Jénesii̱s 50
50
1Kósꞌe̱ Kosiee̱ askjandá kó janíkjá yojoo̱ na̱ꞌmii̱, kó katsjaá ngo ndsó xtjien. 2Ngui̱chí sájín Kosiee̱ katsanguiya chji̱ni̱e̱ndiki xi mosoo̱, kui xi tsꞌendíkii̱ xotaa̱ tsi̱ꞌe̱ nga tsájín fotson yojoo̱, kó kiniꞌándikii̱ yojoo̱ na̱ꞌmii̱. 3Kó yichán ni̱xtjin tsꞌandíyaá nga kiniꞌándikii̱ yojoo̱ Jakoo̱b, ngatꞌa̱ bo̱a̱kjíꞌí ni̱xtjin ꞌbondíyaá nga niꞌándikii̱ yojoo̱ ngo xota̱ xi je kꞌien, kó xota̱ Ejiptoo̱ ichítié ko̱jo kan ni̱xtjin askjandátjé Jakoo̱b.
4Nguije jaꞌa ni̱xtjin xa̱ꞌya̱a̱, Kosiee̱ bi̱ katsoó xota̱ xi síndo ndiꞌaa̱ nda̱ ree̱ nangui Ejipto̱:
—Tsi ka̱ma ngo kjo̱a̱nda kuíꞌájnúꞌun, bo̱a̱ tꞌínchiíjnúu̱ nda̱ ree̱, 5nga na̱ꞌmina nguije mejeén ma kꞌien, nga nguiboanéná tꞌín ji katsóna, nga ki̱a̱ konijín an kui nga̱tsjo xí je íjñanda kui, kui xi tikón nangui Kanaa̱n. Kó kuíni nga ꞌniú míꞌáa̱ nda̱ ree̱ nga tsja̱ndiéna nga kjuinkánijín an na̱ꞌmina, kó nguije kamá, kji̱ndi̱boá nguiñá an kꞌi̱e̱e̱.
6Kó nda̱ ree̱ bi̱ tsó én xí katsanguiyaa̱:
—Tꞌen ji, kó tjanijín ji na̱ꞌmíi̱, xikótsꞌen tsíꞌaá kui.
7-9Kósꞌe̱ Kosiee̱ kijíkanijín na̱ꞌmii̱, kó kijíjo̱ ngayeje já ntsꞌi̱e̱ ko̱jo xota̱ ndiꞌaa̱, ko̱jo ngayeje mosoo̱ nda̱ ree̱, kui xota̱ xi nkꞌa xaá ki̱a̱ ngu̱i̱ndie nínga botixómá nda̱ ree̱ ko̱jo ki̱a̱ na̱xi̱ńdaá. Ti̱ kijíjo̱ Kosiee̱ xota̱ xi ndyi̱a̱ karro̱ ko̱jo xi síndosoón ndi̱je̱ nga. Kó ki̱a̱ nangui Ngosee̱n ta̱ jákjíndií ko̱jo cho̱tsa̱nga̱a̱ ko̱jo cho̱yojoo̱ tsí xi kisꞌińdo.
10Kó nga jachó ki̱a̱ kꞌijñá xi ꞌmí Ataa̱d xi tikón tiñaa̱ ndejé Jordaa̱n, Kosiee̱ ngui yito ni̱xtjin kisꞌijñaxa̱ꞌya̱ kjo̱a̱a̱ nga kꞌien na̱ꞌmii̱, kó ngayeje xota̱ xi jachó ki̱a̱a̱ achichí askjandá. 11Kó kjiꞌa nga xota̱ Kanaa̱n kamábe nga xota̱ Ejiptoo̱ achichí askjandá, bi̱ katsó: «Ta̱nisién ꞌniú ra ndikón xota̱ xi kꞌiee̱n xota̱ Ejiptoo̱». Kuíni nga kꞌijñá Ataa̱d «Kꞌijñaá ndándyi̱ko̱n xota̱ Ejiptoo̱» ítꞌa jaꞌén kuí ngu̱i̱ndiee̱.
12-13Kó jaá Jakoo̱b kijíjo̱ yojoo̱ na̱ꞌmii̱ ki̱a̱ nangui Kanaa̱n, kó ki̱a̱ ínijín ti̱xa̱ na̱xi̱ xi tikón kꞌijñá Makpelaa̱, kui xi tsꞌatsiee̱ Abraa̱n nda̱ xi xota̱ tji̱e̱e̱ Ee̱t xi ꞌmí Efroo̱n, tsi̱ꞌe̱ nga ki̱a̱ kjónijín xkjín. Kui ti̱xa̱ na̱xi̱i̱ ki̱a̱ tikón tꞌa kꞌijñá Mamree̱. Kó bo̱a̱ tsꞌén jatjosón ni xi tsíꞌá na̱ꞌmii̱ nguindiee̱ nga ko̱ya.
14Nguije akjanijín Jakoo̱b, Kosiee̱ ko̱jo já ntsꞌi̱e̱ ko̱jo xota̱ xi nijan kijíkanijínjo̱ na̱ꞌmii̱, kijí nguiní nangui Ejipto̱.
Bi̱ tsꞌén Kosiee̱ yíxioó já ntsꞌi̱e̱
15Kó já ntsꞌi̱e̱ Kosiee̱ nguije jaꞌa nga kꞌien na̱ꞌmii̱, bi̱ tsꞌén katsꞌénkjó: «Mí xí si̱ꞌán tsi Kosiee̱ ta̱kó tjitsꞌénxchánjo̱ná kó tsi ka̱mamejeén sa̱ꞌíngojo̱ kjo̱a̱a̱ ni xi kiniꞌánjo̱.»
16-17Kósꞌe̱ bi̱ tsó én xí katsanguiyaa̱ Kosiee̱: «Ji Kosie̱, nguindiee̱ nga ko̱ya na̱ꞌminá, bi̱ tsó én xí íjñá, nga chjién xó nga si̱ꞌinjetakínjne̱ kjo̱a̱a̱ ni xi ndajínkjiꞌi xi kiniꞌánjo̱jne̱ ji. Kjénní nga ta̱nisién ndajínkjiꞌi ni xi kiniꞌánjo̱jne̱ ji, ta̱nga ꞌniú chjiáꞌájne̱ ji nga si̱ꞌinjetakínjne̱».
Nga tsintꞌié kuí eén Kosiee̱ achichí askjandá. 18Kósꞌe̱ já ntsꞌi̱e̱ Kosiee̱ kijíkoón, kó nga kamábe Kosiee̱ asién tikoó ngaskande nga kisitꞌaa̱ kje̱n tꞌananguii̱ nga kamábendikón, kó bi̱ katsó:
—Kꞌi̱e̱ tindyionjne̱, kó moso̱ tse̱ boá ji̱n.
19-21Ta̱nga Kosiee̱ yíxioó ntsꞌi̱e̱, kó ngayeje ini̱ma̱a̱ nga bi̱ katsoó:
—Ngata̱ ndakonjín májnú, ngatꞌa̱ jmí tsi ngajoo̱ Néná tikòn an. Jún ngo ni xi ndajínkjiꞌi kamámejénjnú kiniꞌánjo̱jnúꞌun, ta̱nga Néná ni xi nda katsꞌén kui nii̱, jún jè kamáyájnú ni xi je kamaá: Néná achichí má xota̱ xi katsꞌénkjiesónjín. Kó kuíni nga ngotꞌe̱ ꞌne̱, ngata̱ ndakonjín májnú, an skónjnúꞌun jún ko̱jo ndíjnú.
Bi̱ tsꞌén kꞌien Kosiee̱
22Kó Kosiee̱ ki̱a̱ kisꞌijña nangui Ejipto̱ ko̱jo xota̱ tji̱e̱e̱ na̱ꞌmii̱. Kó jachó xi úchán ko̱jo tie noó, 23kó kamábe ngase ngaskande xi ma ján tji̱e̱e̱ ndíndee Efraii̱n. Kó ti̱ kamábe ngase ndií Makii̱r kui xi ndií Manasee̱, kó ti̱ kui Kosiee̱ katsꞌénxchá kuí ndií nga.
24-25Jaskan nguije jaꞌa ni̱xtjin, Kosiee̱ bi̱ katsoó já ntsꞌi̱e̱:
«Jè ta̱ chiboa tsí ni̱xtjin chajaa̱ nga ko̱ya an. Ta̱nga nga sꞌijinjnú nga Néná boá xi kji̱ndi̱boá kasikójojnú, kó kuí boá xi ko̱e̱je̱jo nguiníjnú nínga tikón kui tꞌanangui xi katsóyatjón nga tsja̱á Abraa̱n, Isaa̱ ko̱jo Jakoo̱b. Kó jún chjiéngá nguiboanéná tꞌínjnú nga kjiꞌa nga kjo̱chó ni̱xtjin konguínjo̱jnú ńdana kꞌi̱e̱e̱ nguije ko̱ya an».
26Kó úchán ko̱jo tie noó Kosiee̱ nga kꞌien, kó kiniꞌándikii̱ yojoo̱ tsi̱ꞌe̱ nga tsájín jatson, kósꞌe̱ akjaya koxa̱ ki̱a̱ nangui Ejipto̱.
Currently Selected:
Jénesii̱s 50: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014