मरकुस 12

कदुष्ट ज़िम्मींदारे कथ्या

(मत्ती 21:33-46; लुका 20:9-19)

1तेखअ खोज़ी ईशू तिन्नां का एक कथ्या कि “एकी मणछै लाअ एक अंगूरो बगिच़अ और तेता फेर लाऐ बाल़। एक बणांईं अंगूरे रसा लै कोफर। बगिच़ै पहरी लै बणांईं तिधी उछ़टै दी एक छ़ान।

“तेखअ डाहअ होरी ज़िम्मींदारा का सह बगिच़अ ठेकै दी दैई और आप्पू नाठअ सह परदेसा लै।

2 “तेखअ फल़ा दैणें सिज़नै छ़ाडअ तेऊ ज़िम्मींदारा सेटा आपणअ एक टैहलू इहअ बोली कि अंगूरे बगिच़ै दी ज़ुंण फसल लागी दी होए तेतो हेस्सअ आणै मांगी। 3पर तिन्नैं ज़िम्मींदारै ढाकअ सह संघा छ़ाडअ च़िकी-फणाटी करै बापस।

4 “तेखअ छ़ाडअ तिन्नां सेटा तेऊ एक होर टैहलू पर तिन्नैं फाल़अ तेऊओ मूंड और तेऊए निं कोई कदर की। 5संघा तेऊ एक होर टैहलू बी छ़ाडअ, पर तिन्नैं पाअ सह बी मारी। इहै ई छ़ाडै तेऊ मालकै तिन्नां सेटा लै होर बी कई; पर तिन्नैं ज़िम्मींदारै पाऐ तिंयां कोई च़िकी-फणाटी और कई पाए तिन्नां मांझ़ै मारी।

6 “ऐबै त तेऊओ एक्कै शोहरू रहअ द ज़हा लै सह सोभी का खास्सी झ़ूरी करा त। खिरी छ़ाडअ तेऊ सह आपणअ शोहरू बी। तेऊ सोठअ इहअ कि ‘मेरै शोहरूए हेरनी तिन्नां कदर करी।’

7 “तिन्नैं ज़िम्मींदारै बोलअ आप्पू मांझ़ै जोग करी कि ‘अह ई ता आजू तेऊए लुआद आसा; एछा अह पाणअ हाम्हां मारी और फसल हणीं सोभ म्हारी।’ 8तिन्नैं पाअ सह मारी और सह डाहअ अंगूरे बगिच़ै बागै शोटी।”

9ईशू पुछ़अ, “तेखअ ऐबै तेऊ बगिच़ेए मालका तिन्नां संघै किज़ै करनअ होए? हुंह खोज़ा तम्हां का कि तेऊ एछणअ और तिंयां ज़िम्मींदार निं तेऊ ज़िऊंदै छ़ाडणैं। अंगूरो बगिच़अ दैणअ होरी लै।” (भज़न 118:23)

10 “तम्हैं कै पबित्र शास्त्रा दी पहल़अ द निं आथी?

‘ज़ुंण पात्थर राज़ मिस्त्री नकाम्मअ समझ़अ त,

सह ई बणांईं तेऊ कूणींए ज़ान।

11 ईंयां गल्ला हुई प्रभूए तरफा का

और ईंयां आसा म्हारी आछी दी नुआहरी।’”

12तिन्नैं च़ाहअ सह ढाकणअ, किल्हैकि तिंयां गऐ तै समझ़ी कि एऊ बोली ईंयां गल्ला हाम्हां लै। पर तिंयां डरै लोगा का कि इहअ निं हआ कि लोग म्हारअ बरोध करे और तिन्नैं निं सह ढाकअ आथी और तिंयां लागै तिधा का हांढदै।

माहा राज़ै लै कारै दैणैंओ सुआल

(मत्ती 22:15-22; लुका 20:20-26)

13यहूदी छ़ाडै ईशू लै दोश लोल़णें तैणीं किछ़ फरीसी और हेरोदेस राज़े पक्ष लणै आल़ै लोग तेऊ सेटा लै तेऊ परखदै।

14तिन्नैं बोलअ तेऊ लै, “हे गूरू, हाम्हां का आसा थोघ कि तूह आसा शुचअ, और तूह निं कोहिए परबाह करदअ; और नां तूह मणछे मुंहां भाल़ी गल्ला करदअ, पर तूह खोज़ा परमेशरा सेटा डेऊणे बात बडी सत्त संघै। पर हाम्हां का खोज़ इहअ, माहा राज़ै लै कारअ दैणअ ठीक आसा कि गलत आसा? 15हाम्हां कारअ दैणअ लागा कि नांईं?”

ईशू हेरअ तिन्नें दिलो कपट समझ़ी और तिन्नां लै बोलअ, “तम्हैं मुंह परखदै किल्है आसा लागै दै? एक च़ंदीओ सिक्कअ आणा मुंह सेटा लै, मुंह भाल़णअ सह।” 16तिन्नैं आणअ एक च़ंदीओ सिक्कअ, तेखअ बोलअ ईशू तिन्नां लै, “एथ कसरी मुर्ति और नांअ आसा।”

तिन्नैं बोलअ, “माहा राज़ैओ नांअ और मुर्ति।”

17ईशू बोलअ तिन्नां लै, “ज़ुंण माहा राज़ैओ आसा, तेऊ दैआ माहा राज़ै लै, ज़ुंण आसा परमेशरो तेऊ दैआ परमेशरा लै।”

तिंयां हुऐ तेऊए गल्ला शूणीं रहैन।

भी ज़िऊंदै हणअ और बैह

(मत्ती 22:23-33; लुका 20:27-40)

18तेखअ आऐ तिधी सदुकी पंथे लोग। तिंयां मना तै इहअ कि “मूंऐं दै मणछो ज़िऊंदै हणैं आल़ी गल्ल आसा झ़ुठी।”

तिन्नैं ईशू का पुछ़अ, 19“हे गूरू, परमेशरे गूर मुसा आसा हाम्हां लै इहअ लिखअ द कि, ज़ै कसरअ भाई बाझ़ी लुआदी मरे और तेऊए लाल़ी पिछ़ू कल्ही छ़ुटे, ता तेऊओ भाऊ सका तैहा संघै बैह करी। सह आपणैं भाई लै लुआद बी सका पैईदा करी। (मूल़ 38:8; बधान 25:5)

20“एकी ज़मानें गल्ल आसा एही कि एकी बारी तै सात भाई, पैहलअ भाई मूंअ बैहा बाद और तेऊए निं आजू लुआद हुई, 21और दुजै भाई किअ तेऊए बेटल़ी संघै बैह और सह बी मूंअ तेऊए बी निं लुआद हुई, इहअ ई चिऐ भाई बी किअ और सह बी मूंअ।

22“इहअ करै मूंऐं तिंयां सात भाई और लुआद निं तिन्नां कोहिए हुई खिरी मूंईं सह बेटल़ी बी। 23ता, ऐबै ज़ेभै सह भी ज़िऊंदी हणीं ता सह तिन्नां साता भाई मांझ़ै कसरी बेटल़ी हणीं? किल्हैकि सह ता पैहलै साता ज़ण्हे बेटल़ी ती?”

24ईशू बोलअ तिन्नां लै, “तम्हां का नांईं ता पबित्र शास्त्रो थोघ आथी, और नां परमेशरे शगतीओ थोघ आथी? 25ज़ेभै तिंयां मूंऐं दै मांझ़ै ज़िऊई उझ़णै; तेभै नां ता तिन्नां बैह करनअ। नां तिंयां बैहा लै दैणैं। पर स्वर्गै हणैं तिंयां स्वर्ग दूता ज़िहै।

26 “मरी करै ज़िऊंदै हणें बारै कै तम्हैं, मुसा गूरे कताबा दी ज़ल़दै झ़ाकल़ा आल़ी कथ्या निं शूणीं आथी कि परमेशरै आपणैं गूर मुसा लै किज़ै बोलअ, ‘हुंह आसा तेरै पित्तर आबराम, इसहाक और याकूबो परमेशर!’

27 “इहअ बी बोलअ ‘परमेशर निं मूंऐं दै मणछो आथी, परमेशर आसा ज़िऊंदै मणछो।’ पर तम्हैं आसा बडी भूला दी पल़ै दै।”

सोभी का खास हुकम

(मत्ती 22:34-40; लुका 10:25-28)

28शास्त्री मांझ़ै शुणें एकी तिंयां आप्पू मांझ़ै छफल़दै कि एऊ ता ईंयां बडै बधिया करै समझ़ाऊऐ और तेऊ पुछ़अ ईशू का, “सोभी का खास हुकम किज़ै आसा?”

29ईशू बोलअ तेऊ लै, “सोभी का खास हुकम आसा अह, हे इस्राएली लोगो शूणां, म्हारअ परमेशर ई आसा परमेशर।

30 “तूह झ़ूरै आपणैं परमेशरा लै सारै दिला, मना, प्राणा और आपणैं सारै कामां करै। 31दुजअ हुकम आसा अह कि तूह करै आप्पू फेर रहणैं आल़ै होरी मणछा लै बी तेही झ़ूरी ज़िहअ तूह आप्पू लै झ़ूरा। एता का बडअ निं होर कोहै हुकम आथी।”

32शास्त्री बोलअ ईशू लै, “हे गूरू, तंऐं बोलअ ठीक कि सह आसा एक्कै, और तेऊ छ़ाडी निं होर कोहै परमेशर आथी। (याशायाह 45:18; बधान 4:35) 33तेऊ संघै डाहणीं सारै दिला, मन, प्राण और सारै कामां करै झ़ूरी।

“ता ज़ुंण ताह संघै होर लोग बी आसा तिन्नां लै बी करै आप्पू ज़ेही झ़ूरी, ईंयां गल्ला आसा सारी भैंट और सारै बल़ीदाना का बी खास।” (बधान 6:4-5; लेबी बधान 18:18; होशा 6:6)

34ज़ांऊं ईशू भाल़अ कि तेऊ दैनअ बडी समझ़ा संघै ज़बाब, ता ईशू बोलअ तेऊ लै, “तूह आसा परमेशरे राज़ा नेल़।” तेखअ निं कोही बी तेऊ का पुछ़णें हिम्मत हुई।

मसीहा कसरअ शोहरू आसा?

(मत्ती 22:41-46; लुका 20:41-44)

35तेखअ बोलअ ईशू मांदरा दी शिक्षा दैंदी बारी इहअ, “शास्त्री किल्है बोला इहअ कि मसीहा आसा दाबेद राज़ैओ शोहरू? 36दाबेद राज़ै आसा आप्पै ई पबित्र आत्मां दी भर्हुई करै बोलअ (भज़न 110:1)

‘प्रभू परमेशरै बोलअ मेरै प्रभू का,

मेरी दैहणै बेश,

ज़ेभै तैणीं हुंह तेरै दुशमणा तेरै खूरा हेठै निं करूं।’

37 “राज़अ दाबेद ता आप्पू बी तेऊ लै प्रभू बोला त! तेखअ मसीहा तेऊओ शोहरू केऊ साबै हुअ? और लोग शूणां तै तेऊए गल्ला बडै धैन दैई करै।”

शास्त्री का रहै चतैन

(मत्ती 23:1-36; लुका 20:45-47)

38ईशू दैनी तिन्नां लै शिक्षा, “इना शास्त्री का रहै चतैन, ज़ुंणी ईंयां लोगा रहैऊंणा लै लाम्मै च़ोल़ै हआ बान्हैं दै। कि तिंयां किहै महान आसा। ईंयां च़ाहा कि लोगै लोल़ी तिन्नां सेटा हाथ ज़ोल़ै। 39आराधना कोठी दी लोल़ी इना खास-खास ज़ैगा बेशणा लै। धामा दी च़ाहा तिंयां ज़ुदै ज़िहै खास ज़ैगा बेशणअ। 40ईंयां लुटा च़लाकी करै बिधबा बेटल़ीए घर। होरी का रहैऊंणा लै फिरा ईंयां खास्सी घल़ी प्राथणां करदै। इना लै भेटणीं सोभी का खास्सी सज़ा।”

गरीब बिधबा बेटल़ीओ दान

(लुका 21:1-4)

41ईशू लागअ मांदरे भढारा सेटा भाल़अ कि ईंयां मांदरै भढारा दी ढबै-धेल्लै केऊ साबै पाआ; बडै-बडै सेठ मणछै पाऐ आपणैं साबै बडै भारी ढबै। 42तेतरी आई एक गरीब बिधबा, सह भाल़ी ईशू दूई चाम्बे सिक्कै पांदी ज़ेते खास्सी किम्मत निं हंदी।

43तेखअ शादै ईशू आपणैं च़ेल्लै आप्पू सेटा लै। तेऊ बोलअ तिन्नां लै इहअ, “हुंह खोज़ा तम्हां लै सत्त कि मांदरे भढारा दी दान दैणैं आल़ै मांझ़ै दैनअ एसा गरीब बिधबा सोभी का खास्सअ दान।

44 “किल्हैकि सोभी दैनअ आपणैं खास्सै ढबै मांझ़ै आपणीं खास्सी कमाई मांझ़ा का। पर एसा गरीब बिधबा दैनअ आपणीं काम्मी-पेशी का आपणीं सारी कमाई।”

Currently Selected:

मरकुस 12: OSJNT

ማድመቅ

Copy