मरकुस 10

तलाक रै बारै मन्ज यीशु री शिक्षा

(मत्ती 19:1-12; लूका 16:18)

1फिरी यीशु कफरनहूम ग्राँ थऊँ यहूदिया परदेस री सीमा मितै भुन्दा यरदन नदी रै पार आ। भीड़ तैस बलै इकट्ठी भूच्ची गई, अतै सो फिरी तियां जो अपणै तरीकै अनुसार उपदेश दिणा लगा।

2ता फरीसीये तैस बलै ईच्ची करी तसेरी परीक्षा लैणा लाई अतै पूछु, “कै मूसा री व्यवस्था मन्ज ऐह लिखुरा कि मर्द अपणी घरावाळी जो तलाक देय्आ?”

3यीशुऐ तियां जो जवाव दिता, “मूसै तुसिओ कै हूक्म दितुरा?”

4तियैं बल्लू, “मूसै ता बलुरा कि तलाक पत्र दिकरी अपणी घरावाळी जो छड़ी सकदै हिन।”#व्य. 24:1-3.

5यीशुऐ तियां सोगी बल्लू, “तून्दै मना री ढ़ीठपन री वजह थऊँ तिनी ऐह हूक्म लिखुरा। 6पर दुनिया री शुरूआत भूणै थऊँ ही प्रमात्मैं मर्द अतै जनानी ही बणाये।#उत्प. 1:27; 5:2. 7ऐह वजह हा कि मर्द अपणै माता-पिता थऊँ अलग भूच्ची करी अपणी घरावाळी सोगी रैहन्दा, 8तियां अक्क तन भूणा; ठेरैतांये सो अबै दोई ना पर अक्क ही हिन।#उत्प. 2:24. 9ठेरैतांये जियां जो प्रमात्मैं जोडुरा तियां जो कोई भी मणु अलग ना करन।”

10जैहणै सो फिरी वापस घरै आये ता चेलै ठेरै बारै मन्ज फिरी तैस थऊँ पूछु। 11तिनी बल्लू, “जैडा कोई अपणी घरावाळी जो तलाक दी करी दूई सितै बैह करा ता सो तैहा पैहली रै वरोधा मन्ज व्यभिचार करदा। 12अगर घरावाळी अपणै घरावाळै जो छड़ी करी दूये सोगी बैह करा ता सो भी व्यभिचार करदी हा।”

बच्चै जो अशीर्वाद

(मत्ती 19:13-15; लूका 18:15-17)

13फिरी मणु बच्चै जो यीशु बलै लैईणा लगै ताकि सो तियां पुर हत्थ रखी करी अशीर्वाद देय्आ, पर चेलै सो झिड़कै। 14यीशुऐ ऐह हेरी करी तियां जो झिड़की करी बल्लू, “बच्चै जो मिन्जो बलै ईणा देय्आ ईयां जो मना मत करा, क्ओकि प्रमात्मैं रा राज्य ईनै जिन्‍नै रा ही हा। 15अऊँ तूसु सोगी सच बलदा कि जैडा कोई प्रमात्मैं रै राज्य जो अक्क बच्चै सांईयै ग्रहण करला सो ही तैस राज्य मन्ज प्रवेश करी सकदा।”

16यीशुऐ तियां जो गोदी मन्ज लैऊ, अतै तियां पुर हत्थ रखी करी तियां जो अशीर्वाद दिता।

अमीर मणु अतै सदा काल री जिन्दगी

(मत्ती 19:16-30; लूका 18:18-30)

17जैहणै यीशु तैड़ी थऊँ अक्की बत्ता मन्ज चलूरा थू, ता अक्क मणु तैस बलै दौड़ी के आ अतै घुटनै टेकीकरी तैस थऊँ पूछु, “हे उत्तम गुरू, अनन्त जिन्दगी पाणै तांयें अऊँ कै करू?”

18यीशुऐ तैस सोगी बल्लू, “तू मिन्जो उत्तम कजो बल्लू करदा? प्रमात्मैं रै सिवाये कोई भी उत्तम निय्आ। 19तू शिक्षा जो ता जाणदा ‘कोई जानी थऊँ ना मारना, व्यभिचार ना करना, चोरी ना करनी, झूठी गवाही ना दिणा, छल ना करना, अपणै माता पिता रा आदर मान करना।’”#निर्ग. 20:12-16; रोम. 13:9.

20तिनी मणुऐ यीशु सोगी बल्लू, “हे गुरू, इन्या सबी गल्ला ता अऊँ बचपना थऊँ ही मन्दा आ।”

21यीशुऐ तैसिओ प्यारा सोगी हेरू, अतै तैस सोगी बल्लू, “तिजो मन्ज अक्की गल्ला री कमी हा। जैडा कुछ तेरा हा तैतिओ बेचीकरी कंगाला जो दि दे, अतै मेरा चेला बणी गा ता तिजो स्वर्ग मन्ज धन मुलणा हा।”

22ऐसा गल्ला थऊँ तसेरा चेहरा उदास भूच्ची गो, अतै सो दुखी भूच्ची करी चली गो, क्ओकि सो बडा अमीर मणु थू।

23यीशुऐ चंऊ कनारी हेरी करी अपणै चेलै सितै बल्लू, “धनवाना रा प्रमात्मैं रै राज्य मन्ज प्रवेश करना कैतना मुसकल हा!”

24चेलै तसेरी गल्ला थऊँ हैरान भुएै। ता यीशुऐ चेलै सोगी फिरी बल्लू, “मेरै बच्चेओ, जैडा धन पुर भरोसा रखदा तियां तांयें प्रमात्मैं रै राज्य मन्ज प्रवेश करना कैतना मुसकल हा। 25प्रमात्मैं रै राज्य मन्ज अमीर मणु रा प्रवेश करनै थऊँ ज्यादा आसान हा अक्की ऊँटा रा सुई रै भोका मितै नकैई गाणा!”

26सो हैरान भूच्ची करी अप्पू मन्ज बलणा लगै, “अगर अमीर मणु ना ता फिरी कसेरा उद्धार भूच्ची सकदा हा?”

27यीशुऐ तंयारी कनारी हेरी करी बल्लू, “मणु थऊँ ता ऐह ना भूच्ची सकदा पर प्रमात्मैं थऊँ भूच्ची सकदा हा; क्ओकि प्रमात्मां सब कुछ करी सकदा हा।”#अय्यू. 42:2; लूका 1:37.

28पतरस यीशु सोगी बलणा लगा, “हेर, अहै ता सब कुछ छड़ी करी तिजो पिचो चली पैऊरै हिन।”

29यीशुऐ बल्लू, “अऊँ तूसु सोगी सच बलदा तूसु मन्ज जिनी मेरा चेला बणनै अतै मेरा सुसमाचार हुनाणै तांयें अपणै घर, भाई-बैहणी, माता-पिता, बाल-बच्चै या जमीना जो छड़ी दिता भोआ, 30ता तैस ऐसा ही जिन्दगी मन्ज सौ गुणा पाणा मतलब घर, भाई-बैहणी, माता, बाल-बच्चै या जमीन, अतै या ऐस धरती पुर सताव भी सहुरा भोला ता तैस परलोक मन्ज अनन्त जिन्दगी रै मालक भूणा। 31पर मतै सारै हिन जैड़ै अगो हिन सो पिचो करनै; अतै जैड़ै पिचो हिन सो अगो करनै।”

अपणी मौती रै बारै मन्ज यीशु री त्रीं भविष्‍यवाणी

(मत्ती 20:17-19; लूका 18:31-34)

32यीशु अतै चेलै यरूशलेम चलुरै थियै। सो हालि तिकर बत्ता मन्ज ही थियै, यीशु अगो अगो चलूरा थू; चेलै हैरान थियै अतै मणु री भीड़ भी तैस पिचो चलुरी थी सो डरूरै थियै। ता फिरी सो तियां बारह चेलै सितै सो गल्ला दसणा लगा, जैड़ी तैस पुर बितणै बाळी थी।

33“हेरा, अहै यरूशलेम जो चलुरै हिन, अतै मणु रा पुत्र प्रधान याजका अतै शास्त्री रै हत्थै पकड़ाई दिणा। तियां मिन्जो मारनै तांयें चुनणा, अतै गैर यहूदी रै हत्था मन्ज मारनै तांयें सौंपी दिणा। 34तियां मेरा मजाक उड़ाणा, मिन्जो पुर थुकणा, मिन्जो कोड़ै मारनै हिन अतै मिन्जो मारी दिणा, पर त्राई दिन बाद मुँ फिरी जी उठणा।”

याकूब अतै यूहन्‍ना री बिनती

(मत्ती 20:20-28)

35ता जबदी रै पुत्र याकूब अतै यूहन्‍नै यीशु बलै ईच्ची करी बल्लू, “हे गुरू, अहै चाहन्दै हिन कि जैडा कुछ अहै तूसु थऊँ मँगन सो तुहै असु तांयें करन।”

36यीशुऐ तियां सितै बल्लू, “तुहै कै चाहन्दै हिन अऊँ तूसु तांयें करू?” 37तियैं तैस सोगी बल्लू, “अहै ऐह चाहन्दै हिन कि अहै तून्दै महिमामय राज्य मन्ज अक्क तून्दै सज्जै कनारी अतै अक्क खब्बै कनारी बैहा।”

38यीशुऐ तियां सोगी बल्लू, “तुसिओ ना पता कि तुहै कै मँगू करदै हिन? जैडा दुख अऊँ सैहणै जो तैयार हा, कै तुहै भी सही सकदै हिन? अतै जियां मिन्जो मारया गाणा तुहै भी मरनै जो तैयार हिन?”

39चेलै तैस सोगी बल्लू, “हाँ अहै करी सकदै हिन।”

यीशुऐ तियां सोगी बल्लू, “जैडा दुख अऊँ सैहणै जो तैयार हा, तूसु भी सैहणी हा, अतै जियां मिन्जो मारया गाणा तियां ही तुसिओ भी मारया गाणा। 40पर प्रमात्मैं जैस तांयें सो जगह तैयार करूरी हा, तियां जो छड़ी करी होरी कसी जो अपणै अतै सज्जै अतै खब्बै कनारी बहालना मेरा कम निय्आ।”

41ऐह हुणी करी बाकी दस चेलै याकूब अतै यूहन्‍नै पुर गुस्सा करना लगै। 42ता यीशुऐ तियां जो नेड़ै हैदी करी तियां सितै बल्लू, “तुहै जाणदै हिन कि जैड़ै गैर यहूदी रै हाकिम समझै गान्दै, सो तियां पुर राज्य करदै, अतै तियां मन्ज जैड़ै बड़ै हिन, तियां पुर हक्क जतादैं हिन। 43पर तूसु मन्ज ऐसा निय्आ, जैडा कोई तूसु मन्ज बडा भूणा चाहन्दा सो तून्दा सेवक बणा; 44जैडा तूसु मन्ज प्रधान बनणा चाहन्दा सो सबी रा दास बणा। 45क्ओकि मणु रा पुत्र ठेरैतांये आ कि अऊँ होरी री सेवा करूं, पर ठेरैतांये ना छूरा अऊँ अपणी सेवा करवाऊँ, अतै मतै रै छुटकारै तांयें अपणै प्राण दिच्छु।”

अंधे बरतिमाई जो दृष्‍टिदान

(मत्ती 20:29-34; लूका 18:35-43)

46फिरी सो यरीहो नगर मन्ज आये अतै जैहणै तसेरै चेलै अतै अक्क बड़ी भारी भीड़ तसेरी पिचो चलुरी थी, ता तैस शहरा थऊँ बाहर चलदै-चलै तियां जो बरतिमाई नां रा अक्क अंधा भिखारी (तिमाई रा पुत्र) सड़का रै कनारै बैहुरा थू। 47सो ऐह हुणी करी कि यीशु नासरी चलूरा हा, जोरा जोरा सितै बलणा लगा, “हे दाऊद रै पुत्र, यीशु मिन्जो पुर दया कर।”

48मणुऐ तैसिओ झिड़कू की चुप रैह, पर सो होर जोरै बलणा लगा, “हे दाऊद रै पुत्रा, मिन्जो पुर दया कर।” 49ता यीशुऐ खड़ी करी बल्लू, “ऐसिओ हैदा।” अतै मणुऐ तैस अन्धै जो हैदी करी तैस सोगी बल्लू, “हिम्मत रख! उठ! यीशु तिजो हैदु करदा हा।” 50सो अपणी चादर फैंकी करी झट ऊठु, अतै यीशु बलै आ।

51यीशुऐ तैस सोगी बल्लू, “तू कै चाहन्दा कि अऊँ तिजो तांयें करू?” अन्धै तैस सोगी बल्लू, “हे गुरू, ऐह कि अऊँ हेरना लगी पैंऊ।”

52यीशुऐ तैस सोगी बल्लू, “मिन्जो पुर विस्वास करनै थऊँ तू ठीक भूच्ची गो हा, अबै तू गिच्ची सकदा!” सो तैहणै ही हेरना लगी पैऊ, अतै तैहा भिड़ा मन्ज तैस पिचो चली पैऊ।

Currently Selected:

मरकुस 10: GBKNT

ማድመቅ

Copy