मरकुस 13
13
मांदरे बरैबाद हणें बारै गल्ला प्रगट करनी
(मत्ती 24:1,2; लुका 21:5,6)
1ज़ांऊं ईशू मांदरा का डेऊई च़ाल्लअ त, ता तेऊए च़ेल्लै मांझ़ै बोलअ एकी तेऊ लै, “हे गूरू, भाल़, केही बडी-बडी कोठी और पात्थर आसा।”
2ईशू बोलअ तिन्नां लै, “ज़ुंण तम्हैं इना बडै कोठी भाल़ा एक बगत एछणअ इहअ बी कि ईंयां सोभ पाणै ढोल़ी। एथ निं पात्थरा प्रैंदै पात्थर बी टेक्कअ द रहणअ।”
सांगट और दुख
(मत्ती 24:3-14; लुका 21:7-19)
3ज़ांऊं ईशू मांदरा सम्हनै जैतून धारा दी त बेठअ द, ता पतरस, याकूब, युहन्ना और आन्दरू, तिन्नैं सोभी ईशू का पुछ़अ, 4“हाम्हां का खोज़ कि ईंयां गल्ला केभै हणीं, ज़ेभै सह बगत एछणअ तेतो कै नछ़ैण हणअ?”
5ईशू बोलअ तिन्नां लै, “भाल़ै तम्हैं रहै चतैन कि कुंण तम्हां धोखै दी नां पाए। 6कई लोगा एछणअ मेरै नांओंऐं और तिन्नां बोल़णअ इहअ कि ‘हाम्हैं आसा परमेशरै छ़ाडै दै मसीहा।’ तिन्नां पाणै इहअ करै कई लोग कबाता। 7कि ईंयां गल्ला हणीं आसा ज़रूरी, पर तेसा बेला बी निं अंत हणअ।
8 “एकी ज़ाती करनअ दुजी ज़ाती संघै जुध और एकी राईसी करनअ दुजी राईसी संघै जुध। देशै हणीं कई ज़ैगा ज़ाज़री और कई ज़ैगा पल़णै नकाल़। अह हणीं दुखे शुरूआत ज़ेही एकी बेटल़ी सूंणें दाह उझ़िआ।” (यिर्मयाह 6:24)
9 “पर तम्हैं रहै आपणैं बारै दी चतैन। किल्हैकि लोगा निंणै तम्हैं आराधना सभा दी और तेथ च़िकणैं तम्हैं सोभी सम्हनै, मुंह पिछ़ू करनै तम्हैं मुखियै और राज़ै सेटा बी खल़ै। पर अह हणअ तम्हां का मेरै बारै खोज़णेंओ मोक्कअ।
10 “अह आसा ज़रूरी कि पैहलै लोल़ी खुशीओ समाद सोभी ज़ाती सेटा पुजअ। 11ज़ेभै तिंयां तम्हां कैद करे और पेशी लै खल़ै करे, तेभै निं तम्हैं फिकर करी की हाम्हां किज़ै बोल़णअ। तेसा घल़ी परमेशर ज़िहअ तम्हां का खोज़े तेभै बोलै तिहअ। किल्हैकि तैहा घल़ी निं बोल़णैं आल़ै तम्हैं हणैं, पर तेभै बोल़णैं आल़ी हणीं पबित्र आत्मां।”
12 “कई भाई-बैहणी पाणै आपणैं भाई-बैहण धोखै करै मारी और बाप्पू दैणैं शोहरू मारना लै। शोहरू हणैं आपणैं आम्मां-बाप्पूए खलाफ खल़ै ताकि लोग तिन्नां मारी पाए। (लुका 21:16; मीका 7:6) 13मुंह दी विश्वास करनै पिछ़ू हणैं बडै भारी लोग थारै दुशमण, पर ज़ुंण आपणीं मौत हणैं तैणीं सबर करे तेऊओ हणअ उद्धार।”
बडै सांगटो बगत
(मत्ती 24:15-28; लुका 21:20-24)
14(पहल़णैं आल़अ दै एसा गल्ला लै धैन) “एकी धैल़ै भाल़णीं तम्हां सह बरैबाद करनै आल़ी छ़ोतली च़ीज़ मांदरै खल़ी ज़ेते बारै खास्सी साला पैहलै परमेशरो गूर दानिएल बी बोलअ त। तेतो तिधी हणअ निं राम्बल़ी गल्ल आथी। तेभै समझ़ै तम्हैं कि सह बगत गअ एछी।
“तेभै ज़ुंण यहूदा लाक्कै दी होए तिंयां ठुर्है उझै धारा लै। (दानिएल 9:27; 12:11) 15ज़ुंण तेभै छ़ाप्परै होए, तिंयां निं घरा भितरा का किछ़ी गल्ला निंणे तैणीं उंधै होथी और नां घरा भितरा लै डेऊई करै बगत बरैबाद करी।
16 “ज़ुंण खेचै होए ता सह बी निं आपणैं झिकल़ै निंणे तैणीं पिछ़ू हटी।”
17 “तिन्नां धैल़ी ज़ुंण सुंदी बेटल़ी और आपणैं शोहरू लै दुधा पणैंऊंदी होए तैहा लै हणअ ठुहर्नअ बडअ कठण! 18तम्हैं रहा एसा गल्ला लै प्राथणां करदै लागी कि ईंयां गल्ला निं हिंऊंदे धैल़ै लोल़ी हुई।
19 “किल्हैकि ईंयां धैल़ै हणैं इहै दुखा सांगटे कि परमेशरे सृष्टी बणांणैं ओर्ही निं आझ़ तैणीं कधि हुऐ और नां कधि हणैं। (मत्ती 24:21)
20 “परमेशरै आसा आपणैं विश्वास करने आल़े बारै सोठी करै ईंयां सांगटे धैल़ी घटाऊई दी, नांईं ता संसारै निं कोहै मणछ बच़णअ त।
21 “ज़ै कुंण तिन्नां धैल़ी तम्हां लै इहअ बोले, ‘भाल़ा मसीहा आसा इधी, और मसीहा आसा तिधी’, ता तिन्नां दी निं विश्वास करी।
22 “किल्हैकि झ़ुठै मसीहा और झ़ुठै गूर निखल़णैं और तिन्नां पाणै ज़ादू करी करै बडै-बडै नछ़ैण और च़मत्कार रहैऊई कबाता। ज़ै तिन्नों बश च़ले ता तिन्नां पाणै परमेशरे छ़ांटै दै लोग बी कबाता। (मत्ती 24:24)
23 “पर तम्हैं रहै चतैन और इना गल्ला डाहै आद किल्हैकि मंऐं हेरी ईंयां गल्ला तम्हां का पैहलै ई खोज़ी।”
मुंह मणछे शोहरूओ फिरी एछणअ
(मत्ती 24:29-31; लुका 21:25-28)
24 “इना दुख-सांगटे धैल़ी बाद हणअ इहअ कि (प्रगट की दी गल्ला 6:13; याशायाह 34:4)
सुरज़ फिरनअ न्हैरअ
और ज़ोथ हणीं काल़ी।
25 सरगा का अल़णैं तारै धरनीं
और सरगे सारी शगती बी सिकणीं आजू-पिछ़ू।”
26 तेखअ भाल़णअ लोगा हुंह मणछो शोहरू महान शगती और प्रतपा संघै बादल़ा दी एछदअ। (दानिएल 7:13; प्रगट की दी गल्ला 1:17) 27तेसा बेला छ़ाडणैं मुंह आपणैं स्वर्ग दूत। पृथूई दी हर ज़ैगा का करनै आपणैं छ़ांटै दै लोग कठा। (बधान 30:4; मत्ती 24:31)
फेडूए बूटे कथ्या
(मत्ती 24:32-35; लुका 21:29-33)
28 फेडूए बूटा का शिखल़ा एसा गल्ला ज़ेभै तेते शाण्हटी नरम फिरा और ज़ांऊं तेथ प्लीर एछा; ता तेता करै लागा तम्हां का थोघ कि बसंते ऋत आसा नेल़। 29ठीक इहअ ई ज़ांऊं तम्हां ईंयां गल्ला हंदी हेरनी, ता तम्हैं समझ़ै कि तिंयां धैल़ै आसा नेल़। मतलब तिंयां गई डेहल़ा बागै पुजी।
30 “हुंह खोज़ा तम्हां का सत्त कि ज़ेभै तैणीं ईंयां गल्ला हई निं मुक्के, तेभै तैणीं निं एसा पोस्तीए लोग मरनै आथी। 31सरग और पृथूई टल़णीं पर मंऐं ज़ुंण गल्ला बोली ईंयां हणीं सोभ पूरी।” (याशायाह 40:8; लुका 21:33)
बिऊंतै रहा
(मत्ती 24:36-44)
32 “एसा गल्लो निं कोही का थोघ आथी कि ईंयां केभै हणीं। नां एतो थोघ स्वर्ग दूता का आथी और नां शोहरू का। पर एसा गल्लो थोघ आसा सिधअ परमेशर बाप्पू का। 33भाल़ा, बिऊंतै रहा और प्राथणां करदै रहा लागी। किल्हैकि तम्हां का निं एसा गल्लो थोघ आथी कि सह साईत केभै हणीं।
34 “अह आसा तेऊ मणछा ज़ेही गल्ल ज़ुंण परदेसा लै नाठअ, और आपणअ घर डाहअ सभाल़ी आपणैं टैहलू का। संघा डाहअ सोभी टैहलू का तिन्नां लै काम सभाल़ी। दुआरे पहरी लै डाहअ इहअ बोली कि बिऊंतअ रहै।
35 “तैही बोला हुंह तम्हां लै बी कि बिऊंतै रहा। किल्हैकि तम्हां का निं इहअ थोघ आथी कि थारअ प्रभू कसा धैल़ी एछणअ। सह उडै एछणअ कि आधी राची। कि सह दोती न्हैर प्रैशै एछे कि राच भैई करै एछे।
36 “इहअ निं हआ कि तम्हैं होए सुत्तै दै और मालक एछे तेसा ई बेला। 37ज़िहअ हुंह तम्हां लै बोला तिहअ ई बोला हुंह सोभी लै कि बिऊंतै रहा।”
Currently Selected:
मरकुस 13: OSJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
