SUAHTULNAK 12
12
Kaltan Puai
1Izipt ngamsung pen Topa in Moses le Aaron lakah,#Thiam 23:5; Mipum 9:1-5; 28:16; Daan 16:1-2; 2“Tu ha hi nangmu ca in kum khat sung a, ha masabel hi.” 3Israel mipi tei lakah: Tu ha a ni sawmnakin pano hempoh ten amu innkua ca in, innkua pa khat pen tuu dawnno pa khat ahimata keel dawnno pa khat ten teng haw hen hi. 4Innkua pa khatin, a ngan ngawhmi a ei khawng thei ol ma tale, a mihing umzah zo in, a innnel tuah ngan pa khat kawmdun haw hen. Mihing izong um haw tih le izah ten ei thei haw tuk him tih zo in, a man vang suah haw hen. 5A ngan cu sonbang ngawl a cang kum khat kim hi tuk hi. Tuu ahimata keel teng haw hen. 6Mah ha, ni sawm le ni li tian koih haw tuk a, ni sawm le ni li ni taklam ten Israel mi venghawngin ngan cu ngo haw hen hi. 7Mipi ten a thi khenkhat cu la in mah cik a eihnak haw tuk inn kongka khuam pa nihah le a humah noih haw hen hi. 8Zanlam ten mah sa cu mei ah emin, naman hel ngawl cangho le an kha tuah ei haw hen hi. 9A sialin ei pahsuh un hi. A huan hei in ei pahsuh un hi. A pumin, a lu, a ke le a sungngil tuah em unna, ei tuk uh ci. 10A cik dawmno hei zinglam tian khambang umtik pahsuh un. Na khambang uh a um kha tale mei ah halkang un hi. 11Na eih dan tuk uh cu hi bangin hituk hi: Na puan uh cu na tai uhah ken un; na kedam uh bun unna, na thiangkhut uh cawi thahin, manlangzet ei un hi. Hihi Topa i kaltan puai hi.
12Mah zanin, “Izipt ngam buppiah hawh tung a, mihing hihen, ngan hihen, a catawntil haw cu that khawng tung. Keimah cu Topa ing hi, Izipt ngamsung a, pathian hempoh tei humah thukhen tung hi. 13Kongka a, thisan noihmi cu na umnak uh inn hi tih sialsiahnak hi tuk hi. Thisan ka muh ten kaltan tung. Izipt ngam ka bawlsiat ten nohte cu siatsuahnak tawk tukma uh ci. 14Mahmi cu noh tei ca in, na cin leleng tuk uhmi ni hi tuk a, Topa i lakah biaknak puai tin bawl leleng un hi. Khang khat nung khang khat, catngawlin puai ni hi, tin bawl leleng un,” ti hi.
Naman Hel Ngawl Cangho Puai
15 Topa in, “Ni salih sung naman hel ngawl cangho ei un. Ni khat ni-in, na inn uh pen naman hempoh vawk khawng un, itahim titale mi pa kha khatin ni khat ni pen ni salih ni tian naman hel mi cangho a ei tale Israel miphun sung pen suah un hi. 16Ni khat ni le ni salih ni-in, biakpiaknak bawl un hi. Hi ni nih sungin imah dek ngawlin mipi ca in an bek huan un hi. 17Hi naman hel ngawl puai hi komno in cang un, itahim titale hi ni-in Izipt ngam pen puitul ing. Khang khat nung khang khat hi ni cu puai ni-in mang leleng un hi. 18Ha masabel i ni sawm le ni li ni taklam pen ni sawm nih le ni khat ni taklam tian naman hel ngawl cangho ei un hi. 19Ni salih sung cu na innsung hempoh uhah naman koih pahsuh un; itahim titale mi pa kha khat ngamdangmi hihen, na phunpih uh hihen, naman hel mi a ei ahi tale Israel miphun sung pen hawlvawk hi tuk hi. 20Naman hel mi ei hihim pahsuh un hi. Na innsung hempoh uhah naman helngawl cangho bek ei un, tin thuthanin hi,” ti hi.
Amasabel Kaltan Puai
21Moses in Israel puitu upa samin, a lak hawah, “Hawh unna, na innkua uh ca in tuu dawnno ahimata keel dawnno tengin, kaltan puai bawlnak tukin ngo un. 22Hyssop#12:22 Hyssop tihmi hi pi nih le a lang bang a sangmi thingkung neuno kiak tia hi in, a kangkak cu velkualin, Kaltan Puai ah thiantiknakin aman haw mi hi. Saam 69:21; hi, a kak lekah a pak ngo, a bawk um hi. thingkak pa khat la unna, kuang sung um thisan sungah nimin, kongka khuam pa nih le kongka humlam zawlah noih un. A zing khuavak laklawh kuamah in, na inn uh pen tul pahsuh un. 23Izipt mite that tukin Izipt ngam sungah Topa a hawh ten na kongka khuam pa nih le a humlam zawl a, thisan noihmi mu tuk a, Mi thattu Vancungmi cu na innsung uhah tumtik tukma hi.” 24Mah hum pen hi daan cu nangmuh le na casuan tei ca in kumkhua phat thupiakmi hi zui hihim un. 25Topa i tepsa bangin a piak tukmi ngamah na hen uhten hi daan hi zui un hi. 26Na cano uhten, “Hitih bang a bawl uh hi itakaw? tin a dong haw tale, 27noh ten, ‘Topa i lak a, bawlmi kaltan biakpiaknak hi; itahim titale Izipt mite a thah ten Israel tei inn kaltanin khawih hi,’ ti un,” ti hi.
Israel mite cu a khuk haw dinin bia haw hi. 28Israel mite cu hawhin mah thu cu zui haw hi. Moses le Aaron lakah Topa i thupiakmi bangin Israel miten bawl khawng haw hi.
Catawntil Thihnak
29Zanngil laih takin Topa in Izipt ngamsung a, catawntil hempoh, kumpi i capa tawntil, kumpi lo le lam luahtu tuk pepanin leinuai thawnginn a, thawngta mi i capa tawntil tian that khawng hi; ngamsa hempoh tei catawntil vang thi khawng limlem haw hi. 30Mah zanin kumpi pa, a khutnuai bawi le Izipt mite cu tho to haw hi. Kah le taunak tuah Izipt ngam dim hi; itahim titale capa thih ngawlnak inn pa khat hei umma hi. 31Mah zan lelengin, kumpi in, Moses le Aaron manlang zetin samin, “Tul toh un hi! Nangmuh le Israel mite manlang zetin tai un. Ka mihingte cu zam unna, hawh un. Na nget uh bangin Topa cu bia un hi. 32Na tuu, na keel le na khui cu na nget uh bangin pui unna, hawh un. Keima ca hei in muicu ngetsak un,” ti hi.
33Izipt mipi vangin manlang zetin, a ngamsung haw pen tul nawnawmtik haw hi; itahim titale, “A hawh haw ma tale thi khawng ngangai tuk hung,” ti haw hi. 34Mah hangin Israel miten naman hel ngawl sangvut la in, a cangho bawlnak beel sungah puan tuah tuamin, a ko humah pua haw hi. 35Israel miten Moses i thucahmi bangin Izipt mitei na manpha sui, ngun le puan cu ngen haw hi. 36Topa in, Israel mite cu Izipt tei kihcazet tukin a bawl hangin a ngetmi hempoh ngah haw hi. Mahti lengin Israel miten Izipt mitei na manpha laksak khawng haw hi.
Izipt Ngam Pen Israel Mite Tul
37Israel mite cu Rameses pen tulin Sukkoth lamah numei le naupang sial ngawl, pano tunting tiptep thawng za luk keciahin hawh haw hi. 38Minam dang tampi, tuu, keel le khui tampi cu amu lakah hawh bok haw hi. 39Izipt ngam pen a ken haw mi sangvut tuah naman hel ngawl cangho bawl haw hi. Naman hel ngawl cangho a bawlnak haw cu muanmawh khak ngawlin Izipt ngam pen hawlvawkmi a hih haw ten, amu ca tukin an huan mannak hun hei nei haw ma hi.
40Israel mite cu Izipt ngamah kum za li le sawm thum um haw hi. 41Kum za li le sawm thum a kim ni-in, Topa i mi honpi cu Izipt ngam pen tul haw hi. 42Hih zan cu Izipt ngamsung pen tul tukin Topa i cinkhawi zan hi. Mah zan cu Israel mite Topa i cinkhawi zan hi tin, akhang zui in, a can leleng haw tukin Topa i lakah pia haw hi.
Kaltan Puai Zui Tuk Daan
43 Topa in Moses le Aaron lakah, “Kaltan puai ten zui tuk daan cu hi bangin hituk hi; ngamdangmi ten Kaltan Puai an ei haw pahsuh hen. 44Mahnaven na lei uhmi sal cu vuncep na tan nung bek uhten ei thei haw tuk hi. 45Hun demno sung ummi le na zawncop uhmi kuli ten ei haw ma hen. 46An hempoh cu inn pa khat sung pen ei unna, a pualamah imah tulpih pahsuh un. Na ngawh uhmi ngan cu a nguh ektuah pahsuh un. 47Israel mi venghawngin puai cu bawl loli un hi. 48Ngamdangmi na lak uhah umin Kaltan puai cu Topa upatnakin, a bawl nuam haw tale, masabelin pano hempoh a vuncep haw tan khawng un hi; mahnung bek ten puaiah tel thei haw tuk hi; nangmu sungsuak Israel mi bangin bawl hi haw tuk hi. Mahnaven vuncep a tan ngawlmi pa in ei ma hen hi. 49Hih daan ten Israel hin le nangmu lak a, ummi ngamdang mite vang huapcih hi,” ti hi. 50Israel mi hempoh ten zui in, Topa in Moses le Aaron lak a, thu a piakmi bangin bawl haw hi. 51Mah ni-in Izipt ngam pen Israel mite cu Topa in, a honpi in tultik hi.
Currently Selected:
SUAHTULNAK 12: NBF1
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Ngawm Bible © Bible Society of Myanmar, 2014.
