मत्ती 26

यीशु रै विरोधा मन्ज षड्यन्त्र

(मरकुस 14:1,2; लूका 22:1,2; यूहन्‍ना 11:45-53)

1जैहणै यीशु ऐह गल्ला करी बैहु ता अपणै चेलै सोगी बलणा लगा, 2“तुहै जाणदै हिन कि दूँ दिन बाद फसह रा त्यौहार#26:2 फसह रा त्यौहार फसह का त्यौहार प्रमात्मैं री तरफा थऊँ तैस त्यौहारा जो मनणै री ठहराऊरा नियम थू जैतिओ इस्त्राएली मणु अदभुत रीति थऊँ मिस्त्र थऊँ बची करी निकळनै तांई मंनादै थियै। हा, अतै मणु रा पुत्र क्रूस पुर चढ़ाणै तांयें पकड़ाया गाणा।”

3ता प्रधान याजक अतै प्रजा रै स्याणै काइफा नां रै महायाजक रै अँगणा मन्ज इकट्ठै भुएै, 4अतै अप्पू मन्ज ऐह विचार करना लगै कि यीशु जो छल सोगी पकड़ी करी मारी दीन। 5पर सो बलदै थियै, “त्यौहारा रै टैमैं ना, करखी ऐसा ना भोआ कि मणु अकजूट भूच्ची गान।”

बैतनिय्याह मन्ज यीशु रा अभ्यंजन

(मरकुस 14:3-9; यूहन्‍ना 12:1-8)

6जैहणै यीशु बैतनिय्याह मन्ज शमौन कोढ़ी रै घरा मन्ज थू, 7ता अक्क जनानी संगमरमर रै अक्की भाण्ड़ै मन्ज इत्र लेई करी आई, अतै जैहणै सो खाणा बैहुरा थू तसेरा मुण्डा पुर तसेरै आदर तांऐ ड़ोळी दिता।

8ऐह हेरी करी तसेरै चेलै सरकी करी बलणा लगै, “ऐस इत्र रा कजो सत्यनाश करी दिता? 9ऐतिओ ता खरै दाम मन्ज बेचीकरी कंगाला जो दी दिन्दै।”

10ऐह हुणी करी यीशुऐ तिन्या जो बल्लू, “ऐसा जनानी जो कजो सरकु करदै हिन? ऐहै मिन्जो सोगी भलाई करी हा। 11कंगाल ता तूसु सोगी सदा रैहन्दै हिन, पर मुँ तूसु सोगी सदा ना रैहणा। 12ऐहै मेरै शरीरा पुर जैडा इत्र डोळू हा, सो मेरै दबाये गाणै तांयें करू हा। 13अऊँ तूसु सोगी सच बलदा, कि पूरै संसारा मन्ज जैड़ी भी ऐह सुसमाचार प्रचार करलै, तैड़ी सारै ऐस कम्मा री चर्चा भी सारी यादा तांयें करी गाणीआ।”

यहूदा इस्करियोती रा विस्वासघात

(मरकुस 14:10,11; लूका 22:3-6)

14ता यहूदा इस्करियोती, जैडा बारह चेलै मन्ज अक्क थू, तिनी प्रधान याजका बलै गिच्ची करी बल्लू, 15“अगर अऊँ यीशुओ तून्दै हत्थै पकड़ाई दिच्छु ता तुहै मिन्जो कै दिल्लै?” तिन्यै तैसिओ तीह चाँदी रै सिक्कै तोलीकरी दी दितै। 16अतै सो तैहणा थऊँ ही तैसिओ पकड़ाणै रा मौका तोपणा लगा।

चेलै सोगी फसह रा आखरी भोज

(मरकुस 14:12-21; लूका 22:7-13,21-23; यूहन्‍ना 13:21-30)

17अखमीरी रोटी रै त्यौहारा थऊँ पैहलै दिन, चेलै यीशु बलै ईच्ची करी पुछणा लगै, “तुहै कड़ी चाहन्दै कि तूसु तांयें फसह खाणै री तैयारी करन?”

18तिनी बल्लू, “नगरा मन्ज फलाणै मणु बलै गिच्ची करी बला, ‘गुरू बलदा कि मेरा टैमं नेड़ै हा। मुँ अपणै चेलै सोगी त्यौहार ऐड़ी मनाणा।’ ” 19ता चेलै यीशु रा हूक्म मनी करी फसह तैयार करू।

20जैहणै सँझ भूई ता सो बारह प्रेरिता सोगी खाणा बैईठा। 21जैहणै सो खाणा लगै ता यीशुऐ बल्लू, “अऊँ तूसु सोगी सच बलदा कि तूसु मन्ज अक्की मिन्जो पकड़ाणा।”

22ऐह हुणी करी सो बडै़ उदास भूच्ची गै, अतै हरेक तैस थऊँ पुछणा लगा, “हे गुरू, कै सो अऊँ हा?”

23तिनी जवाव दिता, “जैड़ा मिन्जो सोगी बैही करी मेरै ही कटोरै मन्ज रोटी डुबाई करी खाऊ करदा हा, तैस ही अऊँ पकड़ाणा। 24मणु रा पुत्र ता जियां तसेरै बारै मन्ज लिखुरा तैस तियां ही गाणा। पर हाय तैस मणु पुर जसेरी वजह थऊँ मणु रा पुत्र पकड़ाया गान्दा, अगर तैस मणु रा जन्म ही ना भच्छुरा भुन्दा ता तैस तांयें खरा थू।”

25ता तैसिओ पकड़ावाळै यहूदै बल्लू, “हे रब्बी, (गुरू) कै सो अऊँ हा?” तिनी तैस सोगी बल्लू, “हाँ तू मनु करदा।”

प्रभु भोज

(मरकुस 14:22-26; लूका 22:14-20; 1 कुरिन्थियों 11:23-25)

26जैहणै सो खाऊ ही करदै थियै ता यीशुऐ रोटी लेई, अतै आशीष मगींकरी त्रोड़ी, अतै चेलै जो हेरी करी बल्लू, “लेय्आ, खा; ऐह मेरा शरीर हा।”

27फिरी तिनी कटोरा लेई करी धन्यवाद करू, अतै तियां जो दी करी बल्लू, “तुहै सब ऐत थऊँ पिय्आ, 28क्ओकि ऐह नोए वायदै रा सो खून हा, जैडा मतै तांयें पापा री माफी तांयें बहाया गाणा हा। 29अऊँ तूसु सोगी बलदा कि दाखरस तैस दिन तक कदी भी ना पीणा, जैहणै तक तूसु सोगी अपणै पिता रै राज्य मन्ज नौआ ना पीऊँ।”

30फिरी सो भजन गाईकरी जैतून रै पहाड़ा पुर गै।

पतरसा रै मुकरनै री भविष्‍यवाणी

(मरकुस 14:27-31; लूका 22:31-34; यूहन्‍ना 13:36-38)

31ता यीशुऐ तैस सोगी बल्लू, “तूसु अज राती ही मेरै बारै मन्ज ठोकर खाणी हा, क्ओकि लिखुरा ‘मुँ पाहला जो मारना, अतै भैड़ा तितर-बितर भूच्ची गाणा।’ 32पर मुँ अपणै जी भूणै थऊँ बाद तूसु थऊँ पैहलै गलील जो गाणा।”

33ऐह हुणी करी पतरसै बल्लू, “अगर सब तेरा इन्कार करन ता करन, पर मुँ कदी भी तेरा इन्कार ना करना।”

34यीशुऐ तैस सोगी बल्लू, “अऊँ तिजो सोगी सच बलदा कि अज राती ही कुक्कड़ा री बाँग दिणै थऊँ पैहलै तुद त्राई बरी मेरा इन्कार करना।”

35पतरसै तैस सोगी बल्लू, “अगर मिन्जो तिजो सोगी मरना भी पैऊ, तांभी मुँ तेरा इन्कार कदी ना करना।” अतै ईयां ही सब चेलै भी बलणा लगै।

गतसमनी बगीचे मन्ज प्रार्थना

(मरकुस 14:32-42; लूका 22:39-46)

36ता यीशु अपणै चेलै सोगी गतसमनी नां री अक्की जगह मन्ज आ अतै अपणै चेलै सोगी बलणा लगा, “ऐठीये बैही रेय्आ, जैहणै तक अऊँ ओठी गिच्ची करी प्रार्थना करदा।” 37सो पतरस अतै जबदी रै पुत्रा जो सोगी लेई गो, अतै उदास अतै व्याकुल भूणा लगु। 38ता तिनी तियां सोगी बल्लू, “मेरा मन बड़ा उदास हा, ऐतना कि मेरै प्राण निकलणा लगुरै। तुहै ऐड़ी ही रूका अतै जागदै रेय्आ।”

39फिरी सो थोड़ा होर अगो गो अतै मुँहा रै भारै पैई करी ऐह प्रार्थना करना लगा, “हे मेरै पिता, कि अगर भूच्ची सकदा ता ऐस दुखा थऊँ अऊँ बच्ची गच्छू, तांभी जियां अऊँ चाहन्दा तियां ना पर जिईआं तुहै चाहन्दै हिन तियां ही भोआ।”

40फिरी तिनी अपणै चेलै बलै ईच्ची करी तियां जो सुतुरा हेरू अतै पतरसा सोगी बल्लू, “कै तुहै मेरै सोगी अक्क घड़ी भी ना जागी सकै? 41जागदै रेय्आ अतै प्रार्थना करदै रेय्आ कि तुहै परीक्षा मन्ज ना पैन आत्मा ता तैयार हा, पर शरीर कमजोर हा।” 42फिरी तिनी दूई बरी गिच्ची करी ऐह प्रार्थना करी, “हे मेरै पिता, अगर ऐह मेरै पिऊरै बगैर ना हट्टी सकदा ता तुन्दी इच्छा पूरी भोआ।”

43ता तिनी फिरी ईच्ची करी तियां जो सुतुरै हेरू, क्ओकि तंयारी हाख्री निन्द्रा सोगी भरूरी थी। 44चेलै जो छड़ी करी सो फिरी चली गो, अतै तिईआं ही बोला मन्ज त्रीं बरी भी प्रार्थना करी।

45ता तिनी चेलै बलै ईच्ची करी बल्लू, “अबै सुन्दै रेय्आ, अतै आराम करा हेरा सो घड़ी चली आई हा, अतै मणु रा पुत्र पापी रै हत्थै पकड़ाया गाणा। 46उठा, चला; हेरा, मिन्जो पकडाणैवाळा नेड़ै ईच्ची रैऊआ।”

यीशु जो धोखै सोगी पकड़ाणा

(मरकुस 14:43-50; लूका 22:47-53; यूहन्‍ना 18:3-12)

47सो ऐह बल्लू ही करदा थू कि यहूदा जैडा बारह चेलै मन्ज अक्क थू आ अतै तैस सोगी प्रधान याजका अतै स्याणै मणु बड़ी भीड़, तलवारा अतै डंडै लेई करी आई। 48तैसिओ पकड़ाणै बाळै तियां जो बलुरा थू कि “जैसिओ अऊँ गिच्ची करी पोक्कु दिला समझी लैं कि सो ही यीशु हा, तैसिओ पकड़ी लैं।”

49अतै तिनी झट यीशु बलै गिच्ची करी बल्लू, “हे गुरू, नमस्कार!” अतै तैसिओ पोक्कु दिता।

50यीशुऐ तैस सोगी बल्लू, “हे मित्रा, जैस कम्मा तांयें तू छूरा हा तैस कमाई लै।” ता तियैं नेड़ै ईच्ची करी यीशु पुर हत्थ पाऊ अतै तैसिओ पकड़ी लैऊ। 51यीशु रै सोगी थऊँ अक्कीयै हत्थ अगो करी कै तलवार खिन्जी लेई अतै महायाजक रै अक्की दासा पुर चलाई दिती अतै तसेरा कन कटी दिता।

52ता यीशुऐ तैस सोगी बल्लू, “अपणी तलवारा जो म्याना मन्ज रखी लै क्ओकि जैड़ै तलवारा चलान्‍दै हिन सो सब तलवारा सोगी ही नष्‍ट करै गाणै। 53कै तू ना जाणदा कि अऊँ अगर चाँऊ ता अपणै पिता सोगी बिनती करी सकदा, अतै सो स्वर्गदूता री बारह पलटना थऊँ मतै हबजु मेरै सामणै पुजाई सकदा? 54पर पवित्रग्रन्था री ऐह गल्ला कि ऐसा भूणा जरूरी हा कियां पूरी भूणी?”

55तैस टैमैं यीशुऐ भिड़ा सोगी बल्लू, “कै तुहै तलवारा अतै डंडै लेई करी मिन्जो डाकू साईयें पकड़णै तांयें आये हिन? अऊँ रोज मन्दरा मन्ज बैही करी उपदेश दिन्दा थू, ता तुहै मिन्जो ना पकडु। 56पर ऐह सब ठेरै तांयें भुआ कि भविष्‍यवक्ता रै बचन पूरै भून।” ता सब चेलै तैसिओ छड़ी करी नह्ही गै।

महासभा सामणै यीशु

(मरकुस 14:53-65; लूका 22:54-55,63-71; यूहन्‍ना 16:13-14,19-24)

57ता यीशु जो पकड़णै बाळै तैसिओ काइफा नां रै महायाजक बलै लेई गै, जैड़ी शास्त्री अतै स्याणै इकट्ठै भच्छुरै थियै। 58पतरस दूरी बणाई करी तसेरै पिचो पिचो महायाजक रै अँगणा तक गो, अतै अन्दर गिच्ची करी अन्त हेरनै तांयें सपाई सोगी बैही गो।

59प्रधान याजक अतै पूरी यहूदी महासभा यीशु जो मारनै तांयें तसेरै वरोधा मन्ज झूठी गवाही री खोज मन्ज थियै, 60पर मतै सारै झूठै गवाह भूणै पुर भी सो गवाही ना पाई सकै। आखरी मन्ज दोई जिणै आये, 61अतै बल्लू, “ईनी बलुरा कि अऊँ प्रमात्मैं रै मन्दरा जो ढ़ाई सकदा अतै त्रियै दिन बणाई सकदा।”

62ता महायाजकै खड़ी करी यीशु सोगी बल्लू, “कै तू कोई जवाव ना दिन्दा? ऐह मणु तेरै वरोधा मन्ज कै गवाही दिच्छु करदै हिन?” 63पर यीशु चुप रैऊ। ता महायाजकै तैस सोगी बल्लू, “अऊँ तिजो जिन्दै प्रमात्मां री सौगन्द पान्दा कि अगर तू प्रमात्मैं रा पुत्र मसीह हा, ता असु सोगी बली दे।”

64यीशुऐ तैस सोगी बल्लू, “तैंई अप्पू ही ता बली दिता हा; बल्कि अऊँ तिजो सोगी ऐह भी बलदा कि अबै थऊँ तूसु मणु रै पुत्रा जो सर्वशक्तिमान रै सज्जै कनारी बैहुरै, अतै अम्बरा रै बदळा पुर इन्दै हेरना।”

65ऐह हुणी करी महायाजकै अपणै कपड़ै फाड़ै अतै बल्लू, “इन्‍नी प्रमात्मैं री निन्दा करी हा, अबै असिओ गवाह री कै जरूरत हा? हेरा, तुहै हबजु ऐह निन्दा हुणी हा ना! 66तुहै कै सोचदै हिन?” तियैं जवाव दिता, “ऐह कत्‍ल भूणै रै काबल हा।”

67ता तियैं तसेरै मुँहा पुर थूकु अतै तैसिओ घूसै मारै, कईये थप्पड़ मारी कै बल्लू, 68“हे मसीह, असिओ भविष्‍यवाणी करी कै बल कि तिजो कुणी मारू हा?”

पतरसा रा इन्कार

(मरकुस 14:66-72; लूका 22:56-62; यूहन्‍ना 18:15-18,25-27)

69पतरस बाहर अँगणा मन्ज बैहुरा थू कि अक्क दासी तैस बलै आई अतै बल्लू, “तू भी यीशु गलीली सोगी थू ना।” 70तिनी सबी रै सामणै ऐह इन्कार करू, “अऊँ ना जाणदा कि तू कै बल्लू करदी हा।”

71जैहणै सो बाहर डेवढ़ी पुर गो, ता दूई दासीये तैसिओ हेरी करी तियां सोगी जैड़ै तैड़ी थियै बल्लू, “ऐह भी ता यीशु नासरी सोगी थू।” 72तिनी सौगन्द खाई करी फिरी ना करी “अऊँ ऐस मणु जो ना जाणदा।”

73थोड़ी देरा बाद मणुऐ जैड़ै तैड़ी खडुरै थियै, पतरस बलै ईच्ची करी तैस सोगी बल्लू, “सच मन्ज तू भी ऐस मन्ज अक्क हा, क्ओकि तेरी बोली तेरा भेद खोली दिन्दी हा।”

74ता सो कोसणा लगा अतै कसमा खाणा लगा : “अऊँ ऐस मणु जो ना जाणदा।” ता तैहणै ही कुक्कड़ै बाँग दिती। 75ता पतरसा जो यीशु री सो कणैऊरी गल्ल याद आई : “कुक्कड़ा रै बाँग दिणै थऊँ पैहलै तुद मेरा त्राई बरी इन्कार करना।” अतै सो बाहर गिच्ची करी फूटी फूटी करी रोऊ।

Currently Selected:

मत्ती 26: GBKNT

ማድመቅ

Copy