लुका 7

एकी सुबैदारो विश्वास

(मत्ती 8:5-13)

1ज़ांऊं ईशू लोगा संघै सारी गल्ला-बाता करी मुक्कअ ता तेखअ आअ सह कफरनहूम नगरी लै। 2एक सुबैदार करा त आपणैं एकी टैहलू संघै बडी भारी झ़ूरी और एकी धैल़ै हुअ सह टैहलू इहअ बमार कि सह आसा त मरदअ तैर। 3तेऊ बी आसा ती ईशूए बारै गल्ला शूणीं दी। तेऊ छ़ाडै यहूदी लोगे कई मुखियै ईशू सेटा लै एही अरज़ करी कि हे प्रभू मेरै घरै एछी करै बच़ाऊ मेरै टैहलूए ज़ान। 4तिन्नैं ईशू सेटा एछी करै अरज़ की, “हे प्रभू तेऊ लै कर क्रिप्पा सह आसा एता जोगी, 5किल्हैकि सह करा म्हारी ज़ाती लै झ़ूरी और तेऊ ई आसा हाम्हां लै आराधना कोठी बी बणांअ द।”

6ईशू लागअ तिन्नां संघै हांढदअ और ज़ांऊं सह घरा नेल़ पुजअ ता सुबैदारै दैनअ आपणैं कई साथी का समाद, “हे प्रभू, खास्सअ कष्ट निं करी, हुंह निं एता जोगी आथी कि तूह मेरै घरै एछी सके। 7नां हुंह एता जोगी आथी कि ताह सेटा आप्पै एछी सकूं, तैही निं हुंह ताह सेटा लै आअ, पर आपणीं खाखा का बोल एक बोल और मेरअ टैहलू जाणअ ठीक हई। 8किल्हैकि हुंह आसा आप्पू बी सरकारी टैहलू और मुंह आसा आप्पू उंधै काम करनै आल़ै सपाही लै ढेऊआ करनैओ हक। ज़ांऊं हुंह कसा लै पोर्ही डेऊणा लै बोला, सह डेओआ पोर्ही और ज़हा लै ओर्ही एछणा लै बोला, सह एछा ओर्ही और आपणैं टैहलू लै बोला हुंह कि इहअ कर, सह करा तिहअ ई।”

9ईशू बी हुअ तेऊए गल्ला शूणीं रहैन, सह फिरअ पिछ़ू और ज़ुंण तेऊ पिछ़ू हांढदै तै लागै दै तेऊ बोलअ तिन्नां लै, “हुंह खोज़ा तम्हां का सत्त कि मंऐं निं एतरअ विश्वास पूरै इस्राएला दी भाल़अ” 10सुबैदारै ईशू सेटा लै छ़ाडै दै तिंयां लोग ज़ांऊं बापस घरै पुजै ता तिन्नैं भाल़अ सह टैहलू ठीक-ठाक।

मूंईं दी शोहरी ज़िऊंदी हणीं

11थोल़ै धैल़ै बाद ईशू नाठअ एक नांईंन नांओंऐं नगरी लै और तेऊए च़ेल्लै और पिछ़ू तै बडै भारी लोग संघा लागै दै एछदै। 12ईशू पुजअ नगरीए प्रऊल़ी सेटा। तिधी आसा तै लोग एकी ल्हासा बागा लै निंदै लागै दै। ज़ुंण सह मूंअ सह आसा त बिधबा बेटल़ीओ एक्कै शोहरू और नगरीए बडै भारी लोग तै तेऊए ल्हासा पिछ़ू हांढदै लागै दै। 13तेसा बिधबा भाल़ी आई प्रभू ईशू झींण और तेसा लै बोलअ, “लेरा लांदी निं लागे।” 14तेखअ ईशू ल्हासा सेटा लै नाठअ और सह खाट छ़ुंईं और तिंयां च़कणैं आल़ै खल़्हुऐ और ईशू बोलअ, “हे ज़ुआन मणछा, हुंह बोला ताल्है खल़अ उझ़ू।” 15तेखअ सह मुल्दअ उझ़ुअ खल़अ और सह लागअ गल्ला-बाता करदअ और ईशू सभाल़अ सह तेऊए आम्मां का।

16एसा गल्ला भाल़ी डरै तिंयां सोभ लोग और तिंयां लागै परमेशरे ज़ै-ज़ैकारा करदै और इहअ बोलदै, “हाम्हां मांझ़ै आअ परमेशरो एक महान गूर और परमेशरै की आपणैं लोगा लै क्रिप्पा।” 17ईशूए बारै ईंयां गल्ला पुजी सारै यहूदा और ओरी-पोरी सारै लाक्कै कई ज़ैगा।

ईशू और युहन्ना डुबकी दैणैं आल़अ

(मत्ती 11:2-19)

18युहन्ना डुबकी दैणैं आल़ै लै बी दैनअ तेऊए च़ेल्लै इना गल्लो समाद। 19तेखअ शादै युहन्ना आपणैं च़ेल्लै मांझ़ै दूई ज़ण्हैं और तिंयां छ़ाडै प्रभू सेटा इहअ पुछ़दै, “ज़ुंण सह एछणैं आल़अ त; सह मसीहा तूह ई आसा कि अज़ी हाम्हैं कहा होरी न्हैल़ै रहूंमै लागी?”

20और तिन्नैं च़ेल्लै बी ईशू का बोलअ, “युहन्ना डुबकी दैणैं आल़ै आसा छ़ाडै दै हाम्हैं इहअ पुछ़दै कि ज़ुंण सह एछणैं आल़अ त; सह तूह ई आसा कि अज़ी हाम्हैं कहा होरी न्हैल़ै रहूंमै लागी?”

21ईशू किऐ तेसा ई घल़ी कई दाह-खिज़ा और भूत शाचै दै मणछ ठीक और कई कांणै किऐ शरैछै। 22ईशू दैनअ तिन्नां लै ज़बाब, “ज़ुंण बी तम्हैं भाल़अ और शूणअ, तिन्नां गल्ला खोज़ा युहन्ना का कि कांणै लागै भाल़ै, लाट्टै लागै हांढदै-फिरदै। कोल़्हे बमारी आल़ै करा राम्बल़ै और टौणैं लागै शुणदै। मुल्दै लागै ज़िऊंदै हंदै और दुखी दल़िदरा का खोज़ा खुशीओ समाद। (याशायाह 35:5-6; 61:1) 23परमेशरा दैणीं तेऊ लै बर्गत ज़ुंण मेरै काम भाल़ी और शिक्षा शूणीं मुंह दी भरोस्सअ करा और बैहम निं करे।”

24ज़ांऊं युहन्ना छ़ाडै दै दूत तिधा का नाठै ता ईशू लागअ युहन्ने बारै लोगा का बोलदअ, “तम्हैं बणैं उज़ल़ ज़ैगा किज़ू भाल़ै नाठै तै, बागरी करै च़ुकदी नगाल़ै? 25तै तम्हैं किज़ू भाल़ै नाठै तै? नरम झिकल़ै बान्हैं दै मणछा? शूणां, इहै झिकल़ै ज़ुंण लोगा लोभा तिन्नां बान्हणैं आल़ै और आल-मस्ती दी रहणैं आल़ै रहा राज़ मैहला दी। 26तै तम्हैं किज़ू भाल़ै नाठै तै? कसा परमेशरे गूरा भाल़ै? हाँ, हुंह खोज़ा तम्हां का कि तम्हैं नाठै तै परमेशरे गूरा का बी बडै भाल़ै। 27अह आसा सह ई ज़सरै बारै शास्त्रा दी इहअ आसा लिखअ द, (मलाकी 3:1; याशायाह 40:3)

‘हेर, मंऐं छ़ाडअ आपणअ दूत ताखा आजू-आजू

और तेऊ करनै ताह एछणा लै लोग तैर।’

28 “हुंह खोज़ा तम्हां का ज़ुंण बेटल़ी का ज़ल्मैं दै आसा, तिन्नां मांझ़ै निं युहन्ना का बडअ कोहै आथी। पर ज़ुंण परमेशरे राज़ा दी होछ़ै का होछ़अ आसा, सह आसा तेऊ का बी बडअ।”

29तिन्नैं सोभी लोगै ज़ांऊं ईशूए ईंयां गल्ला शूणीं, तिधी आसा तै कारै गराहणै आल़ै बी ज़ुंणी युहन्ना का डुबकी ती लई दी तिन्नैं मनअ परमेशर शुचअ। 30पर फरीसी और शास्त्री समझ़ी परमेशरे सह सोठ नकदरी ज़ुंण तिन्नां लै ती किल्हैकि तिन्नैं निं युहन्ना का डुबकी लई।

31 “एऊ जुगे लोगा हुंह किहै खोज़ूं कि किहै आसा? 32तिंयां आसा तिन्नां लान्हैं ज़िहै ज़ुंण बज़ारै बेशी करै एकी दुजै लै हाक्का लांदै आसा लागै दै,

‘हाम्हैं बाज़ी तम्हां लै बशूरी

पर तम्हैं निं नाच़ै।

हाम्हैं किअ हिक्का पटाकी शोग

पर तम्हैं निं लेरै।’

33 “किल्हैकि युहन्ना डुबकी दैणैं आल़ै नां होरी लोगा ज़ेही भांती-भांतीए रोटी खाई और नां अंगूरो रस झुटअ और तम्हैं बोलअ तेऊ लै इहअ कि एऊ दी आसा भूत? 34हुंह मणछो शोहरू आअ खांदी पिंदी और तम्हैं बोला इहअ कि भाल़ा छ़ाकू, साबा का बाधू अंगूरो रस झुटणैं आल़अ मणछ और कारै गराहणै आल़ै और पापी मणछो साथी। 35पर ज्ञैन आसा आपणैं सोभी बच्च़ै का शुचअ किअ द।”

फरीसी लोगे घरै पापी बेटल़ी लै माफी

36तेखअ की एकी फरीसी लोगे ईशू का अरज़, “हे प्रभू, मुंह संघै खाआ रोटी, और ईशू नाठअ तेऊए घरै रोटी खांदअ।” 37हेरा, तेसा नगरीए एक कंज़री बेटल़ी का ज़ांऊं इहअ थोघ लागअ कि ईशू बेठअ फरीसी लोगे घरै रोटी खांदअ, ता तेसा आणअ संगमरमरे भांडै दी खुशबूदार किम्मती तेल।

38तेखअ लागी सह ईशूए खूरा सेटा, पिछ़ू खल़्हुई करै लेरदी-लेरदी ईशूए खूरा आछिए आशू करै भेऊंदी और आपणैं मुंडे शराल़ा करै लागी ईशूए खूरा टुशदी और तेसा ईशूए च़रणैं माख्खू दैनै और तेथ मल़अ सह खुशबूदार किम्मती तेल।

39इहअ भाल़ी तेऊ फरीसी ज़ुंणी ईशू आपणैं घरा लै शादअ त, सह लागअ आपणैं मनैं सोठदअ, “ज़ै अह परमेशरो गूर हंदअ, तै लागणअ त एऊ का थोघ कि अह बेटल़ी ज़ुंण एऊ छुंहदी आसा लागी दी अह कुंण आसा और अह केही बेटल़ी आसा? किल्हैकि अह आसा पापी बेटल़ी।”

40ईशू हेरी तेऊए मनें गल्ल भुझ़ी और तेऊ लै बोलअ, “शमौन, मंऐं लाअ ताखा किज़ै बोली।”

तेऊ बोलअ, “हाँ गूरू बोल।”

41तेखअ खोज़ी ईशू तेऊ का एक कथ्या, “एकी सेठे तै दूई दैणदार, एकी तै पांज़ शौ च़ंदीए सिक्कै और दुजै तै पज़ाह च़ंदीए सिक्कै तेऊए दैणा लै। 42तिन्नां का निं दैणा लै किछ़ै त और तेऊ सेठै किऐ तिन्नें ढबै माफ। तै तिन्नां दूई मांझ़ै सेठा लै कसा करनी खास्सी झ़ूरी?”

43शमौनै दैनअ ज़बाब, “मेरी समझ़ा दी करनअ तेऊ ज़सरै खास्सै ढबै माफ हुऐ।”

ईशू बोलअ, “तंऐं बोलअ बिलकुल ठीक।” 44तेखअ तेसा बेटल़ी बाखा फिरी करै ईशू शमौना लै बोलअ, “एसा बेटल़ी बी भाल़ा तूह? हुंह आअ तेरै घरै पर तंऐं निं मुल्है खूरा धोणा लै पाणीं बी दैनअ पर एसा धोऐ मेरै खूर आशू करै और आपणैं मुंडे शराल़ा करै टुशै। (मूल़ 18:4) 45तंऐं निं मुल्है च़ुंज़ी माख्खी दैनी पर ज़ेभा ओर्ही हुंह आअ द आसा; तेभा ओर्ही निं एसा मेरै खूरा दी माख्खी दैणीं छ़ाडी। 46तंऐं निं मेरै मुंडै तेल मल़अ पर एसा मल़अ मेरै च़रणैं खुशबूदार किम्मती तेल। (भज़न 23:5) 47तैही बोला हुंह ताल्है कि एसरै पाप ज़ुंण खास्सै तै तिंयां हुऐ माफ, किल्हैकि एसा की मुंह संघै खास्सी झ़ूरी पर ज़सरअ थोल़अ माफ हुअ तेऊ करनी थोल़ी झ़ूरी।” 48तेखअ ईशू तेसा बेटल़ी लै बोलअ, “तेरै पाप हुऐ माफ।” 49तेखअ ज़ुंण लोग ईशू संघै तिधी रोटी खांदै तै बेठै दै तिंयां लागै आपणैं मनैं सोठदै, “अह कुंण आसा कि पाप बी करा माफ?” 50पर ईशू बोलअ तेसा बेटल़ी लै, “तेरै विश्वासै हेरी तूह बच़ाऊई, सुलै करै डेऊ घरा लै।”

Currently Selected:

लुका 7: OSJNT

ማድመቅ

Copy