मत्ती 25

दस कुँवारी रा उदाहरण

1“स्वर्गा रा राज्य तियां दस कुँवारी साईयें भूणा जैड़ी अपणी मशाला लेई करी दूल्है सोगी मुळना चली। 2तियां मन्ज पँज मूर्ख अतै पँज समझदार थी। 3मूर्खे अपणी मशाला ता लेई, पर अपणै सोगी होर तेल ना लैऊ। 4पर समझदारै अपणी मशाला सोगी अपणी कुप्पी मन्ज तेल भी भरी लैऊ। 5जैहणै तक दूल्है रै ईणै मन्ज देर भूई, ता सो सब झमाई मारना लगी अतै सोई गई।”

6“अध्धी राती धूम-धड़ाका मचु कि हेरा, दूल्हा चली आ! तैस सोगी मिलणै तांयें चला।”

7ता सो सब कुँवारी उूठी करी अपणी मशाला ठीक करना लगी। 8अतै मूर्ख समझदारा सितै बलणा लगी, “अपणै तेला थऊँ कुछ असिओ भी देय्आ, क्ओकि इन्दी मशाला हिहणा लगी हिन।”

9पर समझदारै जवाव दिता, “ऐह इन्दै अतै तून्दै तांयें पुरा ना भूणा; भला ता ऐह भोला कि तुहै दुकानदारा बलै गिच्ची करी अप्पू तांयें खरीदी लेई ईन।”

10जैहणै सो खरीदणा गई ता दूल्हा ईच्ची रैऊ, अतै जैड़ी तैयार थी, सो तैस सोगी बैहा रै घरा जो चली गई अतै दार बन्द करी दिता। 11ऐत थऊँ बाद सो कुँवारी भी फिरी आई अतै दूल्है जो बलणा लगी, “हे स्वामी, हे स्वामी, असु तांयें दारा खोल!”

12तिनी जवाव दिता, “अऊँ तूसु सोगी सच बलदा, अऊँ तुसिओ जाणदा भी निय्आ।”

13“ठेरैतांये जागदै रेय्आ, क्ओकि तुहै मेरै दोबारा फिरी करी ईणै रै तैस दिन, अतै तैहा घड़ी जो ना जाणदै।”

तोड़ै रा उदाहरण

(लूका 19:11-27)

14“जैहणै मुँ दोबारा फिरी करी ईणा ता स्वर्गीय राज्य ईना भूणा कि जियां,”

“अक्की मणुऐ परदेस गान्दै टैमैं अपणै दासा जो हैदी करी अपणी जायदात तियां जो सौंपी दिती। 15तिनी अक्की जो पँज तोड़ै#25:15 तोड़ै अक्क तोड़ा अक्क हजार सोनै रै सिक्कै थियै, ता पँज तोड़ै पँज हजार सोनै रै सिक्कै। दितै, दूये जो दोई, अतै त्रियै जो अक्क; मतलब हरेक जो तसेरी कावलिता रै मुताबक दिता अतै सो परदेसा जो चली गो। 16ता, जैसिओ पँज तोड़ै मुळै थियै, तिनी झट गिच्ची करी तैत सोगी लेन-देन करू, अतै पँज तोड़ै होर कमाये। 17ऐस तरीकै जैसिओ दोई मुळै थियै, तिनी भी दोई होर कमाये। 18पर जैसिओ अक्क मुळु थू, तिनी गिच्ची करी धरती मन्ज गत्त कोरू अतै अपणै मालका रा दितुरा तोड़ा लुकैरी पाऊ।”

19“मतै दिन बाद सो मालक ईच्ची करी तियां नौकरा थऊँ तियां तोड़ै रा लेखा लैणा लगा। 20ता जैसिओ पँज मुळुरै थियै, तिनी पँज तोड़ै होर अणीकरी बल्लू, ‘हे स्वामी, तुहै मिन्जो पँज तोड़ै दितुरै थियै, हेर, मैंई पँज तोड़ै होर कमाये हिन।’ 21तसेरै मालकै तैस सोगी बल्लू, ‘धन्य, हा खरै अतै विस्‍वासा लायक दास, तू थोड़ै मन्ज भी विस्वास लायक बणी रैऊआ; मुँ तिजो बड़ी चिजा रा अधिकारी बणाणा।’ मिन्जो सोगी ईच्ची करी खुशी मना।”

22“अतै जैसिओ दोई तोड़ै मुळुरै थियै, तिनी भी ईच्ची करी बल्लू, ‘हे स्वामी, तुहै मिन्जो दोई तोड़ै दितुरै थियै, हेरा, मैंई दोई तोड़ै होर कमाये हिन।’ 23तसेरै मालकै तैस सोगी बल्लू, ‘धन्य, हा खरै अतै विस्‍वासा लायक नौकरा, तू थोड़ै मन्ज भी विस्वास लायक वणी रैऊआ; मुँ तिजो बड़ी चिजा रा अधिकारी बणाणा।’ मिन्जो सोगी ईच्ची करी खुशी मना।”

24ता जैसिओ अक्क तोड़ा मुळुरा थू, तिनी ईच्ची करी बल्लू, “हे मालका, अऊँ तुसिओ जाणदा थू कि तुहै अक्क कठोर मणु हिन तुहै जैड़ी ना बान्दै तैड़ी थऊँ कटदै हिन, अतै जैड़ी ना खलारदै तैड़ी थऊँ बीणदै हिन। 25ठेरैतांये अऊँ ड़री गो अतै तून्दा दितुरा तोड़ा गिच्ची करी धरती मन्ज गत्त पाई करी लुकैरी दिता। हेरा, जैडा तून्दा हा, सो ऐह हा।” 26तसेरै मालकै जवाव दिता, “हे दुष्‍ट अतै कामचोर नौकरा, जैहणै तू ऐह जाणदा थू कि जैड़ी अऊँ ना बान्दा तैड़ी थऊँ कटदा, अतै जैड़ी अऊँ ना खलारदा तैड़ी थऊँ बिणदा; 27ता तिजो ऐसा करना चहिन्दा थू कि मेरै दितुरै तोड़ै बैंका मन्ज रखी दिन्दा, ता अऊँ अपणा पैसा ईच्ची करी ब्याजा सोगी लैन्दा।”

28ता मालकै होरी नौकरा सोगी बल्लू, “ऐह तोड़ा ऐस थऊँ लेई लेय्आ, अतै जैस बलै दस तोड़ै हिन तैसिओ दि देय्आ। 29क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ। 30अतै ऐस नकम्मै नौकरा जो बाहर नैहरै मन्ज फैंकी देय्आ, जैड़ी रूणा अतै दन्द पिहणा भूणा।”

न्याय रा दिन

31“जैहणै मणु रै पुत्रा अपणी जय-जयकार सोगी ईणा अतै सब स्वर्गदूत तैस सोगी ईणै। ता तैस अपणी महिमा रै सिंहासना पुर बैहुरै भूणा। 32अतै सब जाति मेरै सामणै इकट्ठा करी गाणी; अतै जियां पाअल भैड़ा जो बकरी थऊँ अलग करी दिन्दा, तिईआं ही तैस सो अक्की दूये थऊँ अलग करनै हिन। 33तैस भैड़ा मतलब धर्मी मणु जो अपणै सजै कनारी अतै बकरी मतलब अधर्मी मणु जो खब्बै कनारै खड़ा करना हा।”

34“ता राजै अपणी सज्जै कनारी बाळै सोगी बलणा, ‘हे मेरै पिता रै धन्य मणुओ, अईआ, तैस राज्य रै अधिकारी भूच्ची गच्छा जैडा संसार री शुरूआत थऊँ तूसु तांयें तैयार करूरा हा। 35क्ओकि अऊँ भूखा थू, अतै तुहै मिन्जो खाणै जो दिता; अऊँ त्रिहणा थू, अतै तुहै मिन्जो पाणी पिआऊ; अऊँ परदेसी थू, ता तुहै मिन्जो अपणै घरा मन्ज रैहणा दिता। 36अऊँ नंगा थू, तुहै मिन्जो कपड़ै पहनायै; अऊँ बमार थू, अतै तुहै मेरी सुधि लेई, अऊँ जेला मन्ज थू, तुहै मिन्जो सितै मुळना आये।’ ”

37“ता धर्मी तैसिओ जवाव दिणा, ‘हे प्रभु अहै कहणै तिजो भूखा हेरू अतै खुआऊ? या त्रिहणा हेरू अतै पाणी पिआऊ? 38अहै कैहणै तिजो परदेसी हेरू अतै अपणै घरै ठहराऊ? या नंगा हेरू अतै कपड़ै लुआयै? 39अहै कैहणै तिजो बमार या जेला मन्ज हेरू अतै तिजो सोगी मुलणा आये?’ ”

40“ता राजै तियां जो जवाव दिणा, ‘अऊँ तूसु सोगी सच बलदा कि तुहै जैड़ै मेरै ईयां हल्कै थऊँ हल्कै विस्वासी भाई सोगी कसकि अक्की सोगी भी करूरा हा, सो मिन्जो सोगी ही करूरा।’ ”

41“ता तैस खब्बै कनारी बाळै सोगी बलणा, ‘हे शापित मणुओ, मेरै सामणै थऊँ ओसा अनन्त अग मन्ज चली गच्छा, जैड़ी शैतान अतै तसेरै दूता तांयें प्रमात्मैं तैयार करूरी हा।’ ”

42“क्ओकि अऊँ भूखा थू, अतै तुहै मिन्जो खाणै जो ना दिता; अऊँ त्रिहणा थू, अतै तुहै मिन्जो पाणी ना पिआऊ; 43अऊँ परदेसी थू, तुहै मिन्जो अपणै घरै ना ठहराऊ; अऊँ नंगा थू, ता तुहै मिन्जो कपड़ै ना पहनायै; अऊँ बमार अतै जेला मन्ज थू, अतै तुहै मेरी सुधि ना लेई।”

44ता तियां जवाव दिणा, “हे प्रभु, अहै तुसिओ कैहणै भूखा, या त्रिहणा, या परदेसी, या नंगा, या बमार, या जेला मन्ज हेरू, अतै सेवा ना करी?”

45ता तैस तिईआं जो जवाव दिणा, “अऊँ तूसु सोगी सच बलदा कि तुहै ईयां हल्कै थऊँ हल्कै अक्की सोगी भी ऐसा ना करूरा, ता मेरै सोगी भी ना करूरा। 46अतै ईयां अनन्त दण्ड़ भोगणा, पर धर्मी अनन्त जिन्दगी मन्ज प्रवेश करना।”

Currently Selected:

मत्ती 25: GBKNT

ማድመቅ

Copy