मत्ती 17
17
मुसा और एलियाह संघै च़ेल्लै का ईशू शुझणअ
(मरकुस 9:2-13; लुका 9:28-36)
1छ़हा धैल़ी बाद निंयैं ईशू पतरस, याकूब और तेऊओ भाऊ युहन्ना सोभै ज़ण्हैं कांगनरांगै दी एकी धारा प्रैंदा लै संघा। 2तिधी बधल़ूई ईशूए काया तिन्नें सम्हनै एही कि ईशूओ मुंह लागअ सुरज़ा ज़िहअ च़मकदअ और झिकल़ै हुऐ प्रैशै ज़िहै शेतै। 3ता तिधी आऐ हेरे परमेशरो गूर मुसा और एलियाह, संघा तिंयां शुझुऐ ईशू संघै गल्ला करदै।
4इहअ भाल़ी पतरसै ईशू लै बोलअ, “हे प्रभू, अह हुअ ठीक कि हाम्हैं आसा इधी, ज़ै तेरी ज़ाज़त आसा, तै बणांणैं हाम्हां इधी चअन मंडप, एक ताल्है, एक परमेशरे गूर मुसा लै और एक एलियाह गूरा लै।”
5पतरस त बोलदअ ई लागअ द कि शेतअ बादल़ घोर्हुअ तिन्नां प्रैंदै और बादल़ा पिछ़ू का शूणअ तिन्नैं परमेशर इहअ बोलदअ “अह आसा मेरअ शोहरू, हुंह झ़ूरा एऊ लै सोभी का खास्सअ एऊ करै आसा हुंह खुश, एऊए शूणां ज़िहअ तम्हां लै बोले तिहअ।” 6इहअ शूणीं करै पल़ै च़ेल्लै उटी बाखा और तिंयां डरै बडै भारी।
7ईशू तिन्नां सेटा एछी करै तिंयां छ़ूंऐं और बोलअ, “खल़ै उझ़िआ, डरा निं आथी।” 8तेखअ भाल़अ तिन्नैं उझै फेर और ईशू छ़ाडी निं तिन्नां आप्पू संघै होर कोहै शुझुअ।
9ज़ांऊं तिंयां धारा का उंधै तै होथदै लागै ता ईशू दैनअ तिन्नां लै बाता-हांढदी इहअ हुकम, “ज़ेभै तैणीं मुंह मणछे शोहरू परमेशर मरी करै भी ज़िऊंदै निं करी हेरे, तेभै तैणीं निं इना गल्ला कोही का खोज़ी ज़ुंण तम्हैं आझ़ धारा प्रैंदै भाल़ी।”
10तेखअ पुछ़अ च़ेल्लै ईशू का, “तै ईंयां शास्त्री किल्है बोला इहअ कि एलियाह गूरो पैहलै एछणअ आसा ज़रूरी।”
11ईशू बोलअ, “परमेशरै आसा आप्पै बोलअ द कि एलियाह एछणअ और तेऊ करनै कई लोग मसीहा एछणें धैल़ी लै तैर। 12पर हुंह खोज़ा तम्हां का सत्त कि एलियाह आसा मुक्कअ द एछी और तिन्नैं निं सह बछ़ैणअ। ज़िहअ तिन्नें दिलै बोलअ तिहै किऐ तिन्नैं तेऊ लै ज़ुल्म। इहै ई ज़िरनै मुंह मणछे शोहरू बी तिन्नें हाथै दुख।”
13च़ेल्लै समझ़अ इहअ कि अह आसा लागअ द हाम्हां लै युहन्ना डुबकी दैणैं आल़े बारै बोलदअ।
मिर्गिए बमारी आल़अ लान्हअ ठीक करनअ
(मरकुस 9:14-29; लुका 9:37-43)
14ज़ांऊं तिंयां बडै भारी खास्सै लोगा सेटा पुजै ता एक मणछ आअ तिन्नां सेटा और माथअ टेकी करै लागअ सह बोलदअ, 15“हे प्रभू, मेरै शोहरू लै कर झींण। तेऊ उझ़िआ ती मिर्गिए दाह और तेऊ हआ बडी भारी तकलिफ। सह पल़ा तेभा-तेभी पाणीं और आगी जैंदरी। 16मंऐं बोलअ तेरै च़ेल्लै का बी कि एऊ भूता काढा एऊ का पोर्ही। पर तिंयां निं एऊ ठीक करी सकै।”
17ईशू बोलअ तिन्नां लै, “हे बैहम करनै आल़ै हठी लोगो, मुंह कधू तैणीं रहणअ तम्हां संघा कि तम्हैं विश्वास करे? मुंह केभै तैणीं रहणअ तम्हां न्हैल़ै लागी कि तम्हैं विश्वास करे? ओर्ही आणा एऊ लान्हैं इधी मुंह सेटा लै!” 18तेखअ काढी ईशू तेऊ लै एक झ़ाहल़ और भूत निखल़अ तेऊ का दूर और सह हुअ तेभी राम्बल़अ।
19तेखअ पुछ़अ च़ेल्लै ईशू का कांगनरांगै डेऊई करै, हाम्हैं एऊ दी शाचै दै भूता किल्है निं काढी सकै?
20ईशू बोलअ तिन्नां लै, “तम्हैं निं परमेशरे शगती दी विश्वास करदै, ज़ै थारअ विश्वास शाऊईए दाणैं बराबर बी होए, ता ज़ै तम्हैं एसा धारा लै बी बोले कि इधा का पेछ़ुई करै डेऊ दुजी बाखा लै; ता सह डेऊणीं और तम्हैं सका सोभै गल्ला करी।”
ईशू बोलअ भी आपणीं मौत हणें बारै
(मरकुस 9:30-32; लुका 9:43-45)
21ज़ांऊं च़ेल्लै गलील लाक्कै तै कठा हुऐ दै ईशू बोलअ तिन्नां लै, “हुंह मणछो शोहरू ढाकणअ मणछे हाथै 22तेखअ पाणअ तिन्नां हुंह मारी पर हुंह मणछो शोहरू हणअ चिऊथै धैल़ै भी ज़िऊंदअ।” 23एसा गल्ला शूणीं हुऐ च़ेल्लै बडै भारी दुखी।
मांदरा लै कारअ दैणअ
24ज़ांऊं तिंयां कफरनहूम नगरी पुजै, तिधी पुछ़अ एकी लै कारै गराहणै आल़ै पतरसा का, “थारअ गूरू मांदरा लै कारअ दैआ कि नांईं?” तेऊ बोलअ, “हाँ, दैआ ता दैआ।”
25ज़ांऊं पतरस घरै पुजअ ता तेऊए पुछ़णै का पैहलै हेरअ ईशू तेऊ लै बोली, “शमौन, तूह कै समझ़ा? कि ईंयां पृथूईए राज़ै च़ंदअ या कारअ कसा-कसा का मांगा? आपणैं शोहरू या पराऐ का?”
पतरसै बोलअ, “पराऐ का।”
26ईशू बोलअ तेऊ लै, “एऊ साबै गऐ तै शोहरू बच़ी।
27 “तैबी इहअ करै निं हाम्हां तिन्नां लै ठोहल़ दैणीं, तूह कर इहअ, समुंदरे बाढै डेऊ और कांडअ पाआ माह्छ़ली लै ता ज़ुंण माह्छ़ली पैहलै तेथ शाचे तेसा आणै। तेसे खाख खोल्ही भेटणअ ता एक च़ंदीओ सिक्कअ तेते किम्मत आसा च़ऊ धैल़ीए मज़दूरी बराबर और तेऊ निंईं करै दैऐ मेरै और आपणैं बदल़ै कारअ।”
Currently Selected:
मत्ती 17: OSJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.