मरकुस 11
11
येरुशलेम नगरी लै डेऊणअ
(मत्ती 21:1-11; लुका 19:28-40; युहन्ना 12:12-19)
1तेखअ पुजै तिंयां येरुशलेम नगरी नेल़ जैतून धारा दी। सह ज़ैगा ती बेतफगे और बेतनियाह गराऊंआं सेटा। तिधी शादै ईशू आपणैं च़ेल्लै मांझ़ै दूई ज़ण्हैं,
संघा बोलअ तेऊ तिन्नां लै इहअ, 2“एऊ सम्हनें घरा लै डेओआ। तिधा का आणा एक गाधू ज़हा दी आझ़ तैणीं कोहै निं बेठअ द आथी। सह भेटणअ तिधी तम्हां बान्हअ द। तेऊ आणा खोल्ही। 3ज़ै तम्हां का कुंण पुछ़े कि तम्हैं अह किल्है लाअ निंईं? ता तम्हैं बोलै तिन्नां लै इहअ कि प्रभू पल़ी एते गरज़ तेखअ हेरनअ सह तेऊ तेभी तम्हां लै दैई।”
4तिंयां बी नाठै और तिन्नैं भाल़अ गाधू आसा खोल़ै बान्हअ द; तिंयां लागै तेऊ खोल्हदै।
5ता ज़ुंण तिधी खल़्हुऐ दै तै, कई लागै तिन्नां मांझ़ै तिन्नां लै इहअ बोलदै, “तम्हैं किल्है लाअ अह गाधू खोल्ही?” 6ज़िहअ ईशू तिन्नां का बोली त डाहअ द, तिहअ ई खोज़अ तिन्नैं च़ेल्लै बी तिन्नां का, इना गल्ला शूणीं दैनअ तिन्नैं लोगै तिन्नां सह गाधू निंणै।
7च़ेल्लै पजैल़अ सह गाधू ईशू सेटा और तेऊ प्रैंदै पाऐ आपणैं झिकल़ै और ईशू हुअ तेऊ गाधू प्रैंदै शुंआर।
8ता कई लोगै छ़ैऐ आपणैं झिकल़ै तेऊए सुआगत करना लै धरनीं बाता और कई छ़ैई आपणैं खेचा का नरम डाल़ी आणी करै बाता। 9ता ज़ुंण बडै भारी खास्सै लोग तेऊ आजू-पिछ़ू हांढणै आल़ै आसा तै तिंयां लागै ज़ोरै-ज़ोरै बोलदै, (भज़न 118:26; मत्ती 23:39)
“परमेशरे ज़ै-ज़ैकार
परमेशर दैआ तेऊ लै बर्गत ज़ुंण तेऊए नांओंऐं एछा।
10परमेशरा दैणीं ताल्है बर्गत ज़ेभै ताह म्हारै पित्तर दाबेद राज़ै ज़िहअ राज़ करनअ।
स्वर्गा दी रहणैं आल़ै परमेशरे ज़ै-ज़ैकार।”
11ईशू पुजअ येरुशलेम और तिधी नाठअ सह परमेशरे मांदरै तेखअ सारी नगरी फेर भाल़ी सारी च़िज़ा भाल़ी नाठअ आपणैं बारा च़ेल्लै संघै बेतनियाह गराऊंआं लै, किल्हैकि सान्ह गई ती पल़ी।
फल़ा बाझ़ी फेडूओ बूट
(मत्ती 21:18,19)
12दुजी धैल़ी ज़ांऊं तिंयां बेतनियाह गराऊंआं का नाठै ता ईशू आई भुखै। 13ता सह नाठअ दूरा का एकी फेडूए हरै बूटा भाल़ी करै तेता सेटा इहअ सोठी करै कि एथ भेटणअ किज़ै खाणां लै; पर तेथ निं पाचा छ़ाडी होर किछ़ भेटअ; किल्हैकि तिंयां धैल़ै नांईं तै फल़ा लागणें आथी। 14एता लै बोलअ ईशू इहअ, “ताह निं आझ़ा पोर्ही कधि फल़ दैणअ।” ता तेऊए च़ेल्लै तै शूणैं लागै दै।
मांदरा का बपारी बागै काढणैं
(मत्ती 21:12-17; लुका 19:45-48; युहन्ना 2:13-22)
15तेखअ आऐ तिंयां येरुशलेम नगरी। ईशू नाठअ मांदरा भितरी और ज़ुंण तिंयां तिधी ढबै-धेल्लै बदल़ी लैण-दैण करदै तै लागै दै, तिंयां सोभ काढै बागा लै। सुन्नैं-च़ंदी और पालल़ी बेच़णैं आल़े थल़्ही पाई तेऊ ढोल़ी। 16मांदरे खोल़ै बाती निं तेऊ कोही किछ़ी च़िज़ा आणनैं और निंणै दैनअ।
17ईशू बोलअ तिन्नां लै, “तम्हां का थोघ निं आथी कि बधाना दी आसा लिखअ द, ‘मेरअ मांदर हणअ सोभी ज़ातीए लोगा लै प्राथणां करने ज़ैगा?’ पर तम्हैं आसा अह च़ोरा-डाकू लुक्की रहणें खोख बणांईं दी।” (लुका 19:46; यिर्मयाह 7:11)
18इहअ शूणीं करै लागै बडै परोहित, शास्त्री तेऊ मारनें मोक्कै लोल़ै; किल्हैकि तिंयां डरा तै तेऊ का इहअ करै कि तेऊए शिक्षा पाआ ती सोभी लोगा मांझ़ै असर।
19धैल़अ उडी करै नाठै तिंयां नगरी का बागै।
शुक्कै दै फेडूए बूटा का सीख
(मत्ती 21:20-22)
20ज़ेभै तिंयां दोती तेसी बाती नाठै ता तिन्नैं भाल़अ सह फेडूओ बूट च़ुंडी का गोधै तैणीं शुक्कअ द। 21तैबै फिरी पतरसा सह गल्ल आद संघा बोलअ तेऊ ईशू लै, “हे गूरू, अह फेडूओ बूट ज़हा लै तंऐं शाप दैनअ त सह शुक्कअ!”
22ईशू बोलअ पतरसा लै, “तूह किल्है हुअ रहैन? परमेशरा दी डाहा विश्वास।
23 “हुंह खोज़ा तम्हां का सत्त कि ज़ुंण विश्वास करी करै बोले और बैहम नां करे कि अह धार लोल़ी पेछ़ुई करै समुंदरै पल़ी, ता सह पल़णीं समुंदरै। आपणैं मना दी बैहम निं करी विश्वासा संघै बोलै, तै ज़ुंण तूह बोले सह जाणअ हई।
24 “हुंह बोला तम्हां लै इहअ, ज़ेभै बी तम्हैं किज़ै प्राथणां करी परमेशरा का मांगे, तम्हैं करै इहअ विश्वास कि ज़ुंण मंऐं मांगअ सह गअ मुंह भेटी। ज़ै तम्हैं इहअ विश्वास करे ता परमेशरा हेरनअ सह काम तम्हां लै करी।
25 “ज़ेभै तम्हैं प्राथणां करे और थारै मना दी कसरै बारै ज़ीद होए ता तिन्नां लै करै माफ, तै करनै थारै बाप्पू परमेशरा ज़ुंण स्वर्गा दी आसा, थारै पाप बी माफ।”
26 “ज़ै तम्हैं कसरै ज़ुल्म माफ नांईं करे, ता थारअ बाप्पू परमेशर ज़ुंण स्वर्गा दी आसा, तेऊ बी निं थारै पाप माफ करनै।”
ईशूए हको सुआल
(मत्ती 21:23-27; 20:1-8)
27ज़ांऊं तिंयां येरुशलेम नगरी दी आऐ, और तिंयां तै मांदरे खोल़ै हांढदै-फिरदै लागै दै, ता बडै परोहित, शास्त्री और मुखियै लागै ईशू का पुछ़दै, 28“ताल्है इना कामां करना लै कुंणी बोलअ? और अह हक ताल्है कुंणी दैनअ?”
29ईशू बोलअ तिन्नां लै, “हुंबी पुछ़ा तम्हां का एक गल्ल; ज़ै तम्हैं मेरी गल्लो ज़बाब दैए, तै खोज़णअ मुंबी तम्हां का कि मुल्है इना कामां करनैओ हक कुंणी दैनअ। 30युहन्ने डुबकी कसा बाखा का आसा ती? स्वर्गा बाखा का कि संसारे मणछा बाखा का? मेरी गल्लो ज़बाब दैआ!”
31तिंयां लागै तेखअ आप्पू मांझ़ै इहै हठल़दै, “ज़ै हाम्हैं इहअ बोले कि स्वर्गा का, तै एऊ बोल़णअ हाम्हां लै इहअ कि तै तम्हैं तेऊओ विश्वास किल्है निं किअ?
32“ज़ै हाम्हैं इहअ बोले कि संसारे मणछा बाखा का, मणछे बोलै ता लोगा का लागी डौर
“किल्हैकि सोभ लोग मना तै इहअ कि युहन्ना त परमेशरो असली गूर। 33हाम्हां का निं थोघै कि युहन्ना कसा का भेटअ तेतो हक।”
ईशू दैनअ तिन्नां लै ज़बाब, “तम्हैं निं मेरै सुआलो ज़बाब दैनअ आथी! हुंबी निं तम्हां लै एसा गल्ला खोज़दअ कि मुल्है हिझ़ इना कामां करनैओ हक कुंणी दैनअ।”
Currently Selected:
मरकुस 11: OSJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
