YOANE 14

1Nap̃op̃omu ega ta dogo kite sa mau: kuga saralomau Sup̃e, go kuga saralomau au. 2Nasum̃a ki Tamagu nasum̃atokoana laapa eu doko asa; e pe tika, a pe noa ki mu asa; nalakena a naga aga vano naga aga manimu mari m̃ata ki tokora sikai. 3Go a pe vano po manimu mari m̃ata ki tokora sikai, a pe moro umai, go aga wo piragi lua mu umai punusi au; naga tokora waina kinau a doko asa, nimu ma kuga toko asa. 4Go tokora waina kinau a naga aga vaki asa pano, ku atae napua. 5Toma e noa ki nia, e naga, Nawota, au da atae tokora waina ku naga p̃a vaki asa pano mau, go au atae napua dapale sava? 6Yesu e noa ki nia, e naga, Kinau a pei napua, go nalomauana, go namauriana: te naata e pe ta pae au mau, e pe ta umai punusi Tamagu mau. 7Ku pe atae au, ku pe atae gami ma Tamagu: go pae ragi waia pa pa ku atae a, go ku po punusi a. 8Filipo e noa ki nia, e naga, Nawota, p̃a visei ki gami Tamam̃a, go ega vei tea lapa. 9Yesu e noa ki nia, e naga, A sikoti mu doko ragi varau pa, go ku da atae au mau, Filipo, kite? Tea waina e punusi au e punusi Tamagu; ekasana ku naga, P̃a viseiki gami Tamam̃a? 10Ku da saralomau mau naga kinau a doko Tamagu, go Tamagu e doko au? Navasaana maga waina kinau a noa ki mu ara a da dum̃agu pasa ara mau: ma Tamagu waina e doko au doko e do mari nawosiana aneana maga. 11Kuga saralomau navasaana aginau naga a doko Tamagu, go Tamagu e doko au: ma ku pe ta saralomau navasaana aginau mau, kuga saralomau asa nalakena nawosiana maga. 12Lomau, lomau, a noa ki mu, naga Tea waina e saralomau au, nawosiana maga waina kinau a do mari a nae ma ega wo mari a; go ega wo mari nawosiana maga waina eu p̃arua liu tea maga waia; nalakena kinau aga vano punusi Tamagu. 13Go tea waina ku pe wo datago asa pae nagisagu, tea wanogoe aga wo mari a, naga Tamagu ega vei tea samasamaniana Natuna. 14Ku pe tatago te navatuna pae nagisagu, kinau a pe wo mari a. 15Ku pe dodomi au, ku pe wo dogo parati ki natip̃akiana aginau maga. 16Go kinau aga wo pavarani Tamagu, go ega wo dua mu Tea Vasapakavakale p̃ota sikai, naga ega sikoti mu doko pa pa ega tu mau du, 17Naatana ni nalomauana: waina maramana e da mari atae dape a mau; nalakena e da leo punusi a mau, go e da atae a mau: nimu ku atae a; nalakena e doko sikoti mu doko, go ega wo doko nap̃alau mu. 18Aga wo da doropusi mu naga kuga vei namatapesu maga mau: aga wo umai punusi mu. 19Ragi kiki e ko doko, go maramana ega wo da moro leopunusi au mau; ma nimu kuga wo leopunusi au: nalakena kinau a mauri doko, nimu ma kuga wo mauri doko. 20Naaleatia wanogoe nimu kuga wo atae naga kinau a doko Tamagu, go nimu ku doko au, go kinau a doko mu. 21Tea waina e peani natip̃akiana aginau maga, po do dogo paratiki da, nae e pei tea waina e dodomi au: go tea waina e dodomi au ega wo pei tea dodomiana pae Tamagu, go kinau aga wo dodomi a, po dum̃agu pisei ki nia au. 22Yuda (e da pei Iskariote mau) e noa ki nia, e naga, Nawota, e dapale sava p̃a wo dum̃am̃a pisei ki gami ako, go p̃a wo da dum̃am̃a pisei ki maramana ako mau? 23Yesu e pasa dara po noa ki nia, e naga, Te naata sikai e pe dodomi au, e pe wo dogo paratiki navasaana aginau: go Tamagu e pe wo dodomi a, go aro pe wo umai punusi a, po mari nasum̃atokoana aginami e pe wo sikoti a. 24Tea waina e da dodomi au mau e da dogo parati ki navasaana aginau maga mau: go navasaana waina ku dogoe eda pei tea aginau mau, ma e pei tea ki Tamagu waina e dip̃aki lua au umai.

25A pasa ki mu tea maga wanogoe ragi waina a doko sikoti mu doko. 26Ma Tea Vasapakavakale, Naatana Tapu, waina Tamagu ega wo dip̃aki lua e umai pae nagisagu, nae ega wo pasa piseiki mu naleo maga mamau puti, po mari mu kuga wo moro midoaki naleo maga mamau puti waina a noa ki sua mu ara. 27Natam̃ateana a manimu ligiraki nia; natam̃ateana aginau a dua mu asa: kinau a da dua mu dapala waina maramana e pitua mau. Nap̃op̃omu ega ta dogo kite sa mau, go ega ta mataku mau. 28Ku dogo naga kinau a noa ki mu, naga, Aga vano, go aga moro umai punusi mu. Ku pe dodomi au, ku pe laelaea, nalakena aga vano punusi Tamagu: nalakena Tamagu e p̃arua liu au. 29Go ragi waia a po noa ki mu asa pea ki ega vakilina, naga, ragi waina ega wo pakilina, kuga saralomau. 30Aga wo da moro pasa p̃arua sikoti mu mau, nalakena tea maraki ni maramana e umai: go e da peani te navatuna sikai nap̃alaugu mau; 31ma naga maramana ega atae naga a dodomi Tamagu, go dapala waina Tamagu e dip̃a ki nau, a do mari dapala nogoe. Kuga tuleana, tuga vano m̃elu dua ki tokora waia.

Currently Selected:

YOANE 14: NTB

ማድመቅ

Copy