मरकुस 9

1यीशुऐ तियां सितै बल्लू, “अऊँ तूसु सोगी सच बलदा कि जैड़ै ऐठी खडुरै हिन, तियां मन्ज कैई ऐसै हिन, जैहणै तक सो प्रमात्मैं रै राज्य जो सामर्थ सोगी इन्दा ना हेरी लैन तैहणै तक तियां ना मरना।”

यीशु रा रूपान्तर

(मत्ती 17:1-13; लूका 9:28-36)

2छिया दिन बाद यीशुऐ पतरस, याकूब, अतै यूहन्‍ना जो सोगी लैऊ अतै अक्क सुनसान उच्चै जिन्‍नै पहाडा जो लेई गो। तैड़ी तंयारै सामणै तसेरा रूप बदली गो, 3तसेरै कपड़ै ऐसै चमकणा लगै अतै ऐसै चमकीलै भूच्ची गै कि धरती पुर कोई धोबी तिनां ना चमकाई सकदा थू। 4अतै तियां जो भविष्‍यवक्ता मूसा अतै एलिय्याह भी हुजै सो यीशु सोगी गल्ला करू करदै थियै।

5ऐह हेरी करी पतरसै यीशु सोगी बल्लू, “हे रब्बी, (मतलब हे गुरू) इन्दा ऐड़ी रैहणा ही खरा, ठेरैतांये असु त्राई झोपड़ी बनाणी, अक्क तिजो तांयें, अक्क मूसै तांयें, अतै अक्क एलिय्याह तांयें।” 6(पर पतरस ना जाणदा थू कि कै बल्ला, ठेरैतांये सो बड़ै डरी गै थियै।)

7तैहणै तियां जो अक्की बदळै घेरी लैऊ, अतै तैस बदळा थऊँ ऐह आकाशवाणी भूई, “ऐह मेरा प्यारा पुत्र हा, सेरी हुणा।”#भज. 2:7; 2 पत. 1:17. 8ता तियैं चेलै अकदम अपणी चऊँ कनारी हेरू, तियां जो यीशु ही हुजु बाकी कोई होर ना थू।

9पहाडा थऊँ ओसदै टैमैं तिनी चेलै जो हूक्म दिता कि मणु रा पुत्र जैहणै तक मरी करी दोबारा ना जी भोआ, तैहणै तक जैडा कुछ तुहै हेरूआ सो कसिओ मत दसदै। 10तियैं जैड़ा हेरू सो कसी जो ना दस्सु अतै अप्पू मन्ज वाद-विवाद करना लगै, “मरूरै थऊँ जी भूणै रा मतलब कै भोला?”

11ता तियैं यीशु थऊँ पूछु, “शास्त्री कजो बलदै कि भविष्‍यवक्ता एलिय्याह रा मसीह थऊँ पैहलै ईणा जरूरी हा?” 12यीशुऐ जवाव दिता, “एलिय्याह सच मन्ज पैहलै ईच्ची करी सब कुछ सुधारना पर मणु रै पुत्रा रै बारै मन्ज ऐह कजो लिखुरा कि तैस बडा दुख भोगणा, अतै तुच्छ समझया गाणा? 13पर अऊँ तूसु सोगी बलदा कि ऐह सो ही एलिय्याह ता ईच्ची बैहुरा, अतै जैडा तसेरै बारै मन्ज पवित्र शास्‍त्रा मन्ज लिखुरा, मणु तैस सोगी बड़ा बुरा व्यवहार करू, जियां सो करना चाहन्दै थियै।”

दुष्‍टात्माग्रस्त दब्बू जो ठीक करना

(मत्ती 17:17-21; लूका 9:37-43)

14जैहणै यीशु तियां त्रीं चेलै सोगी बाकी चेलै बलै फिरी आ ता हेरू कि तंयारै चऊँ कनारै मणु री बड़ी भीड़ लगुरी हा अतै कुछ शास्त्री तियां सोगी बैंहसणा लगुरै हिन। 15तैसिओ हेरी करी सब हैरान भुएै, अतै तसेरी कनारी दौड़ी आये अतै तैसिओ नमस्ते करै।

16तिनी तियां थऊँ पूछु, “तुहै इन्या सोगी कै बैंहसणा लगुरै?”

17भिड़ा थऊँ अक्कीयै जवाव दिता, “हे गुरू, अऊँ अपणै पुत्रा जो तूसु बलै अन्दा हा कि तुहै ऐसिओ ठीक करन क्ओकि ऐस मन्ज दुष्‍टात्मा हा जैहै ऐसिओ गूंगा बणाई दितुरा। 18दुष्‍टात्मा मेरै पुत्रा जो मरोड़दी रैहन्‍दी हा ऐह तैठी ही पैई गान्दा, सेरै मुँहा मन्ज झाग चली इन्दा अतै दन्दा पिन्दा, अतै कमजोर भूच्ची गच्छुरा। मैंई तून्दै चेलै जो बल्लू कि सो ऐसिओ ठीक करी दीन पर सो ना करी सकै।”

19ऐह हुणी करी तिनी तियां जो जवाव दिता, “ऐस युगा रै अविस्वासी मणुओ, मुँ कहणै तिकर तूसु सोगी रैहणा? अतै कहणै तक मुँ तुसिओ सैहणा? तैस दब्बू जो मिन्जो बलै लेई अईआ।”

20ता सो दब्बू जो यीशु बल्लै लेई आये, जैहणै यीशुऐ तैसिओ हेरू, ता दुष्‍टात्मा तैहणै ही सो मरोडु अतै सो जमीना पुर पैऊ, तसेरै मुँहा थऊँ झाग चली पैऊ, अतै सो धरती मन्ज बेलिणा लगु।

21यीशुऐ तसेरै पिता थऊँ पूछु, “ईना जिन्‍ना हाल सेरा कैहणै थऊँ हा?” तिनी बल्लू, “बचपना थऊँ ही। 22दुष्‍टात्मैं ऐसिओ मारनै तांयें कदी पाणी मन्ज फैन्कू ता कदी अगी मन्ज, पर जे अगर तुहै कुछ करी सकदै हिन ता, असु पुर तरस खा अतै ऐसिओ ठीक करी दे। अगर तू करी सकदा ता!”

23यीशुऐ तैसिओ बल्लू, “हाँ अऊँ करी सकदा! विस्वास करनै बाळै तांयें सब कुछ भूच्ची सकदा।” 24तैस दब्बू रा पिता झट गिड़गिड़ाई करी बल्लू, “हे प्रभु, अऊँ विस्वास करदा तुहै मेरै अविस्वास जो दूर करा।”

25जैहणै यीशुऐ हेरू कि मणु ईच्ची करी भीड़ लाणा लगै, ता तिनी दुष्‍टात्मा जो झिड़की करी बल्लू, “हे गूंगी अतै बैहरी आत्मा, अऊँ तिजो हूक्म दिन्दा ऐस थऊँ नकैई गा, अतै फिरी ऐस मन्ज मत गान्दी।”

26ता सो दुष्‍टात्मा लेरा पान्दी अतै तैसिओ परछाडी करी नकैई गई, सो दब्बू अधमरै सैईयें पैई गो, मणु बलणा लगै कि ऐह मरी गो हा। 27पर यीशुऐ तसेरा हत्थ पकड़ी करी तैसिओ चुकु, सो ठीक भूच्ची गो अतै सो खड़ी गो।

28जैहणै यीशु घरै आ, ता तसेरै चेलै सो अकेला पूछु, “अहै तैहा दुष्‍टात्मा जो कजो ना कड़ी सकै?”

29यीशुऐ तियां सितै बल्लू, “होर जैतना मर्जी जोर लाई लेय्आ पर ऐह दुष्‍टात्मा री जाति सिर्फ प्रार्थना #9:29 प्रार्थना कुछ हस्तलेख मन्ज ऐह लिखुरा कि ऐह जाति प्रार्थना अतै व्रत रखणै थऊँ ही निकळदी हा। सितै ही नकैन्दी हा।”

अपणी मौती रै बारै मन्ज यीशु री दूई बरी भविष्‍यवाणी

(मत्ती 17:22-23; लूका 9:43-45)

30फिरी यीशु अतै तसेरै चेलै तैड़ी थऊँ चली गै अतै सो गलील परदेस मितै भूच्ची करी चलुरै थियै। सो चाहन्दा थू कि कसिओ पता ना लगा। 31क्ओकि सो अपणै चेलै जो उपदेश दिन्दा अतै बलदा थू कि, “मणु रा पुत्र, दुश्‍मणा रै हत्थै पकड़ाया गाणा, मारया गाणा; अतै मरनै थऊँ बाद त्रियै दिन दोबारा जी भूणा।” 32पर ऐह गल्ल तंयारी समझा मन्ज ना आई, अतै सो तैस थऊँ पुछणै थऊँ भी डरदै थियै।

सबी थऊँ बडा कुण?

(मत्ती 18:1-5; लूका 9:46-48)

33फिरी यीशु अतै चेलै कफरनहूम ग्राँ मन्ज आये; अतै घरै मन्ज ईच्ची करी यीशुऐ तियां थऊँ पूछु, “बत्ता मन्ज तुहै कस सोगी बैंहसणा लगुरै थियै?” 34सो चुप रैह, क्ओकि बत्ता मन्ज सो अप्पू मन्ज ही बैंहसणा लगुरै थियै कि असु मन्ज बडा कुण हा।

35ता यीशुऐ बैही करी बारह चेलै जो हैदी करी बल्लू, “अगर कोई बडा भूणा चाहन्दा, ता सो सबी थऊँ हल्का बणा अतै सबी रा सेवक बणा।”

36अतै तिनी अक्की बच्चा हैदी करी तंयारै मन्जै खड़ेरू, अतै तैस बच्चै जो अपणी गोदा मन्ज लेई करी बल्लू, 37“जैडा कोई मेरै नां सितै ऐसै बच्चै जो ग्रहण करदा, सो मिन्जो प्रेम करदा; अतै जैडा कोई मिन्जो ग्रहण करदा सो मिन्जो ना पर मेरै भैजणै बाळै प्रमात्मैं जो ग्रहण करदा।”

जैडा विरोधी निय्आ सो इन्दै कनारी हा

(लूका 9:49-50)

38ता यूहन्‍नै यीशु सोगी बल्लू, “हे गुरू, अहै अक्की मणु जो तेरा नां लेई करी दुष्‍टात्मा जो कड़दै हेरूआ अतै अहै तैसिओ ऐसा करनै थऊँ मना करू, क्ओकि सो असु सोगी ना चलदा।”

39यीशुऐ बल्लू, “तैसिओ ना मत करा; क्ओकि ऐसा कोई जैडा मेरै नां लेई करी सामर्थ रै कम करा सो मेरै बारै मन्ज बुरा ना बल्ली सकदा, 40क्ओकि जैडा कोई इन्दी कनारी हा सो इन्दै वरोधा मन्ज निय्आ। 41जैड़ा कोई तुसिओ अक्क गलास पाणी सिर्फ ऐह समझी के पयांदा कि तुहै मसीह रै बन्दै हिन ता अऊँ तूसु सोगी सच बलदा कि तियां जो तंयारा इनाम जरूर मुळना हा।”

ठोकरा रा कारण बनणा

(मत्ती 18:6-9; लूका 17:1-2)

42“जैडा कोई ईयां हल्कै मन्ज हल्का बच्चै सांईयै मिन्जो पुर विस्वास करदा अगर तसेरी वजह थऊँ अक्की जो भी पाप री कनारी लेई गान्दा ता तैस तांयें ऐह ठीक हा कि तसेरै गल्ळै मन्ज चक्की रा पाट लटकाई करी समुन्द्रा मन्ज फैंकी दिच्छी। 43अतै अगर तेरा हत्थ तिजो थऊँ पाप करांदा ता तैसिओ अप्पू थऊँ बडी फैंक, क्ओकि अक्की हत्था सोगी स्वर्गा जो गाणा तिजो तांयें खरा, कि बजाय तेरा शरीर नरका मन्ज पाया गच्छा। जैड़ी अग कदी भी ना हिहदी। 44[जैड़ी तंयारा कीड़ा भी ना मरदा अतै अग भी ना हिहदी।]#9:44 कुछ हस्तलेख मन्ज 44 आयत ना लिखुरी हा। 45अगर तेरा पैर तिजो ठोकर खुआन्दा ता तैसिओ कटि दे। लट्टै भूच्ची करी जिन्दगी मन्ज प्रवेश करना तिजो तांयें ऐत थऊँ खरा बजाय ठेरै कि तू दूँ पैरा रै भुन्दै नरका री अगी मन्ज गच्छा 46[जैड़ी तंयारा कीड़ा भी ना मरदा अतै अग भी ना हिहदी।]#9:46 कुछ हस्तलेख मन्ज 46 आयत ना लिखुरी हा। 47अगर तेरी हाख्री तिजो थऊँ पाप करा, ता तैहा जो नकाळी फैंक; क्ओकि तिजो तांयें प्रमात्मैं रै राज्य मन्ज प्रवेश करना खरा हा। तेरै अंगा थऊँ अक्क अंग भलै ही नाश भूच्ची गच्छा, पर तेरा पुरा शरीर नरका मन्ज ना पाया गच्छा। 48जैड़ी तंयारा कीड़ा भी ना मरदा अतै अग भी ना हिहदी।#यशा. 66:24. 49क्ओकि हर कोई मणु अगी मन्ज शुद्ध करया गाणा जियां हरेक बलिदान जो लूण पाई करी शुद्ध करया गान्दा।”

50“लूण खरा, पर जे अगर लूणा मन्ज स्वाद ना भोआ ता सो कत सोगी लूणका करना? अपणै आपा मन्ज लूणा सांईयै गुण रखा अतै आपस मन्ज मेल मिलाप सोगी रेय्आ।”

Currently Selected:

मरकुस 9: GBKNT

ማድመቅ

Copy