लुका 18

अधर्मी फैसलै कौरणै वाल़ौ और बिधवा रौ औनैणौ

1तैबै यीशुऐ आपणै च़ेलेऊ कै एथरै बारै दी औनैणौ दैऔ कि आमु रोज़ प्राथना कौरणी और हिम्मत च़ांई छ़ाड़णी। 2एकी इलाकै दी एक फैसलौ कौरणै वाल़ौ रौआ थौ, ज़ुण ना परमेश्‍वरा कु डौरा थौ और ना कासी आदमी री परवाह कौरा थौ। 3सेज़ै इलाकै दी एक विधवा भी रौआ थी ज़ो तेस फैसलै कौरणै वाल़ै काऐ घौड़ी-घौड़ीऐ आशीयौ बोला थी, मैरौ फैसलौ कर और मुं मैरै दुश्मना कु बौच़ाऊ। 4काफी बौगता झ़ांऊ ता तिणीऐ तिंआरी कौन्थशुणी की पर आखरी दी तिणीऐ आपणै ज़िवा दी विच़ार कियौ कि ना ता हाऊं परमेश्‍वरा कु डौरदौ और ना कासी आदमी री परवाह कौरदौ। 5तैबै भी इऐ विधवा मुं रोज़ आशीयौ तंग कौरा, आबै हाऊं इऐं विधवा लै फैसलौ दिलावाऊ। केशी इणौ ना च़ांई हुऔ कि इऐ घौड़ी-घौड़ीऐ आशीयौ मुं भौरी परेशान कौरा। 6प्रभु यीशुऐ बोलौ, “शुणौ, एऊ बुरौ फैसलै कौरणै वाल़ौ का बोला आ? 7तैबै का परमेश्‍वर आपणै च़ुनै औन्दै लोगु रौ फैसलौ नाईं कौरालौ? ज़ुण राच दीन तेसकु प्राथना कौरा ई? का परमेश्‍वर आपणै लोगु लै बेर पा? 8हाऊं तुमुलै बोलाऊ परमेश्‍वर आपणै लोगु रौ फैसलौ फेटी कौरा! तैबै भी पर ज़ेबी हाऊं आदमी रौ छ़ोहरु आशु लौ, ता तेबी धौतरी केती लोग हुणै ई ज़ो मुं माथै विश्वास कौरा ई?”

फरीसी और मामलै निणै वाल़ै रौ औनैणौ

9ज़ुण आपुलै धौर्मी बौणा थै और दुजै लोगु सौमझ़ा थै बेकार तिउंलै यीशुऐ एज़ौ औनैणौ दैऔ कि, 10“दुई आदमी परमेश्‍वरा रै घौरा दी प्राथना कौरदै डेवै, एक थौ फरीसी दुजौ थौ मामलै निणै वाल़ौ, 11फरीसी आपणै मौना दी इणी प्राथना कौरदै लागौ कि, ‘ओ परमेश्‍वर, हाऊं तैरौ धन्यबाद कौराऊ कि हाऊं दुजै लोगु ज़िणौ डाकु, ठौगणै वाल़ौ और गान्दै काम कौरणै वाल़ौ नाईं आसतौ, और ना एस मामलै निणै वाल़ै ज़िणौ आसतौ ज़ो इदै आ।’ 12हाऊं हफ्ते दी दुई बारै ब्रौत छ़ाड़ाऊ, और हाऊं आपणी सारी कौमाई रौ दसवौ हिस्सौ भी दिआऊ। 13पर मामलै निणै वाल़ै दूर खौड़ी हुइयौ सौरगा भिलै देखणौ भी ना च़ाऔ, और आपणै हिकड़ै पिटी-पिटीऔ बोलदै लागौ, ‘ओ परमेश्‍वर’ मुं पापी माथै दया कर। 14तैबै यीशुऐ बोलौ, ‘हाऊं तुमुलै बोलाऊ, कि सेऊ फरीसी नाईं बल्कि एऊ मामलै निणै वाल़ौ आदमी परमेश्‍वरा री नौज़री दी धौर्मी बौणीयौ आपणै घौरै डैऔ आ, कैलैकि ज़ुण आपुलै बौड़ौ बौणा लौ सेऊ छ़ोटौ बौणनौ आ।’ और ज़ुण बौणा लौ आपुलै छ़ोटौ सेऊ बौणनौ आ बौड़ौ।”

छ़ोहरु लै आशीर्वाद

(मत्ती 19:13-15; मरकुस 10:13-16)

15तैबै लोग आपणै लोल़डेऊ भी यीशु काऐ लागै आणदै ताकी यीशु तिऊं माथै हाथ छ़ाड़ा, पर च़ेलै लागै तिऊं धौमकाउंदै। 16यीशुऐ लोल़डै आपु काऐ औटाऐ और बोलौ, “लोल़डेऊ मुं काऐ आशणै दैऔ, इऊं नाईं रोकौ कैलैकि परमेश्‍वरा रौ राज़ इणेऊ ज़िणौ आ। 17हाऊं तुमुलै सौच़्च़ौ बोलाऊ ज़ुण परमेश्‍वरा रौ राज़ इऊं लोल़डेऊ ज़िणौ नाईं माना लौ सेऊ परमेश्‍वरा रै राज़ा दी केबी भी नाईं डेई बौल़दौ।”

सेठ आदमी और सौदा री ज़िन्दगी

(मत्ती 19:16-30; मरकुस 10:17-31)

18तैबै यहुदिऊ रै एक मुख्यै यीशु कु पुछ़ौ, “ओ महान गुरु, ‘सौदा री ज़िन्दगी पाइणा लै हाऊं का कौरु?’ 19यीशुऐ तेसलै बोलौ, ‘तू मुलै सारेऊ कु भौलौ कैलै बोलाई?’ कोई भी भौलौ नाईं आसतौ परमेश्‍वरा रै सिवाऐ। 20तू हुकम ता ज़ाणदौ औलौ, ‘गान्दै काम ना कौरणी, खून ना कौरणौ, च़ोरी ना कौरणी, ना झ़ुठी गवाही दैणी, और आपणै मां-बाबा री इज़्ज़त कौरणी।’ 21तिणी मुख्यै बोलौ, इऊं आज्ञाऐं ता हाऊं लोल़डी ओउलै मानाऊं। 22इणै शुणियौ यीशुऐ तेसलै बोलौ, ‘ताऊं दी औज़ौ भी एकी बुशा री कामी आ। आपणी सारी ज़यदाद बेच़ीयौ गरीबु लै बांट, ताउंलै मिला सौरगा दी धन-ज़यदाद, और आपु हांड मुं पिछ़ु।’ 23इणै शुणियौ सेऊ मुख्यौ भौरी दुखी हुऔ कैलैकि सेऊ भौरी सेठ थौ।” 24यीशुऐ सेऊ सेठ दुखी देखीयौ आपणै च़ेलेऊ लै बोलौ, “सेठ लोगु कै आपणै ज़िवा दी परमेश्‍वर राज़ कौरणै री ज़ाज़त देणी केती मुश्कल़ आ। 25ऊंटा रै सिउणी री पाशी बाटीऐ डेउणौ आसान आ। तेथकु भी कठिण आ सेठ लोगु लै आपणै ज़िवा दी राज़ कौरणै दैणौ।” 26इणै शुणियौ लोगुऐ बोलौ, तैबै कासरौ छ़ुटकारौ हुई बौल़ा सा? 27यीशुऐ बोलौ, “ज़ो आदमी रै बोलै नाईं औन्दौ सेऊ परमेश्‍वरा रै बोलै औआ सा।” 28पतरसै बोलौ, “देखौ आमै ता आपणौ घौर-बार छ़ाड़ियौ ताऊं पिछ़ु च़ाल पौड़ै ई।” 29यीशुऐ बोलौ, “हाऊं तुमुलै सौच़्च़ौ बोलाऊ इणौ कोई ना आसतौ ज़ुणिऐ परमेश्‍वरा रै राज़ा री ताइंऐ, आपणौ घौर, छ़ेउड़ी, भाई और मां-बाब या लोल़डै छ़ाड़ै औलै, 30और तेसलै इऐं ज़िन्दगी दी कई गुणौ ज़ादौ और आशणै वाल़ै जुगा दी सौदा री ज़िन्दगी ना मिला।”

आपणै मौरणै रै बारै दी यीशु रै चीजी बारै बोलणौ

(मत्ती 20:17-19; मरकुस 1:32-34)

31तैबै यीशुऐ आपणै बारह च़ेलै आपु काऐ औटाऐ और तिउंलै बोलौ, “देखौ आमै यरुशलेम लै ई लागै औन्दै डेउंदै, ज़ो-ज़ो बुशै आदमी रै छ़ोहरु रै बारै दी पुराणै भविष्यवक्तुऐ लिखी सै सारी पुरी हुणी आ। 32कैलैकि तेस दुजी ज़ाती रै लोगु रै हाथा दी दिआई, सै तेसरौ मज़ाक उड़ावा ई। सै तेसरी बेइज़्ज़ती कौरा ई और तेस माथै थुकाई। 33और तेसदी कोड़ै ला ई, तेस पोरु झ़ांगाई पर सेऊ चिजै दिनै ज़िउंदौ हुआ सा।” 34पर तिऊं च़ेलेउऐ यीशु री केज़ी भी बूश नाईं सौमझ़ी और इऐ बुशै तिऊंकु च़ोरुई थाकी, ज़ो बोलौ थौ सेऊ तिउंरी सौमझ़ी दी ना आशौ।

शेड़ै भीखारी लै आखी रौ दाण

(मत्ती 20:29-34; मरकुस 10:46-52)

35ज़ैबै यीशु यरीहो इलाकै रै नज़दीक पौउंच़ौ, तिऐ बाटा दी एकी भिलै बोशियौ एक शेड़ौ भीखा मांगदै थौ लागौ औन्दौ। 36तिणी शेड़ै भीड़ा री हाक शुणियौ पुछ़ौ, “एऊ का औन्दै लागौ औन्दौ? 37भीड़ा रै लोगुऐ बोलौ, नासरत गांवा रौ यीशु आ इदरा बाटीऐ डेउंदै लागौ औन्दौ।” 38इणै शुणियौ सेऊ शेड़ौ भीखारी च़िलांदै लागौ “ओ यीशु, राज़ै दाऊदा री खानदानी रौ, मुं माथै दया कर।” 39ज़ो लोग औगाड़िऐ थै लागै औन्दै डेउंदै तिंउऐ तेसलै डांटियौ बोलौ, “च़ुटुक थाक” पर सेऊ तौंइऐ भी ज़ोरै-ज़ोरै लागौ च़िलांदै, “ओ दाऊदा रौ छ़ोहरु मुं माथै दया कर।” 40ज़ैबै यीशुऐ तेसरी हाक शुणी, ता यीशु खौड़ी टेकौ और हुकम दैऔ कि “एस मुं काऐ आणौ” ज़ैबै सेऊ शेड़ौ भीखारी यीशु रै नज़दीक आशौ ता यीशुऐ तेसकु पुछ़ौ, 41“तू का च़ाहा ई? हाऊं ताउंलै का कौरु? तैबै तिणीऐ बोलौ, ‘ओ प्रभु हाऊं च़ाहा ऊ की हाऊं देखदै लागु।’ ” 42यीशुऐ बोलौ, “ठीक आ तू देखी बौल़ा ई, तैरै विश्वासै तू ठीक कियो ई।” 43तेबी ई सेऊ शेड़ौ भीखारी देखदै लागौ, और परमेश्‍वरा री बौड़ाई कौरीयौ यीशु पिछ़ु आण्डदै लागौ। ज़ुणिऐ भी एज़ौ च़मतकार देखौ सै सारै परमेश्‍वरा री महिमा कौरदै लागै।

Currently Selected:

लुका 18: BFZ-NT

ማድመቅ

Copy