Éksondo̱ 1
1
Nga kamá moso̱ xota̱ Israee̱l
Xota̱ Ejiptoo̱ bi̱ tsꞌén katsꞌén moso̱ xota̱ Israee̱l
1-5Kjiꞌa nga jachó Jakoo̱b na̱xi̱ńdá Ejipto̱, jachójo̱ ngayeje kui ndií xi̱ꞌbi̱: Rubee̱n, Simeoo̱n, Lebii̱, Judáa̱, Isakaa̱r, Sabuloo̱n, Benjaa̱, Ndaa̱n, Neftalii̱, Ngaa̱d ko̱jo Asee̱r. Ngayejee̱ nga jachójo̱ xota̱ ndiꞌaa̱, kó ichítié ko̱jo kan kamá ngayejee̱. Kosiee̱ ja̱ bo̱a̱ jè ki̱a̱ tikón nangui Ejipto̱. 6Jaskan nguije jaꞌa ni̱xtjin kꞌien Jakoo̱b, ko̱jo Kosiee̱, ko̱jo ngayeje xota̱ xi nijan jachójo̱ nangui Ejipto̱. 7Ta̱nga nga achichí kamá ndí xí kisꞌiee̱ xota̱ Israee̱l, tsá kamákjín xota̱ tji̱e̱e̱, kó ngo na̱xi̱ńdá xi je ko̱jo xi ꞌniú kamá. ¡Kuíni nga ngayeje nangui Ejipto̱ nga kisꞌieni xota̱ Israee̱l!
8Jaskan nguije jaꞌa kjín nó, atíxoma ngo nda̱ re tja̱tsi̱e̱ xi kamábejín ngayeje ni nda xi katsꞌén Kosiee̱ nga asíko̱jo nangui Ejipto̱, 9kó bi̱ katsoó xota̱ na̱xi̱ńdaá:
«Tsitsíjenjnúu̱ nga xota̱ Israee̱l jè ꞌniú ngase je kamá ko̱jo jè kjín ngase ma ta̱ bo̱a̱jínnii̱ ñá, 10kuíni nga chjiéngá nda nda má tsꞌén si̱ꞌankjó ni xi si̱ꞌanjo̱, tsi̱ꞌe̱ nga nguiti̱ ka̱makjínjín ngase, ngatꞌa̱ tsi ngo kjo̱a̱xchán kji̱ndi̱bá, kó tsi ki̱a̱ nijan ka̱majo̱ kondra̱ná, skjánjo̱ná kuí xotaa̱, kósꞌe̱ jaskan kjo̱tjo kui na̱xi̱ńdaá nguijee̱».
11Kó kuíni nga xota̱ Ejiptoo̱ xota̱ nguito̱ko̱ índotjoón xota̱ Israee̱l, xi ínieé xá ꞌniú. Kó xota̱ Israee̱l kiniꞌaán kjo̱a̱ꞌniú nga katsꞌénda na̱xi̱ńdá ꞌniú xi ꞌmí Pitoo̱n ko̱jo Ramsee̱, kó ki̱a̱ boá nínga indyiá nda̱ ree̱ nangui Ejipto̱ ngayeje ni chinie xi jaꞌátjó. 12Ta̱nga tji̱e̱nga xota̱ Ejiptoo̱ ꞌniú ndajín ngase katsꞌénjo̱ xota̱ Israee̱l, ta̱sá má ꞌniú kamákjín ngase kui xotaa̱.
Xota̱ Ejiptoo̱ achichí katsakjónnií xota̱ Israee̱l nga, 13-14ngaskande ꞌniú ndajín ngase katsꞌénjo̱, kó xá xí ꞌniú ínieé nga katsꞌén. Ngaskande ndáse katsꞌenkꞌájin xi katsꞌén ńdie kachján, kó ti̱ katsꞌénxájin kꞌijñaá nga.
Nda̱ ree̱ nangui Ejipto̱ bi̱ tsꞌén katsjákjo̱a̱ nga kiniꞌánkꞌién jákjíndí xi̱xi̱i̱
15Kó ki̱a̱ Ejipto̱ kisꞌińdo jó ínchjín Ebreo̱ xi ꞌboje̱n ndií ínchjín Israee̱l, ngo xi na̱ Sifraa̱ kiꞌmí, kó ngo xi na̱ Púaa̱ kiꞌmí. Kó nda̱ ree̱ nangui Ejipto̱ tsíchji̱a̱a̱ kui ínchjiín, kó bi̱ katsoó:
16—Kjiꞌa nga ko̱ꞌna̱je̱njnú ndií ínchjín ebreoo̱, tsitsíjenjnúu̱ tsi xi̱ꞌin ko̱jo tsi chjo̱on, tsi chjo̱on ngata̱ jmí ni niꞌánjo̱jínjnú, ta̱nga tsi xi̱ꞌin, ¡ti̱ꞌankꞌiénjnú!
17Ta̱nga na̱ Sifraa̱ ko̱jo na̱ Púaa̱ achichí kamábendikón Néná, kó kuíni nga katsꞌénkjatjosónjiín ni xi katsó nda̱ ree̱ nangui Ejiptoo̱ nga sa̱ꞌín. 18Kósꞌe̱ nda̱ ree̱ tsíchji̱a̱a̱ ínchjín xí ꞌboje̱n ndií, kó bi̱ katsoó:
—Ánní nga bo̱a̱ kiniꞌánjnú. Ánní kiniꞌánkꞌiénjínjnú já kjindí xí xi̱ꞌii̱n.
19Kó kui ínchjiín bi̱ katsó:
—Ngatꞌa̱ ínchjín ebreoo̱ bo̱a̱jín kón xi kókón ínchjín Ejiptoo̱. Tasá nda ko̱jo tjíngaꞌniuú kui ínchjiín, kó beꞌé soboá ndií, kó nde nguiti̱ ma chjiénjín nga ji̱n ko̱siko̱jojne̱.
20-21Kó nga na̱ Sifraa̱ ko̱jo na̱ Púaa̱ kamábendikón Néná, Néná achichí nda katsꞌénjo̱, kó katsjandieé nga kjín ndí kisꞌiee̱ kui ínchjiín. Kó tji̱e̱nga nga ꞌniú kamákjín ngase xota̱ Israee̱l, 22nda̱ ree̱ nangui Ejipto̱, bi̱ katsoó nga atíxomaa̱ ngayeje xota̱ na̱xi̱ńdaá: «¡Ngayeje ndí xí xi̱ꞌin xi stse̱én ínchjín Israee̱l, ngu̱i̱jin ndójoaa̱ tjajmijinjnú, kó ki̱a̱ ngatjisón ngándá, ta̱nga ndí xí ínchjiín, ngata̱ jmí ni niꞌánjo̱jínjnú!»
Currently Selected:
Éksondo̱ 1: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014