ़ी इलीशिबा का राज़ी-खुशी, 41ज़हा घल़ी इलीशिबा मरिअमे राज़ी-खुशी शूणीं, ता तेसा ई घल़ी लागअ तेसे पेटै शोहरू च़ुकदअ और इलीशिबा भर्हुई पबित्र आत्मां करै।
42इलीशिबा बोलअ ज़ोरै हाक पाई करै, “परमेशरै बणांईं तूह सोभी बेटल़ी दी बडी अदर करनै जोगी और ज़हा शोहरू लै ताह ज़ल्म दैणअ, तेऊ लै बी दैनी परमेशरै बर्गत। 43मेरै ईंयां भाग किधा का खुल्है कि मेरै प्रभूए आम्मां आई मुंह सेटा लै? 44भाल़ मरिअम, ज़ांऊं तंऐं मुल्है राज़ी-खुशी पुछ़ी और सह बोल ज़ांऊं मेरै कानै पुजअ ता तेसा ई घल़ी लागअ मेरै पेटै शोहरू खुशी-खुशी च़ुकदअ। 45परमेशर आसा ताह करै खुश। किल्हैकि तंऐं किअ विश्वास कि ज़ुंण गल्ला प्रभू बाखा का ताल्है बोली ती, तिंयां हणीं पूरी।”
मरिअमो स्तोती भज़न
46तेखअ बोलअ मरिअमै, (1 शमूएल 2:1; 1:11; लुका 1:42; मलाकी 3:12)
“हुंह करा प्रभूए ज़ै-ज़ैकार
47और हुंह हुई उद्धार दैणैं आल़ै परमेशरा करै खुश।
48किल्हैकि तेऊ भाल़ी हुंह ज़ुंण तेऊए सेऊआ च़ाकरी करा और तैहीता भाल़ा,
एभा पोर्ही जुगे-जुगे लोगा बोल़णअ इहअ कि परमेशरै दैनी मुल्है बर्गत।
49किल्हैकि तेऊ सर्वशक्तिमान परमेशरै किऐ मुल्है बडै-बडै काम
और तेऊओ नांअ आसा पबित्र
50और तेऊए झींण हआ तिन्नां लै ज़ुंण तेऊए डरा हेठै रहा,
और सह झींण रहा पोस्ती दर पोस्ती बणीं।
51“तेऊ रहैऊअ आपणीं बाहो बल (2 शमूएल 2:7; आयूब 5:11; भज़न 113:7-8)
और ज़ुंण आप्पू बडअ समझ़ा तै तिंयां दरल़ाऊऐ तेऊ सातै-बातै।
52तेऊ किअ बडै-बडै राज़ैओ राज़ खतम,
और दुखी-दल़िदर किऐ बडै।
53भुखै दैनै तेऊ बधिया गल्ला करै रज़ैऊई
और सेठ काढै रित्तै हाथै दरल़ाऊई।
54“आपणैं सेऊआ करनै आल़ै इस्राएली लोगे की तेऊ हेर सभाल़
कि तिंयां तेऊए झींण आद डाहे;
55ज़ुंण आबरामा और तेऊए खांनदानी दी सदा रहणीं।
“ज़िहअ तेऊ म्हारै पित्तरा का बोलअ त।” (मूल़ 22:17; मीका 7:20)
56मरिअम रही चिई भिन्नैं तेसा सेटा और तेखअ आई सह घरा लै फिरी।
युहन्ना डुबकी दैणैं आल़ैओ ज़ल्म
57तेखअ आऐ इलीशिबे सूंणें धैल़ै और तेसो हुअ एक शोहरू। 58ज़ांऊं तेसे संघी-साथी शूणअ कि परमेशरै की तेसा लै झींण और तेसो हुअ शोहरू; ता तिंयां बी हुऐ बडै भारी खुशी।
59तेखअ हुअ इहअ कि आठुऐ धैल़ै निंयं आपणअ शोहरू तिन्नैं खतैर करना लै; ता तिन्नैं लाअ त तेऊओ नांअ तेऊए बाप्पू ज़िहअ जकरयाह डाही। (मूल़ 17:12; लेबी बधान 12:3) 60पर तेऊए आम्मां बोलअ इहअ, “एऊ शोहरूओ नांअ डाहंणअ युहन्ना।”
61तिन्नैं होरी बोलअ तेसा लै इहअ तेरी खांनदानी निं इहअ नांअ कोहिओ आथी? 62तेखअ पुछ़अ तिन्नैं तेऊ शोहरूए बाप्पू का शारै करै, “किहअ करनअ? कि तूह एऊओ नांअ कै च़ाहा डाहंणअ?” 63तेखअ मांगी तेऊ तिन्नां का लिखणे तगती और तेथ लिखअ, “एऊओ नांअ आसा युहन्ना।” ता तिंयां सोभ हुऐ रहैन। 64ता तेऊओ खाख और ज़िभ खुल्ही तेभी ता सह लागअ गल्ला-बाता करदअ और परमेशरो शूकर करदअ।
65ता तेऊ ओरी-पोरी रहणैं आल़ै डरै सोभ और तिंयां गल्ला पुजी तेसी बाती तेसी कई ज़ैगा यहूदा लाक्कै सारै सराज़ै। 66ईंयां गल्ला ज़ुंणी बी शूणीं तिंयां लागै आपणैं मनैं सोठी बोलदै कि अह शोहरू किहअ हणअ? किल्हैकि प्रभूए शगती आसा तेऊ संघै।
जकरयाहो स्तोती भज़न
67ता तेऊ शोहरूओ बाप्पू जकरयाह भर्हुअ पबित्र आत्मां करै और सह लागअ आजू हणैं आल़ी गल्ला प्रगट करदअ, (भज़न 111:9)
68“प्रभू, इस्राएले परमेशरे ज़ै-ज़ैकार (भज़न 132:17; यिर्मयाह 30:9)
तेऊ भाल़ै आपणैं लोग और तिन्नां लै दैनअ छ़ुटकारअ
69और आपणैं टैहलू राज़ै दाबेदे खांनदानी दी दैनअ आजू एक इहअ शगती आल़अ,
ज़हा हाम्हां लै उद्धार दैणअ।
70ज़िहअ परमेशरै खास्सी साला पैहलै आपणैं पबित्र गूरा का खोज़अ
ज़ुंण एऊ संसारे शुरू ई का आसा तै बोलदै लागै दै।
71म्हारै तिन्नां दुशमणे हाथा का दैनअ हाम्हां लै उद्धार
ज़ुंण हाम्हां संघै ज़ीद डाहा तै।
72परमेशरै डाही म्हारै पित्तरा लै झींण करी करै
आपणीं पबित्र करार आद।
73“ता सह करार ज़ुंण तेऊ म्हारै पित्तर आबरामा संघै की ती, (मूल़ 17:7; भज़न 105:8-9)
74कि तेऊ दैणअ हाम्हां लै इहअ कि
हाम्हैं आपणैं दुशमणे हाथा का बच़ी करै
75तेऊ सम्हनै पबित्र धर्मीं और बाझ़ी फिकर करी
सारी ज़िन्दगी तेऊए भगती करदै रहे।
76“ओ शोहरूआ, (मलाकी 3:1; याशायाह 40:3)
तूह हणअ परम प्रधान परमेशरो गूर,
किल्हैकि तूह हांढणअ आजू-आजू ताकि प्रभू एछणें धैल़ी लै लोगा तैर करी सके;
77ताकि तूह तेऊए लोगा लै उद्धारो ज्ञैन दैई सके,
ज़ुंण तिन्नें पाप माफ हई करै भेटणअ।
78किल्हैकि परमेशर आसा हाम्हां लै झणैल़ू
तेऊ करनै हाम्हैं माफ इहअ करै अह उद्धार करनै आल़अ
ज़ुंण दोती सुरज़ा ज़िहअ आसा, अह एछणअ स्वर्गा का म्हारी मज़त करदअ ताकि
79न्हैरै और मौते छ़ैल्ली दी बेशणै आल़ै लै प्रैशअ होए।
“तेऊ खोज़णीं हाम्हां का सुंबल़ी बात ताकि हाम्हैं शांती दी ज़िऊई सके।” (याशायाह 58:8; 60:1-2; 9:2)
80इहअ करै लागअ सह शोहरू युहन्ना बढदअ और आत्मां दी जोधअ हंदअ और इस्राएल देशे लोगा मांझ़ै प्रच़ार करनै का पैहलै तैणीं रहअ सह बणैं बूटै उज़ल़ ज़ैगा।
Currently Selected:
लुका 1: OSJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
