लुका 8

ईशूए च़ेल्ली

1ईशू रहअ नगरी और गराऊंऐं शिक्षा दैंदअ और परमेशरे राज़ो खुशीए समादा प्रच़ार करदअ और तेऊए बारा च़ेल्लै बी हआ तै संघा। 2कई बेटल़ी त भूत शाचअ द और बमारी दी पल़ी दी। ईशू की तिंयां सोभ ठीक तिन्नां मांझ़ै ती मगदल़ गराऊंए मरिअम बी और तेसा दी त सतरूपी भूत। 3हेरोदेस राज़े खुजा नांओंए भढारीए लाल़ी योआना और सूसना बी आसा ती तिधी और होर बी आसा ती कई बेटल़ी तिधी। ईंयां सोभ करा ती आपणीं-आपणीं ज़ैदात करै ईशू और तेऊए च़ेल्ले सेऊआ।

बेज़ै बऊंणैं आल़े कथ्या

(मत्ती 13:1-9; मरकुस 4:1-9)

4ज़ांऊं बडै भारी लोग कठा हुऐ और नगरी-नगरीए लोग ईशू सेटा लै एछा तै, ईशू बोली तिन्नां लै कथ्या खोज़ी एही गल्ला, 5“एकी बारी निखल़अ एक बेज़ै बऊंणैं आल़अ बेज़ै बऊंदअ। बेज़ै बऊंदी बारी पल़अ धख बेज़अ बाते बाढै और सह जैंटअ कई और सरगै डैऊंदै च़ेल्लू पखीरू लै हुअ तेतो च़ुनण। 6धख बेज़अ पल़अ पात्थरा जैंदरी, सह टिप्पअ ता टिप्पअ पर ज़लैल़ै दी बाच नांईं हणें बज़्हा का शुक्कअ। 7धख बेज़अ पल़अ झ़ाकल़ै और सह बझ़अ ता बझ़अ पर दाभूअ कांडै जैंदरी। 8धख बेज़अ पल़अ रज़दी-पज़दी ज़िम्मीं दी और सह बेज़अ टिप्पअ और तेथ लागी बधिया फसल।” तेखअ बोलअ ईशू तिन्नां लै, “ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।”

कथ्या खोज़णेंओ मकसद

(मत्ती 13:10-17; मरकुस 4:10-12)

9च़ेल्लै पुछ़अ ईशू सेटा एछी करै, “अह कथ्या किज़ै आसा?” ईशू बोलअ तिन्नां लै, 10“तम्हैं सका परमेशरे राज़ो भेद समझ़ी। पर होरी का लागा कथ्या खोज़ी एते तैणीं समझ़ाऊंणअ, (मत्ती 4:11; याशायाह 6:9-10)

‘तिंयां निं मेरै मुंह भाल़ी करै शिखल़दै,

नां तिंयां मेरी गल्ला शूणीं करै समझ़दै।’

बेज़ै बऊंणैं आल़े कथ्या समझ़ाऊंणी

(मत्ती 13:18-23; मरकुस 4:13-20)

11 “बेज़ै बऊंणैं आल़अ ज़िम्मींदार आसा परमेशरे बैण खोज़णैं आल़ै ज़िहअ। 12कई लोग आसा इहै बेज़ै ज़िहै ज़ुंण बाते बाढै पल़अ, ज़ेतरअ छ़ेकै तिंयां बैण शूणां राख्स एछा तेभी और तेऊए दिला का करा बैण दूर ज़िहअ च़ेल्लू निंयां बेज़ै च़ुंघी कि इहअ निं हआ कि अह विश्वास करी करै तिन्नां उद्धार भेटे। 13तिहअ ई शकरीली ज़िम्मीं दी पल़अ द बेज़अ आसा तिन्नां लोगे बारै ज़ुंण परमेशरो बैण शूणां और तेभी खुशी-खुशी संघै मना। पर आप्पू पाक्कअ विश्वास नांईं हणें बज़्हा रहा तिंयां थोल़ै ई धैल़ै लै। बैण मनणें बज़्हा ज़ांऊं तिन्नां लै मसीबता एछा ता तिंयां छ़ाडा तेभै परमेशरा दी विश्वास करनअ। 14ज़ुंण बेज़अ झ़ाकल़ै पल़अ सह आसा तिन्नां मणछे बारै ज़ुंण बैण ता शूणां, पर सुलै-सुलै पल़ा तिन्नां फिकर, धन-माया और ज़िऊंणें सुखा दी और तिन्नें फसल बी निं हंदी। 15पर रज़दी-पज़दी ज़िम्मीं दी बेज़अ आसा इहअ ज़ुंण बैण शूणीं करै ठीक और पबित्र मनें सभाल़ी डाहा और सबर करी करै फूला-फल़ा।

लाटूए कथ्या

(मरकुस 4:21-25)

16 “लोग निं लाटू ज़ाल़ी करै च़ठै हेठै या पाटल़ै हेठै दाबी डाहंदै। तेता डाहा उछ़टै दी ताकि सारै घरै प्रैशअ होए। 17किल्हैकि ढोपी डाही दी च़ीज़ शुझणीं सोभी का और गुप्त च़ीज़ हणीं सोभी सम्हनै प्रगट। 18एते तैणीं दै एसा गल्ला दी धैन कि तम्हैं केऊ साबै शूणां? ज़ुंण मेरी शिक्षा शूणां, तिन्नां लै दैणीं होर बी खास्सी समझ़। पर ज़ुंण नांईं शूणां, तिन्नां का निंणअ सह बी पोर्ही ज़ेता तिंयां इहअ सोठा कि तिंयां गऐ समझ़ी।”

ईशूए आम्मां और भाई

(मत्ती 12:46-50; मरकुस 3:31-35)

19ईशूए आम्मां और भाऊ आऐ तेऊ सेटा लै पर लोगे जेल्ह-मरेल्ही जैंदरी निं तिंयां तेऊ का मिली सकै। 20तेखअ बोलअ ईशू का कुंणी इहअ कि तेरी आम्मां और भाई आसा बागै खल़्हुऐ दै और तिंयां च़ाहा ताखा मिलणअ। 21ईशू बोलअ इहअ, “मेरै आम्मां और भाई आसा ईंयां ज़ुंण परमेशरो बैण शूणां और मना।”

ढिश बागर शांत करनअ

(मत्ती 8:23-27; मरकुस 4:35-41)

22तेखअ एकी धैल़ी ईशू और च़ेल्लै किश्ती दी बेठै और ईशू बोलअ तिन्नां लै, “च़ाल्ला हाम्हां डेऊणअ समुंदरा पार। तेखअ तिन्नैं बी किश्ती खोल्ही।” 23पर ज़ांऊं किश्ती पाणीं दी च़लदी लागी, ता ईशू सुत्तअ और समुंदरा दी आअ ढिश बागर और किश्ती लागी पाणीं करै भरदी और तिंयां सोभ च़ाल्लै डुबी।

24तेखअ झ़ैऊअ तिन्नैं ईशू खल़अ और तेऊ लै बोलअ, “हे प्रभू, हे मालक हाम्हैं च़ाल्लै खतम हई। तेखअ ईशू झ़ाहल़ काढी करै नैरी और ढिश बागर रुकी, तेखअ जाई करै हुअ चैन।” 25तेखअ बोलअ ईशू तिन्नां लै, “थारअ विश्वास किधी आसा?” पर तिंयां डरै और तिंयां हुऐ रहैन और आप्पू मांझ़ै लागै गल्ला करदै, “अह कुंण आसा? ज़ुंण ढिश बागर और समुंदरे छ़ाली लै बी दैआ हुकम और तिंयां शूणां एऊए हर गल्ला?”

भूत शाचअ द मणछ ठीक करनअ

(मत्ती 8:28-34; मरकुस 5:1-20)

26तेखअ पुजै तिंयां समुंदरा पार गरासेनी लाक्कै दी ज़ुंण समुंदरा पार गलील सम्हनै आसा। 27ज़ांऊं तिंयां पार बाढै होथै ता तिन्नां भेटअ तेसा नगरीओ एक मणछ, तेऊ दी त भूत शाचअ द और सह निं झिकल़ै बी बान्हदअ त और नां ता सह घरै रहंदअ त, सह रहा त मल्थाना दी।

28तेऊ पाई ईशू भाल़ी लैल़ा और ईशू सेटा बधल़ूई करै ज़ोरै-ज़ोरै बोलअ, “हे परम प्रधान परमेशरे शोहरू ईशू, म्हारअ ताह संघै किज़ै मेल़-ज़ोल़? हुंह करा ताखा अरज़ कि मुल्है निं कष्ट दैई।” 29तेऊ बोलअ इहअ तै कि ईशू दैनअ भूता तेऊ का पोर्ही निखल़णेंओ हुकम। किल्हैकि भूत करा त तेभा-तेभी तेऊ करै उपद्रभ, लोग ता डाहा तै तेऊ शांघल़ी करै बान्हीं पर सह पाआ त तिन्नां बी चोल़ी और भूत दरल़ाऊआ त तेऊ सारै बणैं।

30ईशू पुछ़अ तेऊ का, “ताह नांअ कै आसा?” तेऊ दैनअ ज़बाब, “सैना” किल्हैकि तिंयां तै खास्सै भूत। 31तिन्नैं भूतै की ईशू का अरज़, “हाम्हां निं तेऊ नथहऐ कूंडा दी पाई ज़ेथ परमेशर भूता लै सज़ा दैआ।”

32तिधी त धारठी लागअ द एक सुंगरो बडअ छ़ुंड च़रदअ और तिन्नैं की ईशू का अरज़, “हाम्हां दै एथ पेशणैं और ईशू बी दैनअ तिन्नां तेथ डेऊणैं।” 33तेऊ का निखल़ै भूत पोर्ही और तिंयां पेठै सुंगरे छ़ुंडा दी और सारै सुंगर हुऐ बेगरै और तिंयां पेठै समुंदरे डुघै पाणीं दी और मूंऐं।

34इहअ भाल़ी तिंयां सुंगरा गुआल़ै तिधा का ठुर्है और नगरी गराऊंऐं दैनअ एसा गल्लो समाद। 35लोग आऐ एता भाल़ै ता ईशू सेटा एछी करै ज़हा दी सह भूत निखल़अ त, सह भाल़अ तिन्नैं ईशूए खूरा सेटा राम्बल़अ, झिकल़ै बान्हीं बेठअ द तेऊ भाल़ी करै डरै तिंयां सोभ। 36तिधी ज़ुंणी तिंयां गल्ला आपणीं आछी भाल़ी ती तिन्नैं खोज़अ तिन्नां होरी का तेऊ भूत शाचै दै मणछो पूरअ हाल कि अह मणछ भूता का किहअ करै बच़अ। 37तेखअ गरासेनी लाक्कै आरी-पारीए सोभी लोगै की ईशू का अरज़, “म्हारै एऊ लाक्कै का डेऊ बागै” किल्हैकि तिन्नां पल़अ बडअ भारी फिकर।

ईशू बी किश्ती दी बेठअ और फिरअ बापस। 38ज़हा मणछा का भूत निखल़अ त सह लागअ ईशू का अरज़ करदअ कि मुंबी दै ताह संघै एछणैं पर ईशू किअ तेऊ लै इहअ बोली नांईं कि 39“आपणैं घरा लै डेऊ और सोभी का खोज़ कि परमेशरै ताल्है किहै बडै-बडै च़मत्कारे काम किऐ।” और सह लागअ सारी नगरी प्रच़ारा करदअ कि ईशू भाल़ा मुल्है किहै बडै-बडै काम किऐ।

मूंईं दी शोहरी और एक बमार बेटल़ी

(मत्ती 9:18-26; मरकुस 5:21-43)

40ज़ांऊं ईशू बापस त एछदअ लागअ द ता बडै भारी लोग मिलै तेऊ संघै खुशी-खुशी, किल्हैकि तिंयां तै तेऊ न्हैल़ै भाल़ै लागै दै। 41तिधी आअ याईर नांओं एक मणछ। सह आसा त आराधना कोठीओ मुखिय। सह पल़अ ईशूए च़रणैं। सह लागअ ईशू का अरज़ करदअ “मेरै घरा लै च़ाल्ल।” 42तेऊए ती बारा साले एक्कै शोहरी और सह आसा ती मरदी तैर। ज़ांऊं ईशू हांढदअ लागअ ता पिछ़ू लागै होर बी खास्सै लोग हांढदै। 43बाता हांढदी आई एक बेटल़ी, तेसा ती बारा साला ओर्ही लोहू बगणें बमारी और तेसा हेरी ती आपणीं सारी ज़ैदात लाज़ा पुआई लै बैईदा पिछ़ू खतम करी और सह निं तज़ी बी ठीक हुई ती। 44और तेसा बी पिछ़ू का एछी करै ईशूओ झिकल़ैओ पाल्लअ छ़ुंअ और तेभी हुअ तेसो लोहू बगणअ बंद।

45एता लै बोलअ ईशू, “हुंह कुंणी छ़ुंअ?”

ज़ांऊं सोभी नांईं किअ ता पतरसै और तेऊए होरी साथी बोलअ, “हे मालक, एतरी लोगे जेल्ह-मरेल्ही जैंदरी कसरअ हाथ लागअ होए, कै थोघ?”

46पर ईशू बोलअ तिन्नां लै, “हुंह छ़ुंअ कुंणी इहअ कि मुखा गअ थोघ लागी कि मुखा निखल़ी शगती।” 47ज़ांऊं तेसा समझ़अ कि हुंह निं ऐबै लुक्की सकदी, तेखअ तेसा डरदी-काम्बदी ईशू सेटा माथअ टेकी करै खोज़ी सारी गल्ला शुची-शुची कि मंऐं तूह किल्है छ़ुंअ और किहै करै हुई तेभी राम्बल़ी। 48ईशू बोलअ तेसा लै, “शोहरी, तंऐं किअ विश्वास कि हुंह सका ताह ठीक करी और मंऐं हेरी तूह एसा बमारी का राम्बल़ी करी। सुलै करै डेऊ आपणैं घरा लै ऐबै गई तूह एसा बमारी का छ़ुटी।” 49ईशू त तेसा लै इहअ बोलदअ ई लागअ द कि आराधना कोठीए कारदारे घरा का आअ समाद, “तेरी शोहरी गई मरी ऐबै निं प्रभू लै इधी एछणेंओ कष्ट दैई।” 50ईशू दैनअ एसा गल्ला शूणीं तेऊ लै हैअ, “हैल़अ निं करी, तूह डाह सिधअ विश्वास, तै ज़ाणीं सह बच़ी।” 51घरै पुजी करै ईशू पतरस, युहन्ना, याकूब और तेसा शोहरीए आम्मां-बाप्पू छ़ाडी निं कोहै आप्पू संघै भितरा लै एछणैं दैनअ। 52सोभ तै तेसा लै लेरदै-पकारदै लागै दै, पर ईशू बोलअ तिन्नां लै, “लेरा-पकारा निं लाआ, अह निं मूंईं आथी अह आसा सुत्ती दी।” 53तिंयां लागै एसा गल्ला शूणीं हास्सदै कि अह ता मरी आसा गई दी। 54पर ईशू ढाकअ तेसो हाथ और बोलअ ज़ोरै, “लान्हीऐ खल़ी उझ़ू।” 55तेसा शोहरी फिरअ भी शाह और सह उझ़ुई खल़ी। ईशू बोलअ तिन्नां लै इहअ कि एसा लै दैआ किज़ै खाणां लै। 56तेसे आम्मां-बाप्पू बी हुऐ रहैन। पर ईशू डाहअ तिन्नां लै इहअ बोली कि अह ज़ुंण इधी हुअ, एसा गल्ला निं कोही का खोज़ी।

Currently Selected:

लुका 8: OSJNT

ማድመቅ

Copy