मत्ती 16

स्वर्गो नछ़ैण मांगणअ

(मरकुस 8:11-13; लुका 12:54-56)

1फरीसी और सदुकी पंथे लोग आऐ ईशू सेटा लै और तिन्नैं बोलअ, “ज़ै तूह असली दी परमेशरै आसा हाम्हां सेटा लै छ़ाडअ द तै रहैऊ सरगै हाम्हां का एक नछ़ैण ताकि हाम्हां भरोस्सअ होए।”

2ईशू दैनअ तिन्नां लै ज़बाब, “सान्हां बोला तम्हैं कि सरग रहणअ बिझअ, किल्हैकि सरग आसा लाल। 3दोती बोला इहअ कि आझ़ एछणी ढिश बागर, किल्हैकि सरग आसा लाल और न्हैरअ। तम्हैं हेरा सरगे लछ़ण भाल़ी करै तेतो भेद खोज़ी पर ज़ुंण एभै आसा हंदअ लागअ द सह किल्है निं तम्हां का शुझदअ तेता करै किल्है निं तम्हां समझ़ एछदी कि परमेशर किज़ू करदअ आसा लागअ द? 4एऊ जुगे बूरै और विश्वास घात करनै आल़ै लोग लोल़ा नछ़ैण। पर योना गूरे नछ़ैणां छ़ाडी निं तिन्नां लै होर किछ़ै भेटणअ आथी।” तेखअ लागअ ईशू तिन्नां छ़ाडी तिधा का हांढदअ।

फरीसी और सदुकी पंथे लोगे शिक्षो सज़ेल़अ

(मरकुस 8:14-21)

5च़ेल्लै बिसरूऐ गलील समुंदरा पार डेऊंदी रोटी संघा निंणै। 6ईशू बोलअ तिन्नां लै, “हेरे, फरीसी और सदुकी पंथे लोगे सज़ेल़ै का रहै दूर।”

7तिंयां लागै आप्पू मांझ़ै सोठदै कि हाम्हैं रोटी ता आणी निं! तै आसा अह लागअ द हाम्हां लै एही गल्ला बोलदअ। 8ईशू हेरी तिन्नें मनें गल्ल भुझ़ी और तेऊ बोलअ तिन्नां लै इहअ, “हे बैहम करनै आल़ैओ, तम्हैं आपणैं मनैं कै सोठा कि हाम्हां का रोटी निं आथी? 9तम्हैं कै अज़ी बी निं समझ़ै आथी? तिन्नां पांज़ा हज़ारा लै मणछा लै रोटी खैऊई ती तिंयां बी निं तम्हां आद रही? तम्हैं पिछ़ू बच़ै दै रोटीए केतरै च़ठै च़कै तै? 10तिंयां च़ार हज़ार मणछा लै सात रोटी बी बिसरूऐ? तिधी बी बच़ी दी रोटीए केतरै च़ठै च़कै तै?” 11“तम्हैं किल्है निं समझ़ै कि मंऐं निं तम्हां लै रोटीए बारै कधि बोलअ आथी! फरीसी और सदुकी पंथे लोगे सज़ेल़ै का रहै दूर।”

12तेखअ आई तिन्नां समझ़ कि ईशू निं रोटीए सज़ेल़ै का दूर रहणा लै बोलअ; पर तेऊ बोलअ फरीसी और सदुकी पंथे लोगे शिक्षा का दूर रहणा लै।

पतरसो ईशू लै “मसीहा” बोल़णअ

(मरकुस 8:27-30; लुका 9:18-21)

13ईशू आअ कैसरिया और फिलिप्पी नेल़ गराऊंऐं और सह लागअ आपणैं च़ेल्लै का पुछ़दअ, “लोग मुंह मणछे शोहरू लै किज़ै बोला कि हुंह कुंण आसा?”

14तेखअ बोलअ तिन्नैं, “कोई बोला ताल्है युहन्ना डुबकी दैणैं आल़अ, कई लोग बोला एलियाह। कई लोग बोला कि अह आसा परमेशरो गूर यिर्मयाह या तिन्नां मांझ़ै कोई एक ज़ण्हअ।”

15तेखअ पुछ़अ तेऊ तिन्नां का, “तम्हैं किज़ै बोला मुल्है? हुंह कुंण आसा?”

16शमौन पतरसै बोलअ, “तूह आसा ज़िऊंदै परमेशरो शोहरू मसीहा।”

17ईशू बोलअ तेऊ लै, “शमौन, योने शोहरूआ, परमेशर आसा ताह करै खुश। अह गल्ल निं लोहू और मासा करै हूई। पर मेरअ बाप्पू ज़ुंण स्वर्गै आसा तेऊ की अह गल्ल ताह दी प्रगट। 18हुंबी बोला ताल्है इहअ कि तूह आसा पतरस (मतलब ज़ानीं ज़िहअ)। तूह हणीं तेसा मंडल़ीए आथरी ज़ुंण मुंह बणांणी। नरकै रहणैं आल़ै भूत बी निं मुंह तेता बणांणैं का रोक्की सकदै।

19 “मुंह दैणीं ताल्है स्वर्ग राज़े कुंज़ी, और ज़ुंण बी तूह पृथूई दी तिन्नां लोगा लै रोके, सह रोकणअ स्वर्गै और ज़ुंण बी तूह पृथूई दी ज़ाज़त दैए, तेता लै भेटणीं स्वर्गै ज़ाज़त।”

20तेखअ बोलअ ईशू आपणैं च़ेल्लै लै चतैनगी दैई, “इहअ निं कोही का खोज़ी कि हुंह आसा मसीहा।”

आपणीं मौते बारै ईशूओ पैहलै ई खोज़णअ

(मरकुस 8:31-33; लुका 9:22)

21तेखअ लागअ होर बी ईशू आपणैं च़ेल्लै का खोज़दअ, “मुंह लागणअ येरुशलेम नगरी लै ज़रूर डेऊणअ कि मुखियै, बडै परोहित और शास्त्री लोगे हाथै दुख ज़िरे और तिन्नें हाथै मरूं और हुंह चिऊथै धैल़ै ज़िऊंदअ होए।” 22एसा गल्ला लै निंयं पतरसै सह ज़ुदअ ज़िहअ सह लागअ तेऊ लै इहअ बोलदअ “हे प्रभू, परमेशर नां करे कि ताह संघै कधि इहअ होए।”

23ईशू बोलअ पतरसा बाखा फिरी करै, “हे राख्स, मुंह सम्हनै का हट दूर। ताखा करै लागअ द राख्स बोलदअ। किल्हैकि तूह लाआ परमेशरे गल्ला छ़ाडी मणछे गल्ला दी मन।”

ईशू पिछ़ू हांढणेंओ मतलब

(मरकुस 8:34—9:1; लुका 9:23-27)

24तेखअ बोलअ ईशू आपणैं च़ेल्लै लै, “ज़ुंण बी मेरअ च़ेल्लअ हणअ च़ाहे, सह निं तिन्नां गल्ला करी सकदअ ज़ुंण तेऊओ दिल च़ाहा। तेऊ लागणअ अपराधी ज़िहअ दाह-दुख ज़िरी करै आपणअ क्रूस आपणीं कान्हा आप्पै च़कणअ।”

25“किल्हैकि ज़ुंण बी एसा पृथूई दी आपणीं ज़िन्दगी बच़ाऊंणी च़ाहे, सह करा परमेशरा संघै सदा रहणैं आल़ी ज़िन्दगी बरैबाद, ज़ुंण मुंह दी विश्वास करनै पिछ़ू आपणैं प्राण दैए, तेऊ भेटणीं परमेशरा संघै सदा लै ज़िन्दगी। 26ज़ै मणछ सारै संसारा आपणैं बशै करी सोभी गल्ला दी सेठ बणें और आपणैं प्राण शोटे, ता तेऊ लै कै फाईदअ हणअ? या मणछा लै आपणीं ज़ानीं का ज़ादै किम्मती किज़ै आसा?

27 “हुंह मणछो शोहरू एछणअ आपणैं स्वर्ग दूता संघै आपणैं बाप्पूए प्रतपा और तैहा घल़ी भेटणअ हर एकी तेऊए कामें साबै फल। 28हुंह खोज़ा तम्हां का सत्त कि तम्हैं ज़ुंण इधी आसा, तम्हां मांझ़ै आसा कई इहै बी तिन्नां लै निं तेभै तैणीं मौत एछणी ज़ेभै तैणीं मुंह मणछे शोहरू राज़ै बणीं फिरी एछदै भाल़ी नां हेरे।”

Currently Selected:

मत्ती 16: OSJNT

ማድመቅ

Copy