OHÚTU 18
18
Ɔwɔicō cokónu ō je ɔyínɔ̄nyīlɔ lɛ Ébrahām mɛ́mla Usára
1Óndú ā le hɛ́bɛcɛ lɛ Ébrahām ɛgiyí aɔ́ci óoku kú Umámre ā. Ébrahām cīce okómpīinu kú áklɔ̄kpɛ kú nū eko kú iyē ō hɔ́lá nɛ̄hi ícíícī ɔ́ɔmā. 2#Uhíb 13.2Ó je eyī gicō anɔ́ɔ ó má ācɛ ɛtá māháyi iyɔ̄bū í ligbó lɛ ɔ́ ŋ́ má. Eko nōó le uwá má ā, ó le inya kwu ŋmá okómpīinu ā gaá jīla uwá ɔwɛ. Ó túkpɛɛ́ lɛ eyī pīya klá ajɛ. 3Anɔ́ɔ ó da uwá kahíníī, “Óndú um, ɔ́dāŋ ka ɛlā kú um he aá ɔtū, aá híī gla ɔlɛ́ um nɛ̄ aá í gáā māháyi ŋ́ nɛɛ ŋ́. 4Kéē lɛ éŋkpɔ̄ lígíí bī wā kú aá lɛ ikpó na cɛ́ɛ́ aá le mlɛ́nyɔ́ lígíí ɔkwu ɔcí ā. 5Cɛ́ɛ́ ká n lɛ igbō lígíí bī gē lɛ aá. Ó géē je ɔfú lɛ aá kú aá yɛ gɔbū ipú iyāwu kú aá. Ojīlīmā nɛ̄ aá le ce um á, ɛ́gɛ́nɛ̄ aá bū ce ɔlɛ́ um ā.” Anɔ́ɔ é da ɔ́ kahíníī, “Yá ɛ́gɛ́nɛ̄ a ka ā.”
6Ébrahām le inya kwu ga ipú áklɔ̄kpɛ ɛgiyí Usára gaá da ɔ́ kahíníī, “Lɛ okoolo kú umu ɛtá mīya fíyaa kú ā lɛ igbō yá fíya.” 7Anɔ́ɔ Ébrahām le inya kwu ga ɛgiyí aɛ́na kú nū, anɔ́ɔ ó kwú ɛdrɔ́ ɛna éyi nōo lɔhi ō má ā, í bī gē lɛ ɔ̄cotɛ̄hɔ̄ kú nū, kóō lɛ ɔ́ ŋmó lɛ ɔ́ wá fíyaa. 8Anɔ́ɔ ó kwú ɔhɔ̄ mɛ́mla amɛ̄ɛna, mɛ́mla ɛbɛ́ ɛna nēé he ā ú, anɔ́ɔ ó kwú ɔdōlé ā ú kpó bá iyɔ̄bú uwā á. Anú abɔ̄yī nū je ɔdōlé ā lɛ uwá lé ɔkwu ɔcí ā á.
9Anɔ́ɔ é da ɔ́ ɔ̄kā kahíníī, “Iní nɛ̄ Usára ɔnyā uwɔ yɔ̄ āa?” Anɔ́ɔ ó da uwá kahíníī, “Ó yɔ̄ ipū áklɔ̄kpɛ.” 10#Uróm 9.9Anɔ́ɔ éyi kú uwá da ɔ́ kahíníī, “Ɔyā ahāanɛ ŋmá abālɔbányā#18.10 Ɔyā ahāanɛ ŋmá abālɔbányā; ámāŋ eko nyā kú iháyí ɔhá. N géē kwúcē wā. Cɛ́ɛ́ Usára ɔnyā uwɔ í ma ɔyínɔ̄nyīlɔ éyi.” Usára bayi okómpīnu kú áklɔ̄kpɛ ā igbīhī yɔ̄ ī jāhɔ̄. 11Ébrahām mɛ́mla Usára le kpó hīla nɛ̄hi ɛɛ́. Usára í kē má onyílá kú nū ɛ́ɛ́ gɛ ŋ́. 12#1 Upít 3.6Anɔ́ɔ Usára le ɛhɛ yɛ tū īyī nū kahíníī, “Abālɔbányā nɛ̄ n le hīla kpó nyā, nɛ̄ ɔbá um kē le hīla ā, alɔ jɔ́ɔ́nyɛ kóō gwutá kú ɔbá mɛ́mla ɔnyā glá ɛ́ɛ̄?”
13Anɔ́ɔ Óndú ā da Ébrahām kahíníī, “Ɔdíyá nɛ̄ Usára yɛhɛ klla ka kahíníī, ‘N mɔyí glá ɛ́ɛ́ gɛɛ, eko nɛ̄ n le hīla ɛɛ́ mā a?’ 14#Ulúk 1.37Ɔdā dóódu lɔnɔ tū Ɔwɔicō ō yá ā a? Ɛ́gɛ́nɛ̄ n ka lɛ ā, ɔyā ahāanɛ ŋmá abālɔbányā n géē pīyɛyí, Usára kē í ma ɔyínɔ̄nyīlɔ éyi.” 15Abɔ̄ Usára yɔ̄ ī yúúfi ā, ó le híhó kahíníī, “Ń yɛhɛ nóó.” Amáŋ é da ɔ́ kahíníī, “A yɛhɛ gbóó.”
Ébrahām gbɔ̄ɔkɔ ohígbū Usɔ́dɔm
16Anɔ́ɔ ācɛ ā gbɔɔ́ ŋmá abɔ́ɔ lɛyíkwu Usɔ́dɔm. Ébrahām le yɛ mɛ́mla uwá kóō bī uwā tá. 17Óndú ā kahíníī, “N gaá je ɔdā nɛ̄ n gáā yá nyā tayínū ŋmá ɛgiyí Ébrahām ŋ́. 18Ébrahām wɛ ɔ̄cɛ nōo géē je pīya éwo olɔfú nɛ̄hi, nōo ŋmá ɛgiyí nū ā, nɛ̄ n géē hɔ́hā ce odúúdú aéwo. 19N fu ɔ́ o yá ɛ́ɛ́ kóō géē da ayípɛ̄ ɔlɛ́ nū mɛ́mla ipɔ́ɔma kú nū mɛ́mla ayááyí nū kéē lɛyítáajɛ gā um cɛ́ɛ́ kéē yá ɔdā nōo le kpaakpa mɛ́mla ɔkwɛ̄yī. Ɔ́dāŋ nēé le yá lɛ āa, n géē yá ɛjɛ̄ɛ̄jī ɔdā nɛ̄ n cokónu lɛ ɔ́ ka n gē yá lɛ ɔ́ āa. 20Anɔ́ɔ Óndú ā da Ébrahām kahíníī, “É kpó ɛlā obɔ̄bí nɛ̄hi ce ācɛ Usɔ́dɔm mɛ́mla Ugomóra. Ɔ́bíipu nēé bi ā kē le nwuné nɛ̄hi. 21N géē nyɔ̄ ká n̄ gaá má ɔ̄, ɔ́dāŋ ka ɔdā dóódu nēé kpó ce uwá yá ɔkwɛ̄yi ámāŋ koó wɛ ɔkwɛ̄yi ŋ́.”
22Anɔ́ɔ ācɛ ɛpa ā nyɛ̄ɛ̄ lɛyíkwu Usɔ́dɔm, amáŋ Ébrahām māháyī abɔ́ɔ pī Óndú ā. 23Anɔ́ɔ Ébrahām túblā Óndú ā, anɔ́ɔ ó kahíníī, “A géē je ācɛ okpaakpa mɛ́mla ācobɔ̄bíipú ā yíífi tɔ̄há nɛɛ? 24Ɔ́daŋ ka ācɛ okpaakpa ā wɛ ofɛpa ce igwó ipú igelī ā bɛ́ɛ? A géē je odúúdú igelī ā yíífi kpɔ́ɔ̄? Á gaá mabɔ̄ igelī ā tá ohígbū ācɛ ofɛpa ce igwó ā ŋ́ nɛɛ? 25Ofíyongoli, ká n̄ yá ɔdā ɛ́gɔ́ɔmā, ká ā ŋmó ācɛ okpaakpa mɛ́mla ācobɔ̄bíipú. Ofīyongoli, ɔ̄cɛ nōo hɛ́pɔ̄ kú odúúdú ɛcɛ nyā cíkā ō yá ɔdā olɔhi.” 26Anɔ́ɔ Óndú ā kahíníī, “Ɔ́dāŋ ka n lɛ ācɛ okpaakpa ofɛpa ce igwó má Usɔ́dɔm, n gáā je igelī ā yíífi ŋ́ ohígbū uwā.” 27Ébrahām tá ɔ̄ ohi kpɔ́ kahíníī, “Kócō, ā cɔ̄nū abɔ̄ n lɔtū yɔ̄ ī kɛlā gā uwɔ kpɔ́ ā ŋ́, Óndú. N wɛ ɔlɛɛcɛ icííce nōó lɛ íkwu ō ka ɔdā dóódu ŋ́. 28Ɔ̄cɛ í jé ŋ́ nɛ̄ ācɛ ofɛpa ce ɛhɔ̄ í yá ɔdōōbɔbí ŋ́ má ikɔkɔ ācɛ ofɛpa ce igwó ā. A géē je odúúdú igelī ā yíífi ohígbū ka ācɛ ɛhɔ̄ í yɔ̄ ipú uwā gɛ ŋ́ mā ā?” Anɔ́ɔ Óndú kahíníī, “N gáā je igelī ā yíífi ŋ́ ɔ́dāŋ ka n lɛ ācɛ okpaakpa ofɛpa ce ɛhɔ̄ má abɔ́ɔ.” 29Ébrahām klla kahíníī, “Ɔ́dāŋ ka ācɛ ofɛpa nɛ̄ ā má abɔ́ɔ ā bɛ́ɛ?” Anɔ́ɔ ó tá ɔ̄ ohi kahíníī, “N gaá je ɔ́ yíífi ŋ́.” 30Ébrahām kahíníī, “Kócōō, ā híī cɔ̄nū ŋ́, Óndú, n géē kɛlā kpɔ́ ɛ́ɛ́. Ɔ́dāŋ ka ācɛ ofuciigwó nɛ̄ ā má abɔ́ɔ á bɛ́ɛ?” Anɔ́ɔ Óndú ā kahíníī, “N gaá je ɔ́ yíífi ŋ́ ɔ́dāŋ ka n lɛ ācɛ ofuciigwó má abɔ́ɔ.” 31Ébrahām kahíníī, “Kócōō, ā cɔ̄nū ohígbū ɔtū nɛ̄ n lɛ yɔ̄ ī kɛlā gā uwɔ kpɔ́ ā ŋ́. Ɔ́dāŋ ka a lɛ ācɛ ofu má abɔ́ɔ bɛ́ɛ?” Anɔ́ɔ ó tá Ébrahām ohi kahíníī, “Ohígbū ācɛ ofu ā, n gaá je ɔ́ yíífi ŋ́.”
32Ébrahām klla kahíníī, “Kócōō, ā cɔ̄nū ŋ́, Óndú, ká n̄ klla lɛ ɛlā ámōōmɛ ka. Ɔ́dāŋ ka ācɛ igwó nɛ̄ a má abɔ́ɔ á bɛ́ɛ?” Anɔ́ɔ ó tá ɔ̄ ohi kahíníī, “Ohígbū ācɛ igwó ā, n gaá je abɔ́ɔ yíífi ŋ́.”
33Óndu ā nyɛ̄ɛ̄ eko nōó le ɛlā kámla Ébrahām kwɛyí ā. Anɔ́ɔ Ébrahām kwúcē ga ɔlɛ́ á.
Currently Selected:
OHÚTU 18: IFBCL
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
