लुका 19

मामलै निणै वाल़ौ जक्कई

1यीशु यरीहो इलाकै बाटीऐ थौ डेउंदै लागौ औन्दौ। 2तिऐ जक्कई नावां रौ एक आदमी थौ ज़ुण मामलै निणै वाल़ेऊ रौ मुख्यौ थौ और सेऊ बौड़ौ सेठ थौ। 3सेऊ यीशु देखणे री कोशिश थौ लागौ औन्दौ कौरदै कि सेऊ कुण आ पर भीड़ा री वज़ाह कु सेऊ यीशु नाईं देखी बौल़ौ कैलैकि सेऊ कौदा रौ छ़ोटौ थौ। 4तैबै यीशु देखणा लै सेऊ भीड़ा कु औगाड़िऐ फेटा मारीयौ डैऔ और एक गुलरा रै पेड़ा दी च़ौड़ौ कैलैकि यीशु सेज़ी बाटा दी डेउणै वाल़ौ थौ। 5ज़ैबै यीशु तेस पेड़ा काऐ पौउंच़ौ, तैबै उपरै देखीयौ तेस जक्कई लै बोलौ, “ओ जक्कई फेटी धौनी उतुर कैलैकि आज़ मुंइऐ तैरै घौरा कै रौइणौ आ।” 6जक्कई फेटी उतरौ, और यीशु खुशी कौरीऐ आपणै घौरै नियौं। 7इणै देखीयौ सारै लोग आपु मांझ़िऐ गुणमुणांइयौ बोलदै लागै, “यीशु ता पापी आदमी रै काऐ पा डेई गौ आ।” 8ज़ेबी सै रोटी खांदै थै लागै औन्दै ता जक्कई खौड़ौ उठौ और यीशु लै बोलदै लागौ, “ओ प्रभु हाऊं आपणी आधी ज़यदाद गरीबु लै दिआऊ और अगर मुंइऐ कासी कु भी धोखै देइयौ ज़ादौ मामलौ निऔं आ तेसकै हाऊं च़ार गुणौ वापिस दिआऊ।” 9यीशुऐ तेसलै बोलौ, “आज़ एस घौरा दी छ़ुटकारौ हुई आ कैलैकि एऊ आदमी भी अब्राहमा रै वंशा रौ आ। 10कैलैकि हाऊं आदमी रौ छ़ोहरु इणै लोगु ज़ो परमेश्‍वरा कु दूर पापा दी ई डुबै औन्दै तिऊं लोड़दै और सौदा री मौउता कु बौच़ाउंदे ऊ आशौ औन्दौ।”

दस मुहरी (तोड़ैऊ) रौ औनैणौ

(मत्ती 25:14-30)

11ज़ैबै लोग इऊं बुशु शुणदै थै लागै औन्दै तैबै यीशुऐ एक औनैणै देइयौ बोलौ, “कैलैकि सेऊ यरुशलेम रै नज़दीक थौ, और लोग सौमझ़ा थै कि परमेश्‍वरा रौ राज़ शिगरी पौगड़ौ हुणौ आ। 12एथीलै यीशुऐ बोलौ, ‘एक सेठ आदमी दूर देशा लै डैऔ ताकी सेऊ राज़ै रौ हक्क पाइयौ वापिस आशा। 13तैबै तिणीऐ आपणै नुकरा मांझ़िया कु दस नुकुर औटाऐ, और तिउंकै दस शर्फी मुहरै देइयौ तिउंलै बोलौ, मैरै आशणै झ़ांऊ एथरौ लेण-देण कौरेऊ।’ 14और तेस सेठा रै इलाकै रै लोग तेस आइलै दुश्मनी छ़ाड़ा थै, तैबै तिंउऐ तेस सेठा पिछ़ु आपणै कुछ़ दूत खौबरी कौरी भेज़ौ कि आमै नाईं च़ांअदै कि एऊ आदमी आमु माथै राज़ कौरा। 15ज़ैबै सेऊ आपणै राज़ा रौ हक्क पाइयौ वापिस आशौ तैबै तिणीऐ आपणै नुकुर औटाऐ ज़ासकै तिणीऐ शर्फी मुहरै थी देई ऐन्दी, ताकी सेऊ तिऊंकु लेण-देणा रै बारै दी पौतौ कौरा कि तिंउऐ का-का कौमाऔ आ? 16तैबै पैहलै नुकरै बोलौ, ‘मालिक तेरी देई ऐन्दी शर्फी मुहरी माथै मुंइऐ दस औज़ौ कौमाई।’ 17तिणी सेठै तेस नुकरा लै बोलौ, ‘ओ मैरै सौभी कु आच़्छ़ै नुकुर शाबाश’ तू भौरी थोड़ै दी भी विश्वास वाल़ौ निकल़ौ ई आबै तू दस इलाकै माथै राज़ कर। 18तैबै दुजै नुकरै भी आशीयौ बोलौ, मुंइऐ तेरी शर्फी मुहरी कौरी पांज़ औज़ौ कौमाई। 19तिणी सेठै तेसलै भी बोलौ ‘शाबाश’ तू भी पांज़ इलाकै माथै राज़ कर। 20चिजै नुकरै भी आशीयौ बोलौ, ओ मालिक तेरी देई ऐन्दी शर्फी मुहर इदै आ, ज़ो मैरै च़ादरु रै धुरै दी थी बानियौ छ़ाड़ी ऐन्दी। 21हाऊं ताऊं कु भौरी डौरा थौ कैलैकि तू काठौ आदमी ई ज़ियै तैरौ नाईं आ तिदरु भी तू निंआई ज़ो तू नाईं बौइंदौ तेस भी तू लौआ ई। 22सेठै तेसलै बोलौ, ओ दुष्ट नुकुर हाऊं तैरै मुआं कौरीऐ ताऊं आरोपी चाणाऊ, ज़ैबै तू ज़ाणा थौ कि हाऊं काठौ लोगु ज़ो मैरौ नाईं आ तेस हाऊं च़ुंगाऊ और ज़ो हाऊं नाईं बौइंदौ तेस हाऊं लौआऊ। 23तैबै ताऐं मेरी शर्फी मुहरै ब्याज़ा माथै कैलै ना देई ताकी ज़ेबी हाऊं आशा थौ ता तेबी सित ब्याज़ै निआं थौ। 24तिणी सेठै तिउंलै बोलौ ज़ो तिऐ खौड़ै थै, इऐं शर्फी मुहरै एसकु ओरु छ़ुड़ाऔ और तेसकै दैऔ ज़ासकै दस शर्फी मुहरै ई। 25तिंउऐ तेस सेठा लै बोलौ, ओ मालिक तेसकै ता ई आसती दस शर्फी मुहरै। 26हाऊं तुमुलै बोलाऊ, ज़ासकै आसती आ और सेऊ ठीक ढौंगारौ बौरता लौ तेसकै औज़ौ मिला। ज़ुण ठीक ढौंगारौ ना बौरता लौ तेसकु सेऊ भी ओरु निंईआ सा ज़ो तेसकै औलौ। 27पर मैरै तिऊं दुश्मना ज़ो नाईं च़ाहा थै कि हाऊं तिऊंरौ राज़ौ बौणु, तिऊं इदै मुकाऐ आणियौ पोरु झ़ांगौ।”

यरुशलेम दी ज़ीत आशणी

(मत्ती 21:1-11; मरकुस 11:1-11; यहुन्ना 12:12-19)

28इऊं बुशै बोलीयौ यीशु आपणै च़ेलेऊ आइलै यरुशलेम लै तिऊं सौभीऊ कु औगाड़िऐ आण्डदै लागौ। 29ज़ैबै सै जैतून नावां री पहाड़ी काऐ पौउंच़ै तिऐ बैतफगै और बेतनियाह नावां रै दुई गाऊं थै। तैबै यीशुऐ च़ेलेऊ मांझ़िया कु दुई च़ेलै इणै बोलीयौ भेज़ै कि, 30आपणै सामनै वाल़ै गांवा दी डैऔ, तिऐ पौउंच़िऔ तुमुकै एक गौधेटु मिला खुंटी दी बानौ औन्दौ। ज़ास माथै इबी झ़ांऊ कोई ना बोशौ, तेस खोलियौ ओरु आणेऊ। 31अगर तुमु कु कुण पुछ़ा लौ कि एस कैलै खोलाई? तैबै तुमै बोलेऊ प्रभु कै एसरी ज़ुरत आ। 32ज़ो च़ेलै यीशुऐ भेज़ै औन्दै थै तिंउऐ तिऐ डेइयौ तिणौ देखौ ज़िणौ यीशुऐ तिउंलै बोलौ थौ। 33ज़ैबै सै च़ेलै गौधेटु खोलदै लागै तैबै तेसरै मालिकुऐ तिऊं लै बोलौ, एस गौधेटु कैलै खोलाई? 34तिंउऐ बोलौ प्रभु कै एसरी ज़ुरत आ। 35तैबै च़ेलेउऐ सेऊ गौधेटु खोलियौ यीशु काऐ आणौ और तेस माथै आपणै जुड़कै पाइयौ यीशु तेस माथै बोशाल़ौ। 36ज़ैबै यीशु आण्डदै लागौ तैबै लोग आपणै जुड़कै बाटा दी बिछ़ाऊंदै लागै, यीशु रै स्वागता लै। यीशु रौ स्वागत 37ज़ैबै यीशु जैतून पहाड़ी री उतराई दी पौउंच़ौ, तैबै च़ेलेऊ री सारी भीड़ यीशु रै सारै शक्ति वाल़ै कामा देखीयौ खुश हुऐ और परमेश्‍वरा री बौड़ाई कौरदै लागै। 38“भौलौ सेऊ राज़ौ ज़ुण प्रभु रै नावां दी आशा आ, सौरगा दी शान्ति और परमेश्‍वरा री बौड़ाई हो। 39तैबै भीड़ा मांझ़िया कु कुछ़ फरीसी लोगुऐ यीशु लै बोलौ, ‘ओ गुरु, आपणै च़ेलेऊ धौमकाऊ कि च़ुटुक थाका।’ 40यीशुऐ ज़वाब दैऔ, ‘हाऊं तुमुलै बोलाऊ अगर इऐ लोग च़ुटुक थाका लै तैबै ढोल़ च़िलांदै लागा।’ ”

यरुशलेम लै लेरणौ

41“ज़ैबै यीशु यरुशलेम रै नज़दीक पौउंच़ौ तैबै यीशु यरुशलेम शहरा देखीयौ लेरौ। 42और बोलौ, केती भौलौ औआ थौ कि तू, ओ तू ई, आज़कै दिना री शान्ति री बुशै ज़ाणा थौ। पर आबै इऐ बुशै तेरी नौज़री कु च़ोरुई गोई। 43कैलैकि ताऊं माथै इणै दीन आशणै ई कि तैरै दुश्मना कौठै हुइयौ ताऊं च़ारौ तौरफा कु घेरीयौ दबाउआ ई। 44ताऊं और तैरै लोल़डै ज़ो ताऊं भितै ई माटै दी मिलावा ई ताऊं दी पात्थरा माथै पात्थर भी ना छ़ाड़णै, कैलैकि ताऐं सेज़ौ मौकौ नाईं रवावौ ज़ेबी परमेश्‍वरै मसीह तुमु बौच़ाउणा लै भेज़ौ थौ।”

परमेश्‍वरा रै घौरा कु सामाना बेच़णै वाल़ै गाड़नै

(मत्ती 21:12-17; मरकुस 11:15-19; यहुन्ना 2:13-22)

45तैबै यीशु परमेश्‍वरा रै घौरा दी डैऔ और समान बेच़णै वाल़ै बाइरै भौगाऐ। यीशु परमेश्‍वरा रै घौरा दी 46और बोलौ, “पवित्रशास्त्रा दी इणौ आ लिखौ औन्दौ कि मैरौ घौर प्राथना कौरणै रौ घौर आ। पर तुमुऐ ता एऊ लुटणै वाल़ेऊ रौ आड्डौ चाणी गौ आ।” 47यीशु रोज़ परमेश्‍वरा रै घौरा दी लोगु लै शिक्षा दिआ थौ। पर बौड़ै याजक यहुदी शास्त्री और लोगु रै बौड़ै नेतै यीशु झ़ांगणै रौ मौकौ लोड़ा थै। 48पर तिउंकै यीशु झ़ांगणै रौ कोई मौकौ ना मिलौ कैलैकि सारै लोग यीशु री बुशै बौड़ै ध्याना कौरी शुणा थै।

Currently Selected:

लुका 19: BFZ-NT

ማድመቅ

Copy